Pristut ac Pruhe Sifacna
Sel Prestuhn Henry B. Eyring
Mwet in Kahsruh Se Met ke Prestuhnsi Se Met
God can grant us power in the priesthood for whatever circumstance we may be in. It simply requires that we ask in humility.
Nga tarilacna ke luhlahlfongi ituckyang nuh sihk nga in sramsram nuh sin mwet sruok pristut luhn God fin facluh nohfohn. Nga puhlakihn ma toasr ke pacl wowo sacn ke srihpacn nga etuh kuhtuh ke luhlahlfongi ma Leum el fihliyac in kowos. Ke insese lowos ke pristut, kowos eis ma suwohs in sramsram ac orekma ke inen God.
Ma suwohs ingen tuh fah ahkpwacyeiyuck muhkwena ke kowos eis mokleyuck sin God. Ohiyac ingen muhkwena fah oruh kowos in kuh in sramsram ke Inel. Ac ohiyac ingen muhkwena fah oruh kowos in kuh in orekma ke Inel. Sahp kowos tahfonglac nuhnkuh, “We, tiacna upac ma sacn. Nga kuh in eis mokleyuck fin siyuck sihk nga in oraclah sie sramsram kuh fin enenweyuck sihk nga in oraclah sie mwe insewowo luhn pristut.” Kuh sahp deacon kuh teacher fuhsr kwacna puhla wo ke nuhnak se ingen, “Ke nga mahtuhlah kuh ke nga misineri lac, na pa ngacn pacl se ngwac etuh lah meac God El tuh fah fahk ac lah meac God El tuh fah oruh.”
Nuhnkuh ke lwen se ma kowos enenuh in etuh lah meac God El tuh fah fahk ac meac El tuh fah oruh. Tuhkuh tari nuh sesr kwewa—finne fuhkah pahng se lom ke pristut. Nga mahtuhlah ke acn ma suhpuhs mempucr ke pacl luhn Mweun Ahkluo luhn Facluh. Mempucr elos muhta loeslac liki sie sin sie, ac pakpucki koanon gas mwet se kuh in moli. Nga deacon muhkwefanna ke pracns uh. Mempucr elos sang envelope ke mwe sang ke lalo lalos nuh sin pracns prestuhn ke elos tuhkuh nuh lohm sesr ke toeni ke lalo ac fahkwack luhlahlfongi.
Ke nga matwac yac [singucul tolu] 13, kuht som muhta Utah in muhta ke sie ward luhlahp. Nga esam kunohkohn se met luhk ah in fahsr nuh lohm ac sruhkwack mwe sang ke lalo. Nga ngwetlah nuh ine se sihmlac fin envelope ah ac akihlen ine se oacna sie ke inen sie luhn Mwet Loh Tolu ke Puk luhn Mormon. Nga tongtong ke sruhngucl ah ke puhlaik. Mukul se ikacslah sruhngucl ah, ngwetma, fohlohyak muhtahl, ac na lihksreni fahk nga in kahinglac. Nga kahinglac suhfallac.
Ma ingen sikyak apkuhran yac [itngucul] somlah, tuh nga srwackna esam puhla luhk ah ke lwen se ngacn ke sruhnguhl ah muh oasr ma se enenweyuck tuh nga in fahk ac oruh. Sacohk nga fin tuh pruhe ke luhlahlfongi ke nga fahsrot lwen se ngacn, sahp nga tuh mokleyuck ah in tu kuhtuh pac pacl ke sruhngucl se ngacn, isrwacsr, ac fahk sie ma oacna: “Kuloh ke ohsun uh. Kuloh ke ma kom ac sucu lom sang ke pacl somlah.”
Nga fin tuh fahk ac oruh oacna, sahp ac mwe kihructruct se yohk liki nuh sel—ac finne el ac puhla koluk sihk. Tuh nga etuh ac fuhkah puhla luhk ah. Sahyacn na ahsorlac ke nga fahsr liki, sahp nga tuh kwacna puhla kaksak muhlahlah ke insiuck ac nuhnak: “Wona orekma lom.”
Kuht nohfohn enenuh sramsram ac orekma ke inen God ke pacl ma nuhnak lasr sifacna uh tiacna fal kac sahyacn oasr mokleyuck. Pacl ingacn kuh in sikyak nuh sesr ke wacngihn pacl lasr in ahkolah nuh kac. Sikyak nuh sihk ma ngacn pacl puhkantwen. Sikyak yac puhs somlah e ke lohm ono se ke pahpah se el fahk muh doctor ah elos fahk nuh sel muh tuhlihk muhtwacn matwac yac tolu nahtuhl suc kihnetuh na upac ac fah misac minit ekahsr pacl na sa. Ke nga fihliyac pouk fin acn sefanna mwesahslah ke sifacl, enenuh se nga in etuh, ke mwet kuhlwacnsap luhn God, lah meac El tuh fah oruh ac fahk.
Kahs uh tuhkuh nuh in nuhnak luhk ah ac ngoasrok muh el ac moul. Doctor ah suc tu siskuhk ah isrucnyuc ac siyuck nga in kahinglac liki. Nga tifoki infuckihl lohm ono se ngacn ke puhla se ke mihs ac luhngse. Tuhlihk muhtwacn sac el moul ac el fahsr nuh in toeni ke sackracmacn se ke lwen sahflah se luhk fin mura se ngacn. Nga srackpacna esam engan ac puhla wo luhk ke ma nga tuh orwaclah ac fahk ah ke kuhlwacnsap luhn Leum nuh sin tuhlihk muhtwacn se ngacn ac sucu lal ah.
Ma siena ke puhla luhk ah ke lohm ono ah ac ahsor luhk ke nga fahlac liki sruhngucl sacn ke nga deacon se tuhkuh ke ma nga lotwelah ke kuhpahsr luhn pruhe ac kuh luhn pristut. Ke nga deacon se ah, nga soenna lotwelah muh kuh se in sramsram ac orekma ke inen God uh enenuh fwackyuck, ac in oasr fwackyuck yohrohsr ke pacl enenweyuck uh enenuh kuht in pruhe ac orekma ke luhlahlfongi kuht in eis kahsruh luhn Nguhn Muhtahl.
Ke ekuh se met liki nga som nuh sruhngucl sacn ke mwe sang ke lalo, nga fahk pruhe luhk ah ke pacl in mutul. Tuh ke wik ac mahlwem puhs met liki pahng se sin lohm ono ah, nga tuh ukwe sie pactuhn ke pruhe ac orwaclah orekma muh Prestuhn Joseph F. Smith el luti fah lwelah God El in acse nuh sesr mokleyuck enenweyuck in oasr kuh ke pristut lasr. El fahk arlac fihsrwacsr:
“Kuht tiac enenuh in pruhe nuh Sel ke kahs puhkantwen. Kuht tiac enenuh El in ullac ke pruhe loeloes lasr. Ma kuht enenuh, ac ma kuht enenuh in oruh oacna ke Mwet Luhlahlfongi ke Lwen-sahflah, ke ma wo nuh sesr, pa in kwacna pruhe ye Muhtahl, in ahkkahlwemye nuh Sel tuh kuht Esamuhl ac tuh kuht insese in eis nuh facsr Inel, liyacacng masap Lal, orekma suwohs.”1
Na el fahk nuh sesr ma kuht enenuh in pruhe kac, in oacna mwet kuhlwacnsap lal suc olwelah in sramsram ac orekma ke God. El fahk: “Meac kowos ac pruhe kac uh? Kowos ac pruhe tuh God El in kuh in akihlen suc kowos uh, tuh El in kuh in lohng pruhe lowos an.”2
Tiac yohk srihpac kahs fuhkah in orekmakihn, tuh fah enenweyuck muhtweng. Pa ohiyac se kowos tuhkuh nuh sin Pahpah Lucng ke srihpac se in akihlenyuck Sel sifacna. El God fuhlwact liki nuh kwewa, Pahpah tuhmuhn mwet nuh kwewa, ac tuh El kena acse nuhnak Lal nohfohn nuh sin sie sin tuhlihk Nahtuhl. Sahp ac pa oruh Mwet Lahngo El orekmakihn kahs inge “Papa: Lela Ine mutal lom in akfulatyeyuk.”3
Ac fihsrwacsr kuhtuh in eis puhla ke ma muhtahl ke kowos sikuck muhtuhnte kuh epahsrlah, tuh kowos kuh pac in puhla muh kowos tuhkuh nuh sin Pahpah Lucng ke ohiyac sahyac finne ke pruhe ke insiyac, oacna kwacna enenweyuck kowos in oruh. Ac fah oasr wohwohn ac mwet raunikowoslac inkaiyen lwen lowos an. God El lohng pruhe ke insiyac, tuh sahp kowos ac enenuh lotwelah ohiyac fuhkah se in likiyac na ma fohs mweyen pacl se kowos enenuh kahsruh luhn God sahp ac fah tiac tuhkuh ke pacl mihs.
Prestuhn Smith el kaifwe tuh kowos ac enenuh in pruhe tuh God El in akihlen pahng lowos an in kuhlwacnsuhpwacl. El etuh tari fohnlah ke pahng lowos an. El pahngon kowos, ac ke kowos pruhe nuh Sel ke pahng lowos an, El fah ahkkahlwemye kuhtuh pac ma kowos in etwaclah.4
Ngac fah usot nuh suwos sie srihkasrak ke ma sie mwet luti luhn sucu el kuh in oruh ke el pruhe. Sahp kowos etuh tari muh kowos enenuh:
Muhtwacta ke kais sie lohm sin mempucr, ac kaifwelos in pruhe lihksreni puhsra ac oacyacpac in acn lukmac ac in karihngihn ma kunac nohfohn ke sucu uh. …
“...Liyacacng Alu uh pacl nuh kwewa ac weluhlos ac ahkkweyaclos;
“Liye tuh in wacngihn ma koluk ke Alu uh, wacngihn mwet ahngyahng sie sin sie, wacngihn kikiacp, tohrkahskahs, kuh sramsram koluk;
“Oruh in pwacye tuh Alu uh kwacna tuhkweni ohsun, ac oacyacpac tuh mempucr nuh kwewa elos oruh ma kunaclos.”5
Inge, finne nuh sin sie mwet pah ke forfor luti luhn sucu ac mwet fuhsr wiyacl, elos etuh lah ma ingen pwacyena tiac kuh in sikyak sahyacn oasr kahsruh sin Nguhn Muhtahl. Nuhnkuh ke sucu kuh finne mwet muhkwena suc kowos pahngonwack in kuhlwacnsuhpuh. Nuhnuhnkuh luhn mwet uh ac kena in oruh ma wo uh tiacna falyang nuh kac.
Oruh kowos ac pruhe ke ohiyac se in etuh ke insiyaclos, in etuh ke ma tiacna suwohs ke moul ac insiyac luhn mwet suc kowos tiac arlac etuh. Kowos ac enenuh etuh lah meac God El tuh ke kowos in oruh in kahsrwelos ac in oruh nohfohn ke kuhiyowos, ke puhla luhngse luhn God kaclos.
Pa ke srihpacn oasr pahng pristut yohk srihpac ac upac lowos an oruh Prestuhn Smith el kaifwe tuh ke kowos pruhe, kowos ngihsre pacl nuh kwewa tuh God El in ahkinsewowoye kowos ke Nguhn Lal. Kowos ac enenuh Nguhn Muhtahl tiac pacl sefanna tuh ke lusen pacl ma God El ac usot nuh suwos oacna in mwet wiom ke pacl nuh kwewa. Pa oruh kuht enenuh in pruhe pacl nuh kwewa tuh God El in kolkuht ke kuhlwacnsap lasr nuh sin tuhlihk Nahtuhl.
Ke srihpacn kuht tiac kuh in ohsun fohnlah luhn kuhiyacsr ke pristut sahyacn Nguhn El in wi kuht, kowos target sifacna luhn el suc mwet lokoalok ke mwe engan nuh kwewa. El fin kuh in srihfe kowos in orek ma koluk, el kuh in ahkmuhnahsye kuhiyowos in kolyuck sin Nguhn ma ac fah ahkmuhnahsye kuhiyowos ke pristut. Pa oruh Prestuhn Smith el fahk muh kowos enenuh in pruhe tuh God El in sensenkackihn nuh sum ac karihngihn kom liki ma koluk.6
El sensenkackihn nuh sesr ke ohiyac puhkantwen. Mwe sensen pa ip ke plwacn in molwelah. Mwet pahluh, mwet sap, prestuhn ke stek, pisap, ac misineri elos kwewa fahkwack ke puhsra sensenkackihnyuck in kahing liki ma koluk ke luhlahlfongi ke Jisus Kraist, auliyak, ac orwaclah ac karihngihn wuhlweacng muhtahl.
Ke kowos mwet sruok pristut kowos enenuh in ip ke puhsra sensenkackihnyuck luhn Leum. Tuh kowos enenuh in sifacna lohacng nuh ke mwe sensen se. Kowos ac tiac kalweni moul ke ma luhn nguhn sahyacn oasr karihngihnyuck ke kahsruh luhn Nguhn Muhtahl in moul lowos an lwen nuh kwewa.
Kowos enenuh in pruhe kac ac orekma kowos in eis. Ke mwe kolyuck se ngacn muhkwena kowos fah kuh in sokwack inkacnek lowos fin inkacnek suwohs ac ohsrihksrihk inmahsrlon ohkohk in lohsr. Nguhn Muhtahl El fah mwet kol lowos ke El ahkkahlwemye ma pwacye ke kowos lutlutkihn kahs luhn mwet pahluh.
In eis mwe kolyuck ingen ac enenweyuck ma yohk liki na in lohng ac riti ke nuhnak srihk. Kowos ac enenuh in pruhe ac orekma ke luhlahlfongi in sang kahs ke ma pwacye nuh in insiyowos. Kowos enenuh in pruhe tuh God El fah ahkinsewowoye kowos ke Nguhn Lal, tuh El fah kol kowos nuh ke ma pwacye nuh kwewa ac ahkkahlwemye inkacnek pwacye nuh suwos. Pa ohiyac se El fah sensenkackihn nuh suwos ac kol kowos nuh ke inkacnek pwacye ke moul lowos an ac ke kuhlwacnsap lowos ke pristut.
Toeni luhlahp use pacl wowo in lwelah Leum El in ahkkweye kuhiyowos in kuhlwacnsap ke pristut luhn God. Kowos kuh in ahkoekowoslac ke pruhe. Kowos kuh in sang luhlahlfongi lowos in weluhlos suc pruhe. Elos ac fah pruhe ke toeni se inge ke mwe insewowo pucspucs ke mwet pucspucs.
Elos ac fah pruhe ke Nguhn El in tuhkuh fin mwet pahluh oacna mwet sramsram luhn Leum. Elos ac fah pruhe ke Mwet Sap ac mwet kuhlwacnsap nuh kwewa pahngonyuck sin God. Wi kowos, e ke deacon sasuc se ne ke high priest pah se, ac kwewana, mwet mahtuh ac fuhsr, suc sahp ac fah som nuh ke facl luhn nguhn pacl na sa, yen elos ac fah lohng, “Kom mwet kulansap wo ac oaru. Wona orekma lom.”7
Paing se ngacn fah sikyak nuh sin kuhtuh suc ac fah lut kac. Sahp wacngihn pacl elos eis office fuhlwact ke tohkohsrahi luhn God fin facluh. Kuhtuh sahp tuh puhla muh elos liye muhkwena ma srihsrihk ke orekma lalos kuh kuhtuh sin pacl wowo in kuhlwacnsap tiacna ituckyang nuh selos. Mwet sahyac sahp elos puhla muh pacl in kuhlwacnsap lalos tiacna loeslac oacna elos tuh finsrak uh.
Ac fah tiac office ma kowos eis kuh pacl kowos kuhlwacnsap ma ac yohk srihpac nuh sin Leum. Kuht etuh ma inge ke puhpuhlyuck luhn Leum ke mwet orekma ke imac ah, ke molo ah tuh oacna sie finne fuhkah lusen pacl elos kuhlwacnsap kuh acn fuhkah se. Elos ac fah kaksyakihnyuck ke ohiyac se elos kuhlwacnsap.8
Nga etuh mukul se suc pacl lal in imac ah luhman fahsr nuh in sahflah. El eis kahsruh ke cancer lal ke yac pucs. Inmahsrlon yac in kahsruh inge, el insese in eis pahng se in orwaclah toeni ke wik nuh kwewa yurin ac karihngihn mempucr ke ward se lal suc tuhlihk lalos uh tilac muhta in lohm selos; kuhtuh muhtwacn katin mas. Pahng se lal pa kahsrwelos sokwack mihs ke moul lalos ac lutlut ke wosasuc.
Ke el eis pweng suhpwacr se muh kihtin na pacl luhlah lal in moul, pisap se lal ah muhta fin acn sahyac ke orekma lal. Lwen luo tohkoh, el suhpwacoht pweng se nuh sin pisap lal ah ke mwet kol luhn u ke high priest lal ah. El fahk ma inge ke kunohkohn lal ah: “Nga kahlwemwack lah pisap el oasr acn sahyac, oruh ngwac mukwikwi. Nga nuhnkuh kuht in orwaclah toeni ke u lasrMante se tohkoh. Mwet luo kuh in us kuht som liye Lohm sin Toeni Luhlahp. Kuht kuh in orekmakihn kuhtuh sin mempucr an elos in usaclos som ac orekmakihn kuhtuh sin Scouts elos in pahtok wheelchairs. Wiwi na suc mwesahs an, sahp ac oasr puhs mwet mahtuh kuht kuh in sifacna oruh, tuh ac wo in etuh oasr mwet sahyac kuht fin enenuh. Kuh pac in fong na wo se ke sucu ke mwet kahsruh elos in us pac sucu lalos. Finne ohinge lwelah nga in etuh met liki nga fahkwack pwacye plwacn uh. … Kuloh.”
Na el oruh tuh pisap lal ah in lut ke pacl se el pahng ah. Ke el tiacna sramsram ke ohiyac mas lal ah kuh orekma oaru lal, el siyuck, “Pisap, kuh oasr kuhtwena ma nga kuh in oruh in kahsrwe kom?” Nguhn Muhtahl muhkwena kuh in lwelah el in puhlakihn ma toasr luhn pisap ah ke ma lal sifacna arulacna yohk pac. Ac Nguhn muhkwena tuh kuh in lwelah el in orwaclah sie plwacn in kuhlwacnsapuh mwet mukul ac muhtwacn wiyacl ke ohiyac suwohs el tuh orekmakihn ke pacl el fuhsr ah ke el plwacniyuck ma luhn Scouts.
Ke sie pruhe ke luhlahlfongi, God El kuh in acse nuh sesr kuh ke pristut ke kuhtwena ohiyac kuht oasr kac. Enenweyuck fihsrwacsr kac tuh kuht in siyuck ke inse puhsisacl tuh Nguhn El in ahkkahlwemye nuh sesr ma God El tuh kena kuht in fahk ac oruh, orwaclah, ac kalweni moul suwohs ke mwe sang se ngacn.
Nga usot nuh suwos mwe lohoh luhk lah Pahpah God El moul, El luhngse kuht, ac El lohng pruhe lasr. Nga fahkwack luhlahlfongi lah Jisus El pa Kraist moul sac, suc Iwaclah Lal oruh tuh kuht kuh in ahknwacsnwacsyeyuck kuht in kuh in eis kahsruh sin Nguhn Muhtahl. Nga fahkwack lah ke luhlahlfongi ac oaru lasr, sie lwen kuht kuh in lohng kahs ma ac use engan: “Kom mwet kulansap wo ac oaru. Wona orekma lom.”9 Nga pruhe tuh kuht ac fah eis mwe insewowo wolacna se ngacn sin Mwet Luti sac suc kuht kuhlwacnsap. Ke inen Jisus Kraist, amen.