![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F08%2F70%2F0870faf5721d3705799be92e44f9d055d8a18385%2F0870faf5721d3705799be92e44f9d055d8a18385.jpeg/full/!250,/0/default)
Ohiyacn Ngwetngwet Nuh Tok Ma Pahtpaht luhn Wosasuc
Ke sulwaclah ma ikihl ma nuh tok ma pahtpaht, enenuh in oasr ohiyacn ngwetngwet ke wosasuc.
Ke sie fwackyuck ma ituckyang nuh sel Moses, sruhmuhnyuck nuh sesr ke plwacn luhn Pahpah Lucng lah orekma: Lal ac wolacna Lal pa in oruh mwet uh in eis moul ma pahtpaht Yohrohl. 1 Ke mwe fahkwack inge, kena luhn Pahpah pa in sang pacl wo nuh sin mwet nuh kwewa in ipeis sesseslah luhn engan. Fwackyuck ke lwen lasr uh ahkkahlwemye lah Pahpah tuhmasr Inkuhsrao El oraclah plwacn in enganlacna se nuh sin tuhlihk nuh kwewa Nahtuhl, plwacn sacohk ma lwelah kuht in fohlohk in muhta Yohrohl.
Kahlwem ke plwacn inge luhn engan use nuh sesr ke sie ohiyacn ngwetngwet nuh tok ma pahtpaht ac kahsrwe kuht in luhngse ma sacohk oacna masap, akwuck, wuhlweacng, ac pacl upac ac ma upac.
Sie ip yohk tuhkuh sin Alma: “Ke ma inge God El sang nuh selos masap, tukun El oruh in etweyuck nuh selos ke plwacn in molwelah.” 2
E yohk sum in nuhnkuh ke tahk ke ohiyacn ma lutiyuck ingen. Pahpah tuhmasr Inkuhsrao El luti met Adam ac If ke plwacn in molwelah, na El sang nuh selos masap.
Pa inge sie ma arlac pwacye yohk. Kahlwem ke plwacn sac ac fah kahsruh mwet in karihngihn masap, orwaclah sulwaclah wo, ac eis mokleyuck suwohs.
Ke pacl nga kuhlwacnsap ke Alu, nga tonwelah ke oaru ac luhlahlfongi ke mempucr luhn Alu ke muhtuhnfacl siena sahyac puhspuhs, kuhtuh selos oasr ma lain ke lwacyacn luhn masap, ohiyacn moul, kuh ma in ekas mwet. Sie ip nga konwacack inkaiyacn pacl ke mempucr luhlahlfongi inge pa ohiyacn liye ma pahtpaht oasr yohrohlos. Ohiyacn ngwetngwet nuh tok ma pahtpaht luhn wosasuc kol kuht in kahlwem acn se kuht oasr kac ke plwacn luhn God, in insese ke ma upac ac kalweni ahluhkwelah ma ingen, in oruh sulwaclah, ac in sang moul lasr nuh ke ma yohk ke ohiyac tuhkuh lucng lasr.
Ohiyacn ngwetngwet pa ohiyac kuht liye ma uh oacna ke kuht ngwetngweta ma ingen ke acn loes, ac lwelah kuht in srui ma sekoyuck na pwacye kac uh.
Oacna ke kuht oasr ke insack ah ac oasr soko sahk ye muhtahsr. Kuht fin tiac kohlohli kuhtuh, kuht tiac kuh in sruikih na pwacye luhman insack uh. Sie pacl ah nga som liye insack Amazon ke Leticia, Colombia, nuh ke muhtuhnfacl Brazil ac Peru. Nga tiac kuh in sruikihn yohk ne kena pacl se nga sohkwack lucng liki ac liye ma inge nohfohn.
Ke tuhlihk nahtuhsr fuhsr, elos luhngse liye petsac tuhlihk ke channel se ma ahkkahlwemye ma se pahngon Meac Kom Liyac an? Petsac an fah som fototo nuh ke ma se in liye ma srihk, ac tuhlihk enenuh finsrak in etuh ma se ingen ke petsac muhtwacack in yohkwelihk. Ke pacl ma nohfohn kuh in liyeyuck, fihsracsr in liye lah ma se ingen pa kihsrihk ngaho se, sahk soko, fahko se, kuh sahyac.
Nga esam sie pacl ah ke elos liye petsac se ingen ac el ahkkahlwemye ma se ac petsac arulacna fototo nuh kac ac ma ingen luhman sifucng nuh selos, finne wohtwoht; tuhsruhktuh ke petsac yohkwelihk, elos akihlen lah petsac pa pizza yuc. Na elos fahk nuh sihk, “Pahpah, moli sie nwacsr oacna ma ingen!” Tukun elos kahlwem meac oasr ke petsac, ma se tuh luhman koluk met nuh selos eklac nuh ke ma kahto an.
Lwelah nga in sulpac akacsruhi srihkasrak se. Ke lohm sesr tuhlihk nahtuhsr luhngse sritacl ke jigsaw puzzle. Nga muh kuht nuh kwewa srihke puzzle se. Kuhtuh oraclah ke ip srihk puhspuhs. Nga esam sie sin tuhlihk nahtuhsr (nga tiac sang inel in karuhnguhnuhl) ke pacl met porongo nuh ke ip sefanna, ac ke sie tiac som nuh ke acn se ma el pahngohn enenuh in som, el foloyak ac nuhnkuh ip se ingen tiac wo ac el luhngse in sang nuh ke kutkut. Tukun kuhtuh pacl el lotwelah fuhkah in oruh puzzle an ke el kahlwem lah kais sie ip kac oasr acn la ke petsac nohfohn, finne ke pacl el nihkihn acn se in sang ip se ke pacl se inge.
Pa inge ohiyac se in motko ke plwacn luhn Leum. Kuht tiac enenuh porongo nuh ke kais sie ip kac tuhsruhktuh srihke in porongo nuh ke petsac nohfohn, ac nuhnkuh ke ma sahflah ac fah sikyak kac. Leum El etuh ke kais sie ip nuh kwewa som nuh kac ke plwacn an. Masap nuh kwewa pa yohk srihpac ke pacl ma pahtpaht ke plwacn yohk in engan.
Arulacna yohk srihpac lah kuht tiac oruh sulwaclah ma eklac ma pahtpaht ke ohiyacn liye luhn facluh muhkwena. Ke sulwaclah ma ekuhllah kuh sis moul ma pahtpaht, enenuh in oasr sie ohiyacn ngwetngwet ke wosasuc.
Elder Neal A. Maxwell el luti: “Ne kawucki ke kuht finsrak ke ma wo emet, kuhtuh ma kuht finsrak kac ke moul se inge el sie pacna. Sahp kuht finsrak molosr in kihluckyak ke orekma, Pacl sacohk kuht ahkoo yurin mwet se, kuhtanglah ke kafucrmacn,sie lohm in yohkwack kuhtuh likina met ah—ma sahp motkoeyuck muh ac sikyak kuh tiac. Luhlahlfongi ke plwacn luhn Pahpah use muhtwengwacn ma uh ke pacl finsrak lasr fin facluh tiac sun kuh oreklac. Finsrak uh pa karihngihn kuht in ‘orekma kahfofo lacna ke suwos’ ke srihpac ma wo finne ke pacl luhman oacna in muh wacngihn kuhtanglah (liye D&C 58:27).”3
Tiac finsrakihn ohiyacn ngwetngwet in moul ma pahtpaht uh, kuh in nuhkanlah, kuh na in pwen kuhtlac nuhke ohiyac luhn facluh in pa ma yohk sesr ac oruh sulwaclah ma tiac insese nuhke ma luhngse luhn God.
Puk luhn Mormon sramsram ke ohiyac ma Nephi el orekmakihn ac ohiyac ma Laman ac Lemuel elos orekmakihn. Elos nohfohn kweok ke ma upac puhspuhs; tuhsruhktuh, ohiyac kuh liyeyac selos ke ma ingen tiacna tiacna oacna sie. Nephi el fahk “Ac arulacna yohk mwe insewowo luhn Leum nuh sesr, tuh kena kuht kang ikoac tahkmwek ke yen mwesis, yohk sronin muhtwacn kwactiti kiyacsr in kihte tuhlihk nahtuhlos, ac elos fokoko na, ahok, oacna luhmanna mukulma uh; ac elos ahkwot uh in fungyang nuh ke fuhfahsryucsr lalos ac tiac tohrkahskahs.” 4
Laman ac Lemuel, ke kuhtwena ohiyac, isrisrlacna ke tohrkahskahs uh. “Ac tuh ohinge Laman ac Lemuel, ke elos pa lahp, titiyak lain pahpah tuhmwaclos uh. Ac elos tohrkahskahs ke srihpen a nihkni i lalos ke ohiyac luhn God suh oreloslac uh.”5 Tiac elak kuh seoarui“ohiyac luhn … God” uh pa sie innek lusronglah ngwetngwet nuh tok ma pahtpaht, ac tohrkahskahs uh el na pa sie akucl kac uh. Ne Laman ac Lemuel tuh wi ahkloh ke ma usrnguck na puhs ma sikyak weluhl Nephi, elos fahkwack, ohinge: “Ac kuht fuhfahsryucsr yen mwesis ke yac puhspucs inge; ac muhtwacn kiacsr uh kwemkahtuh, ke pihtuctuc luhlahp lalos; ac elos osweyuck tuhlihk yen mwesis ac kweokkihn ma nuhkwewa, misac na luhlah; ac wo sruhk fin elos misac met liki elos tufoki liki acn Jerusalem liki na in kweokkihn mwe kweok inge.”6
Ohiyac luo inge arulacna siena, finne ma upac elos ohsun nuh kac apkuhran oacna sie. Ma pwacye, ohiyacn liye lalos pa siena uh.
Prestuhn Spencer W. Kimball el sihm ma inge: “Kuht fin liye moul lasr fin facluh ke moul nohfohn, na kweok, ahsor, puhtatlac, ac moul fototo an pa ongaiyac se. Tuhsruhktuh kuh fin liye moul ke ma pahtpaht se ma som ahluhkwelah pacl met nuh ke pacl ma pahtpaht tok, na ma nuh kwewa ma sikyak kuh in liyeyuck ke ohiyacn liye suwohs.” 7
Elder David B. Haight akacsruhi sramsram soko ke mwet sculptor Michelangelo in kahsruh ahkuhtweyac ma yohk in liye ma nuh kwewa ke ohiyacn liye suwohs: “Ke sculptor an oraclah yot marble, mukul fuhsr se tuhkuh lwen nuh kwewa in liye ke ohiyac mwekihn. Ke yot muhtwacack in luhma oacna David, fal in facluh nohfohn in liye, mukul fuhsr se siyuck sel Michelangelo, ‘Kom etuh fuhkah el oasr lun yot sacn?’” 8
Ohiyacn liye ma mwet sculptor liye yot luhn marble se ingen siena liki ohiyacn liye luhn mukul fuhsr suc liyacl orekma. Ohiyacn liye luhn mwet sculptor lwelah ma oasr ke yot in oraclah sie ma oraclah wolacna.
Leum El etuh ma El luhngse in oruh yurin kais sie sesr. El etuh kain eklac El luhngse kuht in sun ke moul lasr uh, ac kuht tiac kuh in kai ma luhngse Lal. Nuhnak Lal pa lucng likina nuhnak lasr. 9
Nga fahkwack lah oasr Pahpah Lucng suc luhngse, suwohswohs, ac pahkomuhta suc oraclah plwacn se ke engan ma pahtpaht lasr. Nga fahkwack lah Jisus Kraist pa Wen Nahtuhl ac Mwet Lahngo luhn facluh. Nga etuh lah Prestuhn Thomas S. Monson el mwet pahluh luhn God. Nga fahk ma inge ke inen Jisus Kraist, amen.