Puhpuhlyuck ke Mwet Tahknwelihk
Sel Elder Dallin H. Oaks
Ke U luhn Mwet Sap Singucul Luo
Ma nuh sesr kais sie in orwaclah finsrak ac in oruh ma uh ma orwaclah fohk wo lasr ac isus fahko pucspucs lasr.
Sifac uh ke sramsram luhn toeni luhlahp pakiyuck—tiac sin mwet suhkawihl oasr wal la tuhsruhk sin moklweyuck luhn Nguhn. Puhs sifac uh ahkkahlwemyeyuck sin mwe sensenkackihn suhkawihl lasr kwewa. Tuh oacna ke Jisus El tiacna luti ah ke lwen Lal ah fuhkah in kuhtanglah ma upac kuh ma lainyuck, El kwacna moklwe mwet kuhlwacnsap Lal mihsenge insramsram ke meac sac ma mwet ukwe Lal kuh in oruh in eklac moul lasr sifacna in ahkoekuhtlac in fohlohk nuh lohm sesr inkuhsrao. Pihrihkyuck insiyuck tuh nga in sramsram ke mwe luti sacohk ac wacngihn sahflahiyac ke sie sin puhpuhlyuck lal Jisus.
Puhpuhlyuck ke mwet tahknwelihk pa se sin kihtin na puhpuhlyuck ma sruhmuhnyuck ke nohfohn na puk luhn Mattu, Mark, ac Luk. Oacyacpac sie sin u in puhpuhlyuck srihsrihk ma Jisus El ahkuhtweyac nuh sin mwet tuhma lutlut Lal. Fihtac ah ma yukiyac pa “pweng ke tokosrai” (Mattu 13:19), “kas uh” (Mark 4:14), kuh “kas lun God” (Luk 8:11)-mwe luti luhn Mwet Luti ac mwet kuhlwacnsap Lal.
Kain in fohk uh ma fihtac uh puhtatyang kalmacn pa kain in ohiyac ma mwet suhkawihl elos eis ac ukwe mwe luti inge. Oruh fihtac ma “putatla nu sisken inkanek” (Mark 4:4) soenna sun fohk suhkawihl ma sahp ac kuh in kapkapwack. Fihtac an oacna mwe luti ma lutiyuck nuh sin insiyac kwekwe kuh tiac ahkolah. Nga ac tilac sramsram ke fihtac inge. Pweng luhk yohk nuh sesr suc luhlahlfongi na pwacye in mwet ukwe luhn Kraist. Meac kuht oruh ke mwe luti luhn Mwet Lahngo ke kuht moul?
Puhpuhlyuck luhn mwet tahknwelihk sensenkackihn kuht ke ohiyac ac atac ma kuh in tulokihn kuhtwena mwet suc eis fihtac luhn pweng ke wosasuc liki isus fahko wo.
I. Yen Eoteot, Wacngihn Okah
Kuhtuh fihtac uh “putati nuh yen eoteot, yen ma srikla fohk we. Fita inge sa na in srunak mweyen fohk we suloal. Na ke fulen faht uh sreya elos uli, ac ke sripen oka uh tia kapla in loal pwanang sa na in masla” (Mark 4:5–6).
Jisus El luti lah ma inge ahkuhtweyac kaclos “suc, ke pacl se na elos lohng kas uh, elos sa na in eis ac insewowo kac,”tuhsruhk ke srihpacn “tiana sremla wo in nunak lalos, … ke pacl mwe lokoalok ac mwe ongoiya sikyak ke sripen kas inge, elos ac sa na in fuhleak” (Mark 4:16–17).
Meac se oruh mwet lohng tuh kahs uh in “tiana sremla wo in nunak lalos”? Ma inge oacna ohiyac luhn mempucr sasuc suc kwacna luhlahlfongi ke misineri kuh kain in atac luhngseyuck luhn Alu uh kuh nuh ke fahko wowo puhs ma tuhkuh oacna sie mempucr ke Alu uh. Tiacna srwemlah wo in kahs uh, ke mwe lain sikyak elos kuh in isihklac ke faht ah ac muhnahslah. Tuhsruhk wi pac elos suc tuhfwelah in Alu uh—mempucr mah—elos kuh in puhtatlac nuh in ohiyac se ma elos tiacna pac srwemlah wo in nuhnak lalos. Nga etwaclah kuhtuh selos inge—mempucr ma wacngihn luhlahlfongi fokoko ac ma pahtpaht ke wosasuc luhn Jisus Kraist. Kuht fin tiac srwemlah wo ke mwe luti luhn wosasuc ac pacl nuh kwewa ukwe uh, kuhtwena sie sesr kuh in oraclah insiyac eoteot, oacna yen eoteot ke fihtac luhn ma muhtahl.
Mongo ke ma muhtahl enenweyuck ke moul in muhtahl, yohk na in facluh se ma fahsrwelihk liki luhlahlfongi ke God ac ma luhn ma wo ac ma koluk. Ke pacl kutongyuck ke Internet, ma ahkyohkye pweng ma kuhnaoslah luhlahlfongi uh, kuht enenuh ahkyohkye pacl lasr ke ma pwacye muhtahl in kuh in ahkkweye luhlahlfongi lasr ac srwemlah wo ke wosasuc.
Mwet fuhsr, fin mwe luti se ngwacn tiac fal in etwacack, pa inge sie srihkasrak. Fin kihteyucki kuhfa luhn Leum ac kowos muhta text kuh mahmah kuh sritacl video games kuh kuhtwena ma in lahfwekihn kowos sifacna ke mongo luhn ma muhtahl enenweyuck, kowos pakiyac okah muhtahl lowos an ac fototoyang nuh ke acn eoteot. Kowos oruh kowos in muhnahslah ke pacl ma kowos ohsun ma upac oacna sifacnalac, sahngweng, kuh ahkkolukyeyuck. Ma ngwacn ma pac nuh sin mwet mahtuh.
Sie pac mwe kuhnaus ke okah muhtahl—ahkfahsryelah pihsrpihsr ke technology tuh tiacna usrnguck kac—pa ngwet sin ol in ki ke wosasuc kuh Alu uh. Ngwet srihsrihk se inge ma nuh ke sie mwe luti kuh ohiyac kuh ma nuhkweyuck muh suhfal luhn mwet luti se ac tiacna liye ke petsac nohfohn ke plwacn in wosasuc ac fahko ke kosracni uh nuh sin mwet sefanna kuh mwet kwewa. Prestuhn Gordon B. Hinckley el use ahkuhtweyac wowo ke sie ip ke ngwet sin ol in ki inge. El fahk nuh sin sie u luhlahp suc lutlut BYU kacn mwet sramtweack pweng suc arulacna foloyak ke sie ma tuhfahna sikyak ke pacl sacn. “Elos arulacna suhlallacl wohwohn kahs ahkkoluk. … Pwacyena,” el ahksahfyelah, “Inseseyuck in pacl lasr tuh in kahskahs oacna mwet mukohl inge.” 1 Ke kapsrweyuck, in srwemlah wo in wosasuc kuht enenuh in wo ke luhlahlfongi lasr ac tiac ahkkolukye mwet ac pacl nuh kwewa srihke kahlwem ke ohiyac nuh kwewa ke orekma wolacna luhn God.
II. Kohkul: Luhngse luhn Facluh Inge ac Luhngse Mwe Kahsruhp
Jisus El luti lah “kutu fita uh putatla nu in fohk ma oasr okan kokul we, ac kokul uh kapak ac kupoiya, oru sacn uh tia ku in fokla” (Mark 4:7). El ahkuhtweyac lah ma inge pa “mwet su lohng kas uh, tusruktu elos nunkala yohk ke moul lun faclu, ac lungse mwe kasrup, ac mwel ma puspis saya, na ma inge kupoiya kas uh, na elos tia isus fahko” (Mark 4:18–19). Ma inge pwacyena mwe sensen nuh sesr nuh kwewa kuht in porongo nuh kac.
Nga ac fah sramsram met ke kikiacp ke mwe kahsruhp. Acn fuhkah se kuht oasr ke fuhfahsryucsr ke ma luhn nguhn lasr—ohiyac fuhkah lasr ke luhlahlfongi lasr—srihfeyuck kuht nuh kwewa ke ma inge. Ke ohiyac kuh luhngse lasr fohrohk nuh ke ma kuht eis, kuh orekmakihn, kuht pahngohn ma inge ma luhn facluh. Puhslac ma sramsramkihnyuck ac sihmihsyuck ke ma luhn facluh oruh tiacna enenweyuck kuhn fahk kuhtuh pac.2 Elos suc luhlahlfongi ma suc pahngpahng alu luhn mwe kahsruhp uh kweokkihn “kikiacp ke mwe kahsruhp.” Fin oasr mwe kahsruhp luhn mwet sie tiacna akucl se ma el luhngseyuck inkuhsrao, ac fin wacngihn mwe kahsruhp tiacna akucl se ke el sruhngwacyuck inkuhsrao. Ke Jisus El fahk nuh sin mwet luhlahlfongi ukwe se muh el kuh in eis moul ma pahtpaht el fin ac sang ma nuh kwewa lal nuh sin mwet suhkahsruhp (liyeMark 10:17–24), El tiacna akihlen ma koluk se kez oasr mwe kahsruhp la tuhsruhk ma koluk se ke kena lal nuh kac uh. Oacna kuht kwewa etuh, Jisus El kaksyakihn sie Mwet Samaria wowo suc kuhlwacnsapuh mwet niyacl ke el orekmakihn mani sepacna ma Judas el orekmakihn in tuhkahkuhnuhlwack. Okahn kain koluk nuh kwewa tiac mani tuhluhngse mani uh (liye1 Timothy 6:10).
Puk luhn Mormon sramsramkihn sie pacl ah ke Alu luhn God muhtwacwacack koluklac ke kapkapwack uh (liyeAlma 4:10) mweyen mwet ke alu uh muhtwacwacack sang insiyaclos ke mwe kahsruhp ac ke ma koluk luhn facluh (liyeAlma 4:8). El suc oasr ma puhkantwen la ke ma luhn facluh taran el in tiac tulokihnyuck ke ma luhn nguhn ke srihpacn mwe kahsruhp ac ma sahyac luhn facluh.3 Fal mwe kahsruh se ngacn nuh ke mwe luti luhn Mwet Lahngo tohkoh.
Kohkul na srihsrihk uh in ahkmuhnahsye kuh se ke kahs luhn wosasuc ke moul lasr pa kuh luhn facluh muh Jisus El pahngohn “elya lalos, ac mwe kasrup ac mwe pwar lun moul se inge” (Luk 8:14). Puhslaclac ma inge koflah sruhmuhnyuck. Fal nga in akacsruhi kuhtuh srihkasrak.
Ke sie pacl ah Jisus El kai Mwet Sap sifac se Lal, fahk nuh sel Peter, “Kom sie mwe tukulkul nu sik, mweyen nunak lom ingan tia ma tuku sin God me, a ma sin mwet uh” (Matthew 16:23; liye pacD&C 3:6–7; 58:39). Sacohkkihn ma luhn mwet kalmacn pa sang elyah luhn facluh se inge met liki ma luhn God ke mukwikwi lasr, finsrak lasr, ac nuhnak lasr.
Kuht fuhlweack nuh sin “mwe pwacr luhn moul se inge” (1) ke kuht sruhfweyuck, ac ma inge ahkkolukye mwe sang sacohk luhn God ke sukohsohk in sulwaclah; (2) ke kuht sruhfweyuck ke ma koluk srihsrihk, ac ma inge srwekuhtlac loeslac liki ma yohk srihpac ke ma pahtpaht; ac (3) ke kuht nuhnkuh kuht fah eis kaiyuck wo, ac ma inge ahkmuhnahsye kapkapwack sifacna lasr enenweyuck in ahkoekuhtlac ke moul ma pahtpaht.
Kuht afihnyucki ke “elyah … luhn moul se inge” ke kuht koflah mukwikwi ke srihpacn sahngweng lasr ke pacl fahsruh, ac ma inge ahkmuhnahsye luhlahlfongi lasr in fahsr na met, luhlahlfongi ke God ac olwelah Lal. Yac longoul limekohsr somlah mwet luti BYU pwengpweng se luhk Hugh W. Nibley el sramsram ke mwe sensen ke fuhlweack nuh sin elyah luhn facluh. Siyuck sel ke sie interview muh pwacye lah ohiyac luhn facluh ac ma kunacsr in fahkwelihk wosasuc oruh kena se lasr in “ekuhllah ma kuht oruh in Alu uh in oacna sie nuh ke ma mwet uh oruh fin facluh.”4
El topuk: “Pa ingacn sramsram ke Alu uh, pwacye? Kom enenuh inkaiyen pacl uh ahkmwekihnye kuhtuh, enenuh kom in tiac sahngweng in oruh ma sacn. Pa ngwacn ma enenweyuck luhlahlfongi. … Oaru lasr oacna srihkeyuck, oacna upac uh, oacna tiacna kuh in ahkfahsryeyuck ke ip in facluh inge.”5
Finsrak ke wosasuc ahkpwacyeiyuck ke acn lutlut BYU kihtin na mahlwem tari ac sin mwet kol Catholic pwengpweng se, Charles J. Chaput, archbishop fin acn Philadelphia. Sramsramkihn “mwe nuhnak luhn u in mwet LDS ac Catholic tuhkweni akacsruhi,” oacna “ke pahyuck ac sucu, ac atacn mahnosr, ac sacohkiyacn moul, ac sukohsohkiyacn alu,” el fahk:
“Nga kena fahk pac ke yohk srihpacn moul pwacye ke ma kuht luhlahlfongi kac uh. Ma sacn enenuh in finsrak se na—tiac ke moul sifacna lasr ac ke sucu tuh in alu lasr, sulwaclah ke mura lasr, mukwikwi ke orekma lasr, ohiyacsr nuh sin mwet suhkahsruhp; in kahs sahyac, ke ma nuh kwewa kuht oruh.”
“Ac efuh ma inge yohk srihpac,” el kalweni. “Lutiyuck ke ma sikyak nuh sin mwet Catholic. Kuht mwet Catholic luhlahlfongi muh srihpac lasr pa in mwe pulohl uh inmahsrlon mwet uh. Tuhsruhk tiacna oacna sie in mwe pulohl inmahsrlon mwet uh ac in kangyucksinmwet uh.”6
Sensenkackihn luhn Mwet Lahngo ke in tiac lwelah elyah luhn facluh se inge ahkkolukye kahs luhn God in moul lasr pwacyena srihke kuht in liyacacng finsrak lasr—insiyacsr fokoko—ke masap luhn God ac ke kolyuck luhn Alu Lal.
Mwe srihkasrak luhn Mwet Lahngo ah kuh in oruh kuht in nuhnkuh ke puhpuhlyuck se inge oacna puhpuhlyuck luhn fohk uh. Woiyacn fohk uh wiwi nuh ke insiyacn kais sie sesr suc lutiyuck ke fihtac luhn wosasuc. Nuh ke kena in eis mwe luti ke ma luhn nguhn, kuhtuh insiyac kwekwe ac tiacna ahkolah, kuhtuh insiyac eoteot tiac orekmakihnyuck, ac kuhtuh insiyac fihliyucki nuh ke ma luhn facluh.
III. Puhtatlac nuh fin Fohk Wo ac Isus Fahko
Puhpuhlyuck ke mwet tahknwelihk ahksahfyelah ke ahkuhtweyac luhn Mwet Lahngo ke fihtac se ma “putatla nu fin fohk wo, ac kapak ac isus fahko wo” ke kain in luhpah (Matthew 13:8). Yac kuht ac ahkoekuhtlac fuhkah in oacna fohk wo sacn ac in oswe fahko wo sacn?
Jisus El ahkuhtweyac muh “in fohk wo uh pa mwet su lohng kas uh, ac sang nu insielos ke nunak wo ac akosten. Ac elos sruokya ku nwe ke na isus fahko” (Luke 8:15). Oasr yohrohsr fihtac ke kahs luhn wosasuc. Ma nuh sesr kais sie in orwaclah finsrak ac in oruh ma uh ma orwaclah fohk wo lasr ac isus fahko pucspucs lasr. Enenuh kuht in suk in srwemlah wo ac luhlahlfongi na pwacye ke wosasuc luhn Jisus Kraist (liyeColossae 2: 6–7). Kuht ahkpwacye eklac fokoko inge ke pruhe, ke riti ma suhmuhslah, ke kuhlwacnsap, ac ke sacnri nuh kwewa eis kuhfa luhn Leum tuh Nguhn Lal in oasr yohrohsr pacl nuh kwewa. Enenuh pac kuht in suk eklac na pwacye luhn insiyac (liyeAlma 5: 12–14) ma ahollah kena koluk ac inse nuhnak ke luhngse luhn God ac kena se in kuhlwacnsapwacl ac tuhlihk Nahtuhl.
Nga fahkwack ke ma pwacye luhn ma inge, ac nga fahkwack ke Mwet Lahngo lasr, Jisus Kraist, suc mwe luti Lal srihsrngiyac inkacnek uh ac suc Iwaclah Lal oruh ma nuh kwewa in kuh in sikyak, ke inen Jisus Kraist, amen.