Ohinge Elos Tulokihnyac Sahngweng Lalos
Sel Elder David A. Bednar
Ke U luhn Mwet Sap Singucul Luo an
Tiac oacna sahngweng facluh ma oraclah sahngweng elyah ac sensen, sin God pa sie kahsruh ke mihs, ahkpwacye, ac luhlahlfongi.
Nga esam na pwacye sie ma sikyak nuh sihk ke nga sie tuhlihk mukul srihsrihk ah. Sie lwen ah ke sritacl wi kawuck luhk ah, nga twelac kuhnahoslah sie winto ke sie stoh sisken lohm sesr ah. Ke kuhlahs ah srasrwelihk ac security alarm ah wohwohn ah, sie sahngweng na upac nwacklah insiyuck ac nuhnak luhk ah. Nga sana akihlen lah nga loal in muhta in moul luhk ke nien kaclpous uh. Ninac pahpah kiyuck ah tok kuhtuh ahkwoyeyuc in tuhkuh liki acn in wihkwihk luhk ye pet kiyuck ah ac kahsrweyuc in ahksuwohsyelah inmahsrlon mwet la stoh sac. Wo ohiyac, pacl in kaclpous se luhk ah eklac.
Sahngweng ma nga puhla ke lwen sac oelac ac pwacye. Nga muh kowos puhlakihn puhla yohk ke sahngweng tukun kom etwacack ke sie mas upac lom sifacna, sokwack sie mwet ke sucu in sun ma upac kuh sensen, kuh liye ma sikyak lusrohngtwen facluh uh. Ke ma ingacn, puhla koluk ke sahngweng uh yohkwelihk ke srihpen mwe sensen ac tuhkuh, tiac arlac kahlwem, kuh ngal ac ke puhlakihnyuck ma tiac ahkoeyucklac, kuhtuh pacl uh sa, ac kuh in oraclah sie ma sikyak koluk.
Ke moul lasr lwen nuh kwewa uh, ripohrt wacngihn sahflahiyac ke fohs suhlallacl, masrinsrwacl, mweun, sesuwohs, terrorism, ahksrihkye ma yohk srihpac, mas, ac kuh kuhnanuclac luhn acn uh kuh in oraclah sahngweng ac elyah. Pwacyena kuht moul ke puhlan pacl sruhmuhnyuck sin Leum ac in lwen ingoh facluh nohfohn fah fohsack, insiyacn mwet uh fah kiacpweloslac (liye D&C 45:26).
Srihpac luhk in ahkuhtweyac ohiyac ma sahngweng ahkwacngihnyeyucklac ke sie etwacack pwacye ke ac luhlahlfongi ke Leum Jisus Kraist. Nga pruhe tuh Nguhn Muhtahl fah ahkinsewowoye kais sie sesr ke kuht tuhkweni nuhnkuh sifac yohk srihpac se inge.
Sahngweng Facluh
Ke lohng puhsrwen God tukun ipeis ke fukunsahk oal sac, Adam ac Eve okanuhloslac sifacna ke Imac Eden. God El pahnglol Adam ac siyuck, “Kom aya? Ac [Adam el topuk], Nga lohng kom … , ac nga sangeng” (Genesis 3:9–10). Yohkna, sie sin ma sikyak emet ke Puhtatlac sac pa Adam ac Eve in puhlakihn sahngweng. Puhla fokoko se inge pa sie ma yohk srihpac emet ke moul lasr facluh uh.
Sie srihkasrak ke Puk luhn Mormon ahkkahlwemye kuh ke etuh luhn Leum 2 Peter 1:2–8; Alma 23:5–6) in ahkwacngihnyelah sahngweng ac sang mihs finne ke kuht lain ma koluk upac uh.
Ke acn luhn Helam, mwet lal Alma ah sahngweng ke sie un solse fokoko luhn mwet Laman.
“Ac Alma el som ac tu inmahsrlolos, ac fahk nuh selos elos in tiac sahngweng, tuh elos in esam Leum God lalos ac El ac kohlohloslac.
“Ohinge elos tui ke sahngweng lalos” (liye Mosiah 23:27–28).
Akihlen lah Alma el tiacna tulokihn sahngweng luhn mwet ah. Sahyacna, Alma el ahkkweye mwet luhlahlfongi ah in esam Leum ac kuhtanglah muhkwena pa El kuh in sang uh (2 liye Nephi 2:8) Ac etuh ke karihngihnyuck luhn Mwet Lahngo oruh mwet uh kuh in tulokihnyac sahngweng lalos sifacna uh.
Etuh suwohs kac ac luhlahlfongi ke Leum ahkfokokoye kuht in tulokihn sahngweng lasr ke srihpen Jisus Kraist pa kahsruh se muhkwena ke mihslac ma pahtpaht uh. El fahkwack, luti sihk, ac lohng kahs luhk; fahsr ke puhsisacl luhn Nguhnihk, ac kowos fah eis mihslac in nga (liye D&C 19:23).
Mwet Kol el oacyacpac fahk, “El suc oruh orekma ke suwohswohs fah eis opi lal, finne mihslac ke facluh se inge, ac moul ma pahtpaht ke facluh se fahsruh uh” (D&C 59:23).
Luhlahlfongi ke Kraist ac sie engnuh ahkolah ke wo, pahkomuhta, ac kuhlwacng Lal kol nuh ke finsrak ke Iwaclah Lal ke Sifil Moulyak ac moul ma pahtpaht (liye Moroni 7:41). Kain luhlahlfongi ac finsrak se ingacn suli nuh ke moul lasr uh mihs ke nuhnak wowo ma kuht nuh kwewa kena nuh kac. Kuh luhn Iwaclah sac ahkfahsryelah auliyak ac tulokihnyac elyah oreklac ke ma koluk; ma ingacn oacyacpac ahkfokokoye kuht in liye, oruh, ac eklac wo ke inkacnek ma kuht koflah in akihlen kuh ahkfahsryelah kuh srihkasrakuh lasr facluh uh. Pwacyena, sie sin mwe insewowo yohk emet ke in mwet tuhma lutlut kwacfweacng pa “misla lun God, su yohk likina ma mwet uh ku in kalem kac” (Philippi 4:7).
Mihs Kraist El use uh lwelah kuht in liye moul facluh ke mwe liye ma pahtpaht sacohk ac use mwe mihs luhn nguhn ( liye Colossae 1:23)) ma kahsrwe kuht in kalweni na lohacng ke fuhfahsryucsr inkuhsrao lasr uh. Pa oruh, kuht kuh in ahkinsewowoyuck in tulokihn sahngweng lasr ke srihpen mwe luti Lal use srihpac ac inkacnek ke ohiyac nuh kwewa luhn moul lasr uh. Akwuck ac olwelah Lal uh ahkfokokoye ac ahkkweye ke pacl kwewana wo ac koluk. Ac kuh luhn pristut Lal use mwe ahkpwacye lah ma yohk srihpac emet uh kuh in muhtwengyucklac ke pacl ac ma pahtpaht.
Tuh yac kuht kuh in tulokihn sahngweng ma arlac fihsracsr ac kwacna ahkkolukye kuht ke facluh se lasr mihsenge inge? Top nuh ke kihsen siyuck kahlwem se inge pa “ahok.” Ip yohk fihsrwacsr tolu emet uh pa yohk srihpac in eis mwe insewowo inge: (1) ngwet nuh sin Kraist, (2) muhsahiyuckyak ke pwelucng luhn Kraist, ac (3) fahsr nuh met ke luhlahlfongi ke Kraist.
Ngwet nuh sin Kraist
Kahs in kahsruh Alma el sang nuh sin wen nahtuhl Helaman kapsrweyuck fal nuh sesr kais sie mihsenge: “Ahok, liye tuh kom in ngwet nuh sin God ac moul (Alma 37:47). Kuht enenuh in ngwet nuh sin ac sang lohacng lasr uh yohkna nuh sin Mwet Lahngo ke pacl nuh kwewa ac ke acn nuh kwewa.
Esamwack ohiyac ma Mwet Sap luhn Leum oasr lun soko oak, kusrusrsrusr infulwen meoa uh. Jisus El som nuh yohrohlos, fahsr fin kof uh; tuh tiacna akihlacnuhl, elos tuhng ke sahngweng.
“Jisus el kasang nu selos ac fahk, Nimet sangeng.
“Na Piter el kasla ac fahk, Leum, fin kom pa ingan, sap nga in fahsrot fin kof uh nu yurum.
“Na Jisus el fahk, Fahsruh” (Matthew 14:27–29).
Na Piter el muhtwacwacack in fahsr fin kof uh nuh yurin Jisus.
Tuhsruhk ke el liye upac luhn eng uh, el sahngweng ac muhtwacwacack in tili nuh inkof uh, ac wowoyak ac fahk: “O Leum, moliyula!
“In kitin pacl ah na Jisus el asreola paol, sruokilya ac fahk, ‘O kom su srikla lulalfongi la! Efu kom ku alolo?’” (Matthew 14:30–31).
Nga petsacelah top lal Piter arlac fokoko ac sana nuh ke solsol luhn Mwet Lahngo. Ke muhtahl ngwetwacng nuh sin Jisus, el srolah liki oak uh ac ke usrnguck fahsr fin kof uh. Tuh ke liye lal muhkwena lusrongyucklac ke eng ac noa uh el eklac sahngweng ac muhtwacwacack in tili.
Kuht kuh in ahkinsewowoyeyuck in kuhtanglah sahngweng lasr ac ahkkweye luhlahlfongi lasr ke kuht ukwe kolyuck luhn Leum in ngwet nuh Sel ke nuhnak nuh kwewa; tiac tahfuhluo, ac tiac sahngweng (liye D&C 6:36).
Muhsahiyuckyak fin Pwelucng luhn Kraist
Helaman el kai wen nahtuhl, Nephi ac Lehi: “Esam, esam lah ke fin yot luhn Mwet in Molwelah lasr, suc pa Kraist, Wen nuhtin God, pa kowos enenuh in muhsahelah pwelucng lowos; tuh ke devil el ac suhpwaclah eng upac lal, ahok, sikucl lal nuh ke eng for uh, ahok, ke aes kwekwe raun nuh kwewa lal ac pahkah upac lal fah srihngihl kowos, ma inge ac fah wacngihn kuh la fowos in eis kowosi nuh ten nuh ke inahlok luhn suhpwacr ac ongaiyac ma wacngihn sahflahiyac, ke srihpen yot se ma kowos muhsahyak fac, suc pa sie pwelucng pwacye, sie pwelucng ma fin mwet uh muhsah fac elos tiacna kuh in puhtatlac (liye Helaman 5:12).
Akwuck ac olwelah uh pa simacn puhlak muhsahlah kuht orekmakihn in muhsahelah moul lasr fin pwelucng luhn Kraist ac Iwaclah Lal. Kuht kuhpahsr arlac wo nuh kac ac sin Mwet Lahngo ke kuht nwacsnwacs in eis akwuck uh ac oraclah olwelah uh, luhlahlfongi in esam ac ahkfuhlwactye olwelah muhtahl ingacn, ac oruh kuhiyacsr in moul fal nuh ke insese kuht lwelah in eis uh. Ac asruoki sacn pa kahsruh ke kuh luhn nguhn ac fokoko ke puhlan pacl nuh kwewa ke moul lasr uh.
Kuht kuh in ahkinsewowoyeyuck in tulokihn sahngweng lasr ke kuht fokoko in oraclah kena ac orekma lasr nuh ke pwelucng suwohs luhn Mwet Lahngo ke akwuck ac olwelah lasr uh.
Fahsr Nuh Met ke Luhlahlfongi ke Kraist
Nephi el fahkwack: “Ohinge, kowos enenuh in ahkwot nuh met ke luhlahlfongi kuh in Kraist, in oasr kahlwem suwohs luhn finsrak, ac luhngse God ac mwet nuh kwewa. Ohinge, kuht fin ahkwot nuh met, mongo ke kahs luhn Kraist, ac muhtweng ne ke na sahflah, liye, ohinge Pahpah El fahk: Kowos fah moul ma pahtpaht (2 liye Nephi 31:20).
Kwacfeacng lutiyuck ma ahkkuhtweyucki ke fuhs se inge pa sikyak ke kahlwem luhn nguhn ac aruhrruhma, kalweni, mongfihsrwacsr, ac pahkotwen luhn God. Ahkyohkye luhlahlfongi ke ac fin ine muhtahl luhn Jisus Kraist, fakpacp in sang nuh ke kena Lal ac pacl ke moul lasr uh, ac puhsisacl in akihlen mukwikwi Lal ke ma nuh kwewa ma sang ma ke mihs nuh ke tohkohsrahi luhn God ma use engan ac moul ma pahtpaht (liye D&C 42:61). Finne ke kuht puhlakihn ma upac uh ac sun ma tiac etweyuck luhn pacl fahsruh uh, kuht kuh in engan in sruokyacna ac moulkihn sie “moul mihsla ke wangin mwe lokoalok ac akfulatye God ac oru ma wo” (1 Timothy 2:2).
Kuht kuh in ahkinsewowoyeyuck in tulokihn sahngweng lasr ke kuht eis puhlaik ma tuhkuh ke lotwelah ac moulkihn ip yohk ke wosasuc uh ac kwacfweacng in fahsr nuh met ke inkacnek in olwelah.
Sahngweng sin Leum
Siena liki tuhsruhk kuhpahsr nuh ke sahngweng kuht kwacna puhlakihn pa ma ma suhmuhslah uh ahkuhtweyac oacna “alu nu sin God” (Hebrews 12:28) kuh “sunakin Leum” (Job 28:28;Soakas 16:6; Isaiah 11:2–3). Tiac oacna sahngweng facluh ma oraclah sahngweng elyah, sensen, sin God pa sie kahsruh ke mihs, ahkpwacye, ac luhlahlfongi.
Tuh ma nuh kwewa kuh in wi ke sahngweng ac oreklac ac kahsrweyuck ke nguhn fuhkah?
Sahngweng suwohswohs nga srihke in ahkuhtweyac uh raunwelah sie puhla loal ke ahkfuhlwact, suhnak, ac motko ke Leum Jisus Kraist (liye Psalm 33:8; 96:4), ahkostwen nuh ke masap Lal (liye Deuteronomy 5:29; 8:6;10:12;13:4; Psalm 112:1), ac rahrah ke Nuhnuhnkuh Sahflah ac nuhnuhnkuh in Pahol. Ohinge, sahngweng sin God ac kapwack nuh ke sie kahlwem suwohs ke ma wolacna ac misin luhn Leum Jisus Kraist, sie kena in sang kena lasr nuh ke kena Lal, ac sie etwacack lah mukul ac muhtwacn nuh kwewa fah nuhnuhnkweyuck nuh ke ma koluk lalos sifacna ke Lwen in Nuhnuhnkuh (liye D&C 101:78; Ip Yohk ke Luhlahlfongi 1:2).
Oacna ke ma suhmuhslah uh ahkpwacye, sahngweng sin God “pa mutaweyen etauk” (Soakas 1:7), “inkanek nu ke etauk” ( Soakas 15:33), sie “lulalfongi ku” (Soakas 14:26), ac “sie unon in moul” (Soakas 14:27).
Nuhnak muhnahs etuh lah sahngweng sin God pa orekweni fototo nuh ke sie kahlwem luhn Nuhnuhnkuh Sahflah ac nuhnuhnkuh lasr kais sie nuh ke kena, nuhnak, kahs, ac mukwikwi lasr uh (liye Mosiah 4:30). Sahngweng sin Leum tiacna mukwikwi tahfuhluo ke tuhkuh nuh ye Muhtahl in nuhnuhnkweyuck. Nga tiacna luhlahlfongi lah kuht fah sahngweng Sel ke kuhtwena pacl. Sahyacna, tuh kuh in luhlahlfongi ye Muhtahl in sun ma na pwacye kacsr sifacna ac in eis sie etwacack suwohs (liye 2 Nephi 9:14; ac Alma 11:43) kema suhfal, kikiacp, ac kuhtasrihk lasr nuh kwewa. Sahflahiyac uh, ac fah wacngihn mwe ahkwoyac luhlah nuh sesr.
Mwet nuh kwewa suc moul kuh fah isuslac nuh facluh fah utuckuh in tu ye muhtuhn God, in nuhnuhnkweyuck Sel fal nuh ke orekma lalos lah wo kuh lah koluk (liye Mosiah 16:10). Fin kena lasr uh ma nuh ke ma suwohswohs ac orekma lasr uh wo, na acn in nuhnuhnkuh fah wolacna (liye Jacob 6:13;Enos 1:27; Moroni 10:34)). Ac ke lwen sahflah kuht fah opiiyucki nuh ke ma suwohswohs (liye Alma 41:6).
Ke ma sruhmuhnyuck uh, fin kena lasr uh fin ma nuh ke ma koluk ac orekma lasr uh suhfal, na acn in nuhnuhnkuh fah sie ma in sahngwengkihn. Kuht fah tiac kuh in ngwetwack nuh sin God lasr; na kuht ac luhngse liki na fin kuht kuh in sapkihn yot ac finohl uh in puhtatlac nuh facsr in okankuhtlac liki ye Muhtahl. (liye Alma 12:14). Ac ke lwen sahflah kuht fah eis usru luhn ma koluk lasr uh (liye Alma 41:5).
Oacna ke ahkfototoyeyucklac ke Ecclesiastes:
“Sunakin ac akfulatye God, ac akos ma nukewa El sapkin, mweyen pa inge sripa ma mwet uh orekla nu kac.
“God El ac nununku ma nukewa kut oru uh, finne wo ku koluk, ac finne ma orekla in lukma (Ecclesiastes 12:13–14).
Tamuhlwel ac tahmtahel wiyuck, in sahngweng sin God ahkwacngihnyelah sahngweng facluh uh. Ma ingacn ahksrihkye elyah lasr muh kuht suhfal ke ma luhn nguhn ac kohflah fal nuh ke enenuh ac kena luhn Leum. Ke ma pwacye, kuht koflah wo fal kuh srihkasrak nuh fin kuhtwena ma ke kuh ac mukwikwi lasr sifacna. Orekma ac kena lasr muhkwena uh tiac kuh in molikuhtlac. Tukun ma nuh kwewa kuht kuh in oruh (liye2 Nephi 25:23), kuht oreklac fohnlah muhkwena ke pahkotwen yohk ac kuhlwacng oasr ke kihsac in iwaclah ne tok ac ma pahtpaht luhn Mwet Lahngo (liye Alma 34:10, 14). Pwacyena, “kuht luhlahlfongi lah ke Iwaclah luhn Kraist, mwet nuh kwewa kuh in moullac, ke ahkostwen ke masap ac akwuck ke wosasuc uh” (Ip Yohk ke Luhlahlfongi 1:3).
In sahngweng sin God pa in luhngse ac luhlahlfongi in El. Ke kuht ahksuwohsye sahngweng lasr sin God, kuht ahksuwohsye luhngse lasr nuh Sel. Ac luhngse suwohs luhslah sahngweng nuh kwewa (liye Moroni 8:16). Nga olwelah lah lahm kahlwem ke sahngweng sin God fah ukwacack nguhna lohsr luhn sahngweng facluh uh (liye D&C 50:25) ke kuht ngwet nuh sin Mwet Lahngo, muhsaheack Facl oacna pwelucng lasr, ac fahsr nuh met ke inkacnek in olwelah Lal ke olwelah muhtahl.
Fahkwack Luhlahlfongi ac Olwelah
Nga luhngse ac ahkfuhlwactye Leum. Kuh ac mihslac Lal uh pwacye. El pa Mwet in Molwelah lasr, ac nga mwet lohoh lah El moul. Ac ke Srihpacl, insiyacsr tiac enenuh in fosrngah kuh sahngweng (liye John 14:27), ac kuht fah ahkinsewowoyeyuck in ahkmihsyelah sahngweng lasr uh. Nga fahkwack luhlahlfongi ke ine muhtahl luhn Jisus Kraist, amen.