Wo Na Pwacye ac Suwohs

Sel Elder Michael T. Ringwood

Ke Mwet Itngucul

Pweng wowo ke wosasuc luhn Jisus Kraist pa lah kena luhn insiacsr kuh in eklac ac srihpac lasr uh kuh in lutlutkihnyuck ac ahkwoyeyuck.

Koluk ohiyac, oasr pacl se ke moul luhk uh ke nga mokleyuck in kena ke sifac ac wal uh. Ma ingacn muhtwacwacack arlac fihsrwacsr. Ke nga ahkolah in kuhlwacnsapuh sie misin fohnlah, tamuhlwel mahtuh se wiyuck ah oreklac mwet kol fohn ke misin lal an. Nga lohng ma wowo puhs kacl ma nga tiac kuh in kahsruh tuhsruhk kena ma ingacn in fwack keik. Nga finsrakkihn ac finne pruhe nuh ke wal ingacn pacna.

Sesseslah ke kuloh, ke nga kuhlwacnsapuh misin luhk, nga lotwelah sie lesin na fokoko. Toeni tari ah, ahkacsmakihnyeyuck nga ke lesin sacn.

Ke Ohktohpa, Prestuhn Dieter F. Uchtdorf el fahk: “Ke moul luhk nohfohn, nga eis pacl wowo in aetuhi yurin kuhtuh mukul ac muhtwacn suhmaht ac lahlmwetmwet emet fin facluh uh. Ke nga fuhsr ah, nga fwefwelac ke mwet suc eis etwacack, ahksahfyelah, oraclah wo, ac ahkfuhlwactyeyuck facluh uh. Tuhsruhk ke yac uh somlah, nga muhtwacwacack in akihlen lah nga fwefwelac likina met ah sin nguhna wolacna ac ahkinsewowoyeyuck suc wo na pwacye ac suwohs uh.”¹

Mwet ahkfuhlwact luhk ke Puk luhn Mormon pa sie mwe srihkasrak suwohs ac nguhna ahkinsewowoyeyuck suc wo na pwacye ac suwohs. Shiblon el sie sin wen nahtuhl Alma Fuhsr. Kuht etuh tuhlihk mukul se wiyacl yohk Helaman, suc ukwe pahpah tuhmwacl oacna mwet liyacacng ma sihmlac uh ac mwet pahluh luhn God, ac Corianton, suc etweyuck oacna sie misineri suc enenuh kuhtuh kahsruh sin pahpah tuhmwacl ah. Nuh sel Helaman, Alma el suhmuhslah fuhs 77 (liye Alma 36–37). Nuh sel Corianton, Alma el orekmakihn fuhs 91 (liye Alma 39–42). Nuh sel Shiblon, wen infulwac nahtuhl, Alma el suhmuhslah muhkwena fuhs 15 (liyeAlma 38). Tuh kahs lal ke fuhs 15 ingacn fokoko ac kahsrweacng.

Ac inge, wen nuhtihk, nga luhlahlfongi muh nga fah engan yohk sum, ke srihpen mihslac lom ac luhlahlfongi lom nuh sin God; tuh ke kom sro nuh ke fuhsr lom in ngwet nuh sin Leum God lom, ohinge nga finsrak tuh kom fah ahkwot in liyacacng masap Lal; tuh insewowo el suc muhtweng ne ke sahflah.

Nga fahk nuh sum, wen nuhtihk, lah nga engan yohk sum tari, ke srihpen luhlahlfongi lom ac oaru lom, ac muhtweng lom ac mongfihsrwacsr lom inmahsrlon mwet luhn mwet uh”(liye Alma 38:2–3).

In weacng sramsramnuh sel Shiblon, Alma el oacyacpac sramsram kaclnuh sel Corianton. Alma el siyuck sel fin el tuni mihslac luhn tamuhlwel wiyacl, luhlahlfongi lal, ac oaru lal in liyacacng masap luhn God. Alma el siyuck sel Corianton fin Shiblon el oakiyac sie srihkasrak wo nuh sel (liyeAlma 39:1).²

Sikyak tuh Shiblon pa wen se ma kena in ahkinsewowoye pahpah tuhmwacl ac forfor oruh ma suwohs ke na srihpac suwohs likina nuh ke kaksyak, acn, kuh, ahkfuhlwact, kuh wal. Sahp Helaman el etuh ac ahkfuhlwactye ma se inge ke tamuhlwel wiyacl an, ke srihpen el sang nuh sel Shiblon ma sihmlac muhtahl el eis sin pahpah tuhmwacl ah. Pwacyena Helaman el luhlahlfongwel Shiblon ke srihpen el mwet, ac el fahsr suwohs ye muhtuhn God ac el kalweni in oruh wo, in liyacacng masap luhn Leum God lal (Alma 63:2). Oacna ke atac pwacye lal Shiblon uh, srihklac ma sihmlac kacl ke pacl se el eis ma sihmlac muhtahl uh nuh ke el sang nuh sel Helaman wen nahtuhl Helaman (liye Alma 36:11).

Shiblon el wo na pwacye ac suwohs. El pa mwet se ma kihsackuhnlah pacl, talan, kuh lal in kahsruh ac ahkkweye mwet sahyac ke srihpen luhngse se nuh sin God ac mwet wiyacl uh (liyeAlma 48:17–19;49:30). El ahkuhtweyucki arlac suwohs ke kahs lal Prestuhn Spencer W. Kimball: “Muhtwacn ac mukul wowo uh pacl nuh kwewa rahrah yohk in kuhlwacnsap likina in eis wal.”³

Ke sie facluh ma kaksyak, acn, kuh, ahkfuhlwact, ac wal uh sukok ke kuhiyac nuh kwewa, nga ahkfuhlwactye nguhna wolacna ac ahkinsewowoyeyuck suc wo na pwacye ac suwohs, mwet suc moklweyuck ke sie luhngse luhn God ac mwet tuhlan lalos, muhtwacn ac mukul wowo ingacn suc pa “rahrah yohk in kuhlwacnsap likina in eis wal.”

Mihsenge oasr kuhtuh mwet suc oruh kuht in luhlahlfongi suk lasr nuh ke srihpac kuh in ahkwoye muhkwena ke eisyacn wal ac kuh. Tuhsruhk, kuloh na pwacye, puhs sesr suc tiacna moklweyuck ke ma inge. Elos sokwack srihpac in suk in wo na pwacye ac suwohs. Nga sokwack kain mwet inge ke moul se inge ac ke alu pucspucs. Ac nga sokolosyak ke pihsac luhlahp inmahsrlon mwet eklac pwacye fahsr tukun Kraist uh.⁴

Nga ahkfuhlwactye mwet suc kwacfweacng in kuhlwacnsap ke kais sie wik ke ward ac pracns fin facluh nohfohn ke oruh yohk in ahkfalye kunohkohn uh. Tuhsruhk kunohkohn uh tuhkuh ac som. Usrnguck yohk nuh sihk pa mwet puhs suc wacngihn kunohkohn na pwacye la ma sokwack inkacnek in kuhlwacnsapuh ac sruhk mwet sahyac pacl nuh kwewa. Sie tahmtahel tuhkuh sa nuh ke alu ah in tahkuhnlah siyah uh ac muhta tukun alu uh in ahknwacsnwacsyelah lohm alu ah. Sie tahmtahel ke srihpac sulaclah sie siyah sisken tahmtahel kun se ke ward lal ah tiac in painuhl muhkwena tuh in oacyacpac elan kuh in onkihn on in alu an yohk in muh muhtwacn kun sacn kuh in lohng kahs an ac wi onkihn. Kom fin lohacng ahkwoyac nuh ke ward kuh pracns lom an, kom fah sokwack kain srihkasrak inge. Kwacna oasr mempucr suc oacna in etuh mwet ma enenuh kahsruh uh ac ngac in sang uh.

Sahp lesin se emet luhk ke Mwet Luhlahlfongi na pwacye suwohs uh lutiyucklac ke nga sie misineri fuhsr ah. Nga som nuh ke sie eria wi sie elder nga tiacna etuh. Nga lohng misineri sahyac uh sramsram ke ohiyac ma el soenna eis kuhtwena kunohkohn in mwet kol lac ac ohiyac ma el muhnahs kac kahs Korea sahyacn el muhta ke muhtuhnfacl sacn ke pacl loes. Tuh ke nga muhtwacwacack in etwaclah elder se inge ah, nga sokwack lah el pa sie misineri ahkostwen ac yohk luhlahlfongi la emet nga etuh uh. El lutlut ke pacl in lutlut uh; el orekma ke pacl in orekma uh. El som liki lohm ah ke pacl fal acfohlohk ke pacl fal. El oaru ke lutlutkihn kahs Korea finne kahs an arulacna upac nuh sel.

Ke nga akihlen fahk nga lohng ma tiac pwacye an, nga puhla oacna misineri inge nuhnuhnkweyuck suhfal ke tiacna wo. Nga ke fahk nuh sin misin na fohn sac ma nga sokwack ke elder se inge. Nga akacsruhi yurin misin prestuhn luhk ah kena luhk in ahksuwohsyelah ma tahfonglac se inge. Top lal ah pa, “Pahpah Lucng El etuh lah mukul fuhsr se inge pa sie misineri oraclah wo, ac nga oruh oacna.” El fahk pac, “Ac ingena kom etuh pac, na suc pac yohk srihpac uh?” Misin prestuhn suhmaht se inge lutiyuc ma yohk srihpac ke kuhlwacnsap uh, ac tiac pa in kaksyak, acn, kuh, ahkfuhlwact, kuh wal. Ma se inge pa sie lesin na wowo nuh sin sie misineri fuhsr suc arlac lohacng yohk nuh ke sifac uh.

Ke lesin se inge ke nuhnak uh, nga muhtwacwacack in esamwack moul luhk ac liye fususiyen pacl nga mokleyuck sin mukul ac muhtwacn suc ke pacl sac tiac sruok oacna sie sifac kuh acn. Mukul wowo inge luti seminary ke yac luo kuh tolu muhkwena, tuhsruhk el mokleack insiyuck ke sie inkacnek ma kahsrweyuc eis sie fahkwack luhlahlfongi. El tiac mwet luti pwengpweng se emet ke lutlut ah, tuh el kwacna ahkolah ac mokleyuck lal nuh sihk uh fokoko ac loes. Sie sin kuhtuh pacl nga liye mukul se inge ke yac 40 ke el lutiyuc ah pa ke el tuhkuh in liyeyuc ke misac luhn pahpah tuhmuhk ah. Pwacyena, mukwikwi se ingacn tiac mokleyuck ke sifac kuh kuh.

Nga ahkfuhlwactye mwet luti kwacfweacng ac mwet puhs oacna el suc wo na pwacye ac suwohs. Nga ahkfuhlwactye mwet luti Sacnri Skul suc tiac luti muhkwena ke pacl in kuhlahs ke Sacnri tuh oacyacpac luti ac mokle tuhlihk lutlut inge pacna ke solwaclos in wi sucu lal ah ke mongo in lututacng. Nga ahkfuhlwactye mwet kol luhn mwet fuhsr suc wi mukwikwi ke sritacl ac facsin luhn mukul ac muhtwacn fuhsr ke ward lalos an. Nga ahkfuhlwactye mukul suc suhmuhslah pohloh kahs in ahkkweye nuh sin mwet tuhlan lalos ac muhtwacn se ma tena suhpwacl lwacta ke Kristmas ke mail ah tuh sifacna uslah nuh sin mwet ke sucu ac kawuck suc enenuh sie muhtwacta uh. Nga ahkfuhlwactye tamuhlwel suc pacl nuh kwewa us mwet tuhlan lalos ke stosah an ke pacl upac luhn mwet tuhlan Alzheimer sacn—sang kwewa nuh selos sie eklac yohk enenuh lalos.

Ma inge tiacna fal nuh ke kaksyak kuh ahkfuhlwact. Mukul ac muhtwacn inge tiacna moklweyuck ke kuh in eis sifac kuh wal uh. Elos pa mwet tuhma lutlut luhn Kraist, forfor kalweni in oruh wo, oacna Shiblon, elos srihke in ahkinsewowoye Pahpah tuhmalos Lucng.

Ma inge ahksuhpwacryeyuc ke nga lohng kuhtuh suc tui in kuhlwacnsap kuh finne tui in wi alu ke srihpen elos fihlfihllac liki kunohkohn se kuh puhla tiac enenweyuck nuh ke sie wal kuh sifac. Nga finsrak elos fah sie lwen lotwelah lesin se pacna nga lotwelah ke nga misineri fuhsr se ah—lah kuhlwacnsap ma yohk srihpac emet uh pa kwacna akihlenyuck sin God muhkwena. Ke ukwe lasr ke kena lasr sifacna uh, yac kuht muhlkuhnlah kena luhn God?

Kuhtuh kuh in fahk, “Tuh arlac upac ma nga enenuh in oruh in eklac oacna mwet kom ahkuhtweyac an.” Pweng wowo ke wosasuc luhn Jisus Kraist pa lah kena luhn insiyacsr kuh in eklac ac srihpac lasr kuh in lutiyuck ac ahkwoyeyuck. Ke kuht pacptaislac nuh ke mwet luhlahlfongi pwacye luhn God, kuht muhtwacwacack ohiyac in eklac mwet moul sasuc (liye2 Corinthians 5:17;Mosiah 27:26). Kais sie pacl kuht ahksasucye olwelah ke pacptais lasr ke eisyacn kuhfa luhn Leum, kuht step se fototoeni nuh ke finsrak yohk sacn.⁵Ke kuht kampare nuh ke olwelah ingacn, kuht lwelah kuh in yoksrah yurin mwet suc yoksrah ac in ahkkweye mwet enenuh ahkkweye(liyeMosiah 18:9). Ke olwelah ingacn, kuht sokwack pahkotwen ma lwelah kuht in kuhlwacnsapuh God ac liyacacng masap Lal uh, weacng luhngse God ke insiyacsr nohfohn ac luhngse mwet tuhlan lasr oacna kuht sifacna.⁶Ke olwelah ingacn, God ac Kraist karihngihn kuht in muh kuht karihngihn mwet suc enenuh karihngihnyuck lasr uh (liyeMosiah 4:16; liyepac fuhs 11–15).

Ma se fanna nga kena ke moul uh pa in ahkinsewowoye pahpah tuhmuhk—kwewana fin facluh ac inkuhsrao—ac in oacna Shiblon yohk.⁷

Nga kuloh nuh sin Pahpah Lucng ke kain nguhna oacna Shiblon suc srihkasrak la use nuh sihk—ac kuht nohfohn—finsrak. Ke moul lalos uh, kuht liye sie mwe lohoh luhn sie Pahpah Lucng luhngse ac sie Mwet Lahngo luhngse ac pahkotwen. Nga sang pac fahkwack luhlahlfongi luhk nuh ke ma lalos wi sie olwelah in kwacfweacng in oacna elos yohk, ke inen Jisus Kraist, amen.

Mwe kahsruh

1. Dieter F. Uchtdorf, “Lord, Is It I?”Ensign kuh Liahona, Nohfuhmpuh 2014, 58; mwe ahkuhtweyac wo ituckyang

2. Helaman el tiacna som in luti mwet lal Zoram ah, oruh kuht etuh lah Alma el sruhmuhnuhl Shiblon ke el fahk “tamuhlwel wiyom” (liyeAlma 31:7;39:2).

3. Spencer W. Kimball, “The Role of Righteous Women,”Ensign, Nohfuhmpuh 1979, 104.

4. “Leum El luti kuht lah ke kuht eklac na pwacye nuh ke wosasuc Lal uh, kena luhn insiyacsr fah eklac liki nuhnkuh sifacna nuh ke sie kena in mokle mwet sahyac ke elos oraclah wo nuh ke moul ma pahtpaht. In eis eklac se ingacn, kuht kuh in pruhe ac orekma ke luhlahlfongi in eklac mwet moul sasuc oreklac kuh ke Iwaclah luhn Jisus Kraist. Kuht kuh in muhtwacwacack kepruhe nuh ke luhlahlfongi in auliyak ke nuhnkuh sifacna ac nuh ke mwe sang in karihngihn mwet sahyac uh yohk liki kuht sifacna. Kuht kuh in pruhe nuh ke kuh in sislah inse fuhlwact ac sok (Henry B. Eyring, “Testimony and Conversion,”Ensignkuh Liahona, Fepweri 2015, 4–5).

5. “[God] El moul kawihl ac suwohs. Kuht moul in mahno ac sesuwohs. Ne ohinge kuht suk inkacnek finne ke moul in mahno ma use kuh nuh sesr in tuhkweni Yohrohl ke nguhn. Ke oruh ma inge kuht eis kuhtuh lwelah nuh ke kwewana pahkotwen ac fuhlwact ke kuh Lal. Pacl yohk srihpac ingacn pa ke … pacptaislac ac ahkkweyeyucklac … [ac] ipeis ke aholyacn kuhfa luhn Leum (Jeffrey R. Holland, To My Friends [2014], 80).

6. “Mwet Luhlahlfongi ke Lwen-sahflah suc liyaclos sifacna ke ma nuh kwewa elos oruh oacna tuhlihk nuhtin God oraclah ac liyacacng masap uh. Plwacn in molwelah pa mahkiyucki ke olwelah uh. Kuht olwelah in ahkos masap uh. In fohlohkihn, God El olwelah mwe insewowo ke moul se inge ac nuh tok ma pahtpaht. El suwohs ke ma el enenuh, ac el suwohs ke liyacacng kahs lal uh. Ke srihpen el luhngse kuht ac ke srihpen srihpac luhn plwacn sac pa in eklac oacna el, el enenuh suwohswohs in kuht. Ac olwelah el oraclah nuh sesr pacl nuh kwewa weacng kuh in kapwack nuh ke kuhiyacsr in liyacacng masap uh. El oruh kuh nuh sesr in etuh masap lal uh. Ke kuht srihke in insiyacsr nohfohn in sun ohiyac lal uh, el use nuh sesr wi luhn Nguhn Muhtahl uh. Ke ac fohlohk uh kwewana ahkyohkye kuh in liyacacng olwelah kwacfweacng ac in akihlen ma wo ac pwacye uh. Ac ma ingacn pa kuh in lotwelah, kwewana ke lutlut in mahno lasr uh ac ke lutlut ma kuht enenuh nuh ke ma pahtpaht uh” (Henry B. Eyring, “A Child of God” [Brigham Young University devotional, Ohktohpa 21, 1997], 4–5;speeches.byu.edu). Liye pac David A. Bednar, “Bear Up Their Burdens with Ease,” Ensign kuh Liahona, Mei 2014, 87–90.

7. Ke ma nga kuh in esam, nga kena ahkinsewowoye pahpah tuhmuhk. Ke nga kapkapwack ac eis sie fahkwack luhlahlfongi nga oacyacpac eis sie kena in ahkinsewowoye Pahpah Lucng. Tok ke moul luhk uh, nga lotwelah kacl Shiblon ac oraclah sie finsrak ke moul luhk in oacna el.