2010–2019
Puk luhn Mormon se: Fuhkah Oyac Moul Lohm Finne El Wacngihn?
Ohktohpa 2017
2:3

Puk luhn Mormon Se: Fuhkah Oyac Moul Lohm Finne El Wacngihn?

Sel Prestuhn Russell M. Nelson

Prestuhn ke U luhn Mwet Sap Singucul

Ke ohiyac usrnguck ac suwos, Puk luhn Mormon luti kuht ke Jisus Kraist ac wosasuc Lal.

Ke yac 1986, Nga suliyuck in sang mwe luti sacohk se ke university se fin acn Accra, Ghana. Ke oyac ah nga ohsun yurin mwet kafucrmacn fuhlwact, wiwina sie tokosra luhn u srihsrihk ke Africa. Ke kuht muhtwacta met liki mwe luti ah, tokosra sramsram nuh sihm muhkwena ke mwet luhngaslah lal, suc luhngaslah keik. Nga topuk nuh ke mwet luhngaslah se, ac na mwet luhngaslah el luhngaslah top luhk nuh sel tokosra se.

Tukun mwe luti luhk, tohkohsrah se fahsruh nuh yuruk, tuhsruhktuh pacl se inge el sefanna tuhkuh wacngihn mwet luhngaslah lal. Nuh ke lut luhk, el sramsram ke kahs English suwohswohs—Muhtwacn kiyacl tohkohsrah el mwet English, Nga kena fahk!

Tohkohsrah el oacna fohsack kuhtuh. “Suc pwacye kom an?” el siyuck.

Nga topuk, “Nga pa sie Mwet Sap ahkkweye luhn Jisus Kraist.”

Tohkohsrah se siyuck, “Yac kom kuh in luti nga Kacl Jisus Kraist?”

Nga topuk ke sie kihsensiyuck: “Lwelah ngan siyuck ma kom etuh tari Kacl?”

Top luhn tohkohsrah ahkkahlwemye lah el mwet lutlut nuh pwacye ke Pwacpuhl ac sie mwet suc luhngsel Leum.

Ac na nga siyuck sel finne el etuh ke luti luhn Jisus Kraist nuh sin mwet fin acn Macrike mahtuh.

Ke nga nuhnkuh, el tiacna.

Nga sruhmuhnyuck lah tukun Iwaclah ac Sifil Moulyak lal Mwet Lahngo, El tuhkuh nuh sin mwet luhn Macrike mahtuh, yac El lotwelos wosasuc Lal. El akiyac Alu lal ac siyuck mwet tuhma lutlut Lal in karihngihn ma sihmlac ke orekma Lal nuh selos.

“Ma sihmlac inge,” nga kampare, “pa ma kuht etuh ke Puk luhn Mormon. El pa sie wuhlweacng sahyac luhn Jisus Kraist. El pa ma suhmuhslah oacna sie nuh ke Pwacpuhl Muhtahl.”

Ke pacl se inge, tohkohsrah kenayuck yohk. Nga forlah nuh ke prestuhn luhn misin ma wi yuc ac siyuck sel fin oasr sie Puk luhn Mormon mwesahs yohrohl. El us tuhkuh sie ke briefcase lal.

Nga ikacslah el nuh ke 3 Nephi sapta 11, ac tohkohsrah se ac nga tuhkweni riti mwe luti Lal Mwet Lahngo nuh sin mwet Nephi. Na nga sang nuh sel sie Puk luhn Mormon. Top lal fah oasr ke nuhnak ac insiyuck ne tok. “Kom kuh in use nuh sik diamonds kuh rubies, tuhsruhk wacngihn ma sacohk nuh sik liki mwe etuh se inge ke Leum Jisus Kraist.”

Tukun el puhlakihn kuh ke kahs luhn Mwet Lahngo ke 3 Nephi, tohkohsrah se fahkwelihk, “Nga fin eklac ac wi Alu an, nga fah us tuhkuh u luhk nohfohn yuruk.”

“Oh, Tohkohsrah,” Nga fahk, “ma inge tiacna orekma ke kain sacn. Eklac se pa ma luhn mwet se sifacna. Mwet Lahngo El luti nuh sin mwet Nephi sie ke sie. Kais sie mwet se eisyuck mwe loh se ac luhlahlfongi ke wosasuc luhn Jisus Kraist.”1

Jisus Kraist luti yurin mwet Nephite

Tamuhlwel ac tahmtahel wiyuck, yac sacohkiyacn Puk luhn Mormon nuh suwos? Finne mwet se sang diamonds kuh rubies kuh Puk luhn Mormon, piyac sulaclah lom? Pwacyena, piyac pa sacohk yohk nuh suwos?

Esam ke toeni luhlahp in lututacng ke Sacnri ke Eprel 2017, Prestuhn Thomas S. Monson kwacfe nuh sin “kais sie sesr in lutlut ke pruhe, ac motko ke Puk luhn Mormon kais sie lwen.”2 Mwet pucspucs topuk nuh ke kwacfe luhn mwet pahluh lasr ah.

Lwelah ngan fahk lah nga kuh muhtwacn fuhsr yac alkosr Riley kwewana tiacna etuh kuhtwena mwet oraclah petsac kacsr. Akihlen lah Riley el riti Puk luhn Mormon lal ke kahsruh sin sie bookmark ma oasr kahs “I Am a Child of God” kac.

Prestuhn Nelson ac Riley elos lutlut ke ma suhmuhslah

Oasr ma kuh sikyak ke tuhlihk nuhtin God sokwack in yohkwelihk etuh lalos ke El ac Wen Nahtuhl. Wacngihn acn ke ma pwacye inge lutiyuck suwohswohs ac ke kuh likina Puk luhn Mormon.

Ke kwacfe lal Prestuhn Monson mahlwem ohnkohsr tari ah, nga srihkeyuck in ukwe kahs in kahsruh lal. Ke kuhtuh ma sahyac, nga oraclah list ma Puk luhn Mormon pa, ma el ahkkweye, ma el ahksuhmuhiye, ma el ahkpwacyeye, ma el ahkkahlwemye, ma el sang. Ngwetlah nuh ke Puk luhn Mormon ke ohiyac inge use nuhnak ac puhla wo! Nga suli kowos kais sie in oruh oacna sie.

Ke mahlwem ohnkohsr fahsr inge, nga suli kuhtin u–wiwina Tamuhlwel wiyuck ke U luhn Mwet Sap Singucul Luo, misineri fin acn Chile, ac prestuhn luhn misin ac muhtwacn kiyaclos oracni fin acn Argentina–in nuhnkuh ke kihsensiyuck tolu lah nga fah usot in nuhnkuh nuh ke mihsenge:

Ma se met, yac moul lom fuhkah finne wacngihn Puk luhn Mormon? Ahkluo, yac kowos fah tiac etuh? Ac ahktolu, meac suwos wacngihnlac?

Top ke engan ke u inge tuhkuh sin insiyaclos suwohs. Oasr inge kuhtuh topuk lalos:

“Finne wacngihn Puk luhn Mormon, nga ac fohsack nuh ke mwet luti lainyuck ac nuhnak ke kain ma puhkantwen. Nga ac oacna nga met liki nga konwacack Alu uh, ke nga sokwack ke etwacack, luhlahlfongi, ac finsrak.”

Sie sahyac fahk: “Nga fah tiac etuh ke kunohkohn Nguhn Muhtahl nuh ke moul luhk uh.”

Sahyac: “Nga fah tiac kahlwem suwohs srihpac luhk fin facluh!”

Sie mwet topuk fahk: “Nga fah tiac etuh lah oasr moul kapwack tukun moul se inge. Mweyen Puk luhn Mormon, nga etuh pwacye lah oasr moul tukun misac. Pa inge finsrak emet kuht orekma nuh ke.”

Top se tuhfahna tari ah oruh nga in nuhnkuh ke moul luhk ke yac pucspucs som lah ke nga mwet ono fuhsr. Sie kunohkohn luhn mwet ono, ke kuhtuh pacl, pa in sramsram nuh sin sucu ke mwet luhngse lalos misac. Ke lohm ono nga orekma ke, infuckihl sacohk muhsahyak ke padded walls in acn se mempucr luhn sucu kuh in eis pacng inge. Oyac, kuhtuh mwet ahkkahlwemye ahsor lalos ke fihskiyac sifaclos nuh ke padded wall inge. Nga kena yohk in luti mwet inge lah misac, finne upac nuh selos luhngseyuck suc srackna moul, pa ma yohk srihpac nuh ke moul in mahno lasr. Misac lwelah kuht in kapwack nuh ke moul tok.3

Sie mwet topuk nuh ke kihsensiyuck luhk ac fahk: “Wacngihn moul luhk nuh ke nga riti Puk luhn Mormon. Finne nga pruhe ac fahsr nuh ke alu moul nohfohn luhk, Puk puhn Mormon kahsrweyuc in sramsram wo yurin Pahpah Inkuhsrao ke pacl se met.”

Another said: “Without the Book of Mormon, I wouldn’t understand that the Savior not only suffered for my sins, but He can heal my pains and sorrows.”4

Ac sie pac sahyac: “Nga fah tiac etuh lah oasr mwet pahluh in kol kuht.”

Oruh kuht sifacna ke pacl nuhkwewa lutlut nuh ke ma pwacye luhn Puk luhn Mormon kuh in eklac moul lom. Sie misineri sin tuhlihk luhn tuhlihk nahtuhsr, Tahmtahel Olivia Nelson, olwelah nuh sin mwet investigator lah el fin riti ke Puk luhn Mormon lwen nuhkwewa, scores ke test lal ke university fah wolac. El oruh, ac elos wolac.

Tahmtahel Olivia Nelson

Tamuhlwel ac tahmtahel sacohk wiyuck, nga fahkwelihk lah Puk luhn Mormon pa kahs pwacye luhn God. El kapsrwacni top nuh ke kihsensiyuck yohk ke moul. El luti ke wosasuc luhn Kraist.5 El yohkwelihk ac ahksuwohsye ma pwacye “fal nuh ke fihsrwacsriyac”6 ma tuhlac ke yac pucspucs ac luhngaslah ekahsr luhn Pwacpuhl.

Puk luhn Mormon on sang kahlwem nohfohn ac wal ke Iwaclah luhn Jisus Kraist ma kuh in konwacack. El luti meac kalmacn pwacye luhn sulpac isuslac. Ke Puk luhn Mormon kuh etwaclah ke oracni luhn tuhlihk Israel. Kuht etuh efuh kuht oasr fin facluh. Ma inge lutiyuck ke Puk luhn Mormon wo liki kuhtwena puk sahyac. Kuh nohfohn luhn wosasuc luhn Jisus Kraist oasr ke Puk luhn Mormon. Sahflah.

Puk luhn Mormon ahkkahlwemye mwe luti luhn Mwet Kol ac ahkkahlwemye mukwikwi luhn mwet lokoalok lasr.7 Puk luhn Mormon el luti wosasuc pwacye in eislah oruh luhn alu stuhuh–oacna mukwikwi stuhuh luhn pacptais tuhlihk ahwowo.8 Puk luhn Mormon use nuh sesr srihpen moul ke kwacfe lal in motko ke kuh in moul ma pahtpaht ac “engan wacngihn sahflahiyac.”9 Puk luhn Mormon el kuhnaoslah luhlahlfongi stuhuh lah engan tuhkuh sin ma koluk10 ac lah wo sifacna pa ma enenuh sefanna in fohlohk nuh yurin God.11 El oacyacpac kuhnaoslah nuhnak stuhuh lah fwackyuck tulokihnyac ke Pwacpuhl ac lah inkuhsrao tiac sramsram mihsenge.

Ke nga nuhnkuh ke Puk luhn Mormon, nga nuhnkuh ke kahs se kuh. Ma pwacye ke Puk luhn Mormon pa oasr kuh in ahkkweye, ahkmihsye, fohlohk, pahkomuhta, ahkfokokoye, karihngihn, ac ahkengan nguhnasr.

Tamuhlwel ac tahmtahel sacohk wiyuck, nga olwelah lah ke kowos lutlut ac pruhe ke Puk luhn Mormon lwen nuh kwewa, kom ac oraclah sulwaclah wo—lwen nuh kwewa. Nga olwelah ke kom motko ke lutlut lom, window nuh ke inkuhsrao fah ikacslah, ac kom fah eis top nuh ke kihsensiyuck lom sifacna ac kolyuck nuh ke moul lom sifacna. Nga olwelah ke kom lutlut lwen nuhkwewa ke Puk luhn Mormon, kom kuh in ahkkweye kom liki ma koluk luhn lwen se, na ma koluk se luhn pornography ac kuhtuh mwe sruhf upac sahyac.

Kuhtwena pacl nga lohngwack mwet se, wi pac nga, fahk, “Nga etuh Puk luhn Mormon pa pwacye,” nga kena fahkwelihk, “Pa wona, tuhsruhk ma inge tiacna fal!” Kuht enenuh in puhla, yac insiyacsr “nohfohn” ,12 lah Puk luhn Mormon pa kahs pwacye luhn God. Kuht enenuh in puhla ma inge fokoko lah kuht tiac ke in moul ke lwen fin el wacngihn. Sahp nga fah orek kuhtuh kahs luhn Prestuhn Brigham Young (1801–77) ke fahk, “Nga finsrak puhsrek pa puhsrwen luhn puhpahl itkohsr in ngwetack mwet an”13 nuh ke pwacyeiyacn ac kuh luhn Puk luhn Mormon.

Kuht enenuh in oacna misineri fuhsr se inge ma kuhlwacnsap fin acn Europe suc puhla fokoko ke pwacyeiyacn Puk luhn Mormon lah el kahsruhsr yurin puk muhtahl an nuh ke mukul fin ac park ma elos tuhfahna konwacack.

Misineri kahsruhsr

Nga luhlahlfongi lah Joseph Smith pa met ac pa mihsenge mwet pahluh se ke fihl sahflah se inge. El pa suc, ke mwe sang ac kuh luhn God, luhngaslah puk muhtahl se inge. El pa puk lah fah kahsruh in ahkolah facluh nuh ke Tuhkuh Ahk Luo luhn Leum.

Nga fahkwelihk lah Jisus Kraist El pa ac Wen moul Nuhtin God Tuhmasr moul. El pa Mwet Lahngo lasr, Mwet Molwelah lasr, Srihkasrak wolacna lasr, ac Mwet sramsram kacsr yac muhtuhn Pahpah. El pac Messiah olwelah, Messiah moul, ac Messiah ke millennium. Nga fahkwelihk ke nguhnihk nohfohn lah ke ohiyac usrnguck, Puk luhn Mormon luti kuht ke Jisus Kraist ac wosasuc Lal.

Nga etuh lah Prestuhn Thomas S. Monson el pa mwet pahluh se luhn God fin facluh mihsenge. Nga luhngse el ac ahkkweye el ke insiyuck nohfohn. Nga pa fahkwack ke inen muhtahl luhn Jisus Kraist, amen.

List soko lal Prestuhn Nelson ke Puk luhn Mormon

Puk luhn Mormon pa:

  • Sie wuhlweacng Sahyac luhn Jisus Kraist. Mwet sihmlac yohk ke—Nephi, Jacob, Mormon, Moroni—ac mwet luhngaslah lal, Joseph Smith, nuh kwewa pa mwet loh luhn Leum.

  • Ma suhmuhslah ke orekma Lal nuh sin mwet ma muhta fin acn Macrike mahtuh.

  • Pwacye, oacna fahk ke Leum El sifacna.

Puk luhn Mormon ahkkweye:

  • Ohiyac sifacna Lal Pahpah Inkuhsrao ac Wen Nahtuhl, Jisus Kraist.

  • Enenweyuck luhn puhtatlac lal Adam ac lahlmwetmwet luhn Eve, lah mwet kuh in eis engan.

Puk luhn Mormon ahksuhmuhiye ma fahk lah:

  • Fwackyuck tilac ke Pwacpuhl.

  • Tuhlihk ahwowo enenuh in pacptaislac.

  • Engan kuh in konwacack liki ma koluk.

  • Ma wo sifacna pa fal in eis moul ma pahtpaht. Akwuck ac olwelah pa enenuh.

  • Puhtatlac lal Adam ahkkolukye mwet ke “ma koluk se met.”

Puk luhn Mormon ahkfalye ma palye luhn pwacpuhl lah:

  • “Kutu pac sheep” fah lohng Puhsrwacl.

  • God fah oruh “sie orekma wolacna ac sacohk,” kahskahs “ye fohk uh me.”

  • “Polosahk se ma aol Judah: ac Polosahk se ma aol Joseph” fah oracni in sie.

  • Israel ma fahsrwelihk ah fah sulpac fahsrweni “ke lwen-sahflah” ac ohiyac ma inge sikyak.

  • Acn ke sie inheritance nuh sin tuhlihk nuhtin Joseph pac acn Western Hemisphere.

Puk luhn Mormon ahkkahlwemye kahlwem ke:

  • Moul met liki moul inge lasr.

  • Misac. El pa yohk srihpac nuh ke plwacn wolacna ke engan luhn God.

  • Moul fahsruh, ma muhtwacwack fin acn paradise.

  • Yac mahno ma sifil moulyak, sulpac ohsun yurin nguhn lal, ekihn ikwac ac nguhn ma pahtpaht.

  • Yac nuhnuhnkuh lasr sin Leum fah sikyak nuh ke mukwikwi lasr ac kena luhn insiyacsr.

  • Yac akwuck enenuh in sikyak: oacna, pacptais, sackracmacn, ac sang Nguhn Muhtahl.

  • Iwaclah luhn Jisus Kraist.

  • Sifil Moulyak.

  • Srihpen yohk luhn lihpufacn.

  • Ohiyac ma pahtpaht luhn pristut.

  • Yac ohiyacn mwet oruh oacna kuh luhn kahs se liki kuh luhn sword soko.

Puk luhn Mormon ahkkahlwemye mwe etuh kuht nihkihn met:

  • Pacptais oreklac met liki Jisus Kraist El isuslac.

  • Tempuhl muhsahiyuck ac orekmakihn sin mwet fin acn Macrike mahtuh.

  • Joseph, tuhlihk ahksingucul sie luhn Israel, palye ke srihpac pahluh luhn Joseph Smith.

  • Nephi (ke 600–592 BC) palye sukyuck ac konwacack luhn acn Macrike.

  • Ma fihsrwacsr ac muhtahl ke Pwacpuhl tuhlac.

  • Kahlwem luhn Kraist pa sang nuh sin mwet nuhkwewa.

  • Yohk srihpac sukohsohk in sulaclah sifacna ac enenuh in ma lain ke ma nuhkwewa.

  • Sensenkihnyuck nuh ke “orekma lukmac.”