Gadad Gubin Thingar da Feked Fithngan ni Ke Pii’ e Chitamingiy Dakean Daed

Keb rok Elder Paul B. Pieper

Ko fare Medlipi Ragag

Fithngan fare Tathapeg e bay gelngin nib gel mab ga’fan. Karimus e re ngochol ni thap e rayog riy.

Fare en e wik nike thimur, mug un ngguy e tawfe rok e bitir ni meruk e duw roraed. Kar tabab gaed i fil mornga’agen fare gospel rok Yesus Kristus ko galabthir nge pi sensey roraed. Fare awoch ko mich roraed Ngak e ke tabab ko ga’. Ma chiney e yaed ba adag ni ngad leaked nga fithik e raen ko tawfe ni ngan mang chonggin e Galasia Rok nikan fulweg. Nap’an ni gube yaliy raed ni karm’ad ko falfalen’, mug tafney nag rogon ni yaed manang fan reb e m’ag ko tawfe: m’ag roraed ni ngar feked fithngan Yesus Kristus nga dakean raed.

Tabolngin, i yoeg Got nib ga’fan fithngan Yesus Kristus u lane tunom Rok ni gan ngodaed. Ba angel e fil ko chitamngdaed ni somm’on, i Adam ni nge rrin’ gubin ban’en u dakean fithngan fare Faak, ma nge kalngan’ me meybil ngak Got u dakean fithngan fare Faak ni machalbog.¹

I Benjamin ni Pilung nib profet u lan fare Babyor ku Mormon e fil ko gidii’ rok ni ga’ar, “Dakuriy rebe fithingan ni kan piiʼ ara kureb e kanawoʼ ara banʼen nra yog ni nge thap e gidiiʼ riy.”²

I yoeg Somoel e biney e riyul’ ngak Joseph Smith nib profet Rok nap’an ni yoeg ngak ni Yesus Kristus e ba ngochol ni pi’ e Chitamangiy, ma dariy reb e ngochol ni rayog ni nge thap e gidii’ riy.³

Ulane rran rodaed, me President Dallin H. Oaks nike fil ngodaed ni “pi’in nima athamgiliy e mich rok u dakean fithngan Yesus Kristus … me yag e m’ag ngoraed … e bay mat’won ko fare miligach ni bayul rok Yesus Kristus.”⁴

Chitamangdaed nu Tharmiy e ba adag ni ngarin nang fan ni fithngan Faak, ni Yesus Kristus, e gathi go’ ba ngochol nibay u fithik gubin e ngochol. Fithngan fare Tathapeg e bay gelngin nib thil ma baga’ fan. Karimus e re ngochol ni rayog e thap riy. Biney e riyul’ ni un leam nag ko gubin e duw, ma Chitamangdaed e ma dag ko gubin e pifaak ni bay e kanawo’ ni ngan sul Ngak. Machane kanawo’ ni ri bay e gathi be yoeg ni sul rodaed e gathi ma yib nib paey. Ke yoeg Got ni bitbit rodaed e baga’ fan ko gubin e gidii’ ni ngar feked fare ngochol nike pi’ e Chitamangiy nga dakean raed.⁵

Ra ngeyog e gelngin e thap ngodaed nima yib u dakean fithngan Kristus, ma ngarin “sobutan’ niged [gadaed ] u pow’chen Got man nib nike kirbaen’ gumircha’ey make kirbaen’uy ma yiba adag ni ngan feek fithngan Yesus Kristus nga dakeaney” ma yag, ni boed e pi fagar rog ni meruk e duw roraed, nikan “thapeg ko tawfe nga lane galasia Rok.⁶

Gubin e pi’in ni ba adag ni ngan feek fithgan fare Tathapeg nga dakean raed e ngari yag rog me thapeg fare gam’ing ko tawfe nibe dag ngak Got e n’en nikar mel’eged.⁷ Machane tawfe e kemus ni somm’on riy.

Fare thin ni feek e gathi darni mithmith. Ba thin ni yibe mithmith ni bo’or fan.⁸Boed ni, m’ag rodaed ni ngad feked fithngan Yesus Kristus nga dakean daed e ba t’uf ni ngan mithmith ma bo’or rogon.

Woed ni susun, reb fan fare thin ni feek e ngan feek fa ngan thapeg nga fithik i dowaey, ni boed nap’an ni kan feek e raen. Gadaed ra feek fithngan Kristus nga dakean daed, ma kad m’aged ni ngad feeked e tin nike fil, Rogon, nge t’ufeg Rok, ni nge paer u fithik daed ya ngeyog ni nge mang daed. Ere baga’ fan e thin rok President Russell M. Nelson ngak fare pi’in ni fal’ yangren ni ngan “meybil man [gay] ni ra reb e ngochol nge rogon [fare Tathapeg] rogon [ngoraed],”⁹ man fil e thin rok Kristus u lane fapi chep nib thothup, baga’ ni fare ke Babyor ku Mormon.¹⁰

Kureb fan fare thin ni feek e ngan adag dakean e bea’ fa ni adag e tin riyul’ fa n’en nib ga’fan. Nap’an ni gadaed ra feek fithngan Kristus nga dakean daed, ma kad tayed ni Ir e Tathapeg rodaed ma gadaed ul’ul’ i adag e tin nike Fil nima gagyeg nag e yafas rodaed. Gubin e tin ni gadaed be mel’eg, ma gadaed ni ngan feek e gospel Rok nib riyul’ man fol riy u lani polo’ i gumircha’ey, gelngiy, lanin’uy, nge gelngiy.

Fare thin ni feek e rayog nibe yup’ fan ni ngan ta’reb nigey ko fare ngochol fa ban’en. Oren i gadaed e ke buch ban’en rok nike feek e murwel fa ke feek ban’en fa ke mithmith. Nap’an ni gadaed ra feek fithngan Kristus nga dakean daed, ma kad feked e murwel ko gachalpen, kad uned i ayuweg ko murwel Rok, ma kad “pired ni ta micheg [Rok] ni gubin ngiyal’ ko gubin ban’en, nge gubin yang ni [gadaed bay riy.”¹¹ Ke yoeg President Nelson ngak “gubin e rugod nge gubin e pagael… ni ngan ulung nga ta’abang ngan ayuweg Somoel u kunuy e Israel nga ta’abang”.¹² Ma gadaed gubin ma gadaed falfalen’ ni ngad rrin’ed e n’en nike yoeg fare profet ni ngan noeg fithngan e Galasia Rok nikan fulweg ni fare Ir Rok fare Tathapeg e ke yoeg: Fare Galasia rok Yesus Kristus ni fan ko Gidii’en Got ko Tin Tomur e Rran.¹³

Nap’an ni kad feked fithngan fare Tathapeg nga dakean daed, ngarin nanged fan fare murwel rok Kristus nge ko Galasia Rok ni ta’aborogon. Dabiyog ni ngan maath’. Ta’aborogon, ni gadaed ni gachalpen Tathapeg ma yima yan ko Galasia Rok e dabiyog ni ngan maath’. Fa’anra gadaed ra marwaer ko m’ag rodaed, ma ra chuuw reb e m’ag rodaed ko reb, me paer nibe buch e biney ni gubin e rran.

Boech e gathi ban’en ni yi ba adag ni ngar feked fithngan Yesus Kristus nga dakean raed nge murwel Rok ya yaed be sap ngay ni dani ga’fan, kaygi gel e momaw’ riy, ba achig, ma yugbe buch. N’en nib riyul’, e fithngan Kristus ni kad feked nga dakean daed e ba ga’ ba thap. Ma n’aggin ngad adaged e n’en nikad thamiyed napan ni kan adaged fare tunok rok Got u dakean e mich ngak fare Tathapeg. Iney e n’en ni yi ba adag u lane gumircha’daed, ma rayog ni ngad pataged e bin riyul’ fan e tawa’ath rodaed nge tin ni gadaed ba cheag riy, nang e t’ufeg Rok nib gel, man runguy boech e gidii’. Nap’an ni gadaed ra feek fithngan fare Tathapeg nga dakean daed, ma ri gadaed be feek e n’en nib mangil man boed Ir.¹⁴

Baga’ fan ni ngad tafneyed ni fithngan fare Tathapeg ni gadaed be feek nga dakean daed e ma m’ag—tabab ko m’ag ni kad fal’eged ko tawfe. Ke fil President Nelson ni ga’ar, “M’ag [rodaed] e ra bing e maaben gubin e tawa’ath u tharmiy nge murwel ni bay.”¹⁵ Reb e kanawo’ nima yib nap’an nikan feek fithngan fare Tathapeg nga dakean daed ko tawfe e ke bing kanawo’en daed ko kanawo’ ko m’ag, ningan micheg daed. Nap’an ni gu fith reb e fapi fagar rog nib meruk e duw rok ko mang e be nang fan ko Kristus ni ngan feek fithngan nga dakean daed, me fulweg ni ga’ar, “Be yoeg ni rayog ni ngeyog fare Kan ni Thothup ngog.” Ma soroek.

Fare tawa’ath ko fare Kan ni Thothup e yima thapeg ko micheg ko tomuren nikan thapeg ko gam’ing ni tawfe. Biney e tawaa’ath e ba mat’aw ma ba kanawo’ ni ngeyog fare Kan ni Thothup ninge paer roaded. Fa’anra gadaed ra motoyil luman, nib achig lingan, me tay daed ko kanawo’ ko m’ag nikad baed riy u dakean e tawfe, me yoeg ngodaed nap’an nikan chel daed ni ngad palog gaed riy, me pi’ e athamgil ngodaed ni ngad kalngan’ gaed man sul biyay napan nib ga’fan. N’en ni ngan tiyan’ gaed ngay ko tomuren e tawfe e nge paer fare Kan ni Thothup rodaed ni gubin ngiyal’ ya ngeyog ni ngad ulul gaed ko fare kanawo’ ko m’ag. Fare Kan ni Thothup e rayog ni nge paer rodaed ko ngiyal’ ni gadaed be paer nib bi’ech ni yib palog ko denen.

Fan e biney, ma ke fal’eg Somoel e kanawo’ ni fan ngodaed ni ngad ulul gaed i bi’ech nag rogon e tawfe rodaed u dakean reb e gam’ing—ni fare sacrament. Ra reb e wik ma rayog ni ngad “micheged ngom, nib mʼagaenʼ[daed] ngay ni [ngad] feked fithingan [fare] Fakam nga dakean[maed],”¹⁶ ma arame, ran yaen ni ngan feek e dowef rok Somoel nge racha’en nga pa’daed—fare flowa nge raen—ma gadaed feek nga fithik e ya’el rodaed, N’en ni ra sul riy, e ra rrin’ fare Tathapeg e Birok ni nge bi’ech nag daed biyay me yag nag ni ngad thamiyed fare Kan ni Thothup. Gathi iraray e murunguy ni kemus ni yira pir’eg u fithngan Yesus Kristus? Boed nap’an ni kad feked fithngan nga dakean daed, Ke feek e denen rodaed nge kirbaen’ rodaed nga dakeaan Ir, machane “pa’ rok nib runguy”¹⁷ ni nge bachiy daed nga fithk e t’ufeg Rok.¹⁸

Fare sacrament e ma pogran ngodaed ni gubin e wik ni fithngan Yesus Kristus ni gadaed be feek nga dakean daed e be paer nibe yaen ma ba m’ag nibe ul’ul’, gathi ta’biyay nima buch ko tawfe rodaed.¹⁹ Rayog ni ngad ul’ul’ gaed I sulsul u dakean ni ngan falfalen’ ni “fare miligach nib thothup, ni dabyog ni nge nang fan e gidii’, ni nge chuw e denen rodaed man feek e dowef rok nge racha’en.”²⁰Gathi ban’en nib bi’ech ni nap’an ni ra nang fan pifaak Got gelngin, fapi tawa’ath nib thothup ni rayog ni ngar feked fithngan Kristus nga dakean raed, ma thamtham roraed e gubin ngiyal’ ma ba falfalen’ ma n’en ni yaed ba adag e gubin ngiyal’ ma ngan fal’eg e m’ag ngak e Got roraed.²¹

Nap’an ni gadaed ra fol ko fare kanawo’ ko m’ag nikan fal’eg, ma m’ag rodaed nge murwel rodaed ni ngad feked fithngan Yesus Kristus nga dakean daed e ra pi’ gelngin ngodaed ni “nge paer fithngan nika yoloey nga lan gumircha’[daed].”²² Ra t’uf Got rodaed nge pi’in nibay u to’ben daed ma gadaed ra adag ni ngad machib gaed ngoraed. Gadaed ra fol ko pi motochiyel Rok ma gadaed adag ni ngad chugur gaaed Ngak, ni ngad fal’eged e m’ag Ngak. Nge nap’an ni gadaed ra nang ni kad mo’owaer gaed ma dabkiyog ni ngad rrin’ed e tin ni gadaed ba’adag, ma gadaed ra wenig nag gelngiiy ni kemus nima yib u dakean Fithngan ma ra yib nga ayuweg daed. Nap’an ni gadaed ra athamgil u fithik e yul’yul’, fare rran e ra yib nap’an ni ra guy ma gadaed ra paer Rok, ma gadaed ra nang ni kad boeded Ir, ere rayog ni ngad suled nga pow’chen e Chitamangiy.

Fare Tathapeg e ke micheg ni pi’in nib mich u waen’ nga fithngan Yesus Kristus, ma liyor ngak Got u dakean fithngan, ma be athamgil nge taw ko tomur²³ u dakean fithngan e ra thap u lan gil’ilungun Got. Nggu un ngomed, ko falfalen’ ko pi tawa’ath ney nib bo’or e rayog ni ngad feked fithngan Yesus Kristus nga dakean daed, ni cha’an ni gube micheg u dakean fithngan, amen.