Dugil mab Yul’yul’ fare Mich ngak Kristus

Keb rok ok Elder D. Todd Christofferson

Ko fare Ulungi Ragag nge L’agruwi Apostle

Nge yag ningan dugliy min yul’yul’ ngak fare mich ku Kristus ab t’uf ningan thapeg fare gospel ku Yesus Kristus ulan gum’ircha’ey nga ya’el ko gidii’.

Ko Bin Kakrom e M’ag, gadad be be’eg mornga’agen bo’or e ningyal’ nap’an fapi gidii’ u Isreal kar tedfan fapi m’ag roraed ngak Jehovah mar liyoergaed Ngak ma boech e ningyal’ e yad be pii’ keru’raed ngak fapi m’ag rorad mar liyoergaed ngak boech e liyos ni woed Baalim.¹

Ngiyal’ nib ga’ lungun Ahab i’ir e ngiyal’ nap’an bay e apostasy ulan reb e binaw nibay nib lelu’och u Israel. Fare profet Elijah ke yoeg ngak Pilung Ahab ninge kunuy e gidii’ u Israel nge boech e profet nge priest ku Baal u dakan fare Burey u Carmel. Nap’an fapi gidii’ e kar mukun’gaed uta’bang, Elijah ke yoeg ngoraed, “Uw numpngin nap’an ni ngam pired mfin gimed duwgiliy lanin’med? [u reb e thin, “Wi’in e ngam me’legned ma dabki thil e tafney romed?”] Fa’anra Somoel, e ir Got, ni gimed fol rok; ma fa’anra Baal e ir e Got, mi gimed fol rok!” Me par e girdi’ nda rogned ta’ab bugithin.”² Ere Elijah ke dugliy ir nge fapi profet ku Ball ningar lii’ ngar th’abed e garbow ngar ted ngadakaen’ e malang nikan ubnguy ngalang nibay e l’ud u dakan, machane, “dab rup’ed e nifiy ngay.”³ Me, “meybil e pi proft rok Baal ngak, mu gu meybul ngak Somoel: ma arororw nra pag e nifiy ngay, ni arma e ke fulweg taban e meybil, e ir Got. Me tolul e girdi’ ni aram e kar pininged e kefel’ ngay.”⁴

Kagamanang ni fapi priest ku Baal kar tolulgaed ngak e got roraed ni bukun e awa ninge pii’ e nifiy nga but’, machane” de fulweg Baal taban e meybil roraed.”⁵ Nap’an ni taw ko ngiyal’ ku Elijah, ke fel’ rogon fare altar rok Somoel, ke ted boech e lud nge maligach nga dakaen, ma chiylen ninge suguy ko rran, gathi ta’arebmachane delip i yay. Dariy rogon ni’ir fa reb e mo’on ninge urufeg e nifiy.

“Fa’ani taw ko nginyal’ ni yima pi’ e maligach riy ko mithig yal’, me yib Elijah ko fare altar nge meybil ni ga’ar, “Somol ni gur fare Got Rok Abraham nge Isak nge Jakob, mmicheg e chiney ni gur fare Got rok yu Israel, me gag e tapigpig rom ma urngin e pin’ey e kug ngongoliy ni bod ni kamog ngog. …

“Me pag Somol e nifiy u lang ko fare altar, me urfiy fare maligach, nge fapi lud, nge fapi malang, nge gowel e but’ me m’ay fapi rran u lan far wol’ e ran nib liy’eg fare altar.

“Fa’ani guy e girdi’ e ren’em miyad paraw nga but’ ma yad be non nib a ga’ lamrad ni be lunguraed, I Somol e ir e Got, kemus ni Somol, e ir e Got!”⁶

Chiney sana Elijah ra yoeg:

Rayog ni Got, e Chitamangdaed nu Tharmiy, ni ba’, fa dani riyul’, machane fa’anra riyul’ ni bay, mu liyoer Ngak.
Rayog ni Yesus Kristus e ir Fak Got, en Tabiyul ni ke fos ko yam’ ko gidii’, fa gathi Ir, machane fa’anra Ir, mu Laked.
Rayog ni fare Babyor ku Mormon e thin rok Got, fa danga’, machane fa’anra ba riyul’, ngam “chuchugur ngak Got udakaen e [bi’eg mag] fol ko pi machib riy.”⁷
Rayog ni Joseph Smith e ke guy me non ngak e Chitamangiy nge Fak nap’an fare rran u spring ko 1820, fa danga’, machane fa’an ke rrin’, ngam folgaed e chiylen ko profet, arragon fapi key ko m’ag paa’ ni Gag, Elijah, kug pii’ ngak.

Ulan fa binem e general conference, President Russell M. Nelson ke yoeg: “Dani t’uf ningam lemnog bin ningan e tin e ba riyul’ [muguy ko Moroni 10:5] . Dani t’uf ningam lemnog mini’ ningam pagaen’ ngak. Udakaen e thogthog rom, rayog ningam thapeg e m’ag rom ni fare Babyor ku Mormon i’r e thin ku Got, ni Joseph Smith i’ir e profet, nge re galasia ney rok Somoel. Dariy fan e thin fa ngongol ko reb e gidii’, dariy e gidii’ ninge fek e m’ag ni kan pii’ ngak e gum’ircha’em nge laniyaen’um mornga’agen e tin riyul’.”⁸

Nap’an James ke micheg ni Got ma “ya ir e ra pi’ ngak’ e gidii’ nibe gay e lowaen’ Rok,⁹ ke yoeg e koel chiya’:

“Machane thingari pagan’med ngak Got ko ngiyal’ ni gimed ra wenignag ban’en ngak, ma dabi maruwaran’med rok. Ya cha’ nra maruwaran’ rok bod ba ley I n’ew u maday nnifeng e be mithmitheg ma be yannag.

“Be’ ni array rogon e thingari dabi leamnag nra pi’ Somol ban’en ngak.

“Ya dawori mudugil laniyan’ ko tin ni be rin’.¹⁰

Tathapeg rodad, u reb e rogon, i’ir e wo’en e dugil nib machaelboeg. Ke ga’ar, “Ma en nike l’oeeg ku gub e bay rog, ya gubin ngiyal’ ma gu be rin’ e tin nib m’agan’ ngay.”¹¹ Mu be’eg ngam lemnog fapi chepin u babyor nib thothup ko mo’on nge ppin kar, woed rogon en Tathapeg, kar dugiliyed ma yad ba yul’yul’:

Kar “michaen’raed ko fare mich nib riyul’; ma dabra chuw gaed riy, ya ri yaed ba miyuluy, ma yaed ba yul’yul’, ma yaed ba dugil u but’, mab m’agaen’raed ngay u fithik’ e l’agaen’ ni ngar fol gaed ko fapi motochiyel rok’ Somoel.”¹²

“Mab miyuluy laniyaen’raed, ma yaed be tay e pagaen’ roraed ngak’ Got ni gubin e ngiyal’.”¹³

“Ere musap gaed, gimed ma gimed manang, ya kam guyed, ni oren i yaed e ba na’ab ko tin riyul’ … ni yaed ba dugil mab miyuluy e mich roraed, ni’ir e ren’en ni puf rograed riy.”¹⁴

“Ma ur pired ni be machib nagraed e pi apostle, ma yad ba par nike ta’reban’rad, ma yad be abich ma yad be meybil u ta’abang.”¹⁵

Ningan athamiliy ngi nge dugil min yul’yul’ ko mich ngak Kristus nib t’uf ninge yaen fare gospel ku Yesus Kristus ngalan gum’ircha’endad nge ya’el, ni be yip fan e gospel dabki un bo’or e ban’en nib fel’ ulane yafos ko gidii’, machane ira mang e dayif ko laniyaen’ e gidii’. En Somoel ke yoeg:

“Bay gu pii’ gum’ircha’enmed nib be’ech, nge reb e leam nib be’ech. Bay gu chuweg gum’ircha’enmed ni bod fani el e malang mu gu pi’ ngomed ba gum’ircha’ nma fol.

“Bay Gu pii’ e kan nthothup rog ngomed mu gu gagiyeg nagmed ngu’um folgad ko pi motochiyel rog ma gimed be’ rrin’ urngin e tin kugog ngomed ni ngu’um rin’ed.

“Ma aram … bay mmanged girdi’ rog, mug mang Got romed.”¹⁶

Iraray e re m’ag ni ngad fi’leged nap’an e tawfe rodad nge fapi gaming u lane tempel. Machane boech e gidii’ dawori thapeged fare gospel ku Yesus Kristus u yafos roraed. Fa’ani, woed rogon e yoeg Paul, kar “upnguy raed [ngak Kristus] u tawfe,” Daworiy ningar thapeged uned “ni woed rogon Kristus kar fasgaed ko yam’ … , arragon … ningar paered [u] yafos nib be’ech.”¹⁷ Dawur ted e dayif ko gospel ngoraed. Dawur puluw gaed ngak Kristus. Yaedba me’eleg yangi mach nge motochiyel ningar fol gaed ma bang nge ningyal’ ningar pigpiggad ko Galasia. U reb e rogon, nap’an ngan fol gaed e m’ag nib polo’ ninge yoeg e gidii’ ningar manged “e gidii’ nib tolang ko pi m’ag”¹⁸ ngar chuweg ko baen mar dugilyed u but ko michaen’ Kristus.

Boech e gidii’ ufithikdaed chiney ba soen ko fare kanawo’ ko fol ko fapi yalen ko Gospel ni fan e fagar nge e rogon nib ilal, laniyaen’raed woed Kristus ningar tiyaen’gaed ngak Got. U chi bang ko kanawo’ nem, fare tin nib fel’ ko gospel ku Yesus Kristus ba yaen ulane gum’ircha’daed ma ying e ya’el rodad. Sana dabki buch nib papay, machane thingar ningad dared nga bang nib fel’ nem.

I’ir e sikeng nib mom’aw machane mab t’uf ningan thamgily ko duwgil mab michaen’ nap’an ngad pired ulane “tafen e nifiy ko gafgow,”¹⁹ e ban’en nira yib ngodaed ni gubin nap’an e yafos rodad u fayleng. Fa’an dariy e Got, fapi bang ko lumor ra yoeg e kirebaen’, gafgow, nge thibngin ngodad. Machane Fa’an bay Got, ran golnigey, ma gafgow era mang gapas, nge kirebaen’ ra mang ganop. Ngan athamgily ko michaen’ ngak Kristus ra yag e murnguy nge ayuw Rok ngay.²⁰ Ir ra thilyeg e sikeng ninge mang e taw’ath, nge, u thin ko Isaiah, “pii’ … fel’ ya’an ko away.”²¹

Gura pii’ l’agruw kanawo’en ni Gumanang:

Bay reb e ppin nima gafgow ko m’ar, nib almarin ni dabiyoeg ninge fel’rogon e togta, taw’ath ko priesthood, fa balaynag abich fa meybil. Dariy fan, mich rok nge gelngin e meybil nge t’ufeg rok ngak Got e darma waer. Irma athamgiliy nga tomur urngin e rran nga reb e rran (nge boech e ningyal’ nga reb e awa) irma pigpig u Galasia, nge uta’abang ko figirngin, yowma chathowliy e tabinaew rorow, irma minmin nap’an rayog. Murnguy rok mab gaa’ to’orngin, ni ke gelong udakaen e gafgow rok, ma bo’or e ngiyal’ irma pii’ bo’or e pigpig nib gaa’ gelngin. Irma athamgily nib yul’yul’, mar falflaen’gaed e gidii’ ningar uned ngak.

Ba m’on ke ilal ulan fare Galasia, nike pigpig ko mission, ma ke lang’iy ban’ib ppin nib fel’ ni kirebaen’ nap’an boech e walagen kar tabab ningar moningaed ngak fare Galasia nge fare Profet Joseph smith. Tomuren boech e ningyal’ kar chuwgaed ko Galasia mar gayed rogon ningar pinninged Ir ninge lek wo’enrad. Woed rogon irma rrin’, kar pii’ed ngak bo’or e babyor, podcast, nge kachido ke fi’leg e critic, boech u somm’on i yaed chongin e Galasia kar wurengaen’. Pi walagen rok kar moningaed ngak e mich rok, kar roeged ni ke liliy. Dabiyoeg ninge fulweg urngin e thin roraed, nge mich rok ke tabab ninge waer ni fan e monging. Ke lemnog fa’an thingar ninge ta’leg ninge un ko misa’. Ke non ngak e ppin rok. Ke non ngak e gidii’ nib pagaen’. Ke meybil. Nap’an ke lemnog u ningyal’ ko balyangaen’, ke pugurran boech e ningyal’ nap’an ke thamiy fare Kan Thothup me thapeg e m’ag ko tin riyul’ udakaen e Ya’el. Ke yoeg u tomur, “Fa’an gag e riyul’ ngog, thingar Ningu gog fare Ya’el ke yib ngog bo’or e yay nge m’ag rog ko Ya’el e ba riyul’.” Ke thapeg e thamtham ko faflaen’ nge gapas ma ke yaen fare’nem nga ppin nge bitir rok.

Bay e figirngiy nge le’engiy ufithik e falflaen’ mar yul’yul’ew makar folgow e fanow ko fapi Walagen u yafos rorw machane kar kirebaen’row bachan dabiyog ningar fakew e bitir. Kar pii’ew bo’or e salpiy mar unew e togta nib salap, ma, tomuren boech e ningyal’, kar fakew e tir nib mo’on. Machane mab kirebaen’, tomuren ta’areb e duw, bayi dol’ ko bitir nem nike kirebnag e loelguy rok. Ke thapeg e ayuw nib thabi fel’, machane pi togta dabiyog ningar fel’ rogon. Fare tir ni ke pinning gali labthir ney nga fayleng udakaen e meybil ni ke n’ag ma dar nanged fa’an ira fulweg ngoraed. Yowma gay rogon e rayog rorow ningar fulweg e tin t’uf ko tir rorow nap’an thinar ningar mugu’uliyew e tin t’uf rorow. Nap’an e ningyal’ ney nib gafgow, kar ranow nga Somoel. Yowba t’uf e “flowa ko rran” yowma thapew Rok. Bayi fagar nge chongin e tabineaw ni yaedma awyueg nge udakaen e taw’ath ko priesthood. Kar mukun’gow nib fel’rogon fa’ani u somm’on.

Naap’an July 23, 1837, en Somoel ke pii’ e thogthog ngak fare President ko fare Ulungi Ragag nge L’agruwi Apostle, Thomas B. Marsh. Ni ke yoeg:

“Ngam meybil ni fan e walagem fare Ragag nge L’agruw. Mu chiylen ngodaed nib almarin ni fan e fithingag, me yoeg e ayuw ni fan e denen roraed, ngam michaen’ u poewcheg ni fan e fithingag.

“Ma tomurne e lumel, nge sikeng roraed, musap gaed, Gag, en Somoel, ra loeg e thamtham ngoraed, ma fa’an dar el’elgaed e gum’ircha’enraed, ma dar kii’ e k’ang u poewcheg, mar thilyegraed, ma gura golnag raed.”²²

Gube leamnag fapi machib ulane ko fapi guruy ni ke pii’ ni fan dad. Fapi lumel nge sikeng nira yib ngodaed, nga reb e sikeng nira pii’ Somoel ni fan dad, ra yaen nga thilyeg nge gol nagdad. Machane nira buch fa’an, ni mus, fa’an dad el’el gaed e gum’ircha’endaed fa kii’ k’ang Nga. Fa’an ngad thamgiliyed nib duwgily u but mab michaen’daed ngak, dariy fan e n’en nira yib, rayog ningag thapeged e thilyeg en Tathapeg ni ke micheg nap’an Ke yoeg ngak Peter, “Nap’an kum thilyeg, mu gay gelngin nga walagem,”²³ e thilyeg nib polo’ ni dabiyoeg ninge kirebnag. Gol ni kan micheg ni’ir e be’echnag nge thothupnag ko e denen u ya’al rodad, ni nge yoeg ninag thothupgaed.

Gube pugurran e fanow ko chitiningdaed: “Mu kay’ e wompngin rom; ninge fel’ rogom.” Chitiningdaed ba yoeg e riyul’, ma woed rogon e mafil ko mich, “mu kay’ e wompngin rom” ba yip fan ningad meybil, biy’eg e babyor nib thothup urngin e rran, pigpig mag liyorgaed ngak u Galasia, feked fare sacrament urngin e week nib mat’aw, t’ufeged e yoror rodaed, ma chibiyeg e kruuth rodad mag folgaed ngak Got urngin e rran.²⁴

Mu tafnay nang e micheg nira yib e tin nib fel’, chiney nge u tomuren e yafos, ni fan e gidii’ nib duwgil u but mar michaen’raed ko mich ku Kristus. Mu pugurran “yafos ni manemus, nge tin falflaen’ ko gidii’en got.” ²⁵ “O gimed gubin e pi’in ni machalbog gum’ircha’en, mu puged oewchmed ngalang ngam thapeged fare thin ko m’agaen’ rok’ Got, mi gimed gur nag e murnguy ni falfalaen’ rok’, ya rayog, ni fa’anra dugil laniyaen’med ngak’, ni gubinechubog.”²⁶ Udakaen e fithingan Yesus Kristus, amen.