1 Chiney e yibi buch u napʼan ni fapi Lamanites ni ka ranoed ni mael ngakʼ fapi Nephites mar pirʼeged, u tomuren ni ke yoʼor yay ni kar gayed rogon ni ngar liiʼedraed, ni dariy tapgin ni ngar liiʼedraed, mar suloed bayay ko fare binaw ku Nephi.

2 Me yibi buch ni fapi Amalekites, e kar damomuw gaed, ni bachan e ke yimʼ boech e gidiiʼ roraed. Ma napʼan ni kar guyed ni dabiyog ni ngar folbiy gaed ngakʼ fapi Nephites, mar tabab gaed i kʼaring e damomuw ngakʼ fapi gidiiʼ ngar togopluw gaed ngakʼ pi walagraed, ni fapi gidiiʼ nu Anti-Nephi-Lehi; ma arame ra tabab gaed bayay i liiʼraed.

3 Ere bayay chiney e pi gidiiʼ ney e dar pigicham gaed, mar paged yaed ngan liiʼraed ni boed rogon ni baʼadag e pi toʼogor roraed.

4 Ere chiney e napʼan ni guy Ammon nge pi walagen e biney e muruwel ni mogothgoth nga fithikʼ fapiʼinem nib tʼuf roraed, nge fapiʼinem ni yaed ba tʼuf roraed—ya ur pigpig gaed ngoraed ni gowa yaed bogi angel ni kan lʼoegraed rokʼ Got ni ngar ayuweged raed ngar chuw gaed ko gafgow ni dabimus biʼid—ere, napʼan ni guy Ammon nge pi walagen e biney e muruwel ni mogothgoth nib gel, me oeb u ngorngoraed ko murnguy, mar gaʼar gaed ngakʼ fare pilung:

5 Ngad kunuyed nga taʼabang e pi gidiiʼ ney ku Somoel, ma gaed yaen ko fare binaw nu Zarahemla ngakʼ pi walagdaed ni fapi Nephites, ma gaed miil ngad chuw gaed u paʼ e pi toʼogor rodaed, ni nga dab ni liiʼdaed.

6 Machane fare pilung e gaʼar ngoraed: Musap gaed, fapi Nephites e yaedra liiʼmaed, ni bachan e rib yoʼor e pi mathang pogofan nge pi denen ni kuʼud rinʼed nib togopluw ngoraed.

7 Me gaʼar Ammon: bay guwaen nggu fith fare Somoel, ma faʼanra yoeg ngodaed, ni nga daroed ngakʼ pi walagdaed, ma gara yaen?

8 Me gaʼar fare pilung ngakʼ: Arragon, faʼanra yoeg fare Somoel ni nga daroed, ma gamaed ra yaen ngakʼ pi walagmaed, ma gamaed ramang sib roraed nge madaʼ ko ngiyalʼ ni ke felʼ laniyaenʼraed ko pi mathang pogofan nge pi denen ni kuʼu rinʼed nib togopluw ngoraed.

9 Machane Ammon e gaʼar ngakʼ: Rib togopluw ko fare motochiyel rokʼ pi walagdaed, ni sunmiy e chitamag, ni thingar dabi sum e sib nga fithikʼraed; ere mman nga daroed ma nge pagaenʼdaed ko wurngaenʼ rokʼ pi walagdaed.

10 Machane me gaʼar fare pilung ngakʼ: Mu fith fare Somoel, ma faʼanra yoeg ni nggu waroed, ma gamaed ra yaen; ara dangay ma gamaed rayimʼ u lan fare binaw.

11 Me yibi buch ni Ammon e yaen nge fith fare Somoel, me gaʼar Somoel ngakʼ:

12 Mu chuweg e pi gidiiʼ ney u lan e re binaw ney, ni nga dabra mʼaed; ya Moʼoniyanʼ e kari chichiʼiy paʼ u gumʼirchaʼen fapi Amalekites, ni yaed be kʼaring e damomuw ngakʼ fapi Lamanites ni ngar liiʼed pi walagraed; ere muchuw gaed u lan e re binaw ney; ma nge felʼ waʼathan e pi gidiiʼ ney u lan e biney e mfen, ya gura ayuwegraed.

13 Ere chiney e yibi buch ni Ammon e yaen nge yoeg ngakʼ fare pilung gubin fapi thin ni ke yoeg Somoel ngakʼ.

14 Mar kunuyed nga taʼabang gubin e gidiiʼ roraed, arragon, gubin fapi gidiiʼ ku Somoel, mar kunuyed nga taʼabang gubin e gamanman nge garbaw roraed, mar chuw gaed u lan fare binaw, marbaed nga lan wuruʼ e binaw niʼir e be kiiʼeg fare binaw ku Nephi ko fare binaw nu Zarahemla, marbaed ngar chugur gaed ko mathil ko fare binaw.

15 Me yibi buch ni gaʼar Ammon ngoraed: Musap gaed, gag nge pi walageg e bay guwaroed nga lan fare binaw nu Zarahemla, ma ngam pired u roey nge madaʼ ko ngiyalʼ ni kug suloed; ma nggu waroed nggu nanged laniyaenʼ pi walagmaed, ko ra mʼagaenʼraed ngay ni ngam baed nga lan e binaw roraed fa dangay.

16 Me yibi buch u napʼan ni be yaen Ammon iyaen nga lan fare binaw, ma ir nge walagen e ra madaʼ niged Alma, ko farengi nʼen niʼir e kan weliy morngaʼagen; ere musap gaed, rib gel e falfalaenʼ ko biney e madaʼ.

17 Ngiyalʼ ney e ri falfalaenʼ Ammon ni rib gel; arragon, me liiʼ e lem u gelingin e falfalaenʼ rokʼ ko Got rokʼ, ni arame ri mʼay gelingin, me thig bayay nge aw nga butʼ.

18 Ere chiney gathi ireray e falfalaenʼ ni rib gel? Musap gaed, ireray e falfalaenʼ ni dariy beeʼ nra yog ngakʼ ma kemus ni piʼin nib yulʼyulʼ ko kalngaenʼ nge piʼin ni ma mogow falfalaenʼ u fithikʼ e sobutʼaenʼ.

19 Ngiyalʼ ney e falfalaen rokʼ Alma ni kar madaʼ gaed pi walagen e rib gel, nge ku aram rogon ko falfalaenʼ rokʼ Aaron, nge Omner, nge Himni; machane falfalaenʼ roraed e de mʼay nag gelingraed.

20 Me yibi buch ni Alma e powiʼiy pi walagen ngar suloed nga lan fare binaw nu Zarahemla; me fekraed ko tabinaew rokʼ. Ma ranoed nga roeged ko fare pilung ko tapuf-oloboch gubin e pinʼen ni ke buch roraed u lan fare binaw ku Nephi, u fithikʼ pi walagraed, ni fapi Lamanites.

21 Me yibi buch ni fare pilung ko tapuf-oloboch e wereg bbugi thin u dakean gaʼangin yang e nam, ni baʼadag ni nge nang laniyaenʼ fapi gidiiʼ u morngaʼagen e wub rokʼ pi walagraed, ni yaed fapi gidiiʼ nu Anti-Nephi-Lehi.

22 Me yibi buch ni yib lungun e yoʼor, ni be gaʼar: Musap, gamaed ra pag fare binaw nu Jershon, ni bay nga baʼan ngek u charen e day, nib peth ko fare binaw ni Galwog, ni bay nga baʼan yimuch ko fare binaw ni Galwog; ma re binaw ney nu Jershon e ireray e re binaw ni nggu piiʼed ngakʼ pi walagmaed ngar tafnayed.

23 Ma musap, bay gu tayed e salthaw romaed u thilin fare binaw ni Jershon nge fare binaw ni Nephi, ni nge yog ni ngug matangiyed pi walagmaed u lan fare binaw ni Jershon; ere ireray e nʼen ni nggu rinʼed ni fan ngakʼ pi walagmaed, ni bachan e yaed be rus ngay ni ngar cham gaed pi walagraed ya yaedra denen; ma biney e murus ni kar tayed e bachan e kalngaenʼ nib almarin ni kar tayed, ni fan ko pi mathang pogofan nge ngongol roraed nib kireb.

24 Ere chiney e musap, ireray e nʼen ni nggu rinʼed ngakʼ pi walagmaed, ni nge yog nra tafnayed fare binaw nu Jershon; ma bay gu piiʼed e salthaw romaed ngar matangiyed yaed ko pi toʼogor roraed, ni faʼan yaedra piiʼ e ayuw ngomaed ni ggan ni nge kay e pi salthaw romaed.

25 Ere chiney, e yibi buch u napʼan ni rungʼag Ammon e biney, me sul ko fapi gidiiʼ nu Anti-Nephi-Lehi, ni yow Alma nra suloew, nga lan wuruʼ e binaw, ko gin ni kar nʼufed e tent roraed riy, mar weliyew ngoraed gubin e pinnʼey. Ere Alma e ki weliy ngoraed rogon ni michaenʼ, ni yaed Ammon nge Aaron, nge pi walagen.

26 Me yibi buch ni yib nag e falfalaenʼ nga fithikʼraed ni rib gel. Ma ranoed nga lan fare binaw nu Jershon, mar pired ni kar tafnayed fare binaw nu Jershon; ma i piningraed fapi Nephites ni yaed e gidiiʼ ku Ammon; ere binem e fithingan e kiiʼeg raed e ngiyalʼ nem min fanay iyaen.

27 Ma ur pired u fithikʼ fapi gidiiʼ ku Nephi, ma kun uneg raed ko mathaʼeg nga fithikʼ fapi gidiiʼ ni yaed gidiiʼen fare galasia ku Got. Ma kuʼur kiiʼ gaed u rogon e gablaenʼ roraed ngakʼ Got, nge gidiiʼ; ya riyaed ba yulʼyulʼ mab paganʼuy ngoraed u fithikʼ gubin banʼen; ma yaed ba miyuluy ko mich roraed ngakʼ Kristus, nge yaeni madaʼ ko ngiyalʼ ni kar mʼaed.

28 Mar guyed ni rachaʼen walagraed e banʼen ni kar dubuyed i puʼoeg; ma dab kiyog ni ngan miliy laniyaenʼraed ngar liiʼed pi walagraed; ma dariy bingyalʼ ni rrus gaed ko yamʼ, ni bachan e athap nge tamilngaenʼ roraed ngakʼ Kristus nge fare foskoyamʼ; ere, ke math wolbuwan e yamʼ u dakean e yamʼ ni tay Kristus.

29 Ere, yaedra yimʼ u fithikʼ e gafgow nge amith u ba dodow nra yib nag pi walagraed ngoraed, u mʼon ni ngar feked e sayden ara sarey ni ngar liiʼedraed.

30 Ere aray rogon ni yaed bogi gidiiʼ nri yaed ba tʼuf, bogi gidiiʼ nri yaed ba tʼuf rokʼ Somoel.