Pi’in ni Bpin nge Fil e Gospel Ulan e Tabinaew
Fare Tathapeg e Ir fare wo’en th’abi fel’ ko rogon nrayog ni ngam rin’ ni fan ko fapi gospel ni yibe fil ulan e tabinaew.
Pi walageg ni pi’in ni bpin, gub fal’falan’ ngay ni ngad mada’gad. Iraray e ngiyal’ ko fal’falan’ ulan Fare Galasia ku Yesus Kristus ni fan Gidii’en Got ko Tin Tomur e Rran. Fare Somoel e be pii’ e llowan’ ko fare Galasia Rok’ ni woed rogon nike micheg nra rinn’.
Kagamnang ko n’en nike Yoeg: “U n’uwmingin pa’an nrayag ni nge paer fare luul’ nib be’ech? Mang gelngin nibe chubiy fare tharmiy ngalang? Dabyag rok bee’ nib mo’on ni nge talag fare luul’ nu Missouri fa nge thilyeg e giin nibe yib marin fare rran riy ni ku woed ndariy bee’ nrayag ni nge taleg Got i pii’ fapi llowan’ nibe yib u tharmiy ngak fapi Gidii’en ko Tin Tomur e Rran.”1
Bang fare tonom rok fare Somoel ninge pii’ boech e llowan’ ngodad ab peth rogon ko llowan’ nibe tay nga dakan lolgan nge gum’ircha’en fapi gidii’ Rok’. Ke yoeg nib tomilang ni fapi bpin ni fak e Chitamangdad nibay u Tharmiy ab ga’farad ko biney e tonom. Reb e powriy nibe m’ug e ke gagiyegnag fare profet Rok’ ninge ta’armidlan e machib ko gospel ulan e tabinaew nge gidii’en fare tabinaew.
Bayum ga’ar, “Urogon ni fapi bpin ni yadba yul’yul’ e bang ko fare tomon rok Somoel nige pii’ e llowan’ ngak fapi Gidii’en Tin Tomur e Rran?” Me fulweg Somoel ulan fare “The Family: A Proclamation to the World.” Kagamnang fap thin riy, bayum guy nike thil rogon ni gabe sap ngay mag guy rogon ni guy fare Somoel nra buch e pin’ey. Ulan fare proclamation, ke pii’ Ngak fapi bpin e murwel niyad e murwel rorad ni ngar filed fapi gospel ulangin e tabinaew u dakan e pi thin ney: “Mitin e mat’won ni nge chugliy pifak.”2 Nib mu’un ni ngan fil e tin nib yul’yul nge fare gospel ni ngan nang.
Maki ul’ul’ fare proclamation: “Mtam nge mitin ab tu’uf ni ngar ayuwegrow ni woed ni yow ba ta’areb.”3 Niyow ba ta’areb, niyow ta’areb ko tin nib thothup nge tin ni yow be fil, ni aray rogon nrayag ni ngar ayuwegnewrow u ta’abang. Niyow ta’areb ni ngar mon’og gow u ta’abang. Ma dabayag ni kemus ni nge mon’og ta’abogyow.
Mangfan, ni aram, ma pi’in nib bpin nifak Got nibay mat’won ulan e tabinaew nib ta’areb ngak figirngin ni murwel rok e nge chathowoliy me fil gubin e pi n’en nike thapeg, fare llowan’ nib riyul’ nike yib u thamriy? Ni woed rogon ni gube guy, iraray kanawo’en Somoel u nap’an ni sunmiy e tabinaew ngan tay nga dakaen e fayleng.
No woed, Eve e thapeg fare llowan’ nib tu’uf ninge kay Adam fare wa’amngin fare gak’iy nib sug ko llowan’ ni ngayag ni ngar folgow ko motochiyel rok Got mayow tababnag e tabinaew. Dangunangfan niyib e biney ngak Eve ni somm’on, machane Adam nge Eve e yow ta’areb ko llowan’ nikan pii’ ngak Adam.
Reb wo’en nibe dag rogon Somoel fare tawa’ath ko chugol ko pi’in nib bpin e rogon ni pii’ gelngin fapi pagal nifak Helaman. Rugma thamiy ban’en riy nap’an ni gura be’eg me yib ngan’ug e thin ko chitnag ngog nap’an nug digey e tabinaew rog nguwan ko maal.
Ke yoloy Helaman:
“Ke fil e pi chitiningraed ngoraed, ni fa’anra dabi maerwaer u wun’raed, ma ra ayuwegraed Got.
“Mar weliyed ngog e thin rok’ e pi chitiningraed, ni yaed be ga’ar: Dar maerwaer u wun’maed ni pi chitiningmaed e yaed manang.”4
Danugnangfan u wan’ fare Somoel nike pii’ ngak pifak ni pi’in nib bpin nib yul’yul’ ningar chugulgad ulan fare tabinaew, michuwan’ug ngay ni bay rogon ko gelngin e tu’ufeg rom. Ba tu’uf ba adag nib gaa’ u m’on ko tin nib tu’uf rom. Iraray fare tu’ufeg rok Kristus ngak facha’ ni gabe chugliy. Biney e thamtham ko tu’ufeg e kab rok’ bee’ ni kan mel’eg nrayag rok ni woed rogon fare Bayul rok Yesus Kristus. Fare bugithin ulan fare Relief Society, nib cheg e chitiningig riy, nima pii’ e athamgil ngog: “Tu’ufeg Ndariy Bi’id Me M’ay.”
Fapi bpin ni pifak Got, bay fare ningan’ rom ni ngam nang e tin nib tu’uf ko gidii’ mag tu’ufegrad. Ni iraray, e n’en, nrayag ni ngam motoyil ko fare thogthog rok e Thothup. Ma fare Thothup e rayag ni nge pow’iyem ko n’en ni gabe tafneynag, nge n’en ni gabe yog, nge n’en ni gabe rin’ ni ngayag ni ngam chugliy e gidii’ ni ngayag ni nge pii’ fare Somoel e llowan’, riyul’, nge athamgil nga dakanrad.
Gamed e pi’in ni bpin ni gamad be matalngog era bagmed mab thilthil e gin nibay riy ulan e yafos rok. Boechi gimed e iraray e somm’on rok ngara’. Boechi gimed e be ngongliy ir ninge famchew ni woed rogon ni ba’dag Got ni ngar rin’ed. Boechi gimed e fanngi mabgol ma dawri fakay e bitir, boechi gimed e kabfel’ yangren ma bay ini bitir rok. Boechi gimed e bayfak nib fel’yangren ma boch nibay ko mission rok. Ma boech e bayfak nike mo’owar e mich rorad mayad palog ko tabinaew. Ma boech e be par rok ni yigo’ir ma dariy figirngin nib yul’yul’. Ma boechi gimed ab titaw.
Ma, dariyfan e magagawon rom, ma gam mu’un—ko n’en nib ga’fan—ko fare tabinaew rok Got nge birom e tabinaew, tin nibay nga m’on, tin nu fayleng, fa tin nibay ulan e faylang ko ya’al. Pagan’um ngak Got ni ngam chugliy urngin fapi bitir Rok nge chongin e tabinaew rom ko tu’ufeg nge mich rom ngak Yesus Kristus.
N’en nib tu’uf ni ngam rin’ e ngam nang ko mini’ e ngam chugliy, rogon, nge wi’in. Gaba tu’uf fare ayuw rok Somoel. Manang gum’ircha’en e gidii’, ma manang ko wi’in e yad ra fanay fare chugol rom. Meybil ni bay e mich rom era ayuwegnem. Ma rayag ni ngam taga’ ko fanow Rok’.
Ke pii’ e athamgil: “Mfith ngak e Chitamag u dakan e mich, nib mich u wun’um ngay ni gara thapeg, ma ran pii’ ngom fare Kan ni Thothup, ni’ir e ma yog gubin ban’en nib manngil.”5
Ni boed rogon e meybil, min fil fapi chepen nib thothup e ir bang fare gelngim ni ngam chugol. Ba’aray e n’en ni kan micheg riy: “Fare Somoel keyog ni damtafnney nag e n’en ni ngam moeg; machane mu tay u wun’um fare thin ko yafos gubin yay, ma ran pii’ ngom ni gubin e awa nraguy gubin e gidii’.”6
Ere garam gay e ngiyal’ ni ngam meybil nib bo’oryay, mag lemnag, mag meybil ko tin nib thothup ban’en. Ma ran pii’ e llowan’ ngom ko tin nib riyul’ ban’an nra gel nigem ni ngam chugliy fare tabinaew rom.
Bay boech e ngiyal’ ni garam thamiy ni fare tin ni gabe fil rogon ab sasaga’al. Ba tu’uf e mich ninge athamgiliy. Ke pii’ ngom e thin nra pii’ gelngim:
Ere chiney, dam malmal ko pin’en ni gabe rin’, ya gabe rin’ e murwel ni tha’abi manngil. Ma tin nib achig ban’en e ma yan ko tin nib gaa’ ban’en.
“Musap, fare Somoel e ma sap ko gum’ircha’ nge tafney ni be gay rogon; ma cha’en nibe gay rogon ma be fol ere kay e tin nib fel’ ban’en ko fare naam nu Zion ulan tomren fapi rran.”7
Wub rom ko re balayal’ney e powriy ni garagay rogon ngam rin’ e biney nike pii’ Somoel. Biney ab ruyul’ ni kube yipfan ngak e tin nib bitir e bpin. Garamnang ko mini’ ab tu’uf ni ngam chugliy ulan e tabinaew rom. Ni fa’an garam meybil nib polo’ i gum’ircha’em, owchen fa fithngan bee’ era yib ko tafney rom. Fa’an gara meybil ngam nang ko mang e ngam rin’ fa ngam mog, ran thapeg ngom. Gubin ngiyal’ ni garam foll, fare gelngim ni ngam chugol era gaa’. Ma gabe fal’eg rogom ko boech e rran nga m’on ni garam chugliy e tin ni bitir rom.
Mtin nibay fak nib fal’yangren e rayag ni nge meybil ko rogon nra chugliy e pagal fa bpin nifak. Rayag ni ngam meybil ni ngam nang ko mini’ e fal’ pangin ngak fakam nra fol rok. Got e ma motoyil ma fulweg e tiney e meybil ko mitin nibe gafan’, Ma ra pii’ e ayuw.
Ma kubay, e titaw uroy ni kube kireb gum’ircha’en ni bachan pifak ndar motoyilgad ngak fa pifak pifakrad. Rayag ni nge pagan’um ko fapi tabinaew nib chuchgur wo’enrad ko biney ulan fare pi chepin nib thothup.
Ko ngiyal’ rok Eve nge Adam, u fithik Chitamangin u Isreal, nge gubin chongin e tabinaew nibay ulan fare Babyor ku Mormon, bay ban’en riy ni rayag ni ngan fil: dam mutal ko tu’ufeg.
Bay fare wo’en fare Tathapeg ni chathowoliy fapi ya’al ni to’ogor nifak e Chitamangdad nibay u Tharmiy. Demtrug ko gelngin e gafgow niyad be tay, ya kub k’iyeg pa’ nge paer.8 Ke non ko 3 Nephi ngak pifak nib thothup ni bpin nge mo’on, nibe gay rogon ninge ayuwegrad: “O gimed e pi gidii’ … ni gidii’en yu Israel, uw urngin yay ni nggu kunuy med ni bowed ba alabol ni ma kunuy pifak nga tan poen, ni nggu chathowoliymed.”9
Ngak gubin fapi bpin demtrug ko gin ni gabay riy ulan e yafos rom, demtrug ko n’en nibe buch ulan e tabinaew rom, ko yalen rom, fare Tathapeg e ir wo’en nrayag ni ngam rin’ e tin nib ga’fan ni ngam fil fare gospel rok ulan e tabinaew rom.
Garam fek fapi n’en ni gabe thamiy ko tu’ufeg ngalan e tabinaew rom nge pin’en ni gabe rin. Iraray e n’en ni ra gelnag e mich rom. Nap’an ni garam meybil mag yibliy bee’ ulan fare tabinaew rom, ma garam thamiy fare tu’ufeg rom nge fare Tathapeg ngak facha’. Ra ul’ul’ nge mang tawa’ath rom ni fakan garam gay. Ma chongin e tabinaew rom e yadra thamiy nap’an ni garam meybil ni rib alamrin u fithik e mich.
Nap’an nra ulung fare tabinaew nga ta’abang ni ngan be’eg fare pi chepin nib thothup, kam m’ugi be’eg kam meybil ma kam mu’i nangfan. Ma garam peri’eg fare Thothup ninge tomilangan’um. Ma fin aram, nap’an nra taw ngom ni ngam be’eg, ma ra thamiy chongin e tabinaew rom fare tu’ufeg rom ngak Got nge thin Rok’. Ma ran chadwoloyirad u dakan fare Thothup Rok’.
Ta’areb rogon nra buch ulan e tabinaew ni fa’an gara meybil mag rin’ ni aray rogon. Bay nram rin’ ni bo’or yay, machane rafek fare m’ang’ang nge yib. Kugumnang ba fanow ni fil e chitinag ngog. Kurayag ni nguy ulan e tafney rog fare map nikan achay nike fal’eg ko gini i malekag fare Apostle Paul riy. Gube lemnang ko mangiyal’ ni rin’ e biney. Ke mada’ ko dabay ma kan tawa’ath nigeg ko tu’ufeg nge mich rok ngak era Apostle ney.
Gamed gubin ma gamed ra pir’eg rogon nrayag ni ngam gaa’niged e llowan’ romad u tabinaew ngak fare Somoel nge fare Galasia rok nikan fulweg. Gamad gubin ni ngam meybilgad, min fil, ngam ninged ko ron nrayag ni ngam pi’id e ayuw. Machane biney e gumnang: gamed gubin, mab ta’areb rogonmed ngak pifak Got nib mo’on, ma gamad baga’fan ko fare gospel nra kunuy gathon yu Isreal ma ra fal’egrogon pifak e tabinaew rok Got ninge sul ngak fare Somoel Yesus Kristus. U dakan fithngan nib machalbog Yesus Kristus, amen.