Moy, Motoyil ko Thin Rok e Profet

Rok Bishop Dean M. Davies

Bin Somm’on e Counselor ulan fare Presiding Bisofric

Fa’an gadad ra gay rogon ngad rin’ed min motoyil ko thin rok fapi profet nib fos, ma ran pi’ fapi tawa’ath ngodad ni manemus.

Weliy mornga’agen fare President ko Fare Galasia ku Yesus Kristus ko Gidii’en Got ko Tin Tomur e Rran, fare Somoel e yoeg:

“Nge kabyay, fare murwel rok fare President ko fare office nib Tolang ko Priesthood e nge fek lungun gaa’ngin fare galasia, ni woed Moses—

“… Arogon, ngan mang e tathogthog, tayi’iy, piliyeg e thin, nge profet, nibay gubin fapi tawa’ath rok Got nike tay nge dakan lolgen e Galasia” (Doctrine nge Covenants 107:91–92; kan uneg ngay).

Kan tawa’ath nigeg ni kugguy bochi tawa’ath rok Got nga dakan fapi profet Rok’. Rayag ni ngu weliy ban’en ni buch ngom? U m’on ko fare murwel rog ulan e galasia, kug un i muruwliy ko gin ningan toey e tempel riy. Tomren e September 11, 2001, fare yan u dakan u Mariken nge barba’ e gel e momaw’ riy. N’en ni buch milekag ney t’uf l’agruw e awa i yan ko dalip nifan yo’or e chon ko Galasia fani yag ni nge thamur u Vancouver, Canada, fin yan ko tempel u Seattle Washington. President Gordon B. Hinckley, President ko Galasia ko ngiyal’ nem, e yoeg ni reb e tempel nga Vancouver era tawa’ath nag pi gidii’en fare Galasia. Min pii’ matwoy ni ngan gay bang, tomren ni kan guy boech e binaew nifen e Galasia, makun sapnag boech e binaew ulan ni gathi binaew rok e Galasia.

Bay bang ni rib mangil nibay u thilin e Highway u Canada nikan peri’eg. Ni gin’ey e rib moem ningan nib ngay, nib bo’or e gak’iy nu Canada riy, ni bangi n’en ni fel’ ya’an e sap riy nib magiyel ko gidii’ ni yo’or nibe yaen u kanawo’.

Magmad thag e rigin’ey nib mu’un e sasing nge map ko fare mo’olung ni gamad ma tay nifan e Tempel Committee. Me pii’ mat’won President Hinckley ni ngug tababgad ko damow min guy ko rayag ni ngan toey e tempel ko giney. Nap’an e December ko re duw nem, magmad fulweg e thin ko fare committee nike may e tin ni bu’uf ningu nanged, ma aram magmed gay rogon ni ngad chuwi’iyed farngi banaw. Tomren nikan motoyil ko fapi n’en ni kug daged, President Hinckley e ga’ar, “Gube thamiy rog nib tu’uf ni nguy e rigin’ey.”

Tomren ere puul ney, l’agruw e rran nga tomren e Kristmas, magmad chuw nguwared nga Vancouver ngak President Hinckley; President Thomas S. Monson; nge Bill Williams, cha’en nima yoloy rogon ni ngan toey e tempel. Gamad mada’nag Paul Christensen, ni’ir fare state president ko nam ney, nifek mad ko farngi binaew. Ba statogon e rran e rofen nem, machane me ‘og President Hinckley nga butt’ me tabab i yan u rom.

Tomren ni kug guyed e rangi binaew ney, mug fith ngak President Hinckley ko ba’dag ninge guy boech e tin ba’aray e binaew ni kug m’ug gad i guy. Me ga’ar rayag, ya ba’adag. Amsap, garam sap ko boech e binaew, ma rayag ni ngad guyed fal’nginrad.

Ere guwared ulangin yu Vancouver ni gamed be guy boech fapi binaew, magmad sul ko fagin somm’on ni ugmed riy. Me ga’ar President Hinckley, “Rib fel’ ya’an e giney.” Me fith, “Rayag ni ngan dared ko fagin nibay e Galasia riy ni ganpo’on ta’areb-nge aningeg e myl [0.4] ko giney?”

“Rayag, President,” ni kug fulwegned lungun.

Magmad sul ngalan e karo magmad yan ko bin galasia nib chuchugur ngomad. Nap’an gu taw gad ko fare chapel, Me ga’ar President Hickley, “Mu ta’ar ko gilay’ aray.” Magmad ta’ar ko ginem ni woed rogon ni ke yoeg. Fare pa’i kanawo’ e be sori yan ngalang.

Nap’an ni taw fare karo ko gin tha’abi tolang ngalang, me ga’ar President Hinckley, “Mutalag e karo, mutalag e karo.” Me yip paa’ ko bangi binaew me ga’ar, “Me giney e binaew? Iraray e gin ninge yan e tempel ngay. Iraray e gin ni ba’adag fare Somoel ni ngan tay fare tempel ngay. Rayag ni ngam fal’eg?”

Dawriyag ni nguyed e giney e binaew. Palog ko kanawo’ nib gaa’, ma dawrin ta’ ni ngan pii’ ni chuway’. Nap’an nug fulwegned ni dangu ninged, me yip President Hinckley paa’ ko farngi binaew me ga’ar biyay, “Iraray e gin ninge yan e tempel ngay.” Gu pared buch’uw e minute nge magmad sul nga airport ni ngu suled nga tabinaew.

Bin migid e rran ngay, min pinngeg nge Brother William ko office rok President Hinckley. Ke yoleoy gubin pi’nen ulan bangi babyor: kanawo’, fare chapel, gini gil’ay ni ngan sorngay, me tay e X mark ko gin ni ngay toy fare tempel ngay. Me fith ngomow ko mang e kug piri’egnew ni mornga’agen. Magmoyoeg ngak ni giney nike mel’eg ab momaw’ rogon. Ya fan dalip e gidii’: be’ nu Canada, India, nge China! Ma dariy mot’won ningan toey e galasia ngay.

“Ere, mu athamgil gow,” ni fulweg.

Ma aram me buch e ma’ang’ang. In e puul ngay ma ku fanayed farngi binaew, ma ta’aboch riy ma fare binaew u Langley British Columbia, e pii’ matwon ngomad ni nguy toyed e tempel.

Nap’an ni gube tafneynag e n’en nike buch, mug guman’ nigeg nge Brother Williams ni dariyfan gelngin e skuul nikug tew e tin ni gamow ba cheg riy nge rogon ni ngan fal’eg e tempel, ma President Hinckley ni daninang, machane bay ban’en rok nibga’—fare tawa’ath ko tathogthog nima yib ngak e pe profet. Ni yag ni nge guy ko gin niba’adag Go tni ngay toey fare tempel rok ngay.

Nap’an ni turguy Somoel ngak fapi Gidii’ rok ningan toey e tempel, me ga’ar:

“Mu toeyed e nu’un u dakaen fithngag nge rogon ni bayguthag ngomed.

“Ma fa’anra toyed gidii’ ni gathi woed rogon ni kugdag ngorad … , ma dabgu fanay” (Doctrine nge Covenants 115:14–15).

Ya woed rogon ko Gidii’eg ni somm’on, aram rogon e dabay: fare Somoel e dag makube ul’ul’ nge dag ngak e President ko fare Galasia rogon ningan toey fare gil’ilungun rok Got rogon ni ngan nongoliy ko pi rran rodad. Nge, woed ni fan ngodad, ma powi’iydad ko rogon ni ngad pired ulan e yafos rodad, nrogon ni ba’adag fare Somoel.

Ko April 2013, kug weliy mornga’agen rogon nrayag ni ngan fal’eg gubin e tempel nge daf riy nrayag ni nge par nib fal’rogon ko ngiyal’ ko yiko’. Machane fare daf riy e iraram e gin somm’on riy. Tempel e bo’or yuyang riy, nima peth ngata’abang ni woed rogon ni kan sunmiy. Fa’an yafos rodad e nge mang fare tempel ma gadad gubin ma gadad rarin’ ni woed rogon nike yoeg fare Somoel (muguy ko 1 Korinthians 3:16–17), ma rayag ni ngad fithed gadad, “Mang e pin’ey nrayag ni ngu rin’ nrayag ni nge mon’og nag e yafos rog, me fal’eg rogon, me thapeg e lumel nu fayleng?”

Rayag ni ngan piri’eg e fulweg ko biney e duwer ulan fare Babyor ku Mormon. Ulan fare Babyor ku Mormon, fare Profet Joseph Smith e ga’ar, “Ku gog ko fapi pumo’on ko galasia ni fare ke Babyor ku Mormon e ire th’abi mat’aw e thin riy u fithik’ e pi babyor nu fayleng, me ire ta’an e mich rodaed, ma rayog ni nge chugur bee’ riy ngak’ Got u dakean yalen e paer riy, ni dabiyog ni rin’ yuken e babor” (tabolngin i mornga’agen fare Babyor ku Mormon). Ulan ere tabolngin fare Babyor ku Mormon e ir fare thin rok Got ni gadad ra nang u dakan gelngin Yesus Kristus ni fare Tathapeg ko fare fayleng, ni Joseph Smith e ir fare tathogthog rok nge fare profet ni fulweg Fare Galasia ku Yesus Kristus ni fan Gidii’en Got ko Tin Tomur e Rran ni’ir fare gil’ilungun Got nikan toey biyay nga dakan e fayleng.

Tiney e iraray boech ban’en nima gaa’nag e mich nge michan’ rodad:

Yesus Kristus e ir fare Tathapeg ko fare fayleng.
Fare Babyor ku Mormom e ir fare thin rok Got.
Fare Galasia rok Yesus Kristus ko Gidii’en Got ko Tin Tomur e Rran e ir gil’ilungun Got u dakaen e fayleng.
Joseph Smith e ir e profet, ma kabay e profet nib fos u dakaen e fayleng e dabay.

In fapi puul aray, kug motoyil ko gubin fapi tok ko general conference nike pii’ President Nelson ko ngiyal’ nikan pining ninge mang e Apostle. Biney e ke thilyeg e yafos rog. Nap’an ni ku fil ma gube guy 34 e duw ko President Nelson nge pi n’en nimanang, bay ban’en ni be par ma babi’mug ko pi n’en nibe fil. Gubin e pi n’ey ma bab peth ko fapi n’en nima gaa’nag fa fapi kiy nima gaa’nag e tempel rodad. Nib mu’un e mich ngak fare Somoel Yesus Kristus rodad, kalngan’uy, tawfe ko fapi denen, fare tawa’ath ko fare Kan ni Thothup, thapag e murwel ko yaam’ nge murwel u tempel, tayfan e rran nib Madnom, mu dugliy ko mang e gaba’dag ni ngam rin’, mpar u dakan fare kanawo’ nib mat’aw. President Nelson e ke weliy e pin’ey ni gubin u fthik e tu’ufeg nge murnguy.

Fare malang ni ir e ba th’abi ga’ ko fare daf ko fare Galasia nge yafos rodad e ir Yesus Kristus. Iraray e Galasia Rok’. President Nelson e ir e Profet Rok’. Pi machib rok President Nelson e be m’ug fal’angin fare yafos rok Yesus Kristus riy. Ma weliy mornga’agen u fithik e tu’ufeg ko fare Tathapeg nge fare gagiyeg Rok’. Kan gergelnag nibay e mich rok ko fare murwel ko fapi profet nib fos—fare President ko fare Galasia—u tan paa’ nibe pigpig riy.

Chiney, daba’, fal’uwan’ug ni gadad be ‘og nag ir ni’ir fare profet rok Somoel u dakaen e fayleng. Ba yalen rodad ni gadad ma pii’ mat’won e toyigang’ ko Galasia nap’an ni gadad ma tining paa’dad ngalang nibe m’ug ni gadad ra tayfan min ayuweg. Kad rin’ed e biney in e minet kafram. Machane biney e gathi kemus aray rogon. Ulan a Doctrine nge Covenants 107:22, fare Bin Somm’on e Presidency e ngan “michwun’uy ngak’, michan’uy, nge meybil ko fare galasa. Kadbad ni ngand tayedfan fare profet nib fos ma gadad be gay rogon ni ngad rin’ed ni woed rogon fapi thin rok, me mich u wun’uy ni ngan rin’ ni aram rogon, min ul’ul’ ngan yibliy ninge par fare Somoel rok.

Nap’an ni gura lemnang marunga’agen President Russell M. Nelson, be pagan’ug ngak fare thin rok fare Tathapeg nap’an ni ga’ar, “Ni fa’an nra motoyil fapi gidii’ ko thin rog, nge thin rok fapi tapigpig rog ni kug mel’eg ni nge gafaliy fapi gidii’ rog, arame, gube yog ngom, dab ni chuweg rad u tigil’rad” (Doctrine nge Covenants 124:45).

Motoyil ngak fapi profet nib fos ab ga’ angin, nrayag nira thilyeg e yafos rodad. Min gelnagdad. Ma ra mich u wan’dad ko mang e ngad rin’ed. Magdad ra rung’ag e thin rok fare Somoel. Ma gadad ra thamiy fare tu’ufeg rok Got. Ma gadad ra nang rogon ni ngad ngongliyed e yafos rodad nibay fan.

Ba tu’uf ma gube pii’ gelngin President Ruessel M. Nelson nge ku boech e gidii’ ni kan piningrad ni ngar manged e pi profet, pi tathogthog, nge pi pilyeg e thin. Mich u wun’ug ngay nibay fare tawa’ath rok Somoel u dakan lolgen, ma gube micheg ni fa’an gadad ra gay rogon ngad rin’ed min motoyil ko thin rok fapi profet nib fos, yafos rodad e ran ni ‘aw ni woed rogon kanawo’en fare Somoem, ma ran pi’ fapi tawa’ath ngodad ni manemus. Biney e fan gubin e gidii’. Moy, ngam motoyil ngak e thin rok e profet; aarogon, moy ngak Kristus nge fasgad. U dakan fithngan Yesus Kristus, amen.