Dam Rus
Mu athamgil, o pi walageg. Arrogon, gadaed be paer ko ngiyal’ nib momaw’, machane nap’an ni gadaed ra paer ko kanawo’ ko m’ag, ma dabda rus gaed.
Gube uneg e mich rog ko mulwol rok President Russell M. Nelson nge Elder Quentin L. Cook ni kaffin ri mu’ gow i weliy mornga’agen fare Ulung ko bin Somm’on e Presidency nge Ulung ko fare Ragag nge L’agruwi Apostle. Gu manang ni pin’ey ni yibe yoeg e lanyan’ nge n’en ni ba adag Somoel ma ra fal’eg wa’athan me pi’ gelngin e gidii’, tabinaew, nge Fare Galasia rok Yesus Kristus ni fan ko Gidii’en Got ko Tin Tomur e Rran nge kuboech e yangar ni bayib.
Boech e duw ni kafran, ma reb e bitir romow nib ppin nike mabgol nge pumo’on rok e ri fithew Sister Rasband nge gag ko ban’en nib ga’fan, mornga’agen e yafos: “Ba mangil ni ngan chugliy e bitir ko biney e fayleng nib gel e murus riy nib gel e kireb riy?”
Chiney, e binem e duwer e baga’ fan ko nina’ nge papa’ ni ngar leam nigew ko fak row nike mabgol. Rayog ni nggu rung’agew e murus u lungun row nge murus u lan gumircha’en row. Fulweg romow e “Ea, ba mangil,” nap’an ni gadaed ra fil mornga’agen e gospel nge tin ni kad filed u lane yafos rodaed.
Murus e dani bi’ech. Gachalpen Yesus Kristus, niba’ u dakean e Day u Galilee, e rus ko “nifeng, nge n’ew” u fithik e lumor nib neap.1 Boed gachalpen e daba’, kubay e murus rodaed. Murus rodaed ni ngan mabgol. Pi’in nike mabgol nib fal’ yangren, ni boed e bitir rodaed, e rayog ni nge rus i chugliy e bitir u lane fayleng nike gel e kireb riy. Pi tamachib e bo’or e tin ni yaed murus ngay, baga’ ni non ngak bee’ ni dan nang ko mini’. Pi’in nike yim’ e cha’an ni yow mabgol e ma rus ni ngar pired ni go’ giyad. Fal’ yangren e yima rus ni dabin adag dakean raed; pi’in u skuul e ma rus nap’an e yan somm’on ko skuul roraed; bitir ko skuul ko university e ma rus ni ngar thapeged e sikeng. Gadaed ma rus nag e mul, ni dariy bea’ ni ra adag dakeaney, kirbaen’, nge n’en ni dan nang ko mang. Gadaed ma rus nag e yiko’, duru’, nifiy nibe urfeg e naam rodaed nge yafos rodaed. Gadaed ma rus ni dabin feak daed, ma ka gadaed ma, rus ni ngan fek dad. Gadaed ma rus ni dan mangil gaed; gadaed ma rus ni dariy e tawa’ath rok Somoel ni fan ngodaed. Gadaed ma rus nag e thil, ma murus rodaed e rayog ni nge alamrin. Ku goeg urngin e n’en ni baga’ ni yima rus ngay?
Nap’an ni kakrom, ma murus e ma achig nag rogon e sap ko pifaak Got. Gubin ngiyal’ ma gu ba adag e thin rok Elisha u lane 2 Kings. Fare pilung u Syria e ke pi’ salthaw ni “yib ni neap, ngan liyeg fare binaew ni ga’ngin.”2 N’en ni yad ba adag ni ngar rrin’ed e ngar koeled miyad feek e fan rok fare profet Elisha. Gadaed be bi’eg nibe ga’ar:
“Me reb e kadbul me od fapi pigpig rok fare mo’on ku Got nge yan nga wean, mu guy, nike longobiy e salthaw nu Syria e binaw ni bay e os nge chariot riy. Me sul fare tapigpig ngak Elisa me ga’ar, Masta! Kad gafgowgad, mang e ngad rin’ed?”3
Iraram e murus nibe non.
“Me ga’ar [Elisa], Dab mu rus: ya kab pire’ e pi’in ni bay u ba’ rodad ko pi’in ni bay u ba’ rorad.”4
Machane dani tal u rom.
“Me meybil Elisa, ni ga’ar, Somol, mu bing owchen e tapigpig rog nge guy. Me pingeg Somol e changar rok fare tapigpig me guy fare burey nib sug e os nge chariot nnifiy nib liyeg e gin’en ni bay Elisa riy.”5
Rayog ni dariy e chariot nnifiy nikan pi’ nge chuweg e murus rodaed nge chuweg e pi mo’oniyan’ rodaed, machane ba tamilang e n’en ni gadaed ra fil riy. Bay Somoel rodaed, ma be leam nag daed ma be tawa’ath nag daed ko kanawo’ ni kemus ni go’ Ir e rayog rok. Meybil e rayog ni nge pining gelngin nge yi’iy nib tu’uf ni ngad ted e tafney rodaed ngak Yesus Kristus nge fare miligach ni bayul Rok. Somoel e manang e ngiyal’ ni gadaed ra thamiy e murus. Kugu moy u rom ma ku arrogon gur, ma iraram fan nib sug fapi chep nib thothup ko thin rok Somoel:
“Mfalfalen’, dam rus.”6
“Sap ngak Kristus u lan gubin lanin’um; dabi marwaer an’um, dam rus.”7
“Pi ulungi gidii’, dam rus gaed.”8 Gu ba adag e thin ni “ulungi gidii’.” Lane biney e Galasia ma dan yo’or gaed nib fal’ u owchen e fayleng, machane nap’an ni gadaed ra bing owchen daed, “bo’or e pi’in ni bay rodaed ko pi’in ni bay roraed.”9 Fare Tachugol Saaf rodaed, ni Yesus Kristus, e yoeg ni ra peth e fayleng nge infiyarno nga ta’abang ngeb ngodaed, machane fa’anra gadaed bay rok, ma dabyog nge kireb nag daed.”10
Urogon ni nge chuw e murus? Fare tapigpig, e be sak’iy u to’ben Elisa, ni profet rok Got. Kubay e binem e micheg rodaed. Napan ni gadaed ra motoyil ngak President Russell M. Nelson, nap’an ni gadaed ra motoyil ko thin rok, ma gadaed be sak’iy u to’ben e profet rok Got. Tafneyem ko thin rok Joseph Smith ni yoeg ni tomuren gudin e mich nikan noeg ni mornga’agen, iraray e mich ni tomur, ni gamaed be pi’ ni fen: Nib fas!”11 Ba fas Yesus Kristus. Tu’ufeg rodaed Ngak nge gospel Rok e ma chuweg e murus.
N’en ni gadaed ba adag ni “nge paer fare Kan Nthothup Rok”12 rodaed e ra chuweg e murus rodaed me fal’ e sap rodaed ko tin manemus ban’en. Ke ga’ar President Nelson, “Lane rran nga m’on, ma dabyog ni ngam thap ni dariy e gagyeg, powi’iy, gapas, nge ayuw rok fare Kan ni Thothup.”13
Ke yoeg Somoel, ni demtrug gelngin ni ra yo’or e tin kireb u dakean e naam me eal nag gumircha’en e gidii’, ma thingari paer e gachalpen ko gin nib thothup, ma thingari dabi mithmmith.”14
Ma arame pi’ e biney e thin ni: “Dabin rus gaed, ya nap’an ni ra buch gubin ban’en ma gadaed ra nang ni fapi thin nikan micheg nag ngodaed e ra buch.”15
Sak’iy ko gin nib thothup—dam rus—me buch fapi thin nikan micheg. Ra reb e murus rodaed ma gadaed sap ko rogon.
Bin somm’on, sak’iy ko gin nib thothup. Nap’an ni gadaed ra sak’iy ko gin nib thothup—tabinaew rodaed, galasia, nge tempel—ma gadaed ra thamiy fare Kan Nthothup rok Somoel ni bay rodaed. Gadaed ra pir’eg e fulweg ko duwer rodaed nima magawon nag daed fa gapas e ra chuweg. Binem e fare Kan Nthothup nibe murwel. Ginn’ey nib thothup u lan gil’ilungun Got u fayleng e ba tu’uf ni dabin wagay gaed riy, gadaed be tay fan boech e gidii’, ma gadaed be athamgil ngad fol gaed ko fare gospel, nge athap rodaed ni ngad paged e murus rodaed ma gadaed pir’eg gelngin Yesus Kristus u dakean e Bayul Rok.
Dariy tigil’ e murus u lane ginn’ey nib thothup rok Got fa lan gumircha’en pifaak. Mongfan? Bachane tu’ufeg. Gadaed ba tu’uf rok Got—ni gubin ngiyal’—ma Ba tu’uf rodaed. Tu’ufeg rodaed ngak Got e ma chuweg gubin e murus, ma tu’ufeg Rok e bay ko gin nib thothup. Tafney nag. Napan ni gadaed ba marwaer ko m’ag rodaed ngak Somoel, napan ni gadaed ra chuw ko kanawo’ nib sar ko yafas nib manemus, napan ni gadaed ra marwaer nag rogdaed ni Ke sunmeg daed, napan ni gadaed ra pag e murus nge yib ngodaed—ma kirbaen’, domomow, ngochngochen’, chalbay—me chuw fare Kan Nthothup rodaed, ma demoy Somoel rodaed. Fa’anra gamanag rogon e binem, ma gamanang ni gathi bang nib mangil ni yibay riy. N’en nib thil ngay, e napan ni gadaed ra sak’iy ko gin nib thothup, ma rayog ngad thamiyed e tu’ufeg rok Got, ma “tʼufeg nib machalbog e be chuweg urngin e murus.”16
Bin migig e micheg e dam rus.”17 Demtrug rogon e kireb nge wagagay ni ra suguy e fayleng, ma kan micheg nag ngodaed ni dakean e michmich rodaed ngak Yesus Kristus e “gapas rok Got, nima yib ko gonop.”18 Ma nap’an ni ra yib Kristus u fithik gelngin nge rir, ma denen, togopluw, nge kireb e ra tal.
Ke n’uw nap’an ni weliy Apostle Paul mornga’agen e rran rodaed, nibe non ngka Timothy nib bitir:
“Mu tay fanam i yan ko re bugithin ney, tin tomuren e rran e ri bay mo’maw ni ngan par nrogon e tin riyul’ e girdi’en Kristus.
“Ya bayi par e girdi’ ni kemus ni yad e yad be leam nagrad, ma kari gel e chogow rorad, ma kar ufanthin gad, ma ke tolangan’rad ni yad be leamnag nri ba ga’ farad, ma bay urogned e thin nib kireb ngak e girdi’, ma bay dab kur folgad rok e gallabthir rorad, ma bay dab kur pininged e magaer ngak’ be’ u lanin’rad, ma bay dab kur liyorgad ngak Got, …
“… bayi t’uf e fafel rorad me tomur Got u wun’rad.”19
Tafneyem, ni “pi’in ni bay u ba’ rodaed” u barba’ e yafos nge u roy, e pi’in nib tu’uf Somoel roraed ni polo’ i gumircha’en raed, gelngiy, lanin’uy, nge gelngiy ko, “pi’in ni bay u ba’ rorad.”20 Fa’anra gadaed ra pagan’ ngak Somoel nge kanawo’ Rok, fa’anra gadaed ra un ko murwel Rok, ma dabin rus niged e tin nibe thil u fayleng fa ni rus ngay. Gube wenig ngom ni ngam ted e tin fayleng ban’en nga orel man gay e tin nib thothup u lane yafos rodaed ni gubin ngiyal’. Adag e n’en ni ba adag Somoel—nib mu’un e motochiyel Rok ngay, na’un Rok nib thothup, pi m’ag rodaed nib thothup Ngak, fare sacrament ko rran ko Madnom, thin rodaed u dakean e meybil—ma dam rus.
Bin tomur ni nggu weliy: pagan’um ngak Somoel nge pi micheg Rok. Gu manag ni gubin e micheg Rok ma ra buch. Gu manag ni rib riyul’ napan ni gube sak’iy u pow’chen med ko re mo’olung ney.
Ke dag Somoel, ni pi’in nib llowan’ ma ke thapeg e riyul’, ma ke thapeg fare Kan Nthothup ni ta powi’iy roraed, e dan baen nag raqed e dabin chuweg raed ko tin tomur e rran.”21
Iraram fan ni dabin rus gaed ko tin nibe buch e daba’, pi’in ni bay ko fare na’un nib ga’, pi’in nibe ogtharan e athamgil nge pigpig ngak Somoel ni Yesus Kristus. Falfalen’, athamgil, nib mu’un e tu’ufeg ngay e ke yib u gumircha’ey ma dani tomal fa momaw’. President Nelson, nib “falfalen’ ko tin nga m’on,” e pogran ngodaed ni, “Fa’anra ngeyib e athap ngodaed u fithik e lunguy nike yo’or nge llowan’ ko gidii’ nima kireb nag e tin riyul’, ma ngarin filed i thapeg e yi’iy.”22
Ra ngan thapeg e yi’iy, ma ngad ted e gospel ningan fol riy man athamgiliy e michmich nge tin nib thothup rok boch e gidii’ ni boed gadaed.
Spencer W. Kimball e reb e profet nap’an ni kugub bitir. Pi duw ney nike thimur, nap’an nikan pinngeg ni nggu mang e Apostle, ma ku pir’eg e gapas u lane bin somm’on e mulwol rok ko general conference nap’an e 1943. Ke magawon ko call rok; gu manang rogon e binem. Ke ga’ar Elder Kimball: “Ku ug meybil nib gel nge leam, fast nge meybil. Bay e tafney nima yib nga loelgeg nge kireb nag—tafney ni boed nibe ga’ar: ‘Dabyog ni ngam rrin’ e murwel. Danum yul’yul’. Dariy e gonop rom riy’—ma gubin ngiyal’ ma yib e tafney ni falfalen’: ‘Ngarim rrin’ e murwel nikan pi’ ngom—ngarim tem ni rayog rom, nib gab yul’yul’, ni rayog rom.’ Me tabab ni ba momaw’.”23
Ke pi’ e athamgil ngog ko mich rok e re Apostle ney ni ra mang e bin 12 e President ko re Galasia ney. Ke nang ni nge tay e murus rok nga orel ni nge “rrin’e e murwel nikan pi’ ngak” ma nga pagan’ ngak Somoel ko gelngin ni nge n’anggin ir nge “yul’yul’, me yag rok.” Ku rayog rodaed. Fapi momaw’ e ra tabab, machane gadaed ra gel ngay nibay fare Kan Nthothup rok Somoel rodaed. Dabin “rus” gaed ya nap’an ni gadaed ra ayuweg Somoel ma gadaed ayuweg e Tirok nge tunom Rok nib manemus, ma gadaed be sak’iy ko gin nib thothup.
Chiney, e fare ppin ni fakag nge pumo’on rok ni ri fithew fare duweg nike bukun e duw? Kar leam nigew e thin romow e re neap nem; mar meybil gow ngar fast gow mar nanged ko mange ngar rrin’ew. Fithik e falfalen’ ngorow nge ngomow, ni kug mangew e tutuw nge titaw, ma chiney e ke gaman medlip e bitir rorow nap’an ni yow be yan u fithik e mich nge tu’ufeg.
Mu athamgil, o pi walageg. Arrogon, gadaed be paer ko ngiyal’ nib momaw’, machane napan ni gadaed ra paer ko kanawo’ ko m’ag, m dabin rus gaed. Gube yibliy med ni napan ni gimed ra rrin’, ma dam rus gaed ko pin’en nibe buch u to’ben daed fa pi magawon nima yib ngodaed. Gube yibliy med ni ngam mel’eged ni ngam sak’iy gaed ko gin’en nib thothup ma dam mithmith gaed. Gube yibliy med ni nge mich u wun’ med e micheg rok Yesus Kristus, nib fas, ma be yaliy daed, ma be ayuweg daed ma be sak’iy u to’ben daed. U dakean fithngan fare Somoel rodaed nge Tathapeg, i Yesus Kristus, amen.