Fan ko fare Babyor ku Mormon u Sulaen’ ngak Got
Gadad be kunuy e gidii’ nu Israel ko yan tomur ma gadad be rin’ u dakaen fare Babyor ku Mormon, nib bin ga’ fan e talin ko sulaen’ ngak Got.
Bo’or e gidii’ daba’ ma duwer nag fa’an be riyul’ Got nge tha’ rodad ngak. Yo’or e gidii’ ba nanged buchuw fa dariy ban’en marunga’agen e tunom ko thap Rok. Bukun 30 e duw faram, President Ezra Taft Benson ke gu’ ni “bo’or e gidii’ ku … fayleng daba’ ma dar michaen’ ngak en Tathapeg. Yad ma duwer nag rogon e gargeleg nib ma’ang’ang Rok, yafos nib machalbog Rok, nge fa’an be riyul’ e fas ko yam’ rok nib fel’ rogon.”1
U rran rodad, kenggin e duwer e gathi kemus en Tathapeg rodad machane e Galasia Rok—Fare Galasia rok Yesus Kristus ni fan ko Gidii’en Got Rok ko Tin Tomur e Rran—ni’ir Ke fulweg nib chilan rogon udakaen fare Profet ni Joseph Smith ngay. Pi duwer ney ma sap ko cheppin, machib, fa yalen ko fare Galasia rok Somoel.
Fare Babyor ku Mormon ma Ayuwegdad ni ngad Ga’ nag e Mich
Bay ko Machib nag e Gospel Rog ni ga’ar: “Mu sulaen’um ni lowan’ rodad [ku Chitamangdad nu Tharmiy nge tunom ko thap Rok] ma yib rok pi profet u tiney e rran—Joseph Smith nge pi gidii’ nga m’on—nibe athapeg pi thog’thog’ rok laman Got. Ere, som’on e duwer ngariy ning be’ riy’ e fa’anre Joseph Smith ni’ir e profet nib riyul, ma rayog ni ngan fulweg ngay bin biney e duwer ni ngan bi’eg min meybil marunga’agen fare Babyor ku Mormon.”2
Mich rog ni kan pinning Joseph Smith ni nge mang Profet e kan gel nag udakaen e meybil rog nge be’eg fare Babyor ku Mormon: Kureb e M’ag rok Yesus Kristus. Kug ngongoliy pi thin ku Moroni ni kug “fith Got riy, ni facha’ ni Chitamangiy ni Manechubog, u fithingan Kristus,” ko ba riyul’ e Babyor ku Mormon fa dangay.3 Gube micheg ngomed ni gu nang be riyul’ riy’. Fare lowan’ nem ke yib ngog, mrayog ni nge yib ngom, “udakaen fare gelingin e Kan ni Thothup.”4
Somm’on e yang ko Babyor ku Mormon ma yoeg: “Pi’in ke yog ngoraed e biney e mich ni yib ko fare Kan ni Thothup e kura nang riy ko re gelngin nem ni Yesus Kristus e ir fare Tathapeg ko fayleng, ni Joseph Smith e ire tayi’iy nge profet rok’ u lan e tiney e rran, ni Fare Galasia ku Yesus Kristus ni fan ko Gidii’ ko Tin Tomur e Rran e ir gil’ilungun Somoel ni kan sulweg bayay nga fayleng, nib dum’midil ko yan l’agurw yay e wub rok’ fare Messiah.”5
Napan gag e missionary nib fel’ yangreg nggu waen nga Chile, kug fil rogon e n’en ni ra thilyeg e yafas ni mornga’agen gelingin fare Babyor ku Mormon. Mr. Gonzalez ke pig’pig’ nag nib tolang ulan e galasia rok nib yo’or e duw. Ke bay yo’or e skul ko taliw rok, nibe un ngay reb e degree ko theology. Ke cheag ko lowaen’ ko Bible. Kug nangew ni ke fil rogon e taliw.
Ke nang marunga’agen pi missionary nib e Fare Galasia rok Yesus Kristus ni fan ko Gidii’en Got ko Tin Tomur e Rran napan ni yad ma yaen ko muruwel rorad u binaw rok ni Lima, Peru. Gubin ngiyal’ ma ba’adag ni nge mada’ nag raed ni nge yoeg ni nge fil nag rad rogon e Bible.
Reb e rran, boed rogon tawa’ath nu tharmiy, ke lemnag, l’agruw e missionary kar tal’ gow ir u kanawo’ mar fithew fa’anre rayog ni ngar bow nga tabinaw rok mar bi’eg fapi babyor ni thothup ngak. Ke rib boed e felan’uy ngay! Kan fulweg pi meybil rok. Mrayog ni nge fal’eg laniyaen’ pi l’agruw e pagael. Ke yoeg ni ra mang rib falfalaen’ ni ngar bow ngak tabinaw rok man bi’eg fapi chep nib thothup.
De yoeg ni nge soen ko fare mo’olung rorad. Ke lemnag nra use nag fare Bible ni nge togopluw ko mich rorow. Ke michaen’ ni fare Bible e ra dag nib tamilang rogon fare dol’ ko taliw nge michaen rorow. Fare nep kan duwgliy ke yib, nge pi missionary kar tuguy e mab rok. Ke falfalaen’. Ke taw chirofen rok.
Ke bing fare mab me pinning pi missionary ni ngar bow ngalan sengil rok. Reb e missionary ke pii’ ngak e babyor nib ra’en e day me yoeg nib tamilang e mich rok ni manang re babyor ney ni ba’ e thin ku Got riy’. Bin l’agruw e missionary ke pii’ e mich rok nib gel ko fare babyor, ni weliy fan ni kan piliyeg e thin riy’ ko profet rok Got u tiney e rran, fithingan Joseph Smith, ma ke fil rogon marunga’agen Kristus. Pi missionary rogew e kafel’ mar bow i yaen.
Mr. Gonzales e ke kirebaen. Machane ke bing fare babyor, me tabab ni nge bi’eg pi page. Ke bi’eg bin somm’on e page. Ke be’eg page ngo page me dani tal’eg riy’ mada’ ko blayal bin magid e rran. Ke bi’eg urngin yang ko fare babyor ma ke nang be riyul’ riy’. Ke nang mang b’tuf ni nge rin’. Ke call nag pi missionary, me athapeg pi machib rorow, me digey e yafos rok ni ke nang faram ni nge mang chongin fare Fare Galasia rok Yesus Kristus ni fan ko Gidii’en Rok ko Tin Tomur e Rran.
Fare pumo’on nem e sensey rog ko MTC u Provo, Utah. Chepin e mich ko Brother Gonzalez nge gelingin fare Babyor ku Mormon ke gin’ug me thiliyeg neg.
Napan kug taw nga Chile, mission president rog, President Royden J. Glade, ke fithdad ni ngad bi’eged fare mich rok’ fare Profet i Joseph Smith ni ba’ ko Joseph Smith—History gubin e wiik. Ke weliy fan ngodad ni michaen’ ko Bin Somm’on e M’ag e ra un ngay ko pi mich rodad marunga’agen fare gospel nge michaen’dad ko fare Babyor ku Mormon.
Kug motoyil ko fonow rok. Kug bi’eg pi chepin e Bin Som’on e M’ug; Kug bi’eg fare Babyor ku Mormon. Kug meybil boed ni ke fith dad Moroni ngay mug fith “Got, ni facha’ ni Chitamangiy ni Manechubog, u fithingan Kristus”6 fa’anre be riyul’ fare Babyor ku Mormon. Gu micheg daba’ ni gu nang ni fare Babyor ku Mormon, boed ni ke yoeg fare Profet i Joseph Smith ke yoeg, “ire th’abi mat’aw e thin riy u fithik’ e pi babyor nu fayleng, ma ire ta’an e mich rodaed, ma rayog ni nge chugur bee’ riy ngak’ Got u dakean yalen e paer riy, ni dabiyog ni rin’ yuken e babyor.”7 Fare Profet i Joseph yuken e yoeg: “Mfek fare Babyor ku Mormon nge pi thog’thog, nge bu’uw e taliw rodad? Dariy.”8
Mich ni Mich Rom
Napan gadad ma nang fan ni mini’ gadad nge mang fan fare Babyor ku Mormon, e mich rodaed e ra gel nag mra de mithmith Ra gel nag e m’ag u wun’dad ni ngad koel chilan pi m’ag kad fal’eg ned rok Got.
Ta’areb e fan ko fare Babyor ku Mormon e ni ngad kunuy bayay pi gidii’ nu Israel kan tuluf. Biney e gaak e ra pii’ ko gubin pifaak Got e wo’ ni ngar laked kanawo’en e m’ag, nge napan yad ma yul’yul’ ngay, sul bayay ngak p’owchen en Chitamangiy. Napan gadad ma fil rogon e kalngan’ min tawfe nag e gidii’, gadad ma kunuy Israel nga ta’abang.
Ba’ 108 e yay ni ba’ ko Babyor ku Mormon nima weliy fan Israel. Ko bin som’on e yang ko Babyor ku Mormon, Nephi ke fil rogon, “Ya n’en ni gube lemnag e gomanga yigi wurengaen’ e gidii’ ngarbaed ngak’ fare Got ku Abraham, ni’ir fare Got ku Isaac ni’ir fare Got ku Jacob, me yog ni ngar thap gaed.”9 Fare Got rok Abraham, Isaac, nge Jacob ni’ir Yesus Kristus, fare Got ko Bin Kakrom e M’ag. Gadad ra thap gad napan gadad ma baed ngak Kristus udakaen gospel rok nib fos.
Tabuch, ke yoloey Nephi:
“Arragon, riyul’ ni chitamag e bo’or ban’en ni weliy ni mornga’agen fapi Gentiles, nge ku mornga’agen e gidii’ ku Israel, ni bay ni tata’areb nagraed ko gak’iy ni olive, ni bayi m’ing papa’ngin me garar u dakean e fayleng. …
“Me tomuren ni ke garar e gidii’ ku Israel u fayleng ma bay kur suloed nga ta’abang bayay; fa, aram ko tomur, u tomuren ni ke yog ngak’ fapi Gentiles fare Gosple ni polo’, ma fayupa’ i papa’ngin fare ke gak’iy ni olive, ara tin ni ke magaey ko fapi gidii’ ku Israel, e bay ni puthuyraed ko fare ke gak’iy, ara yibi tamilang laniyaen’raed ni fare Messiah e ba riyul’, ni’ir e Somoel roraed nge Tabiyul roraed.”10
Amrogon, ko tomur e yang ko Babyor ku Mormon, fare profet i Moroni ma sulaen’dad pi m’ag rodad, ni ga’ar, “ni nge yog ni siyi minaen’ med, ni nge yaeni aw ni pi m’ag rok’ facha’ ni Chitamangiy ni Manechubog ni ke tay ngomed, e nge mugu’ul.”11
Pi M’ag rok’ Facha’ ni Chitamangiy ni Manechubog
Mang e “pi m’ag rok’ facha’ ni Chitamangiy ni Manechubog” kan weliy fan Moroni? Gadad ma bi’eg u babyor ku Abraham:
Fithingag i Jehovah, ma gumanang fare tumor ko fare somm’on; ere pa’ag e ra matangiyem.
“Ma gu ra fal’eg e nam nib ga’ ko gidii’ rom, ma gu ra tawa’ath nigem nib yo’or, min fal’eg e fithingan nib tolang u fithik gubin e pi nam, ma gara mang e tawa’ath ngak pifakam ko tomurenem, ni u fith pi pa’ raed yad ra fekey e machib nge Priesthood ney ngak gubin e pi nam.”12
President Russell M. Nelson ke fil rogon de n’uw napan ngak worldwide broadcast ni “tineyriyul riy e tn tomur e rran, nge Somoel ma papay nag e muruwel rok ni nge kunuy Israel nga ta’abang. Ren’em e bin ga’ fan e n’en nibe buch ko fayleng chiney. Dariy yuken e muruwel nib ga’ fan riy’, dariy yuken e muruwel nrib fla’ab riy. Ma fa’anre gabe mel’eg, fa’an ga ba’adag, mrayog ni ngam un ngay. Ma rayog ni ngam mang bang ko ban’en nib ga’, nib fla’ab, nib manemus!
“Napan gadad ma yoeg marunga’agen e gaak, gadad ma yoeg marunga’agen e tin riyul’ ney: gubin e bitir ku Chitamangiy nu Tharmiy, u l’agruw e barba’ ko veil, bt’uf ni ngar rung’ag fare mulwol ko gospel nib fulweg nga chilan rogon rok Yesus Kristus. Yad ma mel’eg rograd fa’anre yad ba’adag ni ngar nanged yug boech.”13
Ireram e muruwel rodad nib chongin e Galasia rok Yesus Kristus ni fan ko Gidii’ ko Tin Tomur e Rran: gadad ma gay rogon ni nge fekey e nang fan—nge sulweg ngak—fare gospel ku Yesus Kristus. Gadad e “takunuy ko tin tomur e rran.”14 Muruwel rodad e tamilang. Pi walageg, aygi nang e gidii’ ni gadad kad tayed u wun’dad micheg ko Moroni, kad meybil gad min fulweged e meybil rodad ni riyul’ fare Babyor ku Mormon, ma aygi welthin e michaen’ ngay ngak e gidii’ ko thin, nge baga’ fan riy’, ko ngongol rodad.
Fan e Babyor ku Mormon ko Sulaen’ ngak Got
Fare Babyor ku Mormon ma ba’ riy gubin yang ko gospel rok Yesus Kristus.15 nibe powi’iydad ngak pi m’ag rok Chitamangiy, ni’ir fa’anre ngad yul’yul’ gad ngay e ra fekey bin ga’ e tawa’ath rok—yafos nib machalbog.16 Fare Babyor ku Mormon e ta’an e mich rok gubin e pifak Chitamangdad nu Tharmiy.
Ngog bayay pi thin rok President Nelson: “Napan mu … bi’eg gubin e rran ko fare Babyor ku Mormon, gara fil rogon e kengin e machib marunga’agen fare kunuy, tin riyul’ ko Yesus Kristus, Bayul Rok, nge gubin yang e gospel Rok ni dakurir ko Bible. Fare Babyor ku Mormon e bin ga’ fan e rogon ni ngan kunuy e gidii’ nu Israel. Ya, fa’anre dakuri’ e Babyor ku Mormon, fare kunuy ko Israel e dani yoeg.”17
Aygi tal’eg e thin rog nggog pi thin ko Tathapeg rodad napan i fil rogon fapi Nephites ko tawa’ath nikan micheg ngorad: “gimed pifak fapi profet; nge gimed e gidii’ ku Israel; nge gimed gidii’en fare m’ag ni tay facha’ ni Chitamangiy ngak’ e pi chitamangmed, ni ga’ar ngak’ Abraham: Ma dakean pifakam e yira tawa’ath nag gubin e pi mfen nu fayleng riy.”18
Gube micheg nag ni gadad gubin ma pifaak Got, pi bitir ko bitir rok Abraham, fare tabinaw ku Israel. Gadad be kunuy e gidii’ nu Israel ko yan tomur ma gadad ma rin’ u dakaen fare Babyor ku Mormon—e babyor ni, napan ni un e Kan Thothup rok Somoel riy’, e bin ga’ fan e talin ko sulaen’ ngak Got. Kan powi’iydad e profet rok Got, i President Russell M. Nelson, ni’irma gagiyeg nag fare kunuy e gidii’ nu Israel u tiney e rran rodad. Ba riyul’ fare Babyor ku Mormon. Ke thiliyeg e yafos rog. Gube micheg, boed kan micheg nag e Moroni nge bukun e profet ni kakrom nge mada’ ko chiney, ni rayog ni nge thiliyeg e yafos rom.19 U dakean fithingan Yesus Kristus, amen.