Tachugol e Ya’el

Rok Elder Gary E. Stevenson

Ko fare Ulungi Ragag nge L’agruwi Apostle

Ngad kii’ed paa’dag nga reb ufithik e t’ufeg bachen ni ke chiylen Tathapegdaed.

Nap’an rebe sabethin ko e fagar rok, ke non ngog nap’an ke fel’ yangren e mo’on ni ke mang e chongin nib be’ech ko tawfe u Galasia, ke thamiy dabki chongin e gidii’ ko ward rok. Fapi missionary ni kar filew ngak kar chuwgow ko bang, make thamiy e dugil. Bachan dariy’ e fagar rok u ward nem, ke piry’eg fapi fagar rok ko ou’moon ma ke un e ngongol roraed ni ke fek ir ko galasia—arragon ke tab’ab ninge chuweg ko ulungi galasia. Ba maap luwan, nap’an ke weliy’ e magar nib gaa’ ni fan reb e chongin ko ward rok ni kar kii’ed paa’rad ngak mar pinninged ngak ninge sul urrogon nib gol. Tomuren boech e pul, ke sul nga bang nib matangiy, make gay gelngin rok nge reb e gidii’. Gadadba pinning e magar ngak fare tachugol u Brazil ni ke piry’eg fare mo’on nem, Elder Carlos A. Godoy, irba pare nga chiya’ nga tomur rog i’ir e chongin fare Presidency ko fare Medlip I Ragag?

I’ir e ma’ang’ang ninge yoeg e ngongoly rodad nib chigchig nira yaen nga manemus. Tin riyul’ ney e ba dayif ko rayog rodad u Galasia ko machib. Chitamangdaed nu Tharmiy ra sap nga rayog rodad nib chigchig, ma yoeg ningar manged e m’ang’ang. Ke yaen nel’ e pul nap’an President Russell M. Nelson ke yoeg ni “en Somoel ke thilyeg nib ga’ e rogon ningad ayuweged ngodad,”¹ ke weliy’, “Gadadra tab’ab e rogon nib be’ech, mab thothup ningad ayuwegdaed mag machibnoged nga reb. Gadadba kunuy nge pii’ fithingan ko ngongol rodad ni ‘machib.’”²

President Nelson ke weliy’: “E pow ko fare Galasia nib riyul’ nib fas rok Somoel ninge yarmiy, ma ayuweg e machib ni gubin yal’ ni fan e bitir ku Got nge tabinaew roraed. Bachane i’ir e Galasia Rok, gadad gubin e tapigpig rok ra machibnoged nga reb, woed rogon Ke rrin’. Nap’an ngad machibnoged udakaen Fithingan, ko gelngin nge mat’awan Rok, nge udakaen e murnguy nib t’uf Rok.”³

Tomur ko welthin nem, e fulwg romed e ba gaa’! Kug rung’aged marung’agen e gelong romed ningam rrin’ed fatin thilyeg ulan urngin e stake ulongob e fayleng woed ke chilyen e profet rodad nib fas. Ko sasun, tamachib nib mo’on nge ppin kar thapen bochi tabinaw ni ngar ayuwegen, pi companion—ni bay e pumo’on nge ppin ni yangren—kan yarmiy’raed, mar rrin’ed e mo’olung ko machib. Ere, nifan gubin e pi thilyeg ni ke buch foowaap nge daba’, gadad ba’adag biney ma ayuweg e muruwel ko machib.

Dagur lemnag ni kaygi buch ni nel’ e pul nga m’on ko fare thogthog nag nikan noeg fowap—“reb wo’en nib be’ech nge tha’ ko gospel ulan e tabinaew nge lan fare Galasia”⁴—fare thogthog nag ko fare machibnag nikan pii’. Ni tabab ko Januaray, nap’an ni gadad ra pag ta’areb e awa u Galasia, gubin ni kad filed ko fare machibnag e ra ayuwegdad ni ngad tedfan magadad machibnag, u lukngun e tabinaew ko Madnom ko chongin e tabinaew nge gidii’ nib tu’uf rodad.

Kan yarmiy nib fel’ rogon e yalen, machane ngad fithed, urrogon ningad nanged fa’an gadadma machib boed rogon rok Somoel? Gadadba ayuweg fare Tachugol nib Fel’ urrogon ni Ba’adag?

Nap’an reb e sabethin ko President Henry B. Eyring, ke pinning e gil’ ngak fapi Gidii’en Got bachane kar folgaed ko fapi thilyeg me yoeg athap nib yul’yul rok ni fapi chongin ra nang fan e machib nib ba gaa’ ko “ngam gol.”⁴ Dani yib fan ni damu gol, machane e gidii’ nima nang fan e fan ko machib ma nang nib gaa’ ko gol. Nap’an ngan rrin’ u rogon rok Somoel, e machib ra gay e tin fel’ nga manemus, woed rogon e tirok Elder Godoy.

“Fare Tathapeg ke weliy’ e fan ko machib nap’an Ke pigpig ufithik e t’ufeg. … Ke … fil, meybil ni fan, golnag, me taw’athnag e gidii’ Rok, Me pinning urngin ningar ngak. Nap’an fapi Chongin e Galasia ra machibnog [urrogon nib tolang mab thothup], yaedba gayrogon ufithik e meybil ningar pipigniged woed rogon Rok—ningar … ‘matangiyed e galasia ni gubin yal’, ma thamgiliyraed ma pii’ gilingraed,’ ningar ‘ranoed nga urngin e na’un rok pi chongin,’ ma ayuwegraed ningar manged e gachalpen nib riyul’ ku Yesus Kristus.”⁵

Gadad manang ni bin yul’yul’ e cha’en nibe gafaliy e saf ab tu’uf fapi saf rok, ma manangrad ni gubin fithnganrad, nge “tin ba’dag ban’en” ngorad.⁶

E fagar rog ke muruwel ko tachugol, make rrin’ e muruwel nib mom’aw ninge chugolnog e garbow nge saaf ulan fapi Rocky Mountain. Ke weliy’ e tin magowen nge tin riya’ ko muruwel e saaf. Ke weliy’ nap’an e spring, nap’an bayi ice ko burey ngem ke meluk, ke powiy’ ulungi saaf ko 2,000 nga dakaen e burey ko summer. Aram, ke chugol nag fapi saaf mada’ ko fall, nap’an kar chuwgaed ko burey ko summer nga wuru’ e binaw ko winter. Ke weliy’ urrrogon e chugolnog ko saaf i’ir e muruwel nib mom’aw, nibe t’uf e od u kakadabul nga naep—ke od ou’moon e yal’ ke yib mada’ ko ke thig e yal’. Dabiyog ninge rrin ni go’ ir.

Reb e gidii’ kar ayuweged ningar chugolnoged ulungi saaf, i yaed boech e tamuruwel nib salap nge boech nib be’ech ni yaed ba t’uf e ayuw nge ba’adag ni ngar fil’ed. Ke t’uf e ayuw ko la’agruw e os nib faram, la’agruw e os nib chigchig, la’agruw e kus nib faram, nge la’agruw fa delip e kus ni bitir. Machane nap’an fare summer nem, e fagar rok nge ulungi tamuruwel kar nangd e nifeng nge n’ew, m’ar, gat’ing, dariy’ raen, ma urngin e gafgowgaed nib almarin. Nap’an fare boech e d’uw thingar ningar feked e raen nap’an e summer ningar duruwiy’ed fapi saaf. Nge, urnign e duw nap’an e fall, nap’an bayib e winter nib almarin ma kar chuweged fapi saaf ko burey ningar matheged, urngin e yay bay 200 ni kar n’aged.

Fare ulungi saaf ko 2,000 ni kan loeg nga burey nap’an e spring ni ke n’ag ko 1,800 nap’an e fall. Boech e saaf dabki n’ag ko m’ar fa yam’, machane kar lii’ed boech e mountain lion nge coyote. Fapi gamanman nib malboch ngem kar piry’eg pi saaf nib tir ni kar chuwgaed ko ulungi saaf, kar chuwgaed ko matangiy ko reb e saaf. Ngam weliy’ marunga’gen e fanethin ngey ko tin ya’el? Mini i’ir e tachugol? Mini’ i yaed ulungi saaf? Mini’ i yaed e gidii’ nibe ayuweg fare tachugol?

En Somoel Yesus Kristus ni Ke yoeg, “I gag fare tachugol nib fel, ma gumanang pi saaf rog, …ma Gura pii’ yafas rog ni fan e saaf.”⁷

Fare profet Nephi ke fil woed rogon Yesus “ma bay i duruw’iy e saaf rok’, ma bay ra pir’eged ni’ir e ma chathowoliyraed.”⁸ Gube piry’eg e gapas ni gumanang “en Somoel i’ir fare tachugol”⁹ ma Irma nang gadad gubin ma Irma matangiydaed. Nap’an ngad nanged e nifeng nge n’uw nib almarin, m’ar, gafgow, dariy’ e raen, en Somoel—Tachugol rodad—nira ayuwegdaed. Irra fulweg e ya’el rodad.

U ta’abrogon e fagar rog ninge ke chugolnog fapi saaf rok ko ayuw e gidii’ nib glabthir nge tir, pi os, nge pi kus, en Somoel ba t’uf e ayuw ko muruwel nib mom’aw ningan chugolnog e saaf ko ulungi saaf Rok.

Gadad gubin e bitir nib t’uf ngak Chitamangdaed nu Tharmiy ma gadad e saaf ko ulungi saaf Rok, gadadma thapeg e tawa’ath ningad ayuweged Yesus Kristus. U ta’ab e ningyal’, bay e muruwel rodad ningad machibnoged e gidii’ ufithikdaed i gadad gubin e tachugol. Gadadba fol fapi thin ko Somoel ningad “pigpigniged ngam dared u fithingan, ngam … kunuyraed pi saaf rog.”¹⁰

Mini’ i’ir e tachugol? Urngin e mo’on, ppin, nge bitir ulan fare gil’lungun Got i yaed tachugol. Dariy’ e pinning nib t’uf. Ko e ningyal’ ningad chuweg ko pi raen ko tawfe, kan pinningraed nga muruwel. Ngad kii’ed paa’dag nga reb ufithik e t’ufeg bachen ni ke chiylen Tathapegdaed. Keyog Alma: “Ya mang tachathowol e bay u fithik’med nib yo’or e saaf rok’ ma dar matangiyraed, ni nge dabi yibe wolf i longuy e gamanman rok’? Ma gathi nge tuluf nge chuw?”¹¹ Nap’an bay e gafgow ko yoror rodad ko tin u fayleng fa tin ya’el, gadadma mil ngoraed ningad ayuweged raed. Gadadma chibiy tin tomal ko reb ninge ba’ud. Gadadma kirebaen’daed ngak e gidii’ nib kirebaen’. Gadad ba fi’leg laniyaenraed e gidii’ nib t’uf ni ngar fi’leged laniyaen’raed.¹² En Somoel ba’adag pinn’ey rodad. Ma bay yib fare rran nap’an Irra pufthinnagdaed ko e muruwel rodad ningad chugolnog ulungi saaf Rok.¹³

E fagar rog nib tachugol ke weliy’ reb e yang nib gaa’fan ningan matangiy e saaf u wuru’ e binaw. Ke weliy’ fapi saaf ke n’ag ran ka’ed fapi gamanman nib malboch. Arragon, chuchgur ko 15 percent ko ningyal’ roraed kar piry’eged e saaf nib malog. Kar filed fa’an ngar piry’eged e saaf nib papay, ou’moon ke yaen nib palog ko ulungi saaf, dar yim’. Ke weliy’ irma t’uf e gumaen’ nge salap ningar piry’eged e saaf nib n’ag.

Boech e duw u faram, Kug biy’eg e babyor ulane newspaper ni guba a’adag ere Mug thapeg. Pi thin riy’ ni ga’ar, “Kus Ni Gumaen’ Dabi Chuw Ko Saaf Nib Malog.”¹⁴ Biney e babyor ke weliy’ marunga’gen boech e saaf ko binaw nib chuchugur ko fagar rog ke n’ag u burey nap’an e summer. Tomuren la’agruw fa delip e pul, kar malogaed nga dakaen e burey ufithik e ice. Nap’an kar chuwgaed ko saaf, boech e kus dar soengaed ngoraed, bachane i’ir e muruwel roraed ningar matangiyed fapi saaf. Dabi ta’leg ko matanguy. Aram ke soen—ma ke matangiy fapi saaf nib malog ko boech e pul nap’an e ice nge gwael, ma ke matangiyraed ko coyote, mountain lion, fa reb e gamaman nib malboch nira lii’ fare tachugol fa ulungi saaf. Fare sassing nike fek udakaen e bin somm’on e guruy nifan e babyor ko news be pii e rogon ni guy e laniyaen’ re kus nem.

Ya’an lan owchey nge rogon e sap ko saaf

Ulane fare Bin Be’ech e M’ag, gadadma piry’eg e fanethin nge fanow ko Tathapeg nibe weliy’ nib fel’ rogon e muruwel rodad ko tachugol, tamachib nib walagen, fa saaf ke n’ag:

“Sasun e array rogon ma bay bigimed ni bay ra’ay i saf ni fak me yan reb ngabang, ere man e ra rrin’, ra pag fa mereb i ragag nge mereb nem ko gin’en ni yad be kay e pan riy’ me yan ni be changarnag fare saf nike yan ngabang mada’ ko ngiyal’ ni fin ra piry’eg riy’?

“Ma nap’an nra piry’eg, me ir falfalan,’ me yin’ nga pon.

“Me fek i yaen nga tabinaew, me kunuy pi tafagaer rok nge pi’in yad buguliyoror ngar mu’ulungaed ngak me ga’ar ngoraed, Mu uned e falfalen, ya Kug piry’eg fare saf rog ni yan ngabang.”¹⁵

Nap’an gube weliy’ e fan ko fanethin ney, gadadra piry’eg biney e fanow nib gaa’fan:

Thinger ningad nanged fapi saaf nib pag.
Thingar ningad piry’egraed mada’ ko ngan thapeg.
Nap’an ngad piriy’egdaed, sana thingar ningad tayed nga pon rodad min fekraed nga tabinaew.
Ngad kunuyed raed ko fagar nap’an e sulweg roraed.

Pi walageg, re sikeng nib gaa’ roraed nge taw’ath rodaed ra yib udakaen e machib rodad ngak fapi saaf nib malog. Pi chongin e galasia ulan fare Babyor ku Mormon “Ere ur guy[ed] e gidii’ roraed, mar duruw’iyed raed ko pin’en nib l’eag rogon ko tin nib mat’aw.”¹⁶ Rayog ningad fol e fanow roraed nap’an ngad pugurraengaed ninge powiy’ e machib “udakaen fare Ya’el, …ni thilthil, ngan, …fi’leg ni fan e tin t’uf ko urngin e chongin.” Nib gaa’fan ningad “piry’eg ningad ayuweged e bee’ nge gidii’ ningar taermedliyed ko bin magid e gam’ing, mar folgaed pi michmicheg [roraed] … , mar manged gel bugwaenraed.”¹⁷

Urngin e ya’el nib t’uf ngak Chitamangdaed nu Tharmiy. E pinning rok ningad machibnoged ni thabi gaa’fan Ngak, ni fan e muruwel nge fel’ngin Rok. I’ir e muruwel ko manemus. Urgnin e bitir Rok ni gaa’ puluwaen u sap rok. Irba’adag emko t’ufeg ni dabiyoeg ningam nang fan. Woed rogon fare kus nibe matangiy mab yul’yul’, fare Somoel ma soen ngadakaen e burey ninge matangiyem nap’an e nifeng, n’ew, ice, nge boech.

President Russell M. Nelson ke fil ngodaed nap’an fa binem e mo’olung: “E milwol rodad ko fayleng [ma Gube un lamag, ‘ningad ayuweg ulungi saaf’] e ba moem’ mab yul’yul’: gadadba pinning urngin e bitir ku Got ko gali barba’ i veil ningar baed ngak en Tathaepeg, mar thapeged fapi tawa’ath ko temple nib thothup, ngan falfalen’ nib gumaen’, mar mat’awgaed ni fan e yafas nib manemus.”¹⁸

Ra yoeg ningad chibiy owchdaed nga pi lik’ay ko profet, ninge yoeg ningad tachugol fapi ya’el nga temple ma tomuren e Tathapegdaed, Yesus Krisut. Dabki lemnog ningam ngongoliy e ma’ang’ang. Irma fith ni go’ ningam pinning fapi walagem nib mo’on nge pinn Ngak bachan bayi gelingin Rok ninge thapeg e ya’el. Nap’an ngad rrin’ed rayog ningad thapeged fare micheg: “Ya nge yib i m’ug e Cha’ ni ir pilungen e pi’in yad ma gafaliy e safme yag ngomed fare te’eliyaw ko fla’ab ni dabi math ram’en bi’id.”¹⁹ Marunga’agen gube pii’ e m’ag rog—nge ku Yesus Kristus enra e Tathapegdad nge Tabayul rodad—udakaen e fithingan ku Yesus Kristus, amen.