Ulunguy Nga Ta’abang nge Ta’areb Gubin Ban’en ngak Kristus
Gelngin fare gospel rok Tathapeg ni nge pilyeg me yibliy daed e ma yib ni yibe nang ma yibe fol ko machib riy, mornga’agen, nge rogon ni yibe fil.
Gaaf e talne murwel ni gadaed gubin ma gadaed manang ko mang. Gaaf e kan fal’eg ko chachabngan e maad, woldug, seng, fa kuboech ban’en ni yima chelcheleg fa ni l’aen nga ta’abang. Fal’el, ni boech bugiban’en e rayog ni nib peth ma ta’abang me mang ban’en nib gel. Ere, chachamiy bogi ban’en nga ta’abang e rayog ni nge fal’eg e talne murwel nib falel’.
Boed rogon nikeb gelngin e gaad ko boech bogi ban’en, ma ku fare gospel rok Yesus Kristus e ke pi’ mornga’agen e n’en nib riyul’ me pi’ e tawa’ath napan ni gadaed ra motoyil ko thin rok Paul ni ngan “ulunguy nga ta’abang nge ta’areb gubin ban’en ngak Kristus, u tharmiy, nge falyleng; mus nib mu’un ngay.” 1 Baga’ fan, ni biney nib riyul’ ni yibe kunuy nga ta’abang e bay Somoel Yesus Kristus u lukngun ya Ir e “kanawo’, tin riyul’, nge yafas.” 2
Gube meybil ni ra tamilang nag daed fare Kan ni Thothup napan ni gadaed ra leam nag rogon fare thin ni ulunguy nga ta’abang nge ta’areb gubin ban’en ngak Kristus e bay wo’en ni ngan fil man fol ko gospel Rok u lane yafas rodaed.
Ngiyal’ nikan Thapeg e Yi’iy
Gadaed baa’ ko ngiyal’ nikan thapeg e yi’iy ko fare Galasia rok Yesus Kristus nikan fulweg. Pin’en ni kakrom e kan noeg e daba’ ni bay fan ni: ngan gel nang e mich ngak e Chitamangiy nu Tharmiy nge tunom Rok nge ngak Yesus Kristus, ni Faak, nge Bayul Rok. Schedule ko mo’olung ko Madnom e gathi kan ngoch nag. Machane, chiney e ke yo’or e kanawo’ey nge murwel ngodaed e gidii’ nge tabinaew ni ngad murwel gaed ngay ngan mangil nag e Madnom u tabinaew nga galasia.
Fare April nike thimur, ma rogon e ulung ko priesthood e ri daworun thilyeg. Machane, thin nge gelngin e kan pi’ ko kanawo’ nib tolang mab thothup ko machib ngak e pi walag daed.
Boed fapi gaaf nikan l’aeng ke mang talne murwel nib gel, gubin e pi’ mithmith ney e bang ko murwel ni ngan tiyan’uy, rogon mornga’agen, nge murwel ko fare Galasia rok fare Tathapeg nikan Fulweg nibay e murwel riy: ngan ayuweg Got ko murwel Rok ni ngan pi’ e thap nge falfalen’ ko Pi faak. Wenig dam tiyan’um ko rogon ni ngan rrin’’ e n’en nikan noeg. Ri dabin pag nochi ban’en ninge kireb nag faan e pin’ey nib thil e chiney nikan fal’eg.
N’en ni gadaed ba adag e mich ko fare tunom rok e Chitamangiy nge murwel rok Tathapeg ninge bayluyey e ra gel u dakean e fayleng ma m’ag rok Got nib manechubog e ran fal’eg. 3 Kemus ni n’en ni ngad pired ni gadaed be rrin’ e ngad thil gaed i yan ngak Somoel man tu’ufegney man pigpig ngak e pi walagdaed.
Nang e ulung nib Mangil nge Waer
Boech ngiyal’ ma chonggin e Galasia e gadaed ma ulung nga ta’abang, ma gadaed ma waer, man fol ko fare gospel u lane yafas rodaed ni gadaed be mel’eg e pin’en ni ngad filed nge murwel ni ngan rrin’. Machane binem e rayog ni nge kireb nag rogon e gonop nge sap rodaed. Ngarin sag’al gaed ya rogon e sap ko Pharisees e rayog ni nge taleg daed ko chugur ngak Somoel
Fare fan nge ma’ang’ang, falfalen’, nge thil ni gubin ngiyal’ nge ayuw nima yib ko “[kad oged gumʼirchaʼdaed] ngakʼ Got” 4 man “[thapeg] ya’aen [ngodaed]” 5 e dabiyog ngan thapeg ni kemus ni yibe yaliy gubin e pi thothup ban’en ni ngan rrin’ed. Machane, gelngin fare gospel rok Tathapeg ni nge pilyeg me yibliy daed e ma yib ni yibe nang ma yibe fol ko machib riy, mornga’agen, nge rogon ni yibe fil. Kemus ni napan ni gadaed ra ulunguy nga ta’abang nge ta’areb gubin ban’en ngak Kristus, ni ri yibe tiyan’ Ngak, ma tin riyul’ ko gospel e ra n’anggin daed ngad manged e n’en ni ba adag Got ni ngad manged6 man athamgil nge mus ko tomur.7
Tin Riyul’ ko Gospel ni ngan Fol man Ta’areb Nag
Fare gospel rok Yesus Kristus ban’en nib riyul’ nib falel’ “kan tay nga frame”8 ma kan tay nga ta’abang. Napan ni gadaed ra fil ma gadaed ta’areb nag e pi riyul’ ko gospel, me fal’ wa’athan daed ni ngad thapeged e sap nib mangil nge gelngiy ni nge ngan sap ngan guy rogon Somoel u lane yafas rodaed nge telngiy ni rayog ni nge rung’ag luman. 9 Ma thin ni ulung nga ta’abang ngan ta’areb—Ngak—e rayog ni nge ayuweg daed ngad thilyeged e pin’en ni gadaed ma mel’eg nge ta’areb, me mangil, me ta’areb ni ga’ngin. Soen nggoeg l’agruw e machib nge wo’ ko Galasia ko n’en ni gube weliy.
Wo’ ni 1. Bin aninggeg e kenggin lekngin e mich e reb e n’en nikan weliy ni fal’ rogon ni mornga’agen i ulunguy nga ta’abang nge ta’areb gubin ban’en ngak Kristus: “Ba mich u wanʼmad ni tin ni mʼon i kenggin likʼngin machiben e Gospel e: bin taʼareb, Nge mich u wunʼiy somol ni Jesus Kristus; bin lʼagruw, Ngan kalngan; bin dalip, Taufe u maren nge mʼay machan e pi denen; bin aningeg, Taʼpaay nga daken lolgey ngan piʼe tawaʼath ko Kan Thothup.” 10
Mich nib riyul’ e ba’ nib sar ngak Somoel ni Yesus Kristus—u Dakean ni thothup ma Faak e Chitamangiy nib Tu’uf Rok ma Dakean nge bayul Rok nike mu’ nag. “Ya ke muguʼuliy fare motochiyel, ere bay matʼawon ngakʼ e piʼin nib michaenʼraed ngakʼ; ma piʼin nib michaenʼ ngakʼ e bay ra lʼeged paʼaraed ko tin nib mangil banʼen; ere be non ni paʼ e gidiiʼ”11 Mich ni yibe gel nag ngak Kristus e pagan’ ma pagan’ rodaed ni gadaed be pi’ Ngak ni ir e Tathapeg rodaed, u dakean Fithngan, nge pi m’ag Rok.
Bin somm’on ni ngan rirn’ ni yibe pagan’ ngak e Tathapeg e kan kalngan’uy man chuw ko tin kireb ban’en. Napan ni gadaed ra gel nag e mich rodaed ngak Somoel, ma gadaed be cheal, gadaed be sul, ma gadaed be pagan’ Ngak. Ere, kalngan’uy e pagan’ man pagan’ ngak e Tabiyul ninge rrin’ e pin’en ni dabyor rodaed. Ra bag daed ma ngari [pagan’uy] nga dakean e pi ngongol rokʼ e chaʼ ni bay gelingin ni nge thapegey” 12 ya kemus ni “nu dakean e ngongol nib matʼaw, nge wurengaenʼ, nge murnguy rokʼ fare Messiah nib Thothup” 13 e rayog ni ngad bi’ech gaed u dakean Kristus14 man sul ngan paer u pow’chen Got.
Fare gam’ing ko tawfe ningan yan nga fithik e miraen ni fan ko bi’ech nag e denen e baga’ fan ni ngan pagan’ gaed Ngak, man pagan’ Ngak ni polo’, man laek. Ke ga’ar Nephi, ““Gumnang ni faʼan gimed ra lek fachaʼ ni Fak, u poloʼ i gumʼirchaʼmed, ni damur baen gaed nge sasaliyeb u mit Got, ya fithikʼ e lʼagaenʼ romed, ma gimed be kalngaenʼ ko pi denen romed, ma gimed be micheg ngakʼ fachaʼ ni Chitamangiy nib mʼagaenʼmed ngay ni ngam feked nga dakeanmed fithingan Kristus, u dakean e tawfe—arragon, ni ngam leaked e Somoel romed nge Tathapeg romed iyaen nga fithikʼ e raen, ni boed rogon e thin rokʼ, musap gaed, ma aram me yog ngomed fare Kan ni Thothup; arragon, ma aram me yib fare tawfe ko nifiy nge fare Kan ni Thothup.”15
Fare gam’ing ni yibe tay pa’ey nga dakean loelgey ni fan ko fare tawa’ath ko fare Kan ni Thothup e ba tu’uf ngodaed ni ngad pagan’ gaed Ngak, man pagan’ Ngak ni polo’, laek, man athamgil ma bay e ayuw rok fare Kan Thothup Rok. Rogon nike yoeg Nephi, “Ere chiney … gumnang riy ko rennʼey ni faʼanra dabi athamgil beeʼ nge madaʼ ko tomur, ni be leak wokon fachaʼ ni Fak fare Got nib fos, ma dabiyog ni nge thap.”16
Bin aningeg ko fare kenggin lekngin e mich e gathi yima yoeg nib ban’en mab gam’ing ko fare gospel nikan fulweg. Machane, biney e thin ko mich e ma ulunguy nga ta’abang nge ta’areb gubin ban’en ngak Kristus: pagan’ Ngak, pagan’ Ngak ni polo’, laek, man athamgil—Ngak.
Wo ni 2. Chiney e gu ba adag ni nggu weliy mornga’agen rogon nike mukun gubin e pin’en ko Galasia nga ta’abang kan ta’areb rok Kristus. Bukun ban’en ni rayog ni nge dag; ma kemus ni nggu dag in.
Lane 1978, me President Spencer W. Kimball e yoeg ko chonggin e Galasia ni ngan gel nag gelngin e Zion u dakean e fayleng, Ke yoeg ko Gidii’en Got ni ngar pired ko naam roraed man fal’eg e pi stake ni ngan ulnguy e tabinaew rok Got man fil ngoraed wo’en Somoel. Me ulul ni weliy ni bukun e temple e ra ni toey nge pi tawa’ath ni fan ko Gidii’en Got ko gin ni yaed be paer riy u fayleng. 17
Napan ni ga’ e namba ko stake, ma kari tu’uf ko tabinaew ko gidii’ ni nge “mang e [gin’en] ni [ba adag] chonggine tabinaew ni yiba’ riy, ni [rayog] ngar suguyed e yafas roraed mar pir’egned e tu’ufeg, ayuw, nge magaer, nge athamgil.” 18 Ere, napan e 1980, pi mo’olung ko Madnom e puthuy nga ta’abang ke mang dalip thal ni ngan “ayuweg e gidii’ nge tabinaew ngan fil ban’en riy, man fol, man sensey nag fare gospel.” 19 Biney e kan noeg ko tabinaew nge tabinaew biyay u lane “Fare Tabinaew: Thin ni Yan ko Fayleng” ni ke yoeg President Gordon B. Hinckley ko 1995. 20
Napan e April ko 1998, me yoeg Preident Hinckley mornga’agen bukun e temple nib achig ni yibe toey, ni feek iyib e pi gam’ing nib thothup ko na’un rok Somoel nge chugur ko pi Gidii’en Got nge tabinaew u dakean e fayleng. 21 Ma pi wo’ ney ni fan ko rogoy ni ngan gel e ke managil ko rogoy u dakean fare Perpetual Education Fund in 2001. 22
Napan e murwel rok, me President Thomas S. Monson e ke paer nibe yoeg ko Gidii’en Got ni ngan “ayuw” me weliy mornga’agen nib ga’fan ngan ayuweg e pi’in nib tu’uf e ayuw roraed ni bang ko murwel ko Galasia nib thothup. Ululi rrin’ ko pin’en u fayleng, ni Tapigpig Rodaed e kan noeg ko 2012.
Bukun e duw nike thimur, ma pin’en nib ga’fan it ay e Madnom nib falel’ u tabinaew nge G\galasia e kan noeg ma kan fal’eg,23 ere be fal’eg rogon daed ni fan ko mo’olung ko thiliyeg rogon e schedule ko Madnom nikan noeg u lane biney e mo’olung ko general conference.
Ma nel’ e pul nga tomur, ma ulung ko Melchizedek Priesthood e kan gel nag raed ma kar ta’areb gaed ko pi auxiliaries ni ngan machib ib gel ma ba thothup boech.
Mich u wun’ug ni rogon nge ngiyal’ ko pi’ney nike buch nike bukun e duw e rayog ni nge ayuweg daed ngad guyed ta’areb e murwel nib mangil ma gathi kemus ni ra bee’ ma go’ ir ngak. “Ke yoeg Got kanawo’en rogon e tin thothup ban’en ni fan ko gidii’ nge tabinaew u dakean e pi gam’ing, tin ni yibe sensey nag, pin’en ni yibe rrin’, nge gosgos ni bay ko tabinaew nge Galasia. Pin’en u lane Galasia e bay ni nge fal’eg wa’athan e gidii’ nge tabinaew ma gathi kemus ni fan ngom ni go’gur.” 24
Gube meybil ni rayog ni ngad poyed fare mkurwel rok Somoel nib murwel u dakean e fayleng nibe mang ko tabinaew nge Galasia. Gu manang ma gube micheg ni Somoel e be gad ma kura dag “bukun ban’en nib falel’ mab ga’fan ni fan ko Gil’ilungunm Got.” 25
M’ag nge Mich
Ku tabab nag e mulwol rog ni gu weliy e gelngin fapi nochi n’en nikan ulnguy nga ta’abang fa kan l’aeng ke mang e gaaf. Boed, ni gube micheg rogon e sap rodaed, nge fan, nge gelngiy e ra m’ug ko fare gospel nikan fulweg ku Yesus Kristis ni gadaed be fil ma gadaed be fol riy napan ni gadaed ra athamgil ni ngan nib nga ta’abang ngan ta’areb ko gubin ban’en rok Kristus—nibe un Ir.
Gubin e wo’ nge ta’awath nib ga’fan ko tin manemus ma bay, ma rayog ma bay fan, nge athamgil u dakean Somoel ni Yesus Kristus. Alma e micheg ni ga’ar: “Dakuriy rebe kanawoʼ ara rebo yalen nga bayang ni ra yog ni nge thap e gidiiʼ riy, ma kemus ni rokʼ ngu dakean Kristus. Musap, ire yafos nge tamilang ko fayleng.” 26
Gube yoeg u fithik e falfalen’ e mich rog ni mornga’agen e Chitamangiy nib Menechubog nge fare Faak nib Tu’uf Rok, ni Yesus Kristus. Dakean e Tathapeg rodaed, ma gadaed pir’eg e falfalen’. U dakean ma gadaed pir’eg e gapas u roy u donop, nge yafas nib manemus ko bin migid e fayleng ni bayib.27 Ere gube micheg u dakean fithngan Somoel ni Yesus Kristus nib thothup, amen.