Feked Fithngan Yesus Kristus nga Dakean Daed

Keb rok Elder Robert C. Gay

Ko fare Presidency ko fare Medlipi Ragag

Aygun feked fithngan Yesus Kristus nga dakean daed u fithik e yul’yul’—ni yibe sap nrogon nibe sap, ni yibe pigpig rogon niki pigpig, ma yibe pagan’ ni murunguy Rok ba gaman.

Pi walageg, dawori n’uw nap’an, nap’an ni gube leam nag e thin rok President Russell M. Nelson ningan pining fithngan e Galasia ko bin nikan pi’, mug cheal ko pi chep nib thothup ko gin ni non fare Tathapeg ngak fapi Nephites ni mornga’agen fithngan e Galasia. ¹ Nap’an ni gube bi’eg e thin rok e Tathapeg, muguy rogon ni yoeg ko gidii’ ni “ngarim feek fithngan Kristus nga dakean med.”² Biney e n’anggin neg nggu sap ngog mug lean ni, “Gube feek fithngan fare Tathapeg nga dakeanag ni rogon nike yoeg ni nggu rrin’?” ³ Daba ma gu ba adag ni nggu weliy boech mornga’agen e n’en ni ku thapeg ko fulweg ko duwer rog.

Bin som’on, ngad feked fithgan Kristus nga dakean daed e be yoeg ni ngad yul’yul’ gaed ko athamgil ni ngan leam ni boed nima leam Got. ⁴ Urogon nima leam Got? Joseph Smith e ga’ar, “Nap’an nibe sap e gidii’ ngak bee’ ma yibe ogtharam ni dariy e runguy riy, ma Chitamangiy nu Tharmiy e ma sap ko gubin e gidii’ u fithik e t’ufeg” ya “t’ufeg Rok e ba darma mus.”⁵

In e duw nga tomur ppin ni walageg ni ke yim’. Momaw’ e yafas rok. Ki i palog ko fare gospel ma darma yib nga galasia. Pumo’on rok e ke n’ag nge aningeg i faak ni nge chugliy. Re balayal’ ni ke yim’, nibay e bitir rok u lane senggil, mug yibliy ni nge sul nga yaen u fithik e gapas. Ngiyal’ nem mug nang ni ku ug tafney nag e yafas rok ni kemus ni gube leam nag e gafgow rok. Nap’an ni gu tay pa’ag nga dakean loelgen e re balayal’ nem, mug munguy nigeg fare Kan Nthothup. Mug nang e n’en nib mangil rok mug guy ni boed rogon nibe guy Got—gathi bee’ ni i palog ko gospel nge yafas machane bee’ ni ki yaen u fithik e gafgow ni dariy rog. Ku guy ni ba nina’ nib mangil, ni demtrug gelngin e gafgow, ma ke chugliy aningeg, e bitir nib falel’. Kuguy ni yow fagar e ppin rog ni i ayuweg nap’an ni yim’ e chitamangin.

Nap’an e re neap nem ni yibay ko walageg, ma mich u wun’ug ni i fitheg Got ni ga’ar, “Damur guy ni gubin e gidii’ nib liyeg nem ma yaed ba thothup?”

Ke fil Brigham Young ni ga’ar:

“Gu ba adag ni nggoeg ngak e pi Gidii’en Got … ni ngan nang fan e pumo’on nge ppin ni rogon raed ma dabin nang fan raed ni boed gur.” ⁶

“Baga’ ni yima yoeg —‘Biney e gidii’ e ke rrin’ e kireb ma dabiyog ni nge mang Gidii’en Got.’ … Gadaed ma rung’ag e yaba’ nge baen … [fa] darni tay fan e Madnom. … Dam pufthin nag bee’, ya gur ma danum nang rogon e n’en nike gagyeg nag Somoel ni fan raed. … [Mag] gol ngoraed.” ⁷

Ra bagmed ma rayog ni nge tafney nag e Tathapeg rodaed nibe pagem nge tomal rom nge yan ni dabi guy? Fare Tathapeg e sap ngak fare Samaritan, bee’ ni un ku bee’ nib mabgol, cha’an nima kunuy e salpiy, pi’in nib daraw, cha’an nib m’ar, nge pi’in nib ta denen ni ta’abrogon. Gubin ma pifaak e Chitamangin. Gubin ma rayog ni ngan bayluy raed.

Rayog ni ngam tafney niged nibe pi’ kiru’ ngak bee’ de nang e tafan rok ulan e gil’ilungun rok Got fa demtrug e bea’ bay uringin e magawon. ⁸ Dab ki yog rog. Owchen Kristus, ma ra reb e ya’el ma baga’ fan. Dariy bee’ nikan sunmeg ni dabi mangil. Yafas nib manemus e rayog ngak gubin e gidii’.⁹

Fare Kan Nthothup nike munguy nigeg u to’ben e beet ko walageg, mug fil ni: nap’an ni gadaed ra sap ko rogon Nima sap, ma rayog l’agrw ban’en rodaed—bayuliy e pi’in ni gadaed be ayuweg nge bayuliy nag daed.

Bin l’agruw, ra ngan feek fithngan Kristus nga dakean daed, ma gathi kemus ni ngarin sap gaed ni boed nibe sap Got, machane ngarin rrin’ed e murwel Rok man pigpig ni boed rogon Nike pigpig. Gadad ma fol bin la’agruw e motochiyl nib ga’, ma gadaed pad daed ko tin ni ba adag Got, kunuy e Israel nga ta’bang, ma gadaed pag e tamilang rodaed nge “maat u pow’chen e gidii’.” ¹⁰ Gadaed ra thapeg e pi m’ag man fol riy nge pi gam’ing ko Galasia Rok nika fulweg. ¹¹ Nap’an ni gadaed ra rrin’ e biney, me fal’eg Got wa’athan daed ko gelngiy ni ngad yibliyed gadaed, tabinaew rodaed, nge yafas rok boech e gidii’. ¹² Fithem, “Bay bee’ ni gu manang ni dani t’uf e ayuw rok u tharmiy u lane yafas roraed?”

Got e ma murwel ko ma’ang’ang u fithik daed nap’an ni gadaed ra thothup nag daed. ¹³ Gadaed ma thothup nag daed nap’an ni gadaed be bi’ech nag gumircha’en daed. ¹⁴ Gadaed be bi’ech nag gumircha’en daed nap’an ni gadaed ra motoyil Ngak, ¹⁵ kalngan’uy ko denen rodaed,¹⁶ man thil, ¹⁷ man t’ufeg ney ni boed ni i t’ufeg ney.¹⁸ Fare Tathapeg e fith daed, “Ere mang ni gimed be finey nra fulweg Got labgen ngomed ni fa’anra kemus ni pi’in gimed ba t’uf rorad e yad ba t’uf romed?” ¹⁹

Kafin gu fil mornga’agen e n’en ni buch u lane yafas rok Elder James E. Talmage ni u gleam nag rogon ni nggu t’ufeg e pi’in u to’beg mug pigpig ngoraed. Nap’an ni kab fal’ yangren nib professor, um’on nike mang e Apostle ma bay ko ngiyal’ ni rib momaw’ ni bay mit e m’ar ko gumircha’ey ni yima yim’ ngay nap’an e 1892, me pir’eg Elder Talmage ba tabinaew ni dani nang, ni gathi chonggin e Galasia, ni yaed be paer u to’ben ma gidii’ ni ke yib fare m’ar ngoraed nib almarin. Dariy bee’ ni ba adag ni ngan yaen nga lan fare tabinaew ni kan m’ar riy. Machane, Elder Talmage, e papey nge yaen ko fare tabinaew. I pir’eg aningeg e bitir: reb ni chugur nge gaman dalip e duw rok nibay u bet nike yim’, reb ni laal’ e duuw rok nge reb ni ragag e duw rok ni kar m’ow ko amith, nge cha’an ni ragag nge dalip e duw rok nike mo’owaer. Galabthir e kar m’ow ko kirbaen’ nge bilig.

Me ayuweg Elder Talmage e cha’an nike yim’ nge pi’in ni kab fas, me walgow fare tabinaew, me feek e maad nike mak’alit nga waen, me urfiy e maad nike aw e m’ar ngay. I murwel ni rran ni polo’ me sul ko bin migid e kadbul. Cha’an ni ragag e duw rok e ke yim’ nib neap. Me chubiy e cha’an ni laal e duw rok nge koel. Me chochol nag e la’ nib racha’ nga dakean e maad rok nge owchen. Me yoloey ni ga’ar, “Dabiyog ni nggu chuweg rog,” me debey nge taw ko ngiyal’ nike yim’ u pa’. Me ayuw nge ki’iyag fapi dalipi bitir me fal’eg rogon e gaan me bi’ech nag e maad rok fare tabinaew ni Karin kirbaen’. Nap’an ni sul nga tabinaew, me n’ag Brother Talmage e maad rok, me maluk nga fithik e falay, ma paer nib palog ko tabinaew rok, me gafgow u fithik fare m’ar nib alamrin.²⁰

Ere bukun e yafas u to’ben daed nike magawon. Gidii’en Got nikar feked fithngan fare Tathapeg nga dakean raed ni ngan machib ni demtrug ko gin ni yaed bay riy fa rogon raed—ma thap e yafas nap’an ni gadaed ra rrin’.²¹

Bin tomur, mich u wun’ug ni gadaed ra feek fithngan nga dakean daed ma ngarin pagan’ daed Ngak. Reb e mo’olung ni ku un ngay ko ba Madnom, me fith bap pin ban’en ni boed ebiney: “Kaffini kireb thilin mow e cha’an ni gomow be yaen, ma ke dugliy ni nge chuw ko Galasia. Ke yoeg ngog ni kari falfalen’. Urogon e biney?”

Fare Tathapeg e fulweg taban e biney e duwer Ni ga’ar ngak fapi Nephites, “Machane faʼanra dan toey [e yafas rom] nga dakean e gospel rog, ma kan toey nga dakean e pi muruwel ko gidiiʼ, ara nga dakean e pi muruwel ku moʼoniyanʼ, rriyulʼ ni gube yoeg ngomed ni [gara] falfalaenʼ ko pi muruwel [rom] u taʼboechingiyalʼ, ma bayi munmun me yibe tomur. ”²² Dariy e falfalen’ nib n’uw nap’an u wuru’ e gospel rok Yesus Kristus.

Re mo’olung nem, machane, mug tafney nag bukun e gidii’ nib mangil ni gu manang nibe gafgow ma pi motochiyel e ba momaw’ ngoraed. Gu fitheg rog, “Ku mang e ra yoeg fare Tathapeg ngoraed?”²³ Mich u wun’ug ni ra fith ni ga’ar, “Pagan’um ngog?”²⁴ Ngak fare ppin nike m’ar ni pael, e ga’ar, “Michan’ rom ngak Got e ke gol nigem, mman nike pagan’um.”²⁵

Reb e thin u lane chep nib thothup ni gu ba adag e John 4:4, ni ga’ar, “Mra nge yan e ngaram ma dabisiy ni nge yan u lan yu Samaria.”

Mongfan ni gu ba adag e binem? Ya dani t’uf ku Yesus ninge yan u lan yu Samaria. Fapi Jews ko rran rok e dabun raed dakean e Samaritan ma yaed ma yaen ko kanawo’ nib liyeg yu Samaria. Machane ke mel’eg Yesus ni nge yaen u rom ni nge non ko re fayleng ko yan somm’on ni ir fare Messiah nike micheg nag. Biney e mulwol, ma gathi kemus nike mel’eg e gidii’ ni dani sap ngoraed machane ba ppin—ma gathi kemus ni ba ppin machane ba ppin nibe denen—ni ngiyal’ nem e yima sap ko tinef e gidii’ ni tha’abi kireb. Mich u wun’ug nike rrin’ Yesus e biney ni ra bagdaed ma gubin ngiyal’ ni ngan nang dan ni t’ufeg Rok e ba gel ko murus rodad, mad’ad’ rodad, tin ni dabyog ngad paged, marwaer rodaed, lumel rodaed, denen rodaed, tabinaew rodaed nibe wagagey, kirbaen’ rodaed, m’ar nike n’uw nap’an, gafgow rodaed, amith rodaed, nge gadaed ni go’ gadaed.²⁶ Ba adag gubin e gidii’ ni ngan nang ni dariy ban’en ma dariy bee’ ni dabyog ni dabi gol nag ninge thapeg e falfalen’ ngak.²⁷

Murnguy Rok e baga’.²⁸ Go ir e ke yaen u fithik gubin ban’en. Gelngin fare Bayul Rok e gelngin ni ngan gel ko gubin e gafgow u lane yafas rodaed.²⁹ Fare mulwol ko fare ppin ko fare lupeth e manang e gafgow rodaed³⁰ ma gubin ngiyal’ ma rayog ni ngad uned Ngak ni demtrug ko uw e gadaed bay riy. Ngak nge ngodaed ni gubin, Be ga’ar, “En nra unum e ran nu gu ra pi’ ngak e dabki sul e belel ngak bayay; machane bay pi’ e ran ngak nma pi’ e yafos, me pi’ e yafos ngak ndariy n’umngin nap’an.” ³¹

Kanawo’ u lane yafas, ma mangfan ni ngam chuw rok fare Tathapeg ni karimus ni ir e bay gelngin ninge gol me thapegem? Demtrug ko mang e ngam pi’ ni ngam pagan’ Ngak ma rib mangil. Pi walageg, ngad mel’eged ni ngad gel niged e mich rodaed ngak e Chitamangiy nu Tharmiy nge Tathapeg rodaed, ni Yesus Kristus.

Nrib gel mab to’aer lan e wun’ug, gu micheg ngomed ni Fare Galasia rok Yesus Kristus ni fan ko Gidii’en Got ko Tin Tomur e Rran e Galasia rok fare Tathapeg nibe gagyeg nag daed Kristus nib fos u dakean e profet nib riyul’. Meybil rok e gadaed ra yul’yul’ i feek fithngan Yesus Kristus nga dakean daed—ni ngan sap nni rogon nima sap, ni ngan pigpig ni boed rogon Ni pigpig, man pagan’ ni murunguy rok e rayog ni nge thapeg daed nga tabinaew nge falfalen’ ni manemus. U dakean fithngan Yesus Kristus, amen.