1 Ere chiney e yibi buch u napʼan ni ke thap ku Moroni e gi babyor ney me athamgil laniyaenʼ, me falfalaenʼ nib gel ni bachan e yulʼyulʼ ku Pahoran, ni gathi ir rebe toʼogor ko fare paer nib pufrogon nge gamʼing ko nam rokʼ.

2 Machane ki yoer nib almarin ni bachan e denen rokʼ e piʼin ni kar tulufed Pahoran nge chuw ko fare gilʼ e tapuf-oloboch, arragon, ma ngan ngoch nag i yoeg, ni arame bachan e piʼin ni kar togopluw gaed ko nam roraed nge Got roraed.

3 Me yibi buch ni Moroni e fek buchʼuw e gidiiʼ, u rogon ni baʼadag Pahoran, me piiʼ ku Lehi nge Teancum matʼawngirow ni ngar gagyeg nigew e tin ni ke magaey ko salthaw rokʼ, ma arame yaen nib sor iyaen ko fare binaw ku Gideon.

4 Me tining ngalang farengi flak ko paer nib puf-rogon u gubin yang e binaw ni be yaen nga langgin, me yog ngakʼ e salthaw ni rogon nra yog u napʼan e milekag rokʼ iyaen nga lan fare binaw ku Gideon.

5 Me yibi buch ni bukun e biyuʼ e gidiiʼ ni mukun ngakʼ, mar feked e sayden roraed ni ngar yororiyed e yalen e paer roraed nib puf rogon, ni gomanga siy ra aw gaed nga kalbus.

6 Ere aray rogon, ni Moroni e kunuy nga taʼabang u napʼan gubin e milekag rokʼ, me yib ko fare binaw ku Gideon; me puthuy e salthaw rokʼ ko tirokʼ Pahoran mar yoʼor gaed, ni arame kar yoʼor gaed ko gidiiʼ ku Pachus, niʼir e immoy ni pilung ko fa piʼin ra chuw gaed ni kar tulufed fapi Freemen nga wuruʼ fare binaw nu Zarahemla mar suweyed fare binaw.

7 Me yibi buch ni Moroni nge Pahoran e ranow nge salthaw rorow iyaen nga lan fare binaw nu Zarahemla, ma ranoed iyaen ko fare binaw, mar madaʼ gaed e gidiiʼ ku Pachus, ma arame rabaed ra mael gaed.

8 Ere musap gaed, Pachus e nliiʼ ngemʼ ma salthaw rokʼ e ni fekraed ni kalbus, ma arame sul Pahoran ko fare gilʼ e tapuf-oloboch rokʼ.

9 Ma fapi gidiiʼ ku Pachus e ni gechig nagraed, u rogon e motochiyel, ma ku aram rogon ko fapi King-men nni fekraed nga ninʼraed nga kalbus; min liiʼraed ngar mʼaed u rogon e motochiyel; arragon, fapi gidiiʼ ku Pachus nge fapi King-men, ni dabra cham gaed ni fan ko nam roraed, machane ngar togopluw gaed ngay, e nliiʼraed ngar mʼaed.

10 Ere aray rogon ni yibi aw nib tʼuf ni re motochiyel ney e thingar ni fol riy ni fan ko ayuwen e riyaʼ ko nam roraed; arragon, ma gubin e piʼin ni pirʼegraed ni yaed be fek yathin yalen e paer roraed nib puf rogon e ni gechig nagraed u rogon fare motochiyel.

11 Ere aray rogon ni mus e bin guyey e duw ko fare lung ko fapi tapuf-oloboch nga dakean fapi gidiiʼ ku Nephi; Moroni nge Pahoran e kar sulwegew e gapas ko fare binaw nu Zarahemla, u fithikʼ e gidiiʼ roraed, ma kar gagyeg nigew e yamʼ nga dakean gubin e piʼin ni dar yulʼyulʼ gaed nga yalen e paer nib puf rogon.

12 Me yibi buch u napʼan ni tabab e bin guyey nge taʼareb e duw ko fare lung ko fapi tapuf-oloboch nga dakean fapi gidiiʼ ku Nephi, ma Moroni e ku chingiyalʼ nem me tuʼog ni ngan piiʼ e ggan nge yaen, nge nelʼ e biyuʼ i salthaw ni nge yaen ku Helaman, ni ngan ayuweg riy i chaʼariy e ginem e binaw.

13 Ma ki guy rogon ba ulung i salthaw nnelʼ e biyuʼ e gidiiʼ, ni bay e ggan roraed nib gaman, ni ngan piiʼ nge yaen ko fapi salthaw ku Lehi nge Teancum. Me yibi buch ni biney e nrinʼ ni ngan noemow nag e binaw ni ngar chamgaed ko Lamanites.

14 Me yibi buch ni Moroni nge Pahoran, e ra pagew ba ulung i salthaw nib yoʼor u lan fare binaw nu Zarahemla, ma ranow ni kar fekew ba ulung i salthaw nib yoʼor nga ranoed iyaen ko fare binaw ku Nephihah, ni bachan e kar nomegew ni ngar liiʼed fapi Lamanites u lan e re binaw nem.

15 Me yibi buch u napʼan ni yaed be yaen iyaen ko fare binaw, mar koeled ngar feked buʼlung i Lamanites ni yoʼor, mar liiʼed boʼor i yaed, mar feked e ggan roraed nge tatalin e mael roraed.

16 Me yibi buch u tomuren ni kar fekew raed, mar guyew rogon nge taʼareb laniyaenʼraed u dakean ba mʼag ni dab kur feked tatalin e cham roraed nga ranoed ni mael ngakʼ fapi Nephites.

17 Ma napʼan nra uned nga lan e biney e mʼag mar piiʼew raed nga ranoed ngar pired ko fapi gidiiʼ ku Ammon, ma aningeg e biyuʼ urngin e piʼin ni dan liiʼraed ngar mʼaed.

18 Me yibi buch u napʼan nra piiʼew raed nga ranoed ngar chuw gaed mar ʼulʼul gaed ko milekag roraed iyaen ko fare binaw ku Nephihah. Me yibi buch u napʼan ni kar taw gaed ko fare binaw ku Nephihah, mar nʼufed e tent roraed u dakean e falang nu Nephihah, nib chugur ko fare binaw nu Nephihah.

19 Chiney e Moroni e baʼadag ni fapi Lamanites e ngar baed nga wean ngar mael gaed nga taʼabang, u dakean e falang; machane fapi Lamanites, e yaed manang rogon fini mʼuth e lem roraed, ma bachan e kar guyed faraed yoʼor, ere dethog roraed ni ngar baed ngoraed; ere dar baed ko mael u lan e binem e rran.

20 Ma napʼan ni nepʼ riy, ma Moroni e yaen iyaen u fithikʼ e lumor ni nepʼ, me yib nga dakean e yoror ni nge damit nag ko gin ngan ko farengi binaw e bay fapi salthaw ko Lamanites riy.

21 Me yibi buch ni guy ni yaed bay nga baʼan ngek, u charen i langan e garog; ma yaed gubin ni yaed be mol. Ere chiney e sul Moroni ko salthaw rokʼ, me guy rogon ni ngar falʼeged e gaf nib el nge tawoʼ roraed, ni ngan pag u lang nga butʼ u bugul e yoror nga baʼan lan e yoror.

22 Me yibi buch ni Moroni e guy rogon ni gidiiʼ rokʼ e nga ranoed iyaen nga pʼebugul e yoror, mar paged yaed iyib nga butʼ nga lan e ginem ko farengi binaw, arragon, u baʼan ngael, ko gin ni demoy fapi Lamanites nge salthaw roraed riy.

23 Me yibi buch ni yaed gubin ni ra nguchuruyed yaed nga butʼ nga lan fare binaw nib nepʼ, ko fapi gaf roraed nib el nge tawoʼ roraed; ere napʼan ni yaeni kadbul riy ma yaed gubin ni yaed bay u lan e yoror ko fare binaw.

24 Ere chiney, e napʼan ni od fapi Lamanites mar guyed ni fapi salthaw ku Moroni ni yaed bay u baʼan lan e yoror, mar rus gaed nib gel, ni arame ra miil gaed nga wuruʼ e yoror u langan e garog.

25 Ere chiney e napʼan ni guy Moroni ni yaed be miil rokʼ, me guy rogon e salthaw rokʼ ni ngar thelep gaed iyaen ngoraed, mar liiʼed boʼor i yaed, mar yinʼed boʼor i yaed nga lan e langob, min fekraed ni kalbus; ma tin ni magaey roraed e ra miil gaed nga lan fare binaw ku Moroni, ni bay nga mathil u dappʼelʼay.

26 Ere aray rogon ni Moroni nge Pahoran e ra koelew fare binaw ku Nephihah ni dariy bagyaed ni yimʼ; ma rib yoʼor i yaed fapi Lamanites e kan liiʼraed ngar mʼaed.

27 Chiney e yibi buch ni boʼor fapi Lamanites ni kalbus e yaed baʼadag ni ngar manged ko fapi gidiiʼ ku Ammon ma ngar manged boech e gidiiʼ nib puf rograed ko paer.

28 Me yibi buch ni oren e piʼin yaed baʼadag, e ni piiʼ ngoraed ni rogon ni yaed be athapeg.

29 Ere, gubin fapi kalbus ko Lamanites mar manged ko fapi gidiiʼ ku Ammon, mar tabab gaed ko muruwel nib almarin, ni yaed be fofuʼog e butʼ, ma yaed be yung gubin mit e grain, chugliy e gamanman nge garbaw ni urngin mit; ere aray rogon ni fapi Nephites e ra baʼud gaed boech ko muruwel ni gel; arragon, ni arame baʼud laniyaenʼraed rokʼ gubin fapi kalbus ko Lamanites.

30 Ere yibi buch u tomuren ni ke koel Moroni fare binaw ku Nephihah, ma ke fek e kalbus nib yoʼor, ni arame ri lichnag e salthaw ko Lamanites, nge tomuren ni ke sulweg fapi Nephites nib yoʼor ni faʼan ni fekraed ni kalbus, niʼir e piiʼ gelingin e salthaw ku Moroni; ere Moroni e yaen ko fare binaw ku Nephihah, iyaen ko fare binaw ku Lehi.

31 Me yibi buch u napʼan ni guy fapi Lamanites ni Moroni e be yibi yib ngoraed, mar rus gaed bayay mar miil gaed rokʼ fapi salthaw ku Moroni.

32 Me yibi buch ni Moroni nge salthaw rokʼ e ra lʼoelʼoeged raed u rebe binaw ngo reb, nge yaeni madaʼ ko ngiyalʼ ni kar madaʼ gaed Lehi nge Teancum; me miil fapi Lamanites rokʼ Lehi nge Teancum, iyaen nga dakean e mathil u charen dappʼelʼay, nge madaʼ ko ngiyalʼ ni kar madaʼ gaed ko fare binaw ku Moroni.

33 Ma fapi salthaw ko Lamanites e yaed gubin ma kar moʼolung gaed nga taʼabang, ni arame yaed gubin u taʼab ulung u lan fare binaw ku Moroni. Chiney e Ammoron, niʼir fare pilung ko fapi Lamanites, e ku bay roraed.

34 Me yibi buch ni Moroni nge Lehi nge Teancum e ra pired ni yaed e salthaw roraed nib liyeg u lan e mathil ko fare binaw ku Moroni, ni arame fapi Lamanites e ni liyeg raed u mathil u baʼan wuruʼ e binaw u baʼan yimuch, ngu lan e mathil u baʼan wuruʼ e binaw u baʼan ngek.

35 Ere aray rogon nra pired e re nepʼ innʼem. Ya musap gaed, fapi Nephites nge fapi Lamanites e kur magaer gaed ni bachan e thelep ni kar tayed nib almarin; ere dakur tʼired liyiben banʼen nib nepʼ, ma kemus ni Teancum; ya kari damomuw ngakʼ Ammoron, ni arame ke tʼuroeg u waenʼ ni Ammoron, nge Amalickiah ni walagen, e yow e tabolngin ko biney e mael nib gaaʼ make nʼuw napʼan u thilraed nge fapi Lamanites, niʼir e ke mang tapgin e mael ni yoʼor nge puʼoeg rachaʼ, arragon, nge uyngol ni gel.

36 Ere yibi buch ni Teancum u fithikʼ e damomuw rokʼ e yaen nga lan e tamagif ko fapi Lamanites, me luweg ir nga butʼ u dakean e yoror ko fare binaw. Me yaen ni ke fek baelʼ i gaf, ni be yaen u bayang ngu bayang, me yaeni pirʼeg fare pilung; me pag ba sarey ngakʼ, me kuruf nib chugur ko gumʼirchaʼ. Machane musap gaed, fare pilung e pug e pi tapigpig rokʼ u mʼon ni ngemʼ, ma arame ra lʼoelʼoeged Teancum, ngar liiʼed ngemʼ.

37 Chiney e yibi buch u napʼan ni Lehi nge Moroni e ra nangew ni ke yimʼ Teancum mari kirbaenʼrow ni rib gel; ya musap gaed, ir beeʼ nib moʼon nib mʼuthaenʼ niki i cham ni fan ko nam rokʼ, arragon, ma ba tafagear nib yulʼyulʼ ko fare yalen e paer nib puf-matʼawon; ma kari gafgow ko kirbaenʼ nib gel. Machane musap gaed, ke yimʼ, ma ke yaen ke chuw u fayleng.

38 Chiney e yibi buch ni yaeni rebo rran riy me yaen Moroni, me yib ngakʼ fapi Lamanites, ni arame ra liiʼedraed nib noemow; mar tulufedraed nga wuruʼ fare binaw; mar miil gaed, ma arame dakur suloed e ngiyalʼ nem ni mael ngakʼ fapi Nephites.

39 Ere aray rogon ni mus e bin guyey nge taʼareb e duw ko fare lung ko fapi tapuf-oloboch nga dakean fapi gidiiʼ ku Nephi; ere aray rogon ni ur madaʼ niged e mael, nge puʼoeg rachaʼ, nge uyngol, nge kirbaenʼ, nib yoʼor e duw napʼan.

40 Ma bay e mathang pogofan ni kan tay, nge togopluw, nge wagaey ni aw nga thiliy, nge gubin mit e denen nga fithikʼ fapi gidiiʼ ku Nephi; machane rifan ngakʼ e piʼin nib matʼaw, arragon, ni bachan e pi meybil rokʼ e piʼin nib matʼaw, ma dan liiʼraed.

41 Machane musap gaed, ri bachan fini nʼuw napʼan e mael u thilin fapi Nephites nge fapi Lamanites ma arame yoʼor e piʼin ni ʼelʼel gumʼirchaʼen, ma bachan e rib nʼuw napʼan e mael; ere boʼor e piʼin ni munguy ni bachan e pi gafgow nge kirbaenʼ roraed, ni arame ra sobutʼ niged laniyaenʼraed u mit Got, ni mus rogon fini sobutʼ laniyaenʼraed.

42 Me yibi buch u tomuren ni ke yororiy Moroni e yung nem e binaw ni ire ba mab ngakʼ fapi Lamanites, nge madaʼ ko ngiyalʼ ni ke noemow, me sul ko fare binaw nu Zarahemla; ma ku aram rogon Helaman ni sul ko gin tafen e binaw; ma arame yib bayay e gapas nga fithikʼ e gidiiʼ ku Nephi.

43 Ere Moroni e pag e gagyeg ko pi salthaw rokʼ nga lani paʼ ba pagael ni fak, ni fithingan e Moronihah; me sul nga tafen ni gomanga yog ni paer ko tin ni kubay e rran rokʼ u fithikʼ e gapas.

44 Ma Pahoran e sul nga tagilʼ ko tapuf-oloboch; ma Helaman e ki ognag ir bayay ni nge machib nag fare thin ku Got ngakʼ fapi gidiiʼ; ya bachan e boʼor e mael nge togopluw ni ke yaen ere ke yibi aw nib tʼuf ni ngan sunmiy ba fanow bayay u lan fare galasia.

45 Ere, Helaman nge pi walagen e ranoed iyaen, ngar weliyed fare thin ku Got nib mangingʼ me yoʼor e piʼin ni michaenʼraed ni bay e denen roraed, ma arame yog ni ngar kalgaed ngaenʼraed ko pi denen roraed min tawfe nagraed ngakʼ Somoel ni Got roraed.

46 Me yibi buch ni ra yarmiyed bayay fare galasia ku Got, u gaʼangin yang e nam.

47 Arragon, nge pi fanow nni ngongoliy ni morngaʼagen fare motochiyel. Nge pi tapuf-oloboch roraed nge pi gaaʼ ko pi tapuf-oloboch e ni melʼegraed.

48 Ma fapi gidiiʼ ku Nephi e ra tabab gaed ko monʼog bayay u lan fare nam, mar tabab gaed ko yoʼor mar gel gaed bayay u lan e nam. Mar tabab gaed ko falaʼab iyaen.

49 Machane yug aram rogon e falaʼab roraed, ara gelingraed, ara monʼog roraed, ma dar nʼufed yaed ngalang ko yowlop u oewchraed; ara gomanga sagaʼal iyib ngaenʼraed fare Somoel ni Got roraed; ere ra sobutʼ niged laniyaenʼraed u pʼoewchen.

50 Arragon, yib ngaenʼraed e pinʼen nib felʼ ni rinʼ Somoel ni fan ngoraed, ni chuwegraed ko yamʼ, nge langben e mʼag, ngo kalbus, nge gubin mit e kirbaenʼ, make chuwegraed u paʼ e pi toʼogor roraed.

51 Mar meybil gaed ngakʼ fare Somoel ni Got roraed ni gubin e ngiyalʼ, ma arame tawaʼath nagraed fare Somoel riy, ni boed ni ke yoeg, ere ragel gaed mar monʼog gaed u lan e nam.

52 Me yibi buch ni gubin e pinnʼey e nrinʼ. Me yibi yimʼ Helaman, u lan e bin guyey nge lal e duw ko fare lung ko fapi tapuf-oloboch nga dakean fapi gidiiʼ ku Nephi.