Guy rogon, guy rogon, guy rogon
Mich u wun’ug ni en Tathapeg ma kan tay Fithingan riy’ nga lan gum’ircha’med. Ma gabe thamiy fare adag rok Kristus nib machalbog ni fan e gidiii’ ma ni fan rom.
Pi walageg, gu felan’ug ni nge yoeg nggu non ngomed e chiney. Biney e conference ke athamgiliyaen’ug ma ke yib e gapas u wun’ug. Pi tang kan pii’ nge thin kan yoeg e fekey nga lan gum’ircha’dad nu dakaen e Kan Thothup. Gube meybil ni pin’en ni gube yoeg e ra yoeg ngomed ni amrogon.
Bo’or e duw nike thimur, Gag e som’on e counselor ngak district president ni ba’ ko ngek ko United States. Boech i yay nap’an kug drive gow nga misa, me yoeg ngog, “Hal, nap’an ngam mada’ nag bee’, fa’anre ngam lem nag ni cha’nem e ba magowan riy, e ra mu’g nib riyul’ nib ta’reb ko l’agruw e yay riy’.” Riyul’ e thin rok, machane chiney ke ubchiya’ nag thi’eg e magowan ni ba’ ko gidii’. Daba’, gu ba’adag nggu pii’ athamgil u wun’um ko pi magowan rom.
Yafos rodad nga dakaen e fayleng e kan yarimy Got nib t’uf rodad riy’ ni nge sik’eng nag min mon’og nagdad gubin. Mu puguran pithin Got’ Rok marunga’agen pifak Rok fini ke sunmiy e fayleng ni ga’ar: Ngad sik’eng nagrad ni nge yoeg ni ngar daged e mich rodad min fol gad urngin e motochiyel ni kan pii’ Somoel ni Got rorad.”1
Kakrom mada’ ko chiney, pi sik’eng e gathi moem. Ba’ sik’eng nge magowan nibe un ngay ko pi dowef rodad. Gadad gubin ma paer nga dakaen e fayleng ni ba’ riy e mael ko Mo’oniyaen’ nibe togopluw ko tin riyul’ nge falflan, ma ka yigi gel’ riy’. Re fayleng nge yafos rom mrayog ngom nib ma’athuk bingyal’.
Gube yoeg e biney’ ngom: en Got nib t’uf, facha’ nike pag ni yibi aw pi sik’eng ney ngom, ku amrogon ke faleg kanawoen’ ni nge yog ni ngam gel nag riy’. Chitimangdad nu Tharimy ma t’uf e fayleng ni ke pii’ e Fak Rok nib T’uf ni nge ayuwegdad.2 Fak, Yesus Kristus, ke pii’ e yafos Rok ni fan dad. Yesus Kristus ke fek nga dakaen u Gethsemane nge nga dakaen e kuruth gubin pi denen rodad. Ke thamiy urngin e gafgow, amith, nge tin nibe un ko pi denen rodad ni nge yoeg ni nge ba’ud min gel nagdad nu fithik gubin e sik’eng ko yafos ney.3
Mu pugurran ko pi thin Somoel ke yoeg ngak pi tapig’pig rok:
En Chitimangiy nge Gag e ta’reb. Gag ni ba’ ko Chitimangiy nge Chitimangiy ni ba’ rog; ma nrogon ni kam athapegeg, gur e ba’ rog, ma gu bay rom.
“Ere, gu ra paer rom, ma gag e tagafaliy e saaf nib fel’, nge fare malang ku Israel. Enra toey e dayif nga dakaen e malang ney e dowriy puth.”4
Profet rodad, President Russell M. Nelson, ke pii’ t’ab rogon e mich u wun’dad. Ya, ke weliy fan nrogon ni nge yoeg ni ngad toeyed e dayif rodad ngadakan binem e malang min k’aer fithingan Somoel nga dakaen gum’ircha’dad ni nge ayuwegdad u fithik pi sik’eng nagdad.
Ke yoeg: “Gur ni chiney e kirebaen’ rom, mu pugurran, yafos ney e gathi kan duwgily ni nge yib nib moem. Pi sik’eng e ngari gel nag nge kirebaen’ e ngari un ngay. Mu tay u wun’um ni ‘fa’anre ba’ Got rom dariy ban’en ni dani yoeg rom’ (Luke 1:37), mu nang ni’ir e Chitimangem. Gur e fak nib pum’on fa ppin kan sunmiy nrogon e yalen Rok, mrayog ngom nu dakaen e yul’yul’ rom pi thog’thog’ ni nge ayuweg fel’ e muruwel rom. Mrayog ni ngam fek nga dakaenem fithingan Somoel. Rayog ni ngam mog u fithingan thothup Got (muguy D&C 1:20).”5
Pi thin rok President Nelson ma pugurrandad fare micheg ni ba’ riy ko meybil ko sakrament, micheg ni Chitimangdad nu Tharimy ma mugu’uliy nap’an gadad ma mugu’uliy bangiy dad e micheg ngak.
Motoyil ngak pi thin riy: “A Got, ni Chitamangiy ni Gubinfen, gamaed be ning ngom u fithingan Fakam, i Yesus Kristus, ni ngam thothupeg mag tay angin e gi flowa ney ngak’ e ya’al rok gubin e pi’in ni ngar kayed; ni ngar kayed me yib uran ngoraed doewngin Fakam, mar micheged ngom, A Got, ni Chitamangiy ni Gubinfen, nib m’agaen’raed ngay ni ngar feked fithingan Fakam nga dakeanraed, ma nge gubin e ngiyal’ me yib uran ngoraed, mar fol gaed ko pi motochiyel rok’ ni ke pii’ ngoraed, ni nge yog ni paer fare Kan ni Thothup rok’ roraed ni gubin e ngiyal’. Amen.”6
Gubin yay ni gadadma yoeg e thin amen nap’an i yoeg re meybil nem ni fan dad, gadad ma micheg nag ni udaken ka’ e flowa, ran fek nga dakaen dad fithingan thothup ni Yesus Kristus, m’agaen’dad ngay, min fol ko pi motochiyel Rok’. Ma amrogon, kan micheg nag ngodad ni rayog ngodad Kan Thothup Rok gubin ngiyal’. Bachan pi micheg ney, Tathapegdad e malang ni rayog ni ngad sak’iy gad nib gel u’mon pi sik’eng ni demturug rodad.
U nap’an kug lemnag riy’ pi thin e micheg nge tawa’ath ni ba’ ko meybil nem, kug ning mang e ba yip fan ni ngan fek nga dakaendad fithingan Yesus Kristus.
President Dallin H. Oaks ma weliy fan: “Ba ga’fan nap’an gadad ma fek fare sakrament dab da micheg ni ngan fek nga dakaendad fithingan Yesus Kristus. Gadad micheged ni gadadma m’agaen’daed ngay. (Muguy D&C 20:77.) Ren’ey ni ngad micheged ni kad m’agaen’dad ngay ma yip fan nib t’uf yug ban’en ni nge buch ni ngad feked fithingan thothup nib fel’ rogon.”7
Re thin ni gadad “m’agaen’[dad] ngay ni [ngad] feked Fithingan nga dakaendad” ma yip fan ni tawfe e sum’on e bang ko kanawo’ ni ngam fek nga dakanam fithingan Taathapeg. Thingarda athamgiliy ni ngad fek Fithingan ngadakan dad ufithik e yafos rodad, nibe un ngay nap’an gadadma bi’ech nag pi m’ag rodad ko sakrament min fal’eg pi m’ag u temple nib thothup rok Somoel.
Ere ba’ la’agruw e duwer nib ga’fan rodad. “Mang e thingar gu rin’ nggu fek nga dakaenag Fithingan?” nge “Uragon nggu nang fa’anra guy rogon rog e fel’ rogon?”
Pi thin rok President Nelson ma pii’ reb e fulweg riy’. Ke yoeg ni rayog ni ngad feked nga dakaen dad fithingan en Tathapeg min non ni fan Ir. Nap’an gadad ma non ni fan Ir, gadad ma pig’pig’ nag Ir. “Ya bu’uw rogon me nang bee’ nib mo’on fare masta ni dawori pigpig ngak’, ma bee’ ni de nang, ma kub palog ko pi tafnaey nge pi lem u gum’ircha’en?”8
Ni non ku Ir be t’uf e meybil nib suguy ko mich. Be tuf e meybil nib gel ngak Chitimang nu Tharimy ni ngan nang pi thin rayog mog gad ni ngam ayuweg en Tathapeg nge muruwel Rok. Ngari yul’yul’ ngay ni nge mugu’uliy pi thin ni: “Fa’anra nrogon e lamag fa laman pi tapig’pig’ rog, ba ta’ab rogon.”9
Arrogon dani yoeg kemus ni ngad moged e thin Rok ni ngad fek Fithingan nga dakandad. Nga riy paer mit e tham’tham’ nib fel’ rogon nga lan gum’ircha’dad.
Fare profet ni Mormon ma weliy fan pi thamiy nra pii’ matawan dad min ayuweg dad ni ngad feked fithingan nga dakaen dad. Pi thamiy riy’ e mich, athap, nge t’ufeg, ni’ir fare adag rok Kristus nib machalbog.
Ke weliy Mormon:
“Ya kug dugliy ni bay e mich romed ngak’ Kristus ni bachan e sobut’aen’ romed; ya fa’anra dariy e mich romed ngak’ ma arame dabi bung rogmed ni ngan unegmed ko matha’eg nga fithik’ fapi gidii’ ko galasia rok’.
“Ere bayay, pi walageg nib t’uf rog, guba’adag ni nggu non ngomed ni mornga’agen e athap. Bu’uw rogon me yog e mich ngomed, gathi kemus ni fa’anra bay e athap romed?
“Ma mang e ngam athapeged? Musap gaed gube yoeg ngomed ni ngam athapeged u dakean fare bayul rok’ Kristus nge fare gelingin e foskoyam’ ni tay, ni nge yog e yafos ni manechubog ngomed, ma biney e aray rogon ni bachan e mich romed ngak’ ni boed ni michmicheg ngomed.
“Ere, fa’anra bay e mich rok’ bee’ ma thingar dabisiy ni bay e athap rok’; ya fa’anra dariy e mich ma dariy e athap.
“Ere bayay, musap gaed gube yoeg ngomed ni dabiyog ni nge yog e mich nge athap ngak’, ma kemus ni fa’anra ba gum’aen’, mab munguy gum’ircha’en.
“Fa’anra dangay, ma mich nge athap rok’ e ba m’ay fan, ya dariy bee’ ni aram rogon nib m’ag u mit Got, ma kemus ni pi’in nib gum’aen’ mab munguy gum’ircha’en; ma fa’anra bay bee’ nib gum’aen’ mab munguy gum’ircha’en, ma be pogofay nag u gelingin fare Kan ni Thothup ni Yesus e ir Kristus, ma thingari dabisiy ni bay e t’ufeg rok’; ya fa’anra dariy e t’ufeg rok’ ma ire dariy rogon; ere thingari dabisiy ni bay e t’ufeg rok’.”
Tomuren i weliy fan e t’ufeg, Mormon ke ul’ul’ ni ga’ar:
“Machane t’ufeg e fare adag rok’ Kristus nib machalbog, ni ma k’adaen’ ni gubinfen; ma cha’ ni yira pir’eg ni bay rok’ ko bin tomur e rran, ma ire ba fel’ rogon.
“Ere, pi walageg nib t’uf rog, mmeybil gaed ngak’ e en Chitamangiy u polo’ i gelingin gum’ircha’med, ni nge yog ni ngam sug gaed ko re adag ney, ni ke pii’ nga dakean gubin e pi’in nib riyul’ ni ma lek Fak, ni Yesus Kristus; ni nge yog ni ngam manged pifak Got; ni nge yog u nap’an ni nge yibi m’ug ma kad boeded ir, ya gadaed ra guy ni’ir e aram rogon; ni nge yog ngodaed e re athap ney; ni nge yog nni machalbog nagdaed ni boed ir nib machalbog. Amen.”10
Mich u wun’ug ni en Tathapeg ma kan tay Fithingan riy’ nga lan gum’ircha’med. Bochi gimed, mich romed Ngak ma ga’ nag. Gimed bay yo’or e athap nge falflan’ rom. Ma gabe thamiy fare adag rok Kristus nib machalbog ni fan e gidiii’ ma ni fan rom.
Gube sap ngay ko pi missionary nibe muruwliy u bukun e fayling. Gube sap ngay ko pi chongin e galasia ma yoeg ngak pi buguli yoror marunga’agen Fare Galasia rok Yesus Kristus ni fan ko Gidii’en Got ko Tin Tomur e Rran. Pi pum’on, ppin, gidii’ nib fel’ yangraed, nge pi bitir ma machib nag nu fithik e adag ngak Somoel nge pi bugiliy yoror rodad.
Pap’ay tomuren kan nang pi yoko’ nge dirru’ ko fayleng, pi chongin e galasia ma fal’eg rograd ni ngar thapeged e gidii’, bingyal’ yad ma th’aeb e day ma dowriy ning bee’ ayuw rorad. Bingyal’ be mom’aw ni ngar soen gad mada’ ko ngiyal’ ni rayog fare am pi nam ni ngan thapegrad ngay.
Guma nang ni boech i med nibe motoyil daba’ ma thamiy ni mich nge athap rom e ke lich nag ko pi sik’eng rom. Ma gaba’adag ni ngam thamiy e t’ufeg.
Pi walageg, Somoel ke fal’eg rogom ni ngam thamiy min pii’ t’ufeg Rok ngom. Rayog ni ngam gel u wun’um ni ngey powi’iyem Somoel ngak bee’ nibe t’uf e adag Rok. Ma fulweg Ir pi meybil ko tapig’pig’ rok boed e gur. Gur e ram thamiy e t’ufeg Got ngom nge ni fan facha’ ni gaba pig’pig ngay ni fan Ir. Nap’an gabe ayuweg pifak Got ko pi sik’eng rorad, pi sik’eng rom e ra lich nag. Mich nge athap rom e ra gel nag.
Kug guy nib riyul’ e ren’ey. Bo’or e yay ko yafos rok, ppin rog ke yoeg pithin Somoel me ayuweg e gidii’ ni fan Ir. Ni kug yog umon, reb e bisof romow ke yoeg ngog: “Kug gin’ug ngay. Gubin yay kug rung’ag ko magowan rok bee’ u ward rodad, gu waen pap’ay nggu ayweg. Machane fini gu taw ngay, ppin rom e ke yib pap’ay ngog.” Ba riyul’ riy ko gubin e tafen kug paer ngay pi 56 e duw nike thimur.
Chiney kemus nrayog ni nge non buchuw e thin u reb o rran. E gidii’ nike pig’pig nag ni fan Somoel ma pig’pig nag ir. Gubin e nep nge kakad’bul gube yon’ e tang ngak ma gamow be meybil nge ulan fapi tang. B’tuf nggu gog ko meybil romow. Bingyal’ rayog nggu guy l’ugun rok nibe ngongoliy pi thin ko pi tang. Ma ba’adag pi tang ko bitir. Pi thamiy nib ga’ u waen’ e ba’ ko tang “I’m Trying to Be like Jesus.”11
De’ nuw nap’an, tomuren kug yon’ pi thin ko chorus: “Love one another as Jesus loves you. Try to show kindness in all that you do,” ni ga’ar nib mocho’ ma tamilang, “gay rogon, gay rogon, gay rogon.” Gu lemnag ni ra nang nap’an nibe guy Ir, ni Somoel kan k’er fithingan u lan gum’ircha’ey ma ke mang boed Ir. Ir ma fek’ey ir ngalang ko pi sik’eng chiney, ma amrogon Ir ra fekem i yaen ko pi sik’eng rom.
Gube micheg ngom ni en Thathapeg ma nang ma Ir ba’adagem. Ir manang fithingam boed ni gamanang Fithingan. Ir ma nang pi magowan rom. Ke thamey pin’ey. Nu dakaen fare Bayul Rok, Ke gel nag e fayleng. Gur nib m’agaen’ ngay ni ngam fek fithingan nga dakanam, ram chibiy ngalang pin’en tomal ko bo’or. Ma gura piri’eg bayil’ ngo bayil’ ni kam chugur ngak Tathapeg rom ma kam adag dakaen. Fithingan e ran yoloey nga lan gum’ircha’em ma laniyaen’um. Udakaen e fithinan ney Ir ra pinning em. Gube micheg e ren’ey ngom, nib suguy ko magaer ni fan wurengaen’ Rok ngog, ngak pi’in t’uf rog, ma ngom, u fithingan Yesus Kristus, amen.