Nran Sul Ngad Pared Nib Polo’?

Rok Elder Matthew L. Carpenter

Ko fare Medlupi Ragag

Ni bachan fare Bayul ku Yesus Kristus, fa’an gadad ra kalngan’ magdad sul ngak fare Tathapeg, ma ra fosagdad u fithik e thotup.

De gaman in e puul ko mission rok, bin bitir i fakmow e yow be skuul fare missionary companion rok ma thamiy ba amith ni yib nga loligen. Ni thamiy nib thil rogon; somm’on ma dakri thamiy e bin gilay’ i paa’; ma tab nga bolothan ni dakri thamiy. Me lul’ e bin gilay’ i owchan. Ma dakri yog ni nge non. Make nang ni bay ban’en nike rin’. N’en ni de nang e kab e stroke ngak ni dalip yang ulan loligen. Me tab e marus ngak ma dakri thamiy yuyang i dow. Rogon payngin nran taflay nigem e aram gelngin ni papay ni gara gol. Fare missionary companion rok e gachgach nib papay. Tomren nike kol nag e 911, me yibliy. Me tawa’ath, ya fare ambulance e de palog nga orel.

Tomren ni kan gurgur nag nga aspital, facha’ nima pi’ e falay e guy rogon me yog ni ngan pi’ reb e falay ngak nrayog ni nge fulweg nga tomur fare stroke rok.¹ Machane, fa’an gathi stroke e bay rok, ma rayag nira rin’ ban’en ni bachan fare falay, ni woed nra yib e racha’ u lolgan. Ba tu’uf ninge mel’eg fakmow. Ere yog ni ngan pi’ fare falay ngak. Nap’an nin taflay nag min ayuweg ni bukun e puul, fan ki sul fakmow nge mu’nag e mission rok u tomren nike gol make sul fare stroke rok’ ke m’ay.

Chitamangdad nibay u Tharmiy ab gel mab manang gubin ban’en. Manang e tin ni gadad be gafgow riy. Manang e tin ni be amith u fithik i dow dad, m’ar, ngan plibthir, ma’ad’ad, fa bitir nib m’ag. Manang e tin ni gadad ma thamiy, kirban’uy, fa m’ar ko lug. Manang e pi cha’ ni kar gafgow gad ma dan pi’ fare justice ngorad nib fel’ rogon nge tin ni ku’un gafgow nag. Manang e tin ni gadad mo’owar riy nge pi lumel rodad.

Nap’an e biney e yafos ma kan sikeng nagdad ko gadad ra mel’eg e mat’aw fa tin togan ban’en. Pi cha’ ni kar fol gad ko fapi motochiyel rok, e yad ra par Rok’ “ni num’ngin nap’an e fal’falan’ ni manemus.”² Ngan ayuwgdad ni ngar boed Ir, Chitamangiy u Tharmiy e ke pi’ gelngin e lowan’ ngak Fak, Yesus Kristus. Dariy mit e m’ar ko dowef, fa thamtham, fa ya’el ni dabiyag rok Kristus ni nge fosag. ³

Nap’an fare machib rok fare Tathapeg u roy u fayleng, fare thin nib thothup e bo’or yay ni dag Yesus Kristus ni yus nag fare gelngin nge fosag e amith u dowey.

Fare Gospel ku John e bay ba yat riy ni mornga’agen ban nib mo’on ni gafgow ko amith ni 38 e duw.

“Me guy Yesus e re mo’on nem ni kan moleg nga but’, me nang nra mo’on nem e nga aram n’umngin nap’an e re liliy nem, me ga’ar Yesus ngak, Gad adag ni ngam gol ko re liliy rom nir?”

Me fulweg fare mo’on ni ga’ar dariy be’ u roy nra tiyeg ngalang e gi ran ney.

“Me ga’ar Yesus ngak, Mu sak’iy, ngam fek e chob rom, ngam man.

“Ka chingiyal’ nem me chuw e liliy rok fare mo’on nge gol, me fek e chob rok nge yan.” ⁴

Wenig mu tafneynag n’umngin nap’an ni ke gafgow ere mo’on ney (38 e duw) nge payngin nin gol nag nap’an ni yib fare Tathapeg ngalan e yafos rok. Fare fos nag e “ka chingiyal’ nem.”

Bay be’ nip pin nib gel e gafgow ni be tay ko ragag nge l’agruw e duw, nike “pi’ urngin e salpiy rok [ko] pi togta, … ni yib u keru’ Yesus, me yib i math nga taban e mad rok u but: ma ka chingiyal’ nem min golnag fapi m’ar [rok].

“Me ga’ar Yesus, mini’ e ke math ngog: ya kug nang ko ngiyal’ ni yan gelngig riy nga wuru’ i dowag.

“Me nang fare pin nbi kan pir’eg e n’en nike rin’, me … weliy ngak p’eowchen urngin e gidii’ … rogon ni kan fosag ni ka chingiyal’ nem.” ⁵

Urngin fapi machib Rok’, Kristus e fil nibay gelngin nib ga’ ko fare dowef. Dabiyag ni ngad gagiyeg niged e ngiyal’ ni nge fosag Kristus e pi gafgow rodad. Fosagnag e ma buch nibe yan u rogon e fanow rok nge lowan’ rok. Ulan fare thin nib thothup, bo’or e gidii’ ni gafgow ni bukum e duw; boech e gidii’ e n’umngin nap’an e yafos rorad, ra pi’ gelngindad ni ngayog ni ngad athamgilgad. Gadad manang ni gubin e gafgow ko dowey, fa tin dani fel’ rogon u dowdad, e ran fal’ag rogon ngan fosag ni bachan fare Foskoyam’. Iraray e bin tawa’ath nifan ngak gubin e gidii’ u dakan fare Bayul rok Yesus Kristus.

Gadad manang ni gubin e dowef, ga gidii’ ni bta denen e ran fosag rad ko fare foskoyam. Iraray e tawa’ath ni fan ngak gubin e gidii’ u dakan fare Bayul rok Yesus Kristus.⁶

Yesus Kristus e rayog ni nge fosag bo’or ban’en. Ku rayog Rok’ ni nge fosag fare ya’el rodad. U lan fare thin nib thothup kad filed rogon ni ayuweg Kristus fapi gidii’ ni ya’el rorad ab mo’owar nge polo’.⁷ Nap’an ni gadad ra tafney nag e pin’en nike buch, ma are mich nge athap rodad ko fare gelngin fare Tathapeg e ra ga’. Yesus Kristus e rayog ni nge thilyeg gumi’ircha’endad, me fosag dad ko pin’en ni gadad be gafgow riy, me pi’ gelngin dad ngad gel gad, nibe pi’ e gapas ni nge ayuweg dad ko pin’en nu lan e yafos rodad, fosag e thamtham rodad.

Kristus e raog ni nge fosag dad nap’an ni kad denen gad. Ya en nra denen e na kireb e rok nike th’ab e motochiyel rok Got.⁸ Nap’an ni gadad ra denen, ma aram ni ke makalit e dogur rodad. Ma dariy ben’en nib alit ni rayog ni nge yaen nga lan gil’ilungun Got. ⁹ “Ni ngad be’ech gad ab [tu’uf] ni ngad fosag nag dad ko pin’en nib thothup.¹⁰

Got ni Chitamangiy e manang ni gadad ra denen, machane ke pi’ kanawo’en ngodad ni rayag ni ngan n’agfan rodad. Elder Lynn G. Robbins e fil: “Kalngan’uy e gathi bin tomur e tanom rok Got ni fa’an gadad ra denen. Kalngan’uy e ir fare tanom Rok’, ni manang ni gadad ra denen.”¹¹ Nap’an ni gadad ra denen, ma kad mel’eg niged e tin nib mat’aw fa tin nib togan. Kad mel’eg niged e tin nib mangil nap’an ni kad kalngan’gad. U dakan Yesus Kristus nge fare Bayul Rok’, rayog ni ngan thapegdad magdad sul ngak Got ni’ir e Chitamangdad ni fa’an ni kad kalngan’gad. Fosag dad ko pi denen rodad e gathi kemus ni ta’areb wi’in—ba tu’uf fare gelngin fare Tathapeg nge kalngan’uy ni polo’ i gum’ircha’endad. Pi cha’en kar mel’egned ni dabun rad ni ngar kalngan’gad ko pi denen rorad, e dar fanayed fare thapeg rok Kristus nike pi’ ngorad. Ma yad e woed ni dariy fare thapeg rorad.¹²

Nap’an ni gube machib ngak boech e gidii’ ni ngar kalngan’gad, kug guy ni gidii’ nibe par u fithik e denen ab momaw’ rok ni nge rin’ e tin nib mangil. Fare Kan ni Thothup e be chuw rorad, mab momaw’ ni ngar mel’egned e tin nib mangil ni ngayog ni ngar chuchgurgad ngak Got. Bo’or e pul fa duw, ni yad be tatamra’ fa rus ko n’en nra buch ni bachan fapi denen rorad. Ma oren ni ngiyal’ e yad me lemnag ni dabiyag ni ngar thilgad fan n’agfan rorad. Ma baga’ ni yad ma yog ni fa’an nra nang e gidii’ nib tu’uf rorad e n’en ni kar rin’ed ma yad be tafneynag ni ran digeyrad. Tafney rorad e yad be lemnag ni fel’ ni ngar gafgow gad ulan e biney e yafos ko bin ba’aray ni ngan kalngan’. Walageg ni pi’in ni pumo’on nge ppin, dabi fel’ ni ngam mon’ yiren e kalngan’ rom. Moniyan’ e baga’ nima l’igin dad ngad rus gad me talagdad ko kalngan’ ko mich rodad ngak Yesus Kristus.

Nap’an nran nog ngak be’ e pi denen rok, ma woed nra kirban’rad, ma oren i ngiyal’ ma yi be a’dag ni ngan ayuwegrad ngar kalngan’gad ngar suled ngak Got. Arragon, fosagdad ko pi denen rodad ab tu’uf ni ngan nog e tin ni kam rin’ nib togan ngak gubin e gidii’ nib tu’uf rom ni ngayog ni ngar n’aged fan e pi denen rom. Wenig mu tay u wun’um ni Yesus Kristus ab gel gelngin ko rogon ngrayog ni nge fosagnem ko denen rok be’ nike sap Ngak ko ayuw. Ma fosag nran tay ngorad e kura mon’og.¹³

Elder Boyd K. Packer e ga’ar: “Fare ya’el rodad e ra gafgow nap’an ni kad denen gad fa kad rin’en e togan. Machane de wod fare dogur rodad, nap’an nra m’ay i rin’ wo’en fare kalngan’, ma dariy e fath riy ni bachan fare Bayul rok Yesus Kristus. Fare micheg e ba’aray: ‘Ma cha’en nra kalngan’ ko pi denen rok, e iraram e cha’ nran n’agfan rok, nigeg, fare Somoel, e kug pagtilin’ [Doctrine nge Covenants 58:42].”¹⁴

Nap’an ni gadad ra kalngan’ “u polo’ i gumi’rcha’endad,”¹⁵ “ma rib gur ni yira fek fare wo’en e bayul iyib ngomed” ulan e yafos romed.¹⁴ Ma fare Tathapeg e ra fosagdad.9

Fare missionary companion nge facha’ ni taflay nag fak mow ko fare stroke e kar muruwel gow ni rib pay. Ma fre pagal ni fak mow e dugliy ni nge fana’ fare falay nrayag ni nge sulweg fare stroke rok. Ma fare paralyz ni susan ni ra buch rok ni n’umngin nap’an e kan sulweg nga rogon. Ni ku woed, payngin ni gadad ra kalngan’ magdad fek fare Bayul rok yesus Kristus ngalan e yafos rodad, e aram payngin ni ran fosagdad ko pi denen rodad.

President Russell M. Nelson e ke yoeg e biney ni ngad rin’ed: “Fa’an kam man ngaru’ fare pi’ i kanawo’, … gube piningem … ni gube wenig ngom ni ngam sul. Demtrug ko mang e bay ko tafney rom, demtrug ko mang e be buch rom, bay tagl’im u roy, ni’ir fare Galasio rok Somoel. Gur nge pifak fakam nga m’on e ran tawa’ath nag rad ni bachan ni kam sul ko fare pi’ i kanawo’.”¹⁷

Fare fosagdad ko pi denen ab tu’uf ni ngad rin’ed ni woed rogon ni yoeg fare Thathapeg ngodad. Dab da son gad! Ngad rin’ed e dabay! Mu rin’ e chiney ni dab mu paralyz me talegnem ko fare wo’en e kalngan’. Nap’an ni gube non, fa’an ra kam thamiy nikam rin’ ngak’ be e togan, gube pinngim ni ngam rin’. Mog ngorad e n’en ni kam rin’. Mag fith ngorad ni ngar n’agedfan rom. Fa’an nra kam denen ni ke talegnem ko yan nga tempel, gube piningem ni ngam man ko bisof rom—e daba’. Dam soen.

Pi walageg ni pumo’on nge pi’in nib ppin, Got e Chitamangdad nibay u Tharmiy nib tu’uf rodad. Ke pi’ urngin gelngin nge lowan’ ngak fare Fak nib tu’uf Rok’, Yesus Kristus. Ni bachan Ir, gubin e gidii’ ma ran fosag ko fapi denen rorad ni manemus. Ni bachan fare Bayul rok Yesus Kristus, fa’an gadad ra mel’eg ni ngad kalngan’gad magdad sulweg gumi’rcha’endad ngak fare Tathapeg, ma ra fosagdad. Ni ra fosag ney e rayog ni nge buch nib papay. Biney e be yan u rogondad. Nran sul ngad pared nib polo’?

Gube micheg ni Yesus Kristus e ke pi’ pilwon e biney ni ngayog ni ngad sul gad ngad pared nib polo’. Machane ba tu’uf ni ngad faned fare falay nike pi’ ngodad ni nge fosagdad. Mu fek e dabay. Dam mu soen. U dakan fithngan Yesus Kristus, amen.