Rogon ni Dar Fal’ u Wun’uy ko Tin Thothup Ban’en

Rok Michelle D. Craig

Bin Som’on e Counselor ko Young Women General Presidency

Divine discontent can move us to act in faith, follow the Savior’s invitations to do good, and give our lives humbly to Him.

Napan ni gu ba’ ko elementary school, ma gamaed yan nga tabinaw romad u dakean e kanawo’ ni pich ni yaen nga barba’ ngo barba’ e burey.. Ka ba’ reb e kanawo’, ni dan pich nag, kan tunguy e “kanawo’ ko pagal” Ngay. Binem e kanawo’ ko pagal e kan toey nib wu’in’in mab achig radan. Ba ngoch yang, machane kaygi gel e farteg riy. Napan ni gub bulyol, gumnang ni demturug rogon ma rayog ni nggu waen ko kanawo’ nima yaen e pagal riy. Baga’ ni, gumnang ni gube paer u lane tin tomur e rran ma b’tuf ni nggu ngongoliy e tin nib mom’aw, ni boed e pi pioneer—ma gu ba’adag ni nggu fal’eg rogog. Ere bingyal’, ma guma pageg nga tomur ko pi fagaer rog ko fare kanawo’ nib pich, mug luf e sus rog, mug waen ko kanawo’ ko pagal. Gube gay rogon ni nggu gel nag eg.

Napan ni gubbulyol ko Primary, guma lemnag ni aram rogon ni nggu fal’eg rogog. Chiney ku nang nib thil rogon! De t’uf ni nggu waen ni dariy e sus nggu farteg e burey, gu manang ni rayog ni nggu fal’eg rogon eg nge yan ko kanawo’ ko m’ag ni nggu motoyil ko fare Kan ni Thothup. Ya Somoel, udakaen e profet Rok, ma be pinning dad ni ngad pired min ayuw nrogon nib thothup min “mon’og e paer rodad riy’.”¹

Pi thin ney ko profet rodad, nge lowan’ rodad ni rayog ni ngad rin’ed boech nib bo’or, e boech ngiyal’ ma sunmeg e thamtham u fithik daed nima yoeg Elder Neal A. Maxwell e “rogon ni dar fal’ u wun’uy ko tin thothup ban’en.”² Rogon ni dar fal’ u wun’uy ko tin thothup ban’en e ma yib ngodad napan ni gadad ma t’areb nagdad ko chiney ko “mini’ ni rayog ni ngad manged.”³ Ra bagdad, fa’anre gadaed ba yul’yul’, ma yibe thamiy nib thil e gin ni gadaed bay riy nge gadaed mini’, nge gin nge mini’ e gadaed ba adag ni ngad manged. Gadad ba’adag ni ngad mon’og gad. Ba’ e pi thamtham nem ni bachane gadad e pifaak Got, kan gargeleg ni ba’ e Tamilang rok Kristus rodaed machane gadad be u lane fayleng nike kireb. Pi thamtham ney e yib rok Got m ma powi’iydad ni ngad mithmith gaed nib pay.

Mangil ni ngad thamiyed e rogon ni dar fal’ u wun’uy ko tin thothup ban’en, ya be fek dad i yaen nib tolang, machane thingarda nanged fan min digey pi baen ko Mo’oniyaen’ –ni’ir kirebaen’ nibe tal’eg e mon’og rodad. Mo’oniyaen’ ma l’oeg e kireb an’uy ngodad bo’or i yay. Rayog rodad e kanawo’ nib tolang nibe ayuwegdad ni ngad gayed Got nge gapas nge wurengaen’, fa rayog rodad e kanawo’ Mo’oniyaen’, nibe yoeg ngodad ni dabda fel’ wa’athdad, dabda fla’ab, dabda gonop, dabda pithorang, dabda fel’. Marwaer rodaed e rayog pi’ gelngdaed—fa infiyerno.

Ngongoliy ko Mich

Rebo rogon ni ngan nang rogon ni dar fal’ u wun’uy ko tin thothup ban’en ko kirebaen’ Mo’oniyaen’ e ngan nang ni rogon ni dar fal’ u wun’uy ko tin thothup ban’en e ra gagyeg nag dad iyaen ko muruwel. Rogon ni dar fal’ u wun’uy ko tin thothup ban’en e daniy pag dad ni ngad soen, ma dani powi’iy dad iyaen ko kirebaen’. Kug fil rogon ko yafos rog ni napan kug tay u wun’ug e pin’en ni gathi gag, dab gu mon’og, ma ke mom’aw ni ngu thamiy min fol Kan Thothup.⁴

Napan nikab fel’ yangren, me Joseph Smith e ke guy ni ba’ ma’owaer rok me magar nag marunga’agen “rogon e paer e ya’el [rok].” Me ga’ar, “Ke yib e kirban’ ngog nib almarin, ya kug nang fan e pi denen rog, mug … ku thamiy ni nggu yoer ni fan ko denen rog nge pi denen ko fayleng.”⁵ Ren’ey e ke fek i yaen ni nge “sulaen’ me lemnag rogon e paer.”⁶ Kam thamiy ni boed e biney’? Kam kirban’ fa murus ko pi mo’owaer rom?

Ere, Joseph e ke rrin’ ban’en. Ke weliy ni baga’ nima tafney rok: Mange nggu rrin ngay?”⁷ Joseph e murwel ko mich rok’. Ke chel ko fapi chep nib thothup, me bi’ieg fare micheg ni ba’ ko James 1:5, me ning e ayuw ngakGot. Me yibi m’ug ngak me tabab i Fulweg nga Chilan Rogon. Rugub falfalen’ ko rogon ni dar fal’ u wun’uy ko tin thothup ban’en rok Joseph, ngiyal’ nike marwaer ma ke balyang e tafney rok, ke n’anggin ke rrin’ ban’en ngay.

Motoyil ko fare Kan NThothup min Rrin’ e Tin Mangil

Fayleng e baga’ nima thiliyeg pangim nrogon ni ngam sap ngom, ni nge cheleg e tafney rom ngom ko tin nike thimur, ma ba tay u wun’um ni gag e mini’, tin ni dawor kug mang, nge tin ni gu ba’adag. Rogon ni dar fal’ u wun’uy ko tin thothup ban’en ma fek dad i yaen ko kanawo’en Tathapegdad, ni “yan nga gubin yang, ni be rin’ e tin ni bfel.”⁸ Napan ni gadad ra yaen u dakaen kanawo’en e gachalpen, ma gadaed thapeg e kanawo’ ni ngan ayuweged boech e gidii’.

Ba yaat ni kug rung’ag niek bukun e duw e ayuweg neg nggu nang fan mug fol ko pin’en nibe yib ko fare Kan ni Thothup. Sister Bonnie D. Parkin, ni imoy nib Relief Society General President, ke yoeg e biney:

“Susan … e bea’ nib salap ko fal’eg e maad. President [Spencer W.] Kimball e imoy u lane ward [rok]. Reb e Madnom, me guy Susan ni ke chuw ko reb e mad nib be’ech. Chitamag e kaffini … chuw’iy boech e maad ninge yup ni rib fel’. Susan e ke lemnag ni re maad nem e ra fal’eg ya’an e necktie ni nge un ko maad nib be’ech rok President Kimball. Ere Monday me fal’eg fare necktie. Ke inging ko babyor me yaen nga tabinaew rom President Kimball.

“Fini ke taw nga mab rok, ke tal’ me lemnag, ‘Ke di’in nggu fal’eg e necktie ko re profet? Ya ka bay yo’or e necktie rok.’ Ke lemnag e ren’ey me chel ni nge yaen nga mo’on.

“Machane ke bing Sister Kimball fare mab me yoeg, ‘Kamagaer, Susan!’

“Nib murus, ke fulweg Susan riy’ ni ga’ar, ‘Kug gu’ President Kimball nib chew a m’ad nib be’ech ko Madnom. Papa rog ke fekey e silk ngog nu New York … ere kug fal’eg e necktie ni fan.’

“U’mon ni nge athamgl, Sister Kimbal ke tal’eg ir, me fek l’agruw e poen rok nga lan pa’ay me yoeg: ‘Susan, dam tal’eg e tafney nib murnguy rogon.’”⁹

Gu ba adag e ran’em! “Dam taleg e tafney nib mangil rogon.” Bingyal’ napan gu thamiy ni ngu ayuweg bee’, gu duwer dakaen fa’an re tafney ma yib rok Kan Thothup fa gag. Machane ke sulaen’ug ni “Tin ni yib rok’ Got e be pining ma be miliyaen’ e gidii’ ni ngar rin’ed e tin nib mangil ni gubin e ngiyal’; ere, gubin ban’en nibe piningey ma be miliyey ni ngan rin’ e tin nib mangil, ma ngan t’ufeg Got, min pigpig ngak’, e thogthog ni yib rok’ Got.”¹⁰

Demtrug ko fa’anra fare Kan Thothup fa kemus e lanin’um ni ngam ayuweg bee’, muruwliy nib fel’ e mangil; “ya t’ufeg e darma mathmit”¹¹—ma dariy bi’id nib kireb.

Baga’ ni dabda nanged fan ke uragon nra ayweg bee’ e muruwel rodad, ya ke papay fa ba chig’ riy’. Machane, bingyal’, gadad ra nang ni kad manged talin u pa’ Got ma gadad ra oge magaer ngak ni ke muruwliy u fithikdad fare Kan ni Thothup. Ireram ra dagem ni ba’adag Got e muruwel rom.

Pi walageg nib ppin, gur nge gag e rayog ni ngad wenig niged ko fare Kan ni Thothup ni nge dag ngodad gubin e pin’en ni [ngad] rin’ed,”¹² dem turug ko fa’anre bay yo’or e muruwel rodad. Napan gadad ra thamiy, ma rayog ni ngad digeyed e muruwel ko tabinaew rodad fa email list nib n’uw rodad ni ngad bi’eged e babyor ngak e bitir, mada’ nag e tafagar, chathowliy e bitir rok e cha’an nib chugur ngodaed, fa pigpig u lane temple. Dam ma’thuk ko thin rog—gu ba’adag ni nggu yoloey min mu’ nag e ti rog e ban’en. Machane gapas e ma yib nu dakaen e llowan’ ni in e tin kam muruwel e gathi nrogon ni ngan mang nib machalbog. Rogon e tafney rog ko awa’ nu tharimy nggu m’ag u wun’ug nggu fol Kan Thothup ma thiliyeg rogon e lemnag rog ko gos’gos’ rog, ma gu sap tay e gidii’ u bangeg e kengin e yafos rog.

Rogon ni Dar Fal’ u Wun’uy ko Tin Thothup Ban’en e ma Powi’iy Dad ngak Kristus

Rogon ni dar fal’ u wun’uy ko tin thothup ban’en ema gagyeg nigey ko sobutaen’, gathi kirebaen’ fa domomow nibe yib napan ran t’areb nag gur ngak bee’ nrogon ni dani fel’. Pi ppin nibe koel chilan e motochiyel ma bo’or e mit riy; tabinaw rorad, yalen rorad, nge gin’en rorad ab thil.

Riyul’, gadad gubin e ra dol’ bingyal’ ma dabda ngongoliy urngin e tin thothup ni rayog rodad, ma riyul’ ni yigo gadad e gathi machalbog. Machane fare thin nib fel’ ko gospel e ni udakaen e wurengaen’ rok Got, gadad rayog ni ngad machalbog. Udakaen ayuw rok Kristus, rayog rodad gubin ban’en.¹³ Pi babyor ni thothup ma micheg ni “ireram e gin ni yira runguydad riy min ayuwegdad ko ngiyal’ ndabisiy ni ngar ni ayuwegdad.”¹⁴

Tin nib gin’ gad ngay mab riyul’ riy e pi ma’awaer rodad mrayog ni nge mang e tawath napan i sobutaen’ nagdad min chel dad oren ngak Kristus.¹⁵ Tin nde fel’ u waen’ ko tin thothup ban’en mra ayuwegdad napan gadadma bad ngak Yesus Kristus ko tin nib t’uf rodad, gathi napan ngad soen gad nib kireb an’uy.

Ya, pi ma’ang’ang rok Yesus bo’or e yay ma tabab napan i nang e gidii’ e tin nib t’uf rorad, pi ma’awaer rorad, fa mul rorad. Ka gamanang fapi flowa nge nig? Gubin e pi’in nib tayoloey e Gospel ma ke weliy rogon Yesus ni pi’ e gaan ngak picha’an ni yima lek.¹⁶ Machane fare yaat e tabab napan ni nang fapi gachalpen e tin nib tu’uf rorad; kar guyed ni kemus ni ri “lal yal’ i flowa ni barley rok nge l’agruw i nig. Machane dabi gaman e pi girdi’ ney riy ni arya urngirad?”¹⁷ Pi gachalpen e soeroraed: e dani gaman e gaan ko gidii’, machane kar pii’ed e n’en ni bay roraed ngak Yesus, ma Ke rrin’ fare ma’ang’ang.

Bay biyay nikam thamiy nib achig e pi tawa’ath rom ni fan ko muruwel rom nga m’on? Kug lemnag. Machane gur nge gag e rayog ngad pi’ed e gelingdad ngak Kristus, ma ra ga’ nag e muruwel rodad. Tin ni ba’ rom e mangil—dariy fan pi ma’awaer rom—fa’anra mu tay e mich rom kowurengaen’ rok Got.

Bin riyul’ e ra bagdad ma pifaak Got, gadad e bitir ku Got.¹⁸ Ma amrogon ni Ke rrin’ ko pi profet nge pi pumo’on nge ppin ni kakrom nge mada’ ko chiney, ere Chitimangdad nu Tharmiy e ra thiliyegdad nib fel’.

C. S. Lewis e weliy fan gelingin ni ngan thiliyeg bee’ ni aray rogon: “Mu lemnag ni gur e na’un nib fos. Me yib Got ni nge fal’eg bayay e re na’un nem. Sana , somm’on, ma rayog ni ngam nang fan ko mange be rrin’. Be fal’eg e sink ma be ning bang nike kur ko chig nge kuboech ban’en; kam nang ni muruwel nem e ba tu’uf ni ngan rrin’ ere damur gin ngay. Machane Me tabab i thilthilyeg rogon fare na’un ko rogon ni ribe amith. … [Musap,] Be toey e na’un nib thil ko bin ni gabe lemnag. … Kam lemnag ni yibe fal’egginem ni ngam mang bochi na’un nib achig: machane Be toey e na’un ni gathi ba’achig. Ke tafney nag ni nge yib nge paer u langgin.”¹⁹

Bachan fare miligach ni bayul rok fare Tathatpeg rodad, ma rayog ni ngad rrin’ed e pin’en nibay u m’on rodaed. Fapi profet e kar machib niged ni napan gadad ra yan ko kanawo’en gachalpen, ma rayog ni ngad bi’ech gad udakaen e wurengaen’ rok Kristus. Rogon ni dar fal’ u wun’uy ko tin thothup ban’en e rayog ni nge ayuweg dad ngad mithmith gaed u fithik e mich , ma gadaed fol ko pong rok Somoel ni ngad ngongoliy e tin nib mat’aw, min pi’ed e yafos rodad u fithik e sobutaen’ Ngak. U dakean fithingan Yesus Kristus, amen.