1 Chiney e baʼaray e pi thin niʼir e machib nag Amulek ngakʼ fapi gidiiʼ ni ur moyed u lan fare binaw nu Ammonihah, ni gaʼar:

2 I gag Amulek; i gag fare pagael ni fak Giddonah, nib moʼon ni fak Ishmael, niʼir e beeʼ ko ganong ku Aminadi; ni fachaʼ i Aminadi niʼir e weliy fan fapi yol ni immoy u doew e rungrung ko fare temple, ni yoloey Got nga buguli paʼ.

3 Ma Aminadi e yib ko ganong ku Nephi, niʼir fare pagael ni fak Lehi, niʼir e chuw nge yib nga wuruʼ fare nam nu Jerusalem, niʼir e yib ko ganong ku Manasseh, niʼir fare moʼon ni fak Yosef niʼir faram e nni piiʼ ni chuwaeyʼ nga Egypt ni pi walagen e ra piiʼed.

4 Ere musap gaed, kugag beeʼ nib moʼon ni gub gilbugwan u fithikʼ e piʼin ni yaed manngeg; arragon, ma musap gaed, kub yoʼor e gidiiʼ rog nge tafafil rog, ma kub yoʼor salpiyeg ni ke yog ngog ko muruwel ni gub salap riy.

5 Machane, tomuren ni aray rogon gubin e tiney, ma dariy banʼen ni gumnang u morngaʼagen e pi yalen Somoel, nge tin nib riyulʼ rokʼ nib miith nge gelingin nib maʼangʼang. Kugog ni dariy banʼen ni gumnang u morngaʼagen e pinnʼey; machane musap gaed, gube oloboch, ya kug guy nib yoʼor e tin nib riyulʼ rokʼ nib miith nge gelingin nib maʼangʼang; arragon, ni boed ni i ayuweg e pi gidiiʼ rokʼ ni dar mʼaed.

6 Machane, gu ʼelʼel nag gumʼirchaʼeg, ya rib yoʼor yay ni un piningeg ma dar lʼaganʼug ni nggu motoyil; ere ugnang morngaʼagen e pinnʼey, machane de lʼaganʼug ngay; ere ugwon ni gube togopluw ngakʼ Got, u fithikʼ e pi denen u lan gumʼirchaʼeg, ni aram rogon iyib nge madaʼ ko bin aningeg e rran ko biney ni medilip e pul, ni bay u lan e bin ragag e duw ko lung ko fapi tapuf-oloboch.

7 Ere napʼan niʼug milekag iyaen ni ngug guy reb e gidiiʼ rog ni ri gamow ba chugur, me yib ba angel rokʼ Somoel nge yibi mʼug ngog me gaʼar: Amulek, mu sul nga tabinaew rom, ya gur e bay mu duruwʼiy ba profet rokʼ Somoel; arragon, beeʼ nib moʼon nib thothup, ni Got e ke melʼeg; ya ke baley nag e abich rokʼ nib yoʼor e rran ni bachan e denen ko pi gidiiʼ ney, ma ke yibe bilig ngakʼ, ma ngam fek nga langgin e naʼun rom ngam duruwʼiy, ma ra tawaʼath nigem nge chon e tabinaew rom; nge fare tawaʼath ku Somoel e rayog ngom nge tabinaew rom.

8 Ere yibi buch nug fol ko thin rokʼ fare angel, mug sul iyaen ko naʼun rog. Ma napʼan ni gube yaen iyaen ngaram mug pirʼeg fare moʼon ni yoeg fare angel ngog ni gaʼar: Gara fek nga langgin e naʼun rom—ere musap gaed ku ireray e re moʼon ni ka fini weliy ngomed morngaʼagen bogi banʼen ku Got.

9 Ma fare angel e yoeg ngog ni beeʼ nib moʼon nib thothup; ere gunang ni beeʼ nib moʼon nib thothup ni bachan e ke yoeg ba angel rokʼ Got ngog.

10 Ere bayay, gumnang ni pinʼen ni ke micheg morngaʼagen e ba riyulʼ; ya musap gaed gube yoeg ngomed, ni woed nib fos Somoel, e aram rogon fini riyulʼ ni ke lʼoeg e angel rokʼ nge dag e pinnʼey ngog; ma rennʼey e rinʼ u napʼan ni bay e chaʼaney i Alma u tabinaew rog.

11 Ya musap gaed, ke yibliy chon e tabinaew rog, ke yibliyeg, nge ppin rog, nge pi bitir rog, nge chitamag, nge gidiiʼeg; arragon, nge gubin e pi gachalpeg ma ke yibliy, ere fare tawaʼath ku Somoel e ke yog ngomaed ni boed rogon fapi thin ni yoeg.

12 Ere chiney, e napʼan ni Amulek e yoeg e pi thin ney ma fapi gidiiʼ e tabab e balyang nga laniyaenʼraed, ni kar guyed nib yoʼor ko taʼareb e chaʼ ni michriy ni be micheg morngaʼagen fapinʼen ni kan dugliy nga dakeanraed, nge ku morngaʼagen e pinʼen ni bay yib, u rogon fare nangaenʼ ko prophecy ni bay rorow.

13 Machane, immoy boech e gidiiʼ u fithikʼraed ni ra lemniged ni ngan fithrow, ni gomanga yog u dakean e sabaenbaen roraed ni ngar tʼaered e thin nga dakeanrow, ni nge yog nra pirʼeged e nʼen ni ngan togopluw nag ngorow, ni nge yog ni ra feked row iyaen ko tapuf-oloboch roraed ni gomanga yog nni pufthin nagrow u rogon e motochiyel, ni nge yog ni ngan liiʼrow fa ninʼ row nga kalbus, u rogon e oloboch nra yog ni ngar micheged ara ni togopluw nag ngorow.

14 Chiney e pi pumoʼon ney ni ur gayed rogon ni ngan liiʼrow, e bogi lawyer, ni yaed e ni piiʼ e muruwel roraed ara dugliy raed e gidiiʼ ni ngar gagyeg niged e motochiyel u napʼan e puf-oloboch roraed, ara napʼan e puf-oloboch ko oloboch ko gidiiʼ u pʼoewchen e pi tapuf-oloboch.

15 Chiney e pi lawyer ney e ra filed gubin e pi salap nge sabaenbaen rokʼ fapi gidiiʼ; ma fan e biney e nge yog nra salap gaed ko muruwel roraed.

16 Me yibi buch ni arame ra tabab gaed i fith Amulek, ni fan e nge yog ni ngar guyed rogon ni ngan olobochiy e thin rokʼ, ara non nge togopluw ko pi thin nra weliy.

17 Chiney e darnanged ni Amulek e rayog ni nge nang e pi tanam roraed. Ere yibi buch u napʼan ni kar tabab gaed i fith, me pirʼeg e tafnaey roraed, me gaʼar ngoraed: O gimed e re mfen ni tadenen ma kub kireb, gimed e pi lawyer nge tadumʼ thin, ya gimed be ufung e dayif rokʼ moʼoniyanʼ; ya gimed be tay e tawuth nge tafich ni ngam koeled e piʼin thothup rokʼ Got.

18 Gimed be liyeb nag rogon ni ngam thilyeged woʼen e piʼin nib matʼaw, ma gimed be miliy e damomuw rokʼ Got nga dakeanmed, nge madaʼ ko ngiyalʼ ni ke poloʼ i gatheay e pi gidiiʼ ney.

19 Arragon, Mosiah e yoeg nib felʼ rogon, niʼir e bin tomur e pilung rodaed, u napʼan ni be yaen ni nge chuw ko fare lung, ma bachan e dariy beeʼ ni nge piiʼ ngakʼ, ere yoeg ni pi gidiiʼ ney e ngar gagyeg niged yaed ko thin roraed—arragon, rib felʼ rogon ni yoeg ni gaʼar faʼanra yaeni taw ko re ngiyalʼ i nʼen ni ke melʼeg e pi gidiiʼ ney e kireb ni kar fol gaed u lungun e yoʼor, ni faʼanra ngiyalʼ innʼem e ra yib ni ke mul e pi gidiiʼ ney nga fithikʼ e ngongol ni kireb, ma ke taw nga napʼan ni ngan gatheayraed.

20 Ere chiney e gube yoeg ngomed ni rib felʼ rogon nra pufthin nagmed Somoel u morngaʼagen e pi denen romed; ma rib felʼ rogon ni non ngakʼ e pi gidiiʼ ney u dakean e pi angel rokʼ ni gaʼar: Mu kalgaed ngaenʼmed, mu kalgaed ngaenʼmed, ya gilʼelung nu tharmiy e kari chugur ni nge taw.

21 Arragon, rib felʼ rogon ni yoeg, u dakean e pi angel rokʼ ni gaʼar: Gura yib nga fithikʼ e gidiiʼ rog, ni ke un e yalen nge justice u paʼag.

22 Arragon, ma gube yoeg ngomed ni faʼan manga boech ni gathi bachan e pi meybil ko piʼin nib matʼaw, ni yaed bay e chiney ko fare binaw, ma ngiyalʼ ney e rib mudugil ni kan gatheaymed, machane gathi ngan gatheaymed ko dayinbol, ni woed fapi gidiiʼ u lan e pi rran ku Noah, machane u dakean e uyngol, nge mʼar ni ubchiyaʼ, nge sayden.

23 Ere u dakean e pi meybil rokʼ e piʼin nib matʼaw ma kan pag ni dan liiʼmed; ere chiney e, faʼan gimed ra chuweg e piʼin nib matʼaw u fithikʼmed ma arame dab ki tel Somoel e gechig romed; mar fithikʼ e damomuw rokʼ e bay yib riy nib togopluw ngomed; ma arame bay ni gechig nagmed ko uyngol, nge mʼar ni ubchiyaʼ, nge sayden; ma re ngiyalʼ innʼem e kari chugur ni nge taw ngay ma kemus ni faʼan gimed ra kalngaenʼ.

24 Ere chiney e yibi buch ni fapi gidiiʼ e rigel e damomuw roraed ngakʼ Amulek, mar tolul gaed ni yaed be gaʼar: Re moʼon ney e be non nib togopluw ko pi motochiyel rodaed nib matʼaw, nge pi lawyer rodaed nib gonop ni kad melʼeged yaed.

25 Machane Amulek e kʼiyeg paʼ, me non ni rib gel ngoraed, ni be gaʼar: O gimed e re mfen nib tadenen mab kireb, mangfan ni Moʼoniyanʼ e kari chechʼey paʼ u gumʼirchaʼmed? Mang ni ngam paged gimed ngakʼ ni nge yog ni gagyeg nag gelingin nga dakeanmed, me maʼew nag oewchmed, ni nga dab mu nanged fan fapi thin ni kan weliy, boed rogon e thin roraed nib riyulʼ?

26 Ya musap gaed, kug togopluw ko motochiyel romed? Damur nanged fan; kamoeged ni kug non nib togopluw ko motochiyel romed; machane dawor gurinʼ, ya kug non ni gube falʼeg e motochiyel romed, ni nge gechigaenʼmed.

27 Ere chiney e musap gaed, gube yoeg ngomed, ni fare dayif ko mogothgoth ko pi gidiiʼ ney e kan tabab i ufung u dakean fapi lawyer romed nge pi tapuf-oloboch romed ni dematʼaw.

28 Ere chiney e yibi buch u napʼan ni Amulek e weliy e pi thin ney me tolul fapi gidiiʼ nib togopluw ngakʼ, ni yibe gaʼar: Chiney e kug nanged ni re moʼon ney e bbitir ni fak moʼoniyanʼ, ya ke baen nagdaed; ya ke non nib togopluw ko motochiyel rodaed. Ere chiney e be yoeg ni dawori non nib togopluw ngay.

29 Ma ku bayay, ki non nib togopluw ko pi lawyer rodaed nge pi tapuf-oloboch rodaed.

30 Me yibi buch ni fapi lawyer e ra tayed u wunʼraed e pinnʼey nib togopluw ngakʼ.

31 Ma bay beeʼ u fithikʼraed ni fithingan e Zeezrom. Chiney e ireray e chaʼ ni rib gel ni be adaw nag Amulek nge Alma, ir reb e tin thʼabi salap u fithikʼraed, bayoʼor bogi muruwel ni ma rinʼ u fithikʼ e gidiiʼ.

32 Chiney e ri athap ko pi lawyer ney e nge yog ni felʼ rograed; ere felʼ rograed u rogon e muruwel roraed.