1 Ere chiney, tam o fakag, gube pirʼeg ni kubay boech banʼen ni be magaf anʼum ngay, ni daryog ni ngam nangfan—ni morngaʼagen yalen e justice ku Got u rogon i gechig nag e chaʼ ni ma denen; ya gabe guy rogon ni ngam lemnag ni dematʼaw ni chaʼ ni ma denen e ngan dugliy nga ba dodowen e kirbaenʼ.

2 Chiney e musap, tam o fakag, bay gu tamilngeg e rennʼey ngom. Ya musap, tomuren ni fare Somoel ni Got e ke lʼoeg fagal nib mʼon e labthir rodaed ngar chuw gow ko farengi wuldug nu Eden, ni ngar giʼew e butʼ niʼir e ni fekrow riy—arragon, i chuweg fare moʼon u Eden, me tay nga taban u ngek farengi wuldug nu Eden, bay ba angel ni matanag nge bangi sayden ni be dramrom ni gubin yang ma be chel ngay, ni nge matangiy fare ke gakʼiy ko yafos—

3 Ere chiney, e kad guyed ni fare moʼon e ke woed rogon Got, ni ke nang e tin nib felʼ nge tin nib kireb; ma rayog ni nge kʼiyeg paʼ, nge tʼaer waʼamngin fare ke gakʼiy ko yafos, me kay nge paer nib fos ni gubinfen, ere fare Somoel ni Got e tay e angel nge farengi sayden ni be dramrom, ni nge tileg riy ni nga dabi tʼaer waʼamngin nge kay—

4 Ere aray e kad guyed, ni bay bingyalʼ i nʼen nni piiʼ ngakʼ e gidiiʼ ni ngar kalgaed ngaenʼraed riy, arragon, bingyalʼ i nʼen ni ngan guy rogoy riy, bingyalʼ i nʼen ni ngan kalngaenʼ min pigpig ngakʼ Got.

5 Ya musap, faʼan gomange gurgur Adam nge kʼiyeg paʼ ko ngiyalʼ nem, nge fek nge kay waʼamngin fare ke gakʼiy ko yafos, ma ke yog ni nge paer ni gubinfen, ni boed rogon e thin ni yoeg Got, ma dariy napʼan e kalngaenʼ; arragon, nge ku fare thin ku Got ni ra mʼaey fan, ma fare woʼen e thap e ra yaeni aw ni dariy rogon.

6 Machane musap, kan dugliy ni nge yimʼ e gidiiʼ—ere, napʼan nni chuwegrow ko fare ke gakʼiy ko yafos ma arame yira chuwegraed u fayleng—ma arame malog e gidiiʼ ni gubinfen, arragon, mar mangew gidiiʼ ni ke mul.

7 Ere chiney, e kam guy ni gal nib sommʼon e labthir rodaed e kan chuwegrow u paʼ lʼagruw i banʼen ni gamʼingin e dagur nge yaʼel ko gin bay Somoel riy; ere aray e kad guyew ni ke puf rogon ngorow ni ngar rinʼew e tin yow baʼadag.

8 Chiney e musap, de mʼag ni gidiiʼ e ngan chuwegraed ko yamʼ ko dagur, ya ra gatheay fare woʼen e falfalaenʼ nib gel.

9 Ere, bachan e dariy liyiben me yimʼ e yaʼel, ere fare mul e yib nag nga dakean gubin e gidiiʼ ba yamʼ ni ra tay e yaʼel ni ku aram rogon ko dagur, ni arame, kan chuwegrow ko gin bay Somoel riy, ere rib tʼuf ni gubin e gidiiʼ ma ngan chuweg ko biney e yamʼ ni ra tay e yaʼel.

10 Ere, gubin e gidiiʼ ma kar falwok ko tinu fayleng banʼen, ma yaed be rinʼ e tin nib galong, nge tin nib papngin moʼoniyanʼ, u rogon yalraed, ere biney e dodow ni ngan guy rogoy riy, e kemang ba dodow ni fan ngoraed ni ngar falʼeged rograed riy; kemang ba dodow ni ngan guy rogoy riy.

11 Ere chiney e ngam tay u wunʼum, tam o fakag, faʼan manga boech ni dariy fare woʼen e bayul, (ni kan gethiy nga barbaʼ) ma napʼan ni yaedra yimʼ ma yaʼel roraed e kari gafgow ni tinoewey, ni kan chuwegraed ko gin bay Somoel riy.

12 Ere chiney, dariy rogon min chuweg e gidiiʼ ko biney e dodow ni kar mulgaed ngay, ni ra beeʼ make miliy nga dakean ni bachan e dar fol;

13 Ere, rogon yalen e justice, e fare woʼen e bayul e dariy liyiben me yog, ma kemus nu dakean e kalngaenʼ ko gidiiʼ ko ngiyalʼ ney ni ngan guy rogoy riy, arragon, ngiyalʼ ney ni ngan guy rogoy riy; ya faʼan gomanga dariy e tiney e ngongol, ma murnguy e dabiyog ni nge yib angin ni dabi gatheay e muruwel ko justice. Ere chiney e fare muruwel ko justice e dabiyog ni ngan gatheay; ma faʼanra yog, meʼere Got e gathi ir Got.

14 Ere aray ni kad guyed ni gubin e gidiiʼ make mul, ma kar awgaed nga tane gagyeg ko justice; arragon, fare justice ku Got, ni ke dugliy ngoraed ni gubinfen ni ngan chuwegraed ko gin bay riy.

15 Ere chiney, fare woʼen e murnguy e dabiyog ni nge yib nge madaʼ ko ngiyalʼ ni kan falʼeg ba bayul; ere Got e piiʼ ir ni bayul ni bachan e pi denen ko gidiiʼ nu fayleng, ni nge yog ni yog fare woʼen murnguy, ni nge ayliy lungun e justice, me yog ni paer nib Got nib machalbog, mab Got nib matʼaw, ma kub Got nib sug ko murnguy.

16 Ere, e kalngaenʼ e dabiyog ni nge yib ko gidiiʼ ma kemus ni faʼanra bay e gechig, ni kub manechubog ni boed rogon nʼumngin i napʼan e yafos ko yaʼel, ni kan dugliy nib kiiʼ ko fare woʼen e falfalaenʼ, ni kub manechubog ni boed rogon nʼumngin i napʼan e yafos ko yaʼel.

17 Ere, buʼuw rogon me kalngaenʼ beeʼ ni faʼanra dawori denen? Buʼuw rogon me denen ni faʼanra dariy e motochiyel? Buʼuw rogon ma bay e motochiyel ni faʼanra dariy e gechig?

18 Ere chiney, e bay ba gechig ni kan dugliy, nge ba motochiyel nib matʼaw ni kan piiʼ, ni be yib nag e mʼingaenʼ ko nangaenʼ ngakʼ e gidiiʼ.

19 Ere chiney, e faʼanra dariy e motochiyel ni kan piiʼ—ni boed rogon ni faʼanra bay beeʼ nib moʼon ni ke thang e pogofan ma thingar ni liiʼ ngemʼ—gulley ra tamdag ngay ni manang ni yira liiʼ ngemʼ ni faʼanra nge thang e pogofan?

20 Ere ku arragon, faʼanra dariy e motochiyel ni kan piiʼ nib togopluw ko denen ma gidiiʼ e dabi tamdag ni nge rinʼ e denen.

21 Ere faʼanra dariy e motochiyel ni kan piiʼ, me denen e gidiiʼ, ma mang e rayog ni nge rinʼ e justice, ara murnguy, ya dabi yib mataʼwngirow ni ngar ayuwegew e gidiiʼ?

22 Machane bay ba motochiyel ni kan piiʼ, nge ba gechig ni yigagen, nge ba kalngaenʼ ni kan piiʼ; ni ba kalngaenʼ ni bay matʼawon e murnguy ngay; faʼanra dangay, ma justice e ke yib matʼawon ni nge gagyeg nag e gidiiʼ me piiʼ gelingin e motochiyel, ma fare motochiyel e ra gagyeg nag e gechig; ya faʼanra gathi riyulʼ ni aray rogon, ma pi muruwel ko justice e yira gatheay, ma Got e ra paer ni gathi kub Got.

23 Machane Got e dabi paer ni gathi kub Got, ma murnguy e bay angin ngakʼ e piʼin ma kalngaenʼ, ma murnguy e ma yib ni bachan fare bayul; ma fare bayul e yib nag fare foskoyamʼ ko yamʼ; ma fare foskoyamʼ ko yamʼ e sulweg e gidiiʼ ko gin bay Got riy; ere aray rogon nni sulwegraed ko gin bay riy, ni ngan pufthin nagraed u rogon e pi muruwel roraed, u rogon e motochiyel nge justice.

24 Ya musap, justice e ma tay gubin e thin rokʼ nggilʼ, ma murnguy e bay angin ngakʼ e piʼin nib mang ngakʼ; ere aray rogon, ni dariy beeʼ nra thap ma kemus ni chaʼ nib riyulʼ ni ke kalngaenʼ.

25 Mang, gabe lemnag ni murnguy e rayog ni nge chuweg e justice? Gube gaʼar ngom, Dabiyog; ni mus nib achichig ma dabiyog. Ya faʼanra yog, ma Got e gathi kub Got.

26 Ere aray rogon ni Got e gagyeg nag rarogon nib gaaʼ mab manechubog, niʼir e ni yarmiy u napʼan ni sum e fayleng. Ere aray rogon ni yib woʼen e thap ko yafos nge bayul ko gidiiʼ, nge ku aram rogon ko gafgow nge kirbaenʼ roraed.

27 Ere, gur fakag, e ngam nang ni chaʼ nib mʼagaenʼ ngay ni nge yib e rayog ni nge yib nge unum fare raen ko yafos nib puf matʼawon ngay; ma chaʼ ni dabi yib e ireram e chaʼ ni dabni tawasariy ni nge yib; machane u lan e bin tomur e rran ma yira sulweg ngakʼ u rogon e pi ngongol rokʼ.

28 Faʼanra baʼadag ni nge rinʼ e tin nib kireb, ma deyog ni kalngaenʼ u lan e pi rran rokʼ, meʼere musap, kireb e yira sulweg ngakʼ, u rogon fare sulyarmen ku Got.

29 Ere chiney, tam o fakag, gubaʼadag ni dab kum pag e pinnʼey nge magaf nag e tafnaey rom, ma kemus ni ngam pag nge mang pi denen rom e nge magaf anʼum ngay, ni ireram e re magafaenʼ ni ra fekem iyib ko kalngaenʼ.

30 O fakag, gubaʼadag ni dab kum fek yathin fare justice ku Got. Dab mu nomeg ni ngam gay e tatowaey rom ni bachan e pi denen rom, u dakean e fekyath ko justice ku Got; machane ngam pag fare justice ku Got, nge murnguy rokʼ, nge gumʼaenʼ rokʼ nge yib angin nga lan gumʼirchaʼem; mag pag nge fekem iyib nga butʼ ko ab u fithikʼ e sobutʼaenʼ.

31 Ere chiney, O fakag, ke piningem Got ni ngam machib nag fare thin ngakʼ e pi gidiiʼ ney. Ere chiney, tam o fakag, mman ngam ʼulʼul ko tin ni gabe rinʼ, ma ngam weliy fare thin u fithikʼ e yulʼyulʼ nge tamilngaenʼ, ni nge yog ni ngam fek e gidiiʼ iyib ko kalngaenʼ, ni nge yog ni yib angin woʼen fare murnguy ngoraed. Ma gomanga yigi piiʼ Got ngom ni boed rogon ni kug weliy. Amen.