Duwgiliyed e Daba’
Gelngin e falfalen’ nib manemus rodaed e bea yan u rogon ni yibe mel’eg Got nbi fas man un Ngak ko murwel Rok.
Facha’ ko yaat nikan noeg Mary Poppins ngak e bea’ nu Britian nima paer ko bitir—nibe’ nib ta pig.1 Ma changag ninge ayuweg tabinaew rok Banks nima ko bin 17 Cherry Tree Lane, u Edwardian London. Ke mil fan e bitir ngak, ni Jane nge Michael. Fithik munguy, me fil ngoraed e pin’en ningar ninged nibe murwel ko pi ma’ang’ang rok.
Jane nge Michaek e ri fol gow, machane me leam nag Mary nike taw ko ngiyal’ ni nge yaen. Nap’an nibe yan ninge yaen, me Bert, ni fagar rok Mary nima wolguy e chimney, e gay rogon ni nge non ngak ni dabbi yaen. I togpluw ni ga’ar, “Ya yaed e bitir nib mangil, o Mary.”
Me fulweg Mary ni ga’ar, “Ragu paer roraed fa’anra dar mangil gaed? Machane dabiyog ni nggu ayuweg raed fa’anra dabir paged gag, ma dariy bea’ nib momaw’ i fil ban’en ngak nge migid e bitir nibe leam nag ni manang gubin ban’en.”
Me fith Bert, “Ere?”
Me fulweg Mary, “Ere tin ni kubay e yaed e ngar filed roraed.”2
Pi walageg, boed Jane nge Michael Banks, ma gadaed e “bitir nib mangil” nib t’uf ni ngan ayuweg. Chitamangdaed nu Tharmiy e ba adag ni nge ayuweg nge fal’eg wa’athdaed, machane gathi gubin ngiyal’ ma gadaed be pag nge rrin’. Boech ngiyal’, ma ka gadaed ma mithmith ni boed ni gadaed manang gubin ban’en. Ma ka gadaed boech e ba t’uf ni ngad rrin’ed “e bin migid” ni go’ gadaed. Iraram fan ni kad baed nga fayleng ko bin somm’on e yafas, tabinaew rodaed u tharmiy. “Yafas rodaed” e ba t’uf e pin’en ni ngad me mel’eg.
Goal rok e Chitamangdaed nu Tharmiy ko famchew e gathi nge pag e bitir Rok ni ngan rrin’ e n’en nib mangil; nge pag pi faak ni ngar mel’eged ngar rrin’ed e n’en nib mat’aw man boed Ir. Fa’anra ba adag ni ngad fol gaed, ma ra i pi’ e tawa’ath nib tumgin nge gechig ni nge fal’eg e pangin daed.
Machane Got e dabun ni kemus ni nge cheag me fol pifaak ni boed e “gamanman,” ni dabi yengyeng e sus Rok u lane senggil u celestial.3 Danga’, ba adag Got pifaak ningar pil’al gaed mar uned Ngak ko murwel ko tabinaew.
Ke fal’eg Got e tunom ni rayog ni ngad manged e pilung u Gil’ilungun, kanawo’ nib m’ag nibe gagyeg nag daed ni ngad boeded Ir, me yag e yafas ngodaed ni boed Ir, ma gadaed paer e tabinaew rodaed u pow’chen nib manemus.4 Tirodaed ban’en e—ma ir—e baga’ fan ko re tunom ney, ni kad filed mornga’agen e gin ni ku un med riy ko somm’on. Gadaed ba adag fare tunom ma gadaed mel’eg ni ngad baed nga fayleng.
Ra ngan guy ni gadaed ra murwel ko mich man fil ni ngan murwel gaed ko agency rodaed nib mangil rogon, ma kan chuweg e tin ni gadaed manang kafram u wun’daed, ere dakun nanged e tunom rok Got. Ra dariy e binem, ma fan Got e dabi buch ni bachane dabin cheag gaed ni dabin manged e pi’in nib pagan’ ni gadaed ra mang.
Fare profet i Lehi e ga’ar: “Ere, fare Somoel ni Got e ke piiʼ ko gidiiʼ ni nge ra beeʼ me rinʼ u rogon ni baʼadag ni nge rinʼ. Ma, dabiyog ni nge rinʼ e gidiiʼ u rogon ni baʼadag ni nge rinʼ ma kemus ni faʼanra nge lumelaenʼ aray fa aram.”5 Nap’an nike ga’fan, me non Yesus Kristus, Faak e Chitamaniy nib Ilal. Bin migid e non Satan, Lucifer, ni ba adag ni nge kireb nag e agency me feek e rir.6
Dakean Yesus Kristus, “ma bay e cha’an nima wenig daed ngak e Chitamangiy.”7 Tomuren nike mu’ nag fare miligach ni bayul Rok, me Yesus e yaen “nga tharmiy … nge fek rokʼ e en Chitamangiy matʼawon ko murnguy ni ke tay ngakʼ e gidiiʼ.” Ma, ir nike yoeg e mot’won e runguy, “be non ni paʼ e gidiiʼ.”8
Kristus nibe non ngak e Chitamangiy ni pa’ daed e dani togpluw ko tunom rok Got. Yesus Kristus, nike pag Ir ke rrin’ e n’en ni ba adag e Chitamangiy,9 e dabi ayuweg boech ban’en ma n’en ni ba adag e Chitamangiy ko tabolngin. Riyul’ nibe falfalen’ e Chitamangiy nu Tharmiy ma be wayway ko tin ni kad rrin’ed nib mangil.
Bang, nima non Kristus, e nge pogran ngodaed ni Ke pi’ pulwon e denen rodaed ma dariy bea’ ni kari chuw ko runguy rok Got.10 Pi’in nib mich u wan’ raed Yesus Kristus, me kalngan’, me tawfe, me athamgil nge taw ko tomur—e wo’ nima gagyeg nigey ko tha’ nib mangil11—fare Tathapeg e ma n’ag fan e kireb, ma gol, ma non ni pa’ay. I Ir e cha’ nima ayuweg daed, nima pi’ e gapas ngodaed, ma non ni pa’ daed—ninge ayuweg e tha’ rodaed ngak Got.12
Bin nib thil ngay, e Lucifier e ba togpluw fa bea’ nibe kireb nag daed. John nib Tayi’iy e weliy mornga’agen Lucifer nike waer: “Mu gu rung’ag ba lam ni ba ga’ u ngal’an ni nge thapeg Got e girdi’ ngak, chiney e ke dag Got gelngin ni ir e pilung, chiney e ke dag e Messiah rok gelngin.” Mangfan? Ya “fa’anem nma egnag pi walagdad nma yib i sak’iy nga p’oewchen Got ng ii thibthib nagrad ni rran nge neap’ e ka nin’ nga wuru’ e tharmiy. Ke gel pi walagdad ngak u daken racha’en fare Fak e Saf, ngu daken e thin nib riyul’ ni ur wereged.”13
Lucifer e ta togpluw. Ke togpluw ngodaed u tharmiy, ma kube ulul nibe ogtharan daed ko biney e yafas. Be gay rogon ni nge gerngiy daed nga but. Ba adag ni ngad nanged e kirbaen’ ni dabi mus. I ir e cha’an nima yoeg ngodaed ni gadaed ba achig, nni ir e yoeg ni dan mangil gaed, ir e yoeg ngodaed ni dabyog ngan chuw ko oloboch. I ir e ma kakringey, nima gafgow nag daed.
Ra be fil Lucifer ngak reb e bitir ninge yaen me doel’ fare bitir, ma ra tolul ngak fare bitir, me gechig nag, me yoeg ngak nge tal. Kanawo’ rok Lucifer e ma mulan’uy riy ma yima kirbaen’—ni bay yib ma gubin ngiyal’. Re Chitamngin e salap l’ugun ney e ir e tin tha’abi baen14 e murwel ni nge baen nag daed me feek owchdad i yan mangil, “ya be gay rogon ni nge gubin e gidiiʼ me kirbaenʼ ni boed ir.”15
Fa’anra Kristus e be fil ngak ni nge yaen me doel’ fare bitir, ma Ra ayuweg fare bitir nge sak’iy me pi’ e athamgil nga lanyan’ ko bin migid.16 Ir e ma ayuw. Pi kanawo’ Rok e ma pi’ e falfalen’ nge athap—ni bay yib ma gubin ngiyal’.
Tunom rok Got e bay e kanawo’en ni fan ngodaed, ni yima yoeg e motochiyel ngay u lane pi chep nib thothup. Pi motochiyel ney e gathi ba makakring fa bogi ban’en ni yibe kunkunuy ni mornga’agen bogi motochiyel ni kemus ni nge fil ngodaed ni ngan fol. Ba peth ngodaed ni gadaed be boeg Got, man sul ngak e Chitamangiy nu Tharmiy, man thapeg e falfalen’ nib manemus. Pi motochiyel Rok ni yibe fol riy e gathi yibe rrin’ ni dan nang fan, gadaed manang ni gadaed be mel’eg Got nge kanawo’ Rok i yan nga tabinaew. Kanawo’en ni fan ngodaed e ku ta’aborogon ngak Adam nge Eve, “Got e piiʼ e motochiyel ngoraed, u tomuren ni ke dag ngoraed fare woʼen e bayul.”17 Demtrug ni ba adag Got ni ngad pired u dakean fare kanawo’ ko m’ag, ma pag ke mil fan ngodaed ni ngad mel’eged.
Riyul’, Got e ba adag, be athapeg, ma be gagyeg ni ra reb e bitir Rok me mel’eg e tin ni ba adag. Dabi towasor nag daed. Dakean e tawa’ath ko agency, me pag Got pifaak ni ngar “rinʼed roraed ma gathi ngan rinʼ ngoraed,”18 Agency e ma pag daed ngad mel’eged ni ngad baed nga dakean fare kanawo’, fa danga’. Be pag daed ni ngad chuw gaed riy, fa danga’. Boed ni dabiyog ni ngan towasor nag daed ni ngad fol gaed, dabyog ni ngan towasor nag daed ni ngan togpluw gaed. Dariy bea’ ni rayog rok, ni dariy e n’anggan daed riy, ni nge chuweg daed ko fare kanawo’. (Chiney biney e gatih ngan oloboch riy ko pi’in nikan kireb nag e agency roraed. Darur chuwgad e kanawo, yaed e gidii’ nikan gafgow nag raed. Kar thapeged e n’agan’ rok Got, t’ufeg, runguy.)
Machane nap’an ni gadaed ra chuw u dakean fare kanawo’, me kirbaen’ Got ya manang ni biney, e baga’ nima, fekey nge chuwegney ko falfalen’ me chuweg e pi tawa’ath. Lane pi chep nib thothup, ma kanawo’ ni yibe chuw riy e kanoeg e denen ngay, be boch’uw e falfalen’ me chuweg e tawa’ath e kanoeg e gechig ngay. Ma biney, e dar gechig nag daed Got; gechig e n’en nibe buch ni bachane pin’en ni gadaed be rrin’, gathi Ir.
Nap’an ni gadaed ra nang ni kad mul gaed ko kanawo’, ma rayog ni ngad pired u wuru’, fa bachan fare Bayul rok Yesus Kristus, ma rayog ni ngad thiylegned ma gadaed sul biyay. Lane pi chep nib thothup, ma rogon e wo’ ni yibe mel’eg ni ngan thil man sul ko kanawo’ e kanoeg e kalngan’ ngay. Ra dabin kalngan’ ma kad mel’eged ni ngad chuw gaed ko pi tawa’ath rok Got nib a adag ni nge pi’. Fa’anra “dabun daed e n’en ni [kad] thapeged,” ma gadaed ra sul … ko gin ni [gadaed] bay riy, ni ngan falfalen’ ko n’en ni [gadaed] ba adag ni ngad thapeged”19—mil fan ngodaed, gathi Got.
Demtrug n’umngin nap’an ni kad mul gaed ko fare kanawo’ fa pafalngen ni kad dared nga biyang, ma chingiyal’ ni gadaed ra finey ni ngad thil gaed, me ayuweg daed Got ngad suled.20 Ko sap rok Got, dakean e kalngan’uy u fithik e riyul’ man athamgil ni yib gel u dakean Kristus, nap’an ni yira sul ko kanawo’, ma boed ni daworun chuw gaed riy.21 Ke feek Tathapeg e denen rodaed ma ke chuweg daed ko kirbaen’ u fithik e falfalen’ nge tawa’ath. Binem e kanoeg e n’ag fan ngay u lange pi chep nib thothup. Tomuren e tawfe, me gubin chonggin e galasia e ma mul ko fare kanawo’—boech i gadaed e kari palog. Machane, mich ni yibe athamgiliy u dakean Yesus Kristus, kalngan’uy, man thapeg e ayuw Rok, man n’ag fan e kireb rodaed ta’areb ngiyal’ machane, ban’en ni ta’abiyay machane lane yafas rodaed, wo’ nibe paer ma be sulsul u dakean. Iraray rogon ni gadaed ma “athamgil nge taw ko tomur.”22
Ba t’uf ni ngad mel’eged ko mini’ e ngad pigpig gaed ngak.23 Rogon e falfalen’ rodaed nib manemus e be yaen u rogon ni mel’eg Got man un Ngak ko murwel Rok. Nap’an ni gadaed ra athamgil ngad “rrin’ed ni go’ gadaed”, ma gadaed be murwel ko fare agency rodaed nib mangil rogon. Rogon nike yoeg l’agruw e Relief Society General President kafram, e dabin boeded e bitirni ngaygun paer ma yibe non ngak ma yibe gafaliy ni gubin ngiyal’.”24 Danga, Got ni ba adag ni ngad ilal gad nge ngad gagyeg ngodad.
Tunom rok e Chitamangiy ni yibe mel’eg ni ngan fol riy e kemus e re kanawo’ ni rayog ni ngad manged e bitir ni pilung u lan Gil’ilungun; kemus e ngiyal’ ni ra pagan’ ngodaed ni dabin fithed rogon e n’en ni ba adag.25 Machane ba t’uf ni ngad tafneyed gadaed ni “dariy bea’ nib momaw’ i fil ban’en ngak nge migid e bitir nibe leam nag ni manang gubin ban’en.” Ere ba t’uf ni ngan adag ni ngan fil ban’en ngodaed ko kanawo’ rok Somoel nge pi tapigpig Rok. Rayog ni ngad pagan’ gadaed ni gadaed e bitir ni faak e Galabthir u Tharmiy26 ma baga’ fan i “ngan ayuweg daed” ma gadaed nang ni “go’ gadaed” e ri gathi be yoeg ni “ri go’ gadaed.”
Ni prophet Jacob u lane fare Babyor ku Mormon ke yoeg, Gu be yoeg ta’ab rogon:
“Ere, nge falfalaenʼ med, ma ngam tayed u wunʼmed nib puf rogmed ni ngam rinʼed nrogon ni gimed baʼadag—ni ngam melʼeged e kanawoʼ ko yamʼ ni dabimus biʼid fa kanawoʼ ko yafos ni manechubog.
“Ere, pi walageg nib tʼuf rog, mmʼaged gimed ko tin baʼadag Got, ma gathi tin baʼadag fare moʼoniyanʼ … ma ngam tayed u wunʼmed, u tomuren ni kam mʼaged gimed ngakʼ Got, ni kemus nu fithikʼ ngu dakean fare murnguy rokʼ Got e gimed rathap riy.”27
Ere, mel’eg e mich ngak Kristus; kalngan’um; mel’eg ni ngam tawfe mag thapeg fare Kan ni Thothup; mel’eg ni nga um paer ni gabe fal’eg rogom ngam paer ni gab yul’yul’ i feek fare sacrament; mel’eg ni ngam ngongliy e pi m’ag u lane temple; mag mel’eg ni ngam pigpig ngak Got nge pifaak. Pin’en ni gadaed be mel’eg e be dag ko gadaed mini’ nge mini’ e gadaed ra mang.
Nggu museg ko tawa’ath rok Jacob: “Ere, manga yigi fasegmed Got ko … gelingin fare foskoyamʼ, nge fare yamʼ ni dabimus biʼid u dakean gelingin fare bayul, ni gomanga yog ni ngam thap gaed nga langgin gilʼilungun Got ni manechubog.”28U dakean fithngan Yesus Kristus, amen.