ផ្ទុកឈើឆ្កាងរបស់យើង
ការផ្ទុកឈើឆ្កាងលើខ្លួនបងប្អូន ហើយធ្វើតាមព្រះអង្គសង្គ្រោះ មានន័យថាបន្ដដើរលើផ្លូវរបស់ព្រះអម្ចាស់ដោយសេចក្ដីជំនឿ ហើយមិនបណ្ដោយខ្លួនតាមទម្លាប់លោកិយឡើយ ។
បងប្អូនប្រុសស្រីជាទីស្រឡាញ់ យើងបានទទួលការបង្រៀនដ៏អស្ចារ្យមកពីថ្នាក់ដឹកនាំរបស់យើងអំឡុងពេលពីរថ្ងៃចុងក្រោយនេះ ។ ខ្ញុំថ្លែងទីបន្ទាល់ដល់បងប្អូនថា បើយើងខិតខំអនុវត្តការបង្រៀនដ៏បំផុសគំនិត និងទាន់ពេលទាំងនេះក្នុងជីវិតយើង នោះព្រះអម្ចាស់នឹងជួយយើងម្នាក់ៗឲ្យលីឈើឆ្កាងរបស់យើង និងសម្រាលបន្ទុកយើងឲ្យស្រាលតាមរយៈព្រះគុណទ្រង់ ។
ខណៈនៅជិតខាងនឹងក្រុងសេសារា-ភីលីព ព្រះអង្គសង្គ្រោះបានបង្ហាញដល់សិស្សរបស់ទ្រង់ពីអ្វីដែលទ្រង់នឹងរងទុក្ខនៅក្នុងដៃនៃពួកចាស់ទុំ ពួកសង្គ្រាជ និងពួកអាចារ្យនៅក្រុងយេរូសាឡិម ។ ទ្រង់បានបង្រៀនពួកគេយ៉ាងជាក់លាក់អំពីការសុគត និងការរស់ឡើងវិញដ៏រុងរឿងរបស់ទ្រង់ ។ មកដល់ត្រឹមនេះ ពួកសិស្សរបស់ទ្រង់មិនបានយល់ទាំងស្រុងពីបេសកកម្មដ៏ទេវភាពរបស់ទ្រង់លើផែនដីនោះទេ ។ ពេត្រុសផ្ទាល់ពេលបានឮអ្វីដែលព្រះអង្គសង្គ្រោះមានបន្ទូល គាត់បាននាំទ្រង់ទៅម្ខាង ហើយទូលជំទាស់នឹងទ្រង់ថា « ឱព្រះអង្គម្ចាស់អើយ សូមទ្រង់ប្រណីអង្គទ្រង់វិញ ការនោះមិនត្រូវមកដល់ទ្រង់ឡើយ » ។
ដើម្បីជួយសិស្សរបស់ទ្រង់ឲ្យយល់ថា ភក្ដីភាពចំពោះកិច្ចការទ្រង់រួមមានការចុះចូល និងការរងទុក្ខ នោះព្រះអង្គសង្គ្រោះបានប្រកាសដោយក្ដីមេត្តា ៖
« អ្នកណាដែលចង់មកតាមខ្ញុំ ត្រូវឲ្យអ្នកនោះលះកាត់ចិត្តខ្លួនឯងចោល ទាំងផ្ទុកឈើឆ្កាងខ្លួនមកតាមខ្ញុំចុះ ។
ព្រោះអ្នកណាដែលចង់ឲ្យរួចជីវិត នោះនឹងបាត់ជីវិតទៅ តែអ្នកណាដែលបាត់ជីវិត ដោយព្រោះខ្ញុំ នោះនឹងបានវិញ ។
ដ្បិតបើមនុស្សណានឹងបានលោកីយ៍ទាំងមូល តែបាត់ព្រលឹងទៅ នោះតើមានប្រយោជន៍អ្វីដល់អ្នកនោះ ឬតើមនុស្សនឹងយកអ្វីទៅដូរ ឲ្យបានព្រលឹងខ្លួនវិញ ? »
តាមរយៈការប្រកាសនេះ ព្រះអង្គសង្គ្រោះបានគូសបញ្ជាក់ថា អស់អ្នកដែលស្ម័គ្រចិត្តដើរតាមទ្រង់ត្រូវកាត់ចិត្តខ្លួន ហើយគ្រប់គ្រងបំណងប្រាថ្នា ការឃ្លាន និងចំណង់របស់ខ្លួន លះបង់អ្វីទាំងអស់សូម្បីតែជីវិតផងបើចាំបាច់ គឺចុះចូលទាំងស្រុងតាមព្រះទ័យរបស់ព្រះបិតា—គឺដូចជាទ្រង់បានធ្វើដែរ ។ តាមពិតទៅ នេះគឺជាអ្វីដែលត្រូវបង់ថ្លៃសម្រាប់ការសង្គ្រោះដល់ព្រលឹង ។ ព្រះយេស៊ូវបានប្រើនិមិត្តសញ្ញានៃឈើឆ្កាងក្នុងគោលបំណងប្រៀបធៀប ដើម្បីជួយសិស្សរបស់ទ្រង់ឲ្យយល់ច្បាស់ពីអត្ថន័យពិតប្រាកដនៃពលិកម្ម និងភក្ដីភាពចំពោះបុព្វហេតុរបស់ព្រះអម្ចាស់ ។ សិស្សរបស់ទ្រង់ និងរាស្ដ្រក្នុងចក្រភពរ៉ូម៉ាំងស្គាល់ច្បាស់ពីរូបភាពនៃឈើឆ្កាង ដោយសារពួករ៉ូម៉ាំងបានបង្ខំជនរងគ្រោះនៃការឆ្កាង ឲ្យលីឈើឆ្កាង ឬនឹមរបស់គេផ្ទាល់ទៅកន្លែងដែលនឹងធ្វើការកាត់ទោសគេ ។
ទាល់តែក្រោយពីការរស់ឡើងវិញរបស់ទ្រង់ ទើបគំនិតរបស់ពួកសិស្សត្រូវបានបើកឡើងហើយយល់អ្វីទាំងអស់ ដែលបានសរសេរអំពីទ្រង់និងអ្វីដែលតម្រូវឲ្យពួកគេធ្វើតាំងពីពេលនោះមក ។
បងប្អូនប្រុសស្រី នៅក្នុងរបៀបដូចគ្នានេះ យើងគ្រប់គ្នាចាំបាច់ត្រូវបើកគំនិត និងចិត្តរបស់យើង ដើម្បីយល់ឲ្យកាន់តែពេញលេញពីទំនាក់ទំនងនៃការលើកដាក់មកលើខ្លួនយើងនូវឈើឆ្កាងរបស់យើង និងការដើតាមទ្រង់ ។ យើងរៀនតាមរយៈបទគម្ពីរថា អ្នកដែលចង់ផ្ទុកឈើឆ្កាងគេនៅលើខ្លួនគេ ស្រឡាញ់ព្រះយេស៊ូវគ្រីស្ទតាមរបៀបមួយ ដែលពួកគេកាត់ចិត្តខ្លួនពីអ្វីដែលមិនមែនជារបស់ព្រះ និងចំណង់គ្រប់យ៉ាងនៃពិភពលោកនេះ ហើយកាន់តាមបទបញ្ញត្តិទ្រង់ ។
ការប្ដេជ្ញាចិត្តរបស់យើងដើម្បីបោះចោលអ្វីទាំងអស់ដែលផ្ទុយពីព្រះទ័យរបស់ព្រះ ហើយលះបង់អ្វីទាំងអស់ដែលយើងត្រូវបានសូមឲ្យផ្ដល់ និងធ្វើតាមការបង្រៀនរបស់ទ្រង់ នឹងជួយយើងឲ្យស៊ូទ្រាំលើផ្លូវនៃដំណឹងល្អរបស់ព្រះយេស៊ូវគ្រីស្ទ—ទោះក្នុងការប្រឈមនឹងទុក្ខព្រួយ ភាពទន់ខ្សោយក្នុងព្រលឹងយើង ឬសម្ពាធខាងសង្គម និងទស្សនវិជ្ជាខាងលោកិយដែលផ្ទុយពីការបង្រៀនទ្រង់ក្ដី ។
ឧទាហរណ៍ ចំពោះអ្នកដែលមិនទាន់រកឃើញដៃគូដ៏អស់កល្ប ហើយអាចមានអារម្មណ៍ឯកោ និងអស់សង្ឃឹម ឬអ្នកដែលលែងលះគ្នា ហើយមានអារម្មណ៍ថាគេបោះបង់និងភ្លេចយើង ខ្ញុំសូមធានាបងប្អូនថា ការទទួលយកការអញ្ជើញរបស់ព្រះអង្គសង្គ្រោះឲ្យផ្ទុកឈើឆ្កាងបងប្អូនលើខ្លួនបងប្អូន និងការធ្វើតាមទ្រង់ មានន័យថាការបន្ដដោយសេចក្ដីជំនឿលើផ្លូវរបស់ព្រះអម្ចាស់ លើគន្លងរបស់ព្រះ ហើយមិនបណ្ដោយខ្លួនតាមទម្លាប់នៃលោកិយ ដែលនឹងផ្ដាច់ក្ដីសង្ឃឹមយើងពីក្ដីស្រឡាញ់ និងក្ដីមេត្តារបស់ព្រះនៅចុងបញ្ចប់ ។
គោលការណ៍ដូចគ្នានេះអនុវត្តចំពោះបងប្អូនដែលដកពិសោធន៍ការស្រឡាញ់ភេទដូចគ្នា ហើយមានអារម្មណ៍បាក់ទឹកចិត្ត និងតែលតោល ។ ហើយប្រហែលដោយសារមូលហេតុនេះ ទើបបងប្អូនមួយចំនួនអាចមានអារម្មណ៍ថា ដំណឹងល្អរបស់ព្រះយេស៊ូវគ្រីស្ទមិនមែនសម្រាប់បងប្អូនទៀតឡើយ ។ ប្រសិនបើពិតដូច្នេះមែន ខ្ញុំចង់ធានាបងប្អូនថា នឹងមានក្ដីសង្ឃឹមលើព្រះ ជាព្រះវរបិតា និងលើផែនការនៃសុភមង្គលរបស់ទ្រង់ លើព្រះយេស៊ូវគ្រីស្ទ និងពលិកម្មដ៏ធួនរបស់ទ្រង់ និងលើការរស់នៅតាមបទបញ្ញត្តិជាទីស្រឡាញ់របស់ពួកទ្រង់ជានិច្ច ។ ក្នុងប្រាជ្ញា ព្រះចេស្ដា សេចក្ដីយុត្តិធម៌ និងក្ដីមេត្តាដ៏ឥតខ្ចោះរបស់ទ្រង់ ព្រះអម្ចាស់អាចផ្សារភ្ជាប់យើងទៅនឹងទ្រង់ ដើម្បីឲ្យយើងអាចចូលទៅក្នុងវត្តមានរបស់ទ្រង់ ហើយទទួលបានការសង្គ្រោះដ៏អស់កល្ប បើយើងមានចិត្តខ្ជាប់ខ្ជួន ហើយមុតមាំក្នុងការកាន់តាមព្រះបញ្ញត្តិទាំងឡាយហើយពោរពេញទៅដោយអំពើល្អជានិច្ច ។
ចំពោះអ្នកដែលបានប្រព្រឹត្តអំពើបាបធ្ងន់ធ្ងរ ការទទួលយកការអញ្ជើញដូចគ្នានេះមានន័យថា ក្នុងចំណោមរឿងផ្សេងទៀត ត្រូវបន្ទាបខ្លួនបងប្អូនចំពោះព្រះ ប្រឹក្សាជាមួយថ្នាក់ដឹកនាំសាសនាចក្រត្រឹមត្រូវ និងប្រែចិត្ត ហើយបោះបង់អំពើបាបបងប្អូន ។ ដំណើរការនេះក៏នឹងផ្ដល់ពរដល់អស់អ្នកដែលប្រយុទ្ធនឹងការញៀនដែលធ្វើឲ្យបងប្អូនចុះខ្សោយ រួមមានអាភៀន ថ្នាំញៀន គ្រឿងស្រវឹង និងអាសគ្រាមផងដែរ ។ ការធ្វើតាមជំហានទាំងនេះនាំបងប្អូនទៅកាន់តែជិតនឹងព្រះអង្គសង្គ្រោះ ដែលអាចរំដោះបងប្អូនពីកំហុស ទុក្ខសោក និងទាសភាពខាងវិញ្ញាណ និងសាច់ឈាមនៅទីបំផុត ។ លើសពីនេះ បងប្អូនក៏អាចស្វែងរកការគាំទ្រពីគ្រួសារ និងមិត្តភក្ដិបងប្អូន ព្រមទាំងអ្នកមានវិជ្ជាជីវៈខាងវេជ្ជសាស្ដ្រ និងប្រឹក្សាដ៏ល្អផងដែរ ។
សូមកុំចុះចាញ់ឡើយ ក្រោយពីបរាជ័យច្រើនដង ហើយកុំគិតថាបងប្អូនមិនអាចបោះបង់អំពើបាប និងយកឈ្នះលើការញៀននោះបានឡើយ ។ បងប្អូនមិនអាចឈប់ព្យាយាម រួចហើយបន្ដក្នុងភាពទន់ខ្សោយ និងអំពើបាបបានទេ ! សូមខិតខំធ្វើឲ្យអស់ពីសមត្ថភាពជានិច្ច ដោយបង្ហាញពីបំណងដើម្បីសម្អាតខាងក្នុងចិត្តដូចបានបង្រៀនដោយព្រះអង្គសង្គ្រោះតាមរយៈកិច្ចការរបស់បងប្អូន ។ ពេលខ្លះដំណោះស្រាយចំពោះបញ្ហាមួយចំនួនកើតមានរាប់ខែក្រោយពីការខិតខំដ៏ខ្ជាប់ខ្ជួន ។ សេចក្ដីសន្យាដែលមានក្នុងព្រះគម្ពីរមរមនថា « មានតែដោយព្រះគុណទេ ទើបយើងបានសង្គ្រោះ បន្ទាប់ពីអ្វីៗទាំងអស់ ដែលយើងអាចធ្វើបាន »អនុវត្តបានក្នុងករណីទាំងនេះ ។ សូមចងចាំថា អំណោយទាននៃព្រះគុណរបស់ព្រះអង្គសង្គ្រោះ « មិនមានកាលកំណត់ទេ ‹ បន្ទាប់ពី › អ្វីទាំងអស់ដែលយើងអាចធ្វើបាននោះ ។ យើងអាចទទួលបានព្រះគុណរបស់ទ្រង់ពីមុន អំឡុងពេល និងក្រោយពេលដែលយើងពង្រីកការខិតខំរបស់យើងផ្ទាល់ » ។
ខ្ញុំថ្លែងទីបន្ទាល់ថា កាលយើងបន្ដខំយកឈ្នះលើឧបសគ្គរបស់យើង នោះព្រះនឹងប្រទានពរយើងនូវអំណោយនៃសេចក្ដីជំនឿដើម្បីបានសះស្បើយ និងនៃកិច្ចការនៃអព្ភូតហេតុ ។ ទ្រង់បានធ្វើសម្រាប់យើងនូវអ្វីដែលយើងមិនអាចធ្វើសម្រាប់ខ្លួនយើងបាន ។
លើសពីនេះ សម្រាប់អ្នកមានអារម្មណ៍ជូរចត់ ខឹងសម្បារ អន់ចិត្ត ឬកើតទុក្ខនឹងអ្វីដែលបងប្អូនគិតថាមិនសមកើតលើបងប្អូនសោះ ការផ្ទុកឈើឆ្កាងខ្លួន ហើយធ្វើតាមព្រះអង្គសង្គ្រោះមានន័យថា ការខិតខំទម្លាក់ចោលអារម្មណ៍ទាំងនេះ ហើយងាកទៅព្រះអម្ចាស់ ដើម្បីទ្រង់អាចរំដោះយើងពីសភាពនៃគំនិតនេះ ហើយជួយយើងឲ្យរកឃើញសេចក្ដីសុខសាន្ដ ។ ជាអកុសល បើយើងនៅឱបក្រសោបអារម្មណ៍អវិជ្ជមានទាំងនេះ យើងអាចឃើញថាខ្លួនឯងរស់នៅដោយគ្មានឥទ្ធិពលពីព្រះវិញ្ញាណរបស់ព្រះអម្ចាស់ក្នុងជីវិតយើង ។ យើងមិនអាចប្រែចិត្តឲ្យមនុស្សដទៃឡើយ ប៉ុន្ដែយើងអាចអភ័យទោសឲ្យពួកគេបាន—ដោយបដិសេធមិនចងកំហឹងនឹងអ្នកដែលធ្វើឲ្យយើងរងទុក្ខ ។
ព្រះគម្ពីរបង្រៀនថា មានរបៀបមួយគេចពីស្ថានភាពទាំងនេះ—គឺការយាងព្រះអង្គសង្គ្រោះឲ្យជួយយើងជំនួសដួងចិត្តរឹងដូចថ្មរបស់យើងដោយដួងចិត្តថ្មី ។ ដើម្បីឲ្យការណ៍នេះកើតឡើង យើងត្រូវមករកព្រះអម្ចាស់ដោយភាពទន់ខ្សោយរបស់យើង បន្ទាបខ្លួនចំពោះទ្រង់ហើយទូលសូមជំនួយ និងការអភ័យទោសពីទ្រង់ជាពិសេសអំឡុងពេលដ៏ពិសិដ្ឋ កាលយើងទទួលទានសាក្រាម៉ង់រាល់ថ្ងៃអាទិត្យ ។ ចូរយើងជ្រើសរើសដើម្បីស្វែងរកជំនួយពីទ្រង់ ហើយបោះជំហានដ៏សំខាន់ តែពិបាកនេះ តាមរយៈការអភ័យទោសឲ្យអ្នកដែលធ្វើឲ្យយើងឈឺចាប់ ដើម្បីឲ្យស្នាមរបួសយើងអាចចាប់ផ្ដើមសះស្បើយ ។ ខ្ញុំសន្យានឹងបងប្អូនថា កាលបងប្អូនធ្វើដូច្នេះ យប់របស់បងប្អូននឹងពេញដោយការធូរស្រាល ដែលកើតពីគំនិតដ៏សុខសាន្ដជាមួយនឹងព្រះអម្ចាស់ ។
ខណៈជាប់ក្នុងគុកលីប៊ើរធីឆ្នាំ ១៨៣៩ ព្យាការី យ៉ូសែប ស្ម៊ីធ បានសរសេរសំបុត្រទៅសមាជិកសាសនាចក្រ រួមមានការព្យាករ ដែលអនុវត្តបានល្អនៅរាល់ស្ថានភាព និងកាលៈទេសៈទាំងនេះ ។ លោកបានសរសេរថា « គ្រប់ទាំងបល្ល័ង្ក និងអំណាចគ្រប់គ្រង ក្សត្របុរី និងអំណាចទាំងឡាយ នឹងត្រូវបានបើកសម្ដែង ហើយប្រទានមកលើអស់អ្នកណាដែលស៊ូទ្រាំដោយក្លាហាន ដើម្បីដំណឹងល្អនៃព្រះយេស៊ូវគ្រីស្ទ » ។ ហេតុដូច្នេះហើយ អ្នកដែលលើកដាក់មកខ្លួនគេនូវព្រះនាមរបស់ព្រះអង្គសង្គ្រោះ ទុកចិត្តលើការសន្យា និងការលះបង់របស់ទ្រង់ដល់ទីបញ្ចប់នឹងត្រូវបានសង្គ្រោះហើយអាចរស់នៅជាមួយព្រះក្នុងសភាពនៃសុភមង្គលដ៏មិនចេះចប់មិនចេះហើយ ។
យើងទាំងអស់គ្នាប្រឈមនឹងកាលៈទេសៈអវិជ្ជមានក្នុងជីវិតយើង ដែលធ្វើឲ្យយើងមានអារម្មណ៍ក្រៀមក្រំ តែលតោល អស់សង្ឃឹម ហើយពេលខ្លះទន់ខ្សោយផងដែរ ។ អារម្មណ៍ទាំងនេះខ្លះអាចនាំឲ្យយើងសួរទៅព្រះអម្ចាស់ថា « ហេតុអ្វីខ្ញុំជួបនឹងស្ថានភាពទាំងនេះ ? » ឬ « ហេតុអ្វីខ្ញុំមិនអាចសម្រេចការរំពឹងទុកខ្ញុំបាន ? ទោះខ្ញុំធ្វើអ្វីៗទាំងអស់ក្នុងអំណាចខ្ញុំដើម្បីផ្ទុកឈើឆ្កាងខ្ញុំ ហើយធ្វើតាមព្រះអង្គសង្គ្រោះហើយនោះ ! »
មិត្តជាទីស្រឡាញ់របស់ខ្ញុំ យើងត្រូវចាំថា ការផ្ទុកឈើឆ្កាងរបស់យើងលើខ្លួនយើងរួមមាន ការបន្ទាបខ្លួន និងទុកចិត្តលើព្រះ និងលើព្រះប្រាជ្ញាដ៏គ្មានព្រំដែនរបស់ទ្រង់ ។ យើងត្រូវទទួលស្គាល់ថា ទ្រង់ជ្រាបពីយើងម្នាក់ៗ និងពីតម្រូវការយើង ។ វាក៏ចាំបាច់ដើម្បីទទួលយកការពិតថា ពេលវេលារបស់ព្រះអម្ចាស់គឺខុសពីយើង ។ ពេលខ្លះយើងចង់បានពរជ័យមួយ ហើយកំណត់ពេលវេលាឲ្យព្រះអម្ចាស់បំពេញវា ។ យើងមិនអាចដាក់លក្ខខណ្ឌលើភក្ដីភាពយើងចំពោះទ្រង់ ដោយដាក់ថ្ងៃកំណត់ឲ្យទ្រង់តបនឹងបំណងប្រាថ្នាយើងបានទេ ។ ពេលយើងធ្វើដូច្នេះ យើងដូចជាពួកសាសន៍នីហ្វៃពីបុរាណដែរដែលមិនជឿ ហើយបានចំអកបងប្អូនគេដោយនិយាយថា ពេលវេលាកន្លងហួសហើយសម្រាប់ការបំពេញតាមពាក្យដែលបានថ្លែងដោយសាំយ៉ូអែល ជាសាសន៍លេមិន ដែលធ្វើឲ្យអ្នកជឿមានការភាន់ភាំង ។ យើងត្រូវទុកចិត្តព្រះអម្ចាស់ល្មមនឹងនៅស្ងៀម ហើយដឹងថា ទ្រង់គឺជាព្រះ ថាទ្រង់ជ្រាបពីអ្វីៗទាំងអស់ ហើយថាទ្រង់ស្គាល់យើងម្នាក់ៗ ។
ថ្មីៗនេះ ខ្ញុំមានឱកាសបម្រើបងស្រីមេម៉ាយម្នាក់ឈ្មោះ ហ្រ្វាំងកា កាឡាម៉ាស៊ី ដែលមានជំងឺកម្រើកខ្លួនលែងបាន ។ បងស្រីកាឡាម៉ាស៊ីគឺជាសមាជិកដំបូងក្នុងគ្រួសារគាត់ ដែលចូលរួមសាសនាចក្រនៃព្រះយេស៊ូវគ្រីស្ទដែលបានស្ដារឡើងវិញ ។ ទោះបីស្វាមីគាត់មិនបានជ្រមុជទឹកក្ដី ក៏គាត់ព្រមជួបអ្នកផ្សព្វផ្សាយសាសនា ហើយចូលរួមការប្រជុំសាសនាចក្រញឹកញាប់ដែរ ។ ថ្វីបើមានស្ថានភាពដូច្នេះក្ដី ក៏បងស្រីកាឡាម៉ាស៊ី បន្ដស្មោះត្រង់ ហើយចិញ្ចឹមកូនបួននាក់របស់គាត់នៅក្នុងដំណឹងល្អនៃព្រះយេស៊ូវគ្រីស្ទដែរ ។ ក្រោយពីស្វាមីគាត់ស្លាប់បានមួយឆ្នាំ បងស្រីកាឡាម៉ាស៊ីយកកូនៗគាត់ទៅព្រះវិហារបរិសុទ្ធ ហើយពួកគេចូលរួមក្នុងពិធីបរិសុទ្ធដ៏ពិសិដ្ឋ និងបានផ្សារភ្ជាប់ជាមួយគ្នាជាគ្រួសារ ។ ការសន្យាទាក់ទងនឹងពិធីបរិសុទ្ធទាំងនេះផ្ដល់ក្ដីសង្ឃឹម អំណរ និងសុភមង្គលដ៏ខ្លាំងដល់គាត់ ដែលជួយគាត់ឲ្យខំបន្ដទៀតក្នុងជីវិត ។
ពេលរោគសញ្ញាជំងឺនេះចាប់ចេញមកដំបូង ប៊ីស្សពគាត់បានផ្ដល់ពរជ័យដល់គាត់ ។ នៅពេលនោះ គាត់បានប្រាប់ប៊ីស្សពគាត់ថា គាត់ត្រៀមខ្លួនទទួលយកព្រះទ័យរបស់ព្រះអម្ចាស់រួចហើយ ដោយបង្ហាញសេចក្ដីជំនឿគាត់ដើម្បីបានសះស្បើយ ក៏ដូចជាសេចក្ដីជំនឿដើម្បីស៊ូទ្រាំនឹងជំងឺគាត់ដល់ទីបញ្ចប់ ។
អំឡុងពេលខ្ញុំទៅលេង ខណៈកាន់ដៃបងស្រីកាឡាម៉ាស៊ី ហើយមើលចំកែវភ្នែកគាត់ ខ្ញុំឃើញពន្លឺទេវតាភាយចេញពីទឹកមុខគាត់—ឆ្លុះបញ្ចាំងពីទំនុកចិត្តគាត់លើផែនការរបស់ព្រះ និងក្ដីសង្ឃឹមដ៏ចែងចាំងឥតខ្ចោះរបស់គាត់លើក្ដីស្រឡាញ់ និងផែនការរបស់ព្រះវរបិតាសម្រាប់គាត់ ។ ខ្ញុំមានអារម្មណ៍ពីការប្ដេជ្ញាចិត្តដ៏មាំមួនរបស់គាត់ ដើម្បីស៊ូទ្រាំក្នុងសេចក្ដីជំនឿគាត់រហូតដល់ចុងបញ្ចប់ ដោយផ្ទុកឈើឆ្កាងគាត់ មិនថាគាត់ជួបឧបសគ្គអ្វីទេ ។ ជីវិតរបស់បងស្រីរូបនេះគឺជាទីបន្ទាល់អំពីព្រះគ្រីស្ទ សាក្សីអំពីសេចក្ដីជំនឿ និងការលះបង់របស់គាត់ចំពោះទ្រង់ ។
បងប្អូនប្រុសស្រីជាទីស្រឡាញ់ ខ្ញុំចង់ថ្លែងទីបន្ទាល់ទៅកាន់បងប្អូនថា ការផ្ទុកឈើឆ្កាងយើង ហើយធ្វើតាមព្រះអង្គសង្គ្រោះតម្រូវឲ្យយើងធ្វើតាមគំរូទ្រង់ ហើយខិតខំក្លាយដូចជាទ្រង់ហើយប្រឈមនឹងស្ថានភាពជីវិតដោយអំណត់ កាត់ចិត្តចោលចំណង់ខាងសាច់ឈាម ហើយរង់ចាំព្រះអម្ចាស់ ។ គម្ពីរទំនុកតម្កើងបានសរសេរ ៖
« ចូររង់ចាំព្រះយេហូវ៉ាចុះ ចូរមានកំឡាំង ហើយឲ្យចិត្តក្លាហានឡើង អើ គួររង់ចាំព្រះយេហូវ៉ាទៅ » ។
« ទ្រង់ជាជំនួយ ហើយជាខែលរបស់យើងខ្ញុំ » ។
ខ្ញុំថ្លែងទីបន្ទាល់ដល់បងប្អូនថា ការធ្វើតាមគំរូរបស់លោកចៅហ្វាយយើង ហើយរង់ចាំទ្រង់ ដែលជាគ្រូព្យាបាលដ៏ពូកែដល់ជីវិតយើង នោះវាផ្ដល់ការសម្រាកដល់ព្រលឹងយើង ហើយសម្រាលបន្ទុកយើង ។ ខ្ញុំសូមថ្លែងទីបន្ទាល់ពីការណ៍ទាំងនេះក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕