Klou el Ongdibel
Dmolech el ngara chelsel a Rengud
April 2020 General Conference
2:3

Dmolech el ngara chelsel a Rengud

Mla er a Douglas D. Holmes

Ng Dirk mlo Merek el Mesiou el Kot el Counselor er a Cherrengelel Omerredel er a re Ngeasek el Sechal

A Rubak a melasm lolngeseu er kid—kid el rokui—el nguu a ebangkelio er Ngii el mo dmolech er a chelsel a rengud.

Rodos me a rodam, tiang a meral ungil taem el de kiei er ngii. Sel doutkeu er a uchelel Oluut eng dirrek lungil a doutkeu er a melemolem el Oluut el kid a sioning er chelechang. Ak obengkemiu el ngara deureng er chelechal taem.1 A Rubak a melemolem el merech, el okiu a re profet er Ngii, aikel rokui el usbechall el kudmeklid el melai er Ngii.2

A tara ikal usbechall el tekoi a beches el tekoi lureor el mora Rengalek me a Reng. Betok er kemiu a medengelii tial prokuram el kudmokl a moktek, beches lolchotel a deseluk er ngii, me a ongdibel el Kirel a Klisichir a Rengeasek. Ng di diak kirel mochib osenged a uchul me a moktek osisechakl er tial prokuram: el olngeseu rulii ebangkelio er a Jesus Kristo el mo dmolech er a chelsel a rengrir a rengeleked me a rengeasek.3

Ak oumerang el sel bododengei aika el osisechakl el mo bleketakl, e kid a mesang el diak dil prokuram er a rechedal a ikelesia el rekrir a eai el mora teruich me a eai. Kid a mo mesang el uase ng mekera Rubak e melasm lolngeseu er kid—kid el rokui—el nguu a ebangkelio er Ngii el mo dmolech er a rengud. Nglunguchek me a Chedaol Reng lengesukid el dmak el mesuub.

Deleuill—“Bom Teloi er Tir”4

A kot el osisechakl a deleuill. Tir el kmal meklou a ultutelir el telengtengil a Ikelesia er a Jesus Kristo, a bebil er a taem e kid obes ra klou el belkul a deleuill el kirel a omerolled el mo er a Kristo. Kid a diak dorael er a rolel a telbiil el di kid eltang. Kede ousbech er a beltikereng me a ngesou er a rechedam me a rechedil, rechad er a telungalek, resechelei, me a roungerachel el dirrek el ngara tial rael.

Aikaikid el teletael er a deleuill ousbech a taem. Taem el dedak. Taem el dedak el ocherchur, milil, mesuub, e mesiou. Taem ra omereng el saul er a ringel el kirel a ta me a tang. Taem el debleketakl el mora ta me a tang sel dolasm el dmak el merael mo ungil. Aika el deleuill a tara bebil er a kot el moktek er a omengideb el telungalek, chelechad, klas, me a seked. Ngii a dodai er a ungil osisechakl.5

A Elder Dale G. Renlund a milskid a kiis el mo omuchel aika el deleuill sera ledu el kmo: “A uchul e kid mo ungil mesiou er a ta me a tang eng kired lomes er tir … er a osengel a Chedam er a Babeluades. Seikid e kid a kmal mo ungil medengelii a klou el ultutelel a chad. E seikid e kid a melchesuar a beltikereng er a Chedam er a Babeluades el mo er a rokui el Rengelekel.”6

A domes er a rebebil el uaia Dios a sengk. A kulengit er kid rokui el mo osiik er tial sengk. Sel lobok osenged,7 e kid a dirrek el sebeched el ngosuterir a rebebil el mo omes er tir el uaia Dios.8 A President Henry B. Eyring a ulmeketakl er a klisichel tiang sera lolekoi el kmo: “Sel kot el klou a ultutelel aikel lesuub a [rebebil] er [kau] el kirel a kmo te kmal techang e sebechir el mo ngerang. A kumdasu e tia diak bol suebii er a mekemanget el cheldecheduch. Te mo suebii lokiu a omelchesiu el kmo ke techang, e ngera uldesuem er tir, e omdasu el kmo ng sebechir el mo techang.”9 Olngeseu er a rebebil el mo medengei el kmo te techang me a moktek er tir a ta er a kot el klou el sengch el sebeched el mesterir.10 Mesterir a rebebil me kid el uai a Dios a odak a rengud “el di mo tang er a beltik el reng.”11

A di mengisois el mesisiich el teletael mengurs er kid, ekid ousbech a klisiich el mengai er a ungil deleuill. Sel dosaod omilil, miting, me a bebil er a ongdibel, e dolatk er sel ngarbab el moktek er a ikal ongdibel a mo olkes a deleuill el ngii a oldak er kid e nguu a ebangkelio er a Jesus Kristo el mo dmolech er a chelsel a rengud.12

A chedaol locholt, Mimokl el Melilt, me a Ouchel reng a—“Omak er Tir el mo er a Babeluades”13

Uaisei, ng diak el klebech a di bo dedak. Ng betok a chelchad me a cheldebechel el dmak el kakerous a moktek er ngii. Ng di a kaukledem el dosiik er ngii a sel bo dechimong el ngara Kristo, el omak er kid el mo er Ngii.14 Mo omak a rengud el mo er a babeluades, e kede ousbech a chedaol teletael er a ta el chad, el Elder Andersen a dirk milngedecheduch el kirel el merkid.15 Aikal chedaol tekoi a mei sel sekum a Chedaol Reng a ngmai a tekingel me a beltikereng er a Dios el locha er a uldesued me a rengud.16

Tial locholt a mei e rekid lokiu a chedaol llechukl, tokuni se el Babier er a Mormon; el okiu a ulekrael tekingir a rengar el re profet me a rebebil er a blak a rengrir loltirakl, e dirrek lokiu sel chelellakl, e kekerei el ngor.17 Aikal tekoi a klou a belkul ra di llechukl ra babier, oto er a daob er a dingad, me a uldasu el ngara uldesued me a rengud. A tekingel a Dios a chedaol klisiich.18 Ng klemerang me a llomes.19 Tiaikid a rolel e kid a Rongesii! Tia el tekoi a kilungii a klaumerang er kid er a Kristo e rullid el mo semeriar el mo uaia Osobel—el mo, ouchel a rengud e merael er a rolel a telbiil.20

Tial mlomerek el Ongeua el Buil, e a President Russell M. Nelson a mle ngosukid el mo medengelii a meral ngerchelel ouchel reng er tia el mla mocholt el omerael.21 Ng dilul kmo: “Sel dolilt el mo ouchel a rengud, e kede melilt el mengodech! Kede kongei er a Osobel el mo ngodechid el mo er sel kmal ungil kid. … Kid a melilt el mo uaia Jesus Kristo!”22 Tial teletael mengodech, lobengkel a tekingel a Dios, a omak er kid el mora babeluades.

Ngara cheungel a siotai er a President Nelson el mo ouchel a rengud a osisecheklel a mimokl el melilt. Ng kired el melilt a ouchel el reng el kired. A ebangkelio a diak el sebechel el oremelii el me er a chelsel a rengud. Uaike el dilung a Elder Renlund, “A moktek er a Demad er a Babeluades er a klaungalek a diak loruul er a Rengelekel mo meruul a llemalt; ng bai meruul er a Rengelekel mo melilt el mo meruul er a llemalt.”23

A ikel prokuram el mutechei er a Rengalek me a Rengeasek, e ng mlarngii a eim el dart el kakerous el tekoi el kirir el meruul e mo sebechir el ngmai a kakerous el nguked.24 Chelechal sils, eng di chimong a klou a belkul. Ng siotai el mo melilt el mo uaia Osobel. Kede meruul er tiang sel dengai a tekingel a Dios el okiu er a Chedaol Reng e kongei er a Kristo el mo melodech er kid el mo er sel kot el ungil blekerdeled.

Tia lmuut el ngarbab er a di moktek er a exercise a bedenged el mo ungil. A tekoi el soad el remuul a donguu el ngii a ngosukid el lomak er kid el mora babeluades lokiu chedaol locholt, mimokl el melilt, me a ouchel reng—el mei er a Kristo e nguu a ebangkelio er Ngii el mo dmolech er a rengud.

Oureor el kirel me a Mo Chuarm—“Bo Lomekrael”25

Ulebongel, sel uchul a ebangkelio er a Jesus Kristo a mo dmolech er a rengud, eng kired loureor el kirel— el chemoit a temed me a duch er kid, e mo chuarm.26 Kid el rokui el soad a ungil klengar, e tiang a kmal klemerang er chelechal telcheroll. Tir ousbech a moktek.

A ebangkelio er a Jesus Kristo a kot el ngarbab el moktek el ngara beluulechad. A President Ezra Taft Benson a dilung: “Kid a mla modurech er a Dios el mo nguu tial ebangkelio el mora beluulechad. Tiaikid a moktek loldak er kid er chelechal sils. Ng dital ebangkelio a osebelii a beluulechad er a kerior er a telmellel. Ng dital ebangkelio oldak er a rsechal [me a redil] er a rokui el beluu el mo metik er a budech. Ng dital ebangkelio a meskid a deureng, klungiaol, me a diak a ulebengelel klengar er a rokui el telungalek er a chad.”27

A Elder David A. Bednar a mle yaksok el uase: “A debsa klisichir a rengeasek el siotai e rulterir el mo ngara omeruul, e a Ikelesia omakes el bedul uchei er a mengasireng el teletael.”28 Kid a blechoel diak desiotai e diak debechititerir a rengeasek me bol chuarm el kirel tial klou urerel a Kristo. A Elder Neal A. Maxwell a ulemtab, “Alsekum a rengeasek er [kid] a diak bol meringel [meruul a urerel a Dios], eng klou a techellir el mo chemau a urerel a beluulechad.”29

A prokuram er a Remekekerei el ngalek me a Rengeasek a uldalem er a omelisiich er a rengeasek. Di tir el melilt a moktek er tir. A roungerachel a chelechad me a klas a mo ngara ikel ngerchelir. A ward council er a rengeasek, el di uaia ward council, a ureor kirel a mo suobel me a kiei el mo cherechar.30 Ea chelchad me a klas a omuchel a miting er tir el chadecheduch el uase te mekerang loruul a urerel a Dios el bla lengai.31

A President Nelson a millekoi er a rengeasek er a Ikelesia el kmo: “Alsekum komelilt, e somiu el mong, … eng sebechiu el mo tebedechel a klou, e meang, el kmo ngerang! … Kemiu a bebil er tirkel kmal lungil el Rubak a mla ngoiteterir el mei er a beluulechad. Ngarngii a duch er kemiu el mo mellomes e klou a mrellii er a beluulechad er a chelsel a ngii dil telcheroll!”32 A kuk mle tara ongdibel, e a President Nelson a dilu er a rengeasek el kmo: “Ak mui el oumera er kemiu. Betik a renguk er kemiu, me a Rubak meng uaisei. Kid a Chedal, el dmak loureor er tial chedaol Urerel.”33 Rengeasek el chad, ko melchesuar a klaumera er a President Nelson er kemiu me sel klou el ultuteliu er tial ureor?

Roungalek me a roungerachel, ak siotai er kemiu lomes er a rengeasek el uaia President Nelson. A rengeasek sel lolchesuar a beltikereng me a klaumera er kemiu, sel mongelechel e molisechakl er tir kirel omerredel—e sola bom cheroid er tir—ng mo mechas a rengmiu er tir er a llemesir, duch er tir, me a blakereng er tir ra ebangkelio.34 Tir a melchesuar a deureng sel lolilt el mo oureor e mo chuarm er tial klou el moktek er a Osobel. A ebangkelio a mo dmolech er a rengrir, e tial ureor a merael bedul luchei er a mengasireng el teletael.

Yaksok me a Klaumerang

Ak yaksok, el sel domdasu aika el osisechakl—e a deleuill, chedaol locholt, omelilt, ouchel reng, me a mo chuarm—e a ebangkelio er a Jesus Kristo a mo dmolech er a rengud el rokui. Kede mo mesang a Oluut el merael mo ruchei el mo er sel klou el moktek er ngii, el mo olsobel er a Israel me a okedecherul a Zion,35 el Kristo a mo merreder el King er a re king er ngii.

A kuuchais el uase a Dios a melemolem el meruul aikel rokui el kirel a kedmeklel a Rechedal er chelechal sils. Bo desa Chimal er tial ureor sel dolasm el rokui el “mo er a Kristo, e bo decherrungel er ngii.”36 El ngara a ngklel a Jesus Kristo, amen.

Uleklatk

  1. Mesa Doctrine and Covenants 45:12. A President Nelson a dilung: “Ka di momdasu er a klou el deureng me a rechedel rokui: el bek el profet lomuchel er a Adam a mla mesa tial sils er kid. Ma bek el profet a mla mesaod er tial sils er kid, el Israel a mo mekideb me a beluulechad a mo kldmokl el kirel Ongeru Lemei Osobel. Ka momtab er ngii! Chelsir a rokui el chad el mla kiei er a beluulechad e, kid a tirkel mo ngara chelsel sel ulebongel, el klou lomengideb. Ng diak el sal klebokel!” (“Hope of Israel” [ongdibel er a rengeasek er a beluulechad el rokir, June 3, 2018], HopeofIsrael.ChurchofJesusChrist.org).

    Elder Jeffrey R. Holland a ulisechakl:

    “Meral ungil taem el de ngar!

    “A ebangkelio er a Jesus Kristo a kot el bleketakl, e kot el selbechakl, kot el usbechall, me a dirrek el kot el ungil sengk er a klemerang er a beluulechad me a babeluades, er a taem el mo cherechar. Ng diak a ngerang—ngi di el ngerang, ngidi el chad, me a ngidi el omelodech—a mo merrob er tia el Ikelesia el meruul er sel moktek me a ultekllel el mildung er a uchei er a dodai er a beluulechad. … Ng diak a ultutelel a dakt me a lechub eng sebekreng el kirel a ngar medad el taem.

    “El ngodech er a bebil er a rak ruchei er kid, tia el uriul klebesei a diak bol ngara chelsel a klou el rebet; ng diak el bol lesa a rebetel a kisel a priesthood; ng diak el bol chuarm er a diak a ocholt er a ngerel a Kot el Mesisiich el Dios. … Meral ungil sils el de kiei!

    “… A lsekum e ng dirkak molchesuar, ak kuldubech el kirel a uriul el klebesei. … Moumerang. Bom dechor. Bo moba klaumerang. E mngai a ungil tekoi er a chelsel a klebokel el sils el de kiei er ngii! ” (Facebook post, May 27, 2015; dirrek mesa “Be Not Afraid, Only Believe” [address to Church Educational System religious educators, Feb. 6, 2015], broadcasts.ChurchofJesusChrist.org).

  2. Mesa Johanes 1:12.

  3. Kedeb el taem ruriul er a kimokedong el mo Young Men General Presidency, e a President Henry B. Eyring a milsaod lobengkemam a ringel me a techall el rengeasek er a Ikelesia chelebangel er chelechal sils. Ng millach er kid el mo omdasu aikel tekoi el mo nguu a ebangkelio er a Jesus Kristo el mo dmolech er a chelsel a rengud. Tial a tekoi a olangch er kemam a rengara Young Men Presidency.

  4. Mesa “Be with Them,” ChurchofJesusChrist.org/callings/aaronic-priesthood-quorums/my-calling/leader-instruction/be-with-them.

  5. Mesa Mosiah 18:25; Moroni 6:5.

  6. Dale G. Renlund, “Through God’s Eyes,” Liahona, Nov. 2015, 94; dirrek el mesa Moses 1:4–6.

    A President Thomas S. Monson a mle olisechakl: “Ngercheled el mesterir a dersta el chad er sel ngii a sebechir el mo uai ngii. A kulengit er kemiu me momes er tir tiakid el teletael” (“See Others as They May Become,” Liahona, Nov. 2012, 70).

    Elder Neal A. Maxwell ulisechakl: “Ng blechoel, iikrel a chad a diak loltirakl a teletael er a Ikelesia, a lechub a olengasechereng el keril, a lechub a rraureng er ngii a rullid el mo merritel er a chad. Tia sebechel rulii a chad el mor cheroid, e a bebil er a taem, eng diak soal teloi er kid. A meral beltikereng a diak lorritel!” (“Unto the Rising Generation,” Ensign, Apr. 1985, 9).

  7. Mesa 2 Kings 6:17.

  8. Stephen L. Richards, el chedal a First Presidency, a dilung, “A kot el ngar er bab el ulcholt a sel sekum e a rebebil a ocholt a ungil teletelir, sel meral ungil blekerdelir” (in Conference Report, Apr. 1950, 162; in David A. Bednar, “Quick to Observe,” Ensign, Dec. 2006, 35; Liahona, Dec. 2006, 19). Dirrek el mesa 2 Kings 6:17.

  9. Henry B. Eyring, “Teaching Is a Moral Act” (milngedecheduch er a Brigham Young University, Aug. 27, 1991), 3, speeches.byu.edu; smisichii a belkul; dirrek mesa Henry B. Eyring, “Help Them Aim High,” Liahona, Nov. 2012, 60–67.

  10. Mesa Moses 1:3–6.

  11. Mosiah 18:21; dirrek el mesa Moses 7:18.

  12. “A rengeasek el sechal el mesisiich, e ungil delongelir er a mesisiich el [Uriul-klebesei el Santo] el telugnalek, resechelei, me a roungerachel, a ngosuterir el mo ngara ungil deleuill lobengkel a Demerir er a Babeluades, a mo klou a techellir el melemolem el mesisiich. Tokubets el prokuram—el uaia Sunday curriculum, [Rengeasek el Sechal] prokuram er a ureor, me a ikel kired el meruul … a locha diak a klou el relii er a ikal deleuill. … A klou a belkul ker a kmo aikal telengtengil a prokuram ng mekera doltirakl, e mekerang a lteketekii a ungil deleuill el mo melisiich a klechelid er kid [Uriul-klebesei el Santo] rengeasek el sechal” (“Be with Them,” ChurchofJesusChrist.org/callings/aaronic-priesthood-quorums/my-calling/leader-instruction/be-with-them).

  13. Mesa “Connect Them with Heaven,” ChurchofJesusChrist.org/callings/aaronic-priesthood-quorums/my-calling/leader-instruction/connect-them-with-heaven.

  14. Mesa Johanes 15:1–5; 17:11; Philippians 4:13; 1 Johanes 2:6; Jakob 1:7; Omni 1:26; Moroni 10:32.

  15. A chedaol llechukl a mui er a okesiu; aikakid a erung: 1 Nephi 2:16; Enos 1:1–4.

  16. Mesa Lukas 24:32; 2 Nephi 33:1–2; Jakob 3:2; Moroni 8:26; Doctrine and Covenants 8:2–3.

  17. Mesa 2 Timoti 3:15–16; Doctrine and Covenants 68:3–4; 88:66; 113:10.

  18. Mesa 1 Thesalonika 1:5; Alma 26:13; 31:5; Helaman 3:29; 5:17; Doctrine and Covenants 21:4–6; 42:61; 43:8–10; 50:17–22; 68:4.

  19. Mesa Johanes 6:63; 17:17; Alma 5:7; Doctrine and Covenants 84:43–45; 88:66; 93:36.

  20. Mesa Johanes 15:3; 1 Petrus 1:23; Mosiah 1:5; Alma 5:7, 11–13; 32:28, 41–42; 36:26; 62:45; Helaman 14:13.

  21. Mesa 2 Nephi 31:19–21; 32:3, 5.

  22. Russell M. Nelson, “Ng Sebeched el Meruul a Ungil e Mo Ungil,” Liahona, May 2019, 67.

  23. Dale G. Renlund, “Mngiltau er Chelecha el Sils,” Liahona, Nov. 2018, 104.

  24. Tial ochur a uldimukl aikel kirel ruoll e ra prokuram er a Scouting, el dirrek el mle telengtengil a prokuram er a Ikelesia el mora rsechal me a rengeasek el sechal, tokuni chelsel a Beluu er a Merikel me a Canada. Aikal basio el dimlak a Scouting er ngii, aikel iidisel a kirel ruoll a mle engelakl er a erul dart. Osisiu, a kakerous lomeruul el mora rsechal, redil, ngeasek el sechal, me a ngeasek el redil a milkedmokl el kakerous, el rulii tial teletael el mo meringel er a telungalek.

  25. Mesa “Let Them Lead,” ChurchofJesusChrist.org/callings/aaronic-priesthood-quorums/my-calling/leader-instruction/let-them-lead.

  26. Mesa Omni 1:26; 3 Nephi 9:20; 12:19; Doctrine and Covenants 64:34. “A klechelid el diak bol chuarm er a rokui el tekoi a diak a klisichel el mekdebechii a klaumerang el mo olsobel a klengar” (Lectures on Faith [1985], 69).

  27. Ezra Taft Benson, The Teachings of Ezra Taft Benson (1988), 167; in Preach My Gospel: A Guide to Missionary Service (2019), 13; see also Russell M. Nelson, “Hope of Israel,” HopeofIsrael.ChurchofJesusChrist.org.

  28. Miting lobengkel a Elder David A. Bednar; dirrek mesa “2020 Temple and Family History Leadership Instruction,” Feb. 27, 2020, ChurchofJesusChrist.org/family-history.

  29. Neal A. Maxwell, “Unto the Rising Generation,” 11. Elder Maxwell a millemolem: “Te telang, el oungerachel er a deacon me a resensei a di domekedong er tir el mo meluluuch malechub ete di merous er a sacrament? Rodam, tirka meral tokubets el reng, e sebechir remuul a meklou el tekoi a besterir a techall!”

  30. Mesa General Handbook: Serving in The Church of Jesus Christ of Latter-day Saints, 2.2, ChurchofJesusChrist.org.

  31. A bebil er a usbechall a debetik er a Gospel Library el olengeseu er a rengeasek el mengedereder, uldimukl “Quorum and Class Presidency Resources,” “Using Come, Follow Me—For Aaronic Priesthood Quorums and Young Women Classes,” me a usbechall el mora klass er a Young Women me a chelechad er a Aaronic Priesthood er a chelsel a “ Okedong er a Ward malechub a Branch.”

  32. Russell M. Nelson, “Hope of Israel,” HopeofIsrael.ChurchofJesusChrist.org. Tiaikid el osisiu el ongdibel, a President Nelson a dilu el kmo: “A Demad er a Babeluades a mla mengeluolu er a betok er tirkel ngellitel el Ngelekel—el sebechek uase, tirkel ngellitel el tim er Ngii—el kirel tial ulebongel lureor. Tirkal chetengakl el reng—tirkel kmal meduch lousekool, tirkel mesisiich—a kemiu!”

  33. Russell M. Nelson, opening remarks in “Children and Youth: A Face to Face Event with Elder Gerrit W. Gong,” Nov. 17, 2019, broadcasts.ChurchofJesusChrist.org.

  34. President Nelson a millekoi: “Ng kired el mechiteterir a rengeasek me toungerachel, oumesingd tirkel mla mokedong e moterekokl el merredel a klas me a chelechad. A ngerachel er a priesthood a mo modars el mo er tir. Te mo mesuub el melai chedaol ocholt sel loungerachel a klas me a chelechad er tir” (er a “Children and Youth Introductory Video Presentation,” Sept. 29, 2019, ChurchofJesusChrist.org).

    Elder Quentin L. Cook a millekoi, “A rengeasek el ngeleked a mla nguu a klou el ngerachel er chelechal mekekekerei—el rechedam me a rechedil me a roungerachel a diak loruul aikel sebechir a rengeasek el meruul” (“Adjustments to Strengthen Youth,” Liahona, Nov. 2019, 40).

  35. A President George Q. Cannon a ulisechakl: “A Dios a ulematek er a rengelekel el kirel tial uriul klebebesi el ngarngii dechal a rengrir me a blakelreng er tir el mo chemau a beluulechad, me a ikel rokui el klisichel ngkel mekngit, a lesang me a lak el lesang, el mo ouchais er a ebangkelio e lobang a klemerang e mo muchelii e toketekii a Zion er a Dios er kid el diak el medakt er a ikel mo duubech er a uriul. Ngii a mla odureklii tirkal el rengelekel er tial telcheroll el mo rulii a dodai er a Zion el diak luut el mo mechitechut, e mo omekeroul a tane el mo ngara llemalt, e mo oldanges er a Dios, e mo menguul er Ngii loba ngarbab omeruul, e mo oltirakl er Ngii er a ikel rokui el tekoi el loruul” (“Remarks,” Deseret News, May 31, 1866, 203); dirrek mesa Teachings of Presidents of the Church: Joseph Smith (2007), 186.

  36. Moroni 10:32.