Mesisiich el Dodai el Kirel a Ngarmedad el Taem
Er a aika el merael mei el rak, mei e de kongei er a aikal ungil omeleketek a Templo er a Salt Lake el mo mesebechakl e omekellomes er a kid.
Reksi er a Templo er a Salt Lake
Ka domes el bedul sel mle mekeald el sueleb a sils er a July 24, 1847 er a ngara eru el klok er a ieta sils. Al blol merek sel meringel el dart me a teruich me a tal klebesei lomerael er a redart me a okeua me a teai el chedal a Ikelesia el milchelii sel kot lomerael bedul ngebard, e a Brigham Young, el mle Merredel er a Chelechad er a Teruich me a terung el Apostol, a kmal mle smecher er a tereter e mechitechut a bedengel, a kol mocha soiseb er a Salt Lake Valley.
Erul klebesei ruriul, er a bocha lungil er tial tereter, e a Brigham Young a ngiltiterir a rebebil er a Rechedal a Teruich me a terung el Apostol me a rebebil er a rechad e ulemais lomes er tial basio. A William Clayton a milluches el kmo, “Ng kmeed el edei mael er a diluches a cheridel er tial ki bla er ngii, e a ki korda er a klebokel loberberk el basio, el kmal loberberk el bedul ngebard.”1
Sera lobengterir tirkal chad lomes er tial basio, e a Brigham Young a di mle kiul mo dechor e nguu a skersel dolmeklii er a chutem, e kmo, “Tiakid a bol dechor ngii a Templo er a Dios er kid.” A tara ulebengkel chad a mle Elder Wilford Woodruff, el dilu el kmo tia el tekoi ledilii a “siliseb er [ngii] el uaia bisebusech,” e ngii a ngiluu a rechelel a kerrekar dolmeklii er a chutem lolengchelel a basio el President Young a dilmeklii a skersel er ngii. Okeua el acre (16 ha) a klungel chutem a miltutk el kirel a templo, e mloterekokl el kmo a beluu a mo dechor el “mo bedul a Diluches &Dimes, ongos &ngebard” e a templo mo dechor er a belengel.2
Sera klou el ongdibel er a Ongeua el buil er a 1851, e a rechedal a Ikelesia a mle sengkio el kongei er a uldasu er a okedecherul a templo el mo “ngara ngklel a Rubak.”3 Erul rak ruriul, er sera February 14, 1853, e tia el basio a lulterkeklii a Heber C. Kimball er a ongdibel buai el mlar ngii a retal telael el Santo, e a chutem a mlekiis el kirel a dodai er a templo. Sesei el buil ruriul, er a April 6, e a ikel meklou el saus er a templo a milteketek e mloterekokl lobengkel a klebokel el seked er a rechad luldimukl er a kakerous a iiro er a bilir el chad me a band me a omerael lobengterir a remengeteklel a ikelesia er a recheuodel el mo er tial basio er a beches el templo, el cheldecheduch me a nglunguuch a mildung er a ikel kleua el saus er a templo.4
Sel sils er a omengiis el chutem, e a President Young a dilbedebekii a ues le ngiluu er a lekot el sorechii tial basio er a lorael lomes er a chetemel tia el basio, e melekoi el kmo, “Ak mle medengei [risei] el uai chelechang el kudengei, el kmo tiaikid a basio el mo dechor ngii a templo—tia di bla kudengelii er medak.”5
Teruich el rak el ruriul, e a Brigham Young a ulechotii tiakid lulaoch er sera klou el ongdibel er a October 1863: “Ng soak el mesa teletelel okedecherul [tial] templo el mo sebechel dechor el meketeket el rak. Tia diak di el chimo el templo el domekedechor ngii; ng mo betok el domekedechor e oterekokl el mo er a Rubak. Tia el templo a mo merael chisel el kot el templo el dechor er a rois lokiu a Uriul-klebesei el Santo. … Ng soak tial templo a bol dechor er a rois … lolchotel a klaumerang, duchelreng me a rechituuk el Santo er a Dios.”6
A omesubek er tia el kedeb el reksi a rullak el mo mechas a renguk er a ulochel a Brigham Young—a kot, e sel bleketakl, lomelkingel el kirel, okedecherul tial templo lultuil er a klekedall el mla er ngii er sel taem, el Salt Lake Templo a mo melemolem el dechor el Telael rak e a, ongerung, sel ulochel el kirel a templo el mo dechor medad el taem, el mo ngara derdart a iidisel.
Ureor Lomekbeches er a Templo er a Salt Lake
Me te uaia Brigham Young, ea reprofet er kid er chelechal sils a kerekikl er a Salt Lake Templo me ikel bebil er a templo. Chelsel aika el mereko el rak, e a First Presidency a, bek el taem, longelechel er a Presiding Bishopric me bol kerekikl el kmo a dodai er a Salt Lake Temple a melemolem el mesisiich. Sera kusiou el ngara Presiding Bishopric, e a First Presidency ulengit, me ki bo mungil mesang e ki mtirterii a Salt Lake Templo, luldimukl aike el beches el teletael me a lecheklel omkedecheraol.
Aikakid a bebil er a ikel ues a First Presidency er a seikid el taem: “A ketengel ma omekdechor a Templo er a Salt Lake, a kot el ungil teketekel, dachelbai, klekedelel a omeruul blai, dertelkib ma bekbedengel a mlarengii er a kid a uluusbech. Sera lemoterekokl er 1893, e tial templo a kmal dirk mesisiich el dechor lolengchelel a klaumerang [me a] urungulir me a llomes el mo er a rechad. Klou el ureor a mla mekedmokl el kirel orretel, klebekelel, me a kedmeklel tial templo meng di ungil. A smentel a ikrel me a ulaol er a chelsel me a chelseklel a kmal dirk ungil e mesisiich. A dirk mlarngii lomesuub a oterkeklii el kmo tial basio lengileltii a Brigham Young el mo dechor ngii a templo a kmal ungil a chetemel e dirrek lungil lulsarch a chetemel.”8
Tial omerritel a mlo oterkeklii el kmo ng beot lureor a mle usbechall el mo omekbeches e smisichii a templo, luldimukl aikel lultobed er a ikrel a blai me a bebul, me a mechetong el rua seng me a baeb, me a blil a techolb. Eng di, a ki dirrek luluchais el kirel a klou el ureor el mo omekbeches er a dodai er a templo lomuchel er eou el mo er bab.
Dodai er a Templo
Ko medengei el kmo, a President Brigham Young a mle klou a urerel er a ikel komakai lokedecherul a dodai er sel mle kot el templo, el mla oltekau er a templo er sera bol merek er a dart me a lluich me a euid el rak ra memong el mei er a chelechang. Tial beches luldasu el mo omekbeches er a templo el rokir a mo ousbech a ileakl el klekedall, el ngii a dimlak lomtab el kirel er sel taem er a okedecherul. Tia sel kot el beches, el teletael er chelechal taem er a omekedecheraol lomecheliu a taem er a desiu.
Tial klekedall, el kmal dirk mlo er ngii, a omuchel er sel dodai er a templo, el melisiich er ngii meng diak el metemall er a desiu. Ng belkul a kmo, ng kmal smisichii a templo meng dechor el mesisiich, luldimukl a bo longitengtik cheungel a chutem el dechor ngii a le bo er ngii a desiu.
A urerel a templo el mo ousbech er tiaikid el beches el klekedall a mluchais er a First Presidency er tial mlo merek el rak. Ngokiu a dereder er a Presiding Bishopric e a ureor a ulemuchel er a sesei el buil er a memong, er sera Kot el buil er a 2020. Ke de omdasu el kmo ng momerek a urerel er a locha chelsel eua el rak.
Mo Ungil Toketekii a Dodai er a Klengar Kau
Sel kulatk el kirel aika el merael mei leua el rak ra klengar tial klebokel, chetengakl, meang, e mechas a rengud er ngii el Salt Lake Templo, e a kumes er ngii el taem er a omekbeches ng diak el taem er a rokiolel! Chelsel osisiu el teletael, eng sebeched loker kid, “Ng mekera tial meringel urerel a Salt Lake Templo a lokrolid el bedul chedaol klengar el domekbeches, lmuut lomekedechor, lmuut el cheroll, lmuut el mo mesisiich, a lechub e kede lmuut lobult?”
A bo dungil lomtab eng sebechel mocholt er kid el kmo kid me a telungalek er kid a dirrek lousbech el mo omekbeches e sumechokl a klengar kid, luldimukl a di de telkib el ngoriakl! Ng locha sebeched lomuchel er tial teletael loker:
“Ngua ngera teletelel a dodai er ngak?”
“Ngera ikel okrokr, mesisiich, el saus el ngii a telengtengil a dodai er a klengar ngak, el klaumera er ngak a ulsirs er ngii?”
“Ngera ikel klisichel a dodai er a chedaol klechad er ngak el ngosukak me a telungalek er ngak el mo mesisiich e diak ki mesim, el sebecham lotekau aikel ringel me a kerior el ngii a mo duubech er a klengar kemam?”
A tekoi el kmeed el uaia rua desiu a meringel el bo dodengei temel e mei el kakerous a klisichel—a bebil a rraureng me a klaumededenger, ringel me a kerior el bo dechebangel, terded er a remengeteklel a Ikelesia, rechedal a Ikelesia, osisechakl, a lechub a llach. Sel kot el bedochel el sebechekled er a ikang a ultuil er a mesisiich el dodai er kid er a chedaol tekoi.
Ng locha ngera ikel chedaol tekeklel a klechad er kid me a telungalek er kid? Ng locha sebechel ikel beot, bleketakl, e mekreos el osisechakl er a ebangkelio—nglunguuch er a telungalek, omesubel chedaol llechukl, Babier er a Mormon, bised el mo er a templo, me a omesubed er a ebangkelio lokiu sel hong el Mei, Moltirakl er Ngak me a ongdibel er a telungalek. A dirrek el bebil er a bedochel el ngesou el mo smisichii a tekeklel a chedaol klengar kau a sebechel luldimukl er ngii a Tebechelel a Klaumerang, me sel chais el mo er a telungalek, me a “Ngar el Kristo.”
A denguu er ngak, e a ikal osisechakl a uldimukl er ngii aikel ker sel bo dolai a babier er a mo er a templo el ngii a kmal sebechel tekeklel a chedaol klengar kid—tokuni aikel kot el kleua el ker. Ak mes el chedaol dodai er a klengar.
Ng meral tekoi, el dodengei aika el ker, el President Russell M. Nelson a chiluiu el mei er kid er tial mlomerek el klou el ongdibel.
-
Ngar er ngii a klaumerang er kau er ngii me a olchotel a klaumerang er a Dios, el Diak a Ulebengelel Chedam; Ngelekel, el Jesus Kristo; me a Chedaol Reng?
siasing/LlecheklelBdelul a Kledios -
Ngar er ngii a olchotel a klaumerang er kau er a Tngakireng er a Jesus Kristo me a Urerel el Osobelem e Olsobel?
siasing/LlecheklelTngakireng er a Jesus Kristo -
Ngar er ngii a olchotel a klaumerang er kau er a Olutel ebangkelio er a Jesus Kristo?
siasing/LlecheklelOltel -
Ke oldubech er a Merredel er a Ikelesia er a Jesus Kristo er a Uriul-klebesei el Santo el profet, chad er a ues, me a ocholt e di chimo el chad el nga er a beluulechad el loba ngerachel el kirel a ike el rokui el kiis er a priesthood?9
siasing/LlecheklelReprofet
Ko mesa el kmo ng mekera ika el ker e sebechel meklou a ultutelel kirel a dodai er a klengar kemiu e ngosukemiu el toketekii e smisichii? A Paulus a ulisechakl er a rechad er a Efesus el kirel a ikelesia el “dilechor er a dodai er a reapostol me a reprofet, el Jesus Kristo a ngii a kot el saus; el rokui el klekedellel a kmal tabesul e chatter e dmak el mukeroul el mo templo er a Rubak.”10
A tara kot el ngarbab el deureng er a klengar ngak a sel bok teloi e kmukrael er a rechedal a Ikelesia er a beluulechad el rokir el tir a okesiu er a klaumerang er a Jesus Kristo me a ebangkelio er Ngii. Ng mesisiich a uchelel a klengar tir el mle ngosukir el mo mesisiich er a desiu el tekoi el oba melmalt el sekutab, e dimlak el ultuil er a klengit el reng ma ringel.
A ungil lolchotel tiang er a klechad er kid, e a kdirk milngedecheduch er a kemeldillel a klebokel, mesisiich a bedengel, ngeasek el bechiil redil e chedil (dirrek el sechelei er a telungalek er kemam). Ng mle chedal a klekool er a soccer el tiaikid el taem eng miltik er a bechil el mle ngalek er a skuul el mesuub el mo toktang er a uingel. Te mlo ngletengat el milchelii a klebokel, el mekreos el ngelekir redil. Ng silecher er a meringel el secherel a kasinoma el kmeed lelomel el rak. Meng diak el iior er a ikel blechoel ringel el ngii a siliseb er a chelsel, leng mle ultuil er a Chedam er a Babeluades me a resechelil a mle blechoel melekoi er ngii er a social media el kirel tiakid el tekingel: “Dios a medengei a bek el telengtengil a klengar.”
A tara tekingel er a social media eng milluches el kirel a tal chad luleker ngii el kmo, “Ke mekera e dirk kurrekodel er a klaumerang er a chelsel aikal betok el ringel el mchelebangel?” Ngulenger er a ikakid el tekoi: “Le klaumerang a ngii a sobecheklak er a chelsel aika el meringel el taem. A lengarngii a klaumera er kau eng diak el belkul a kmo ng diak a mekngit el duubech el kirem. A klaumerang a ngosukak el mo medengei el kmo ngarngii a klungiaol ruriul. E tial llomes a mo dmiich el klungiaol le ak mla soiseb er a iilkolk. Me a iilkolk el bla ksiseb er ngii er a ika el mereko el rak, e ak dirrek el mla mes a betok el klungiaol. Ak mla mes ongasireng el tekoi. AK mla omelchesiu er a reanghel. Ak medengei el kmo a Demak er a Babeluades a ultekau er ngak. Ng diak a tara ikang el blo kudengei omko klengar a mlo beot. Ng diak kudengelii a ngara medak el taem, eng di a klaumera er ngak a diak el mengodech. A kulilt el mo diak a klaumera er ngak eng uaia kulilt el mo merael er a ilkolk. Le a lak a klaumerang, eng di ilkolk a medechel.”11
A diak el mesim el klaumera er ngii er a Rubak el Jesus Kristo—lokiu omelkingel me a omerellel—a ulemekrael er a rebebil. A bedengel a locha mle mechitechut, eng di ngii a ngilsuterir a rebebil el mo mesisiich.
Ak omdasu el kirir a rebetok el chedal a Ikelesia, el uai ngkal sister el bekeu, el kiei er a bek el sils lultuil er a klaumerang, e melasm el mo mui loltirakl e diak el medakt el chedal a Osobeled, el Jesus Kristo. Te mesuub el kirel a Kristo. Te olisechakl el kirel a Kristo. Te melasm lemekesiu er tir er Ngii. Ng diak el iior er a kmo a bek el sils er a klengar tir ng di ungil a lechub eng diak, a dodai er tir a mesisiich e diak el mesim.
Tirkakid tirkei el kmal mle ungil medenglii a meral belkul a tekingel a chelitakl “Klisichel a nglaos, kemiu el santos er a Rubak” ma “Techa mo er a omrotel er a Osobel”11 A kmal ulis el mereng a saul el teloi er tirkel mla toketekii a chedaol dodai er a ngakl el Santoel mesisiich e diak el mesim er a ikel ses el eolt er a klengar.
A kumdasu eng diak a ngodech el msodii a klou el ultutelel tia el mesisiich el teketekel a klengar kid. Ng dirrek el mekekerei el ngeleked, er a Primary a mla mosisechakl sel longitakl er tiakid el klemera el tekoi:
A mellomes a rengul chad a tilketekii a blil er bebul a bad,
Eng miltengel a chull el mei er eou. …
Ng miltengel a chull me a baoch, a mirrael el mei er bab,
E a blai el dilechor bebul a bad a dimlak el mukel.12
A chedaol llechukl a smisichii tiaikid el dodai er a osisechakl. A Osobel a ulisechakl er a rechad el mla er a Beluu er a Merikel:
“Sel bo blechoel meruul aika el tekoi e ko mo ngeltengat, le kemiu el dechor er a dodai er ngak.
“E ng di ngike el kosadel malechub eng dochel aikang a diak el dechor er a dodai er ngak,ng bai dechor er a bebul a chelechol; me a lemetengel a chull, e lemei a iieleb, me a eolt bol meses, el subechii er tir, e te mukel.”14
Ng kmal urungulir a remengeteklel a Ikelesia me a ureor el mo omekbeches er a Salt Lake Templo bol lotireklii a urungulel a Brigham Young el mo mesa “templo el mo dechor el melemolem el telael rak.” Me a ikal merael mei el rak, e bol sebechel aikal ureor el mo omekbeches er a Salt Lake Templo bo lomekrael er kid, a dersta el chad me a telungalek, me bol sebeched el dirrek—el mo uaia—“dolemolem el dechor el telael rak.”
Ng sebeched el mo uaisei a lsekum e ke de otireklii a tekingel a Apostol Paulus el “[toketekii] a klengar [kid] er a ungil dodai er a taem el merael mei, me [bo] denguu a diak a ulebengelel klengar.”15 Ng meral nglunguchek me a chedaol dodai er a klengar kid bol mesisiich, me a klaumera er kid er a Tngakireng er a Jesus Kristo me a Urerel el Osobeled e Olsobel er kid bol kot el saus er a klengar kid, e ngak a ouchais el obang a ngklel, el Jesus Kristo, boluaisei.