Kot el Ungil Blai
A Osobel a kot el meduch el meleketek, omekedechur, e omesiich er kid. A urerel a sel cherrungel me a diak a ulebengelel deureng el mo er a rengud.
A tekoi el mle llechukl er a rael er a Salt Lake a tilab osengek er ngii. Ng melekoi el kirel a klalou me a besiich er a chelsel a blai loruul a kombalii. Ng dmu el kmo, “Mesiou Aikel Kot Lungil Blai er a Salt Lake City.”
Ng mle melemlim a renguk er tial tekoi—ngera “kot lungil blai”? Ak mlo omdasou er tial ker, e melbedebek er a rengalek el bechik, er a Kathy, me ngak a mla omekeroul er tir me a rengelekir el tir omekeroul er tir er chelechal sils. Aki uaia roungalk er a ngii dil ker, el bekikl e meluluuch el kirel a telungalek er kemam. E dirk uaisei. Ng kmal somam a bo lungil a klengar tir. Te mekerang tir me a rengelekir e mo kiei er a kot el ungil blai. Ak mo omtab a blirir a rechedal a Ikelesia el Kathy me a ngak a mla ngarngii a techellam loldingel. Aki mla oldingel obliil er a Korea me a Kenya, me a Huriping me a Peru, me a Laos me a Latvia. Msall e kuuchais euang el ultebengek er a ikal blai.
A kot, a denguu er a osengel a Rubak, a kedmeklel a kot el ungil blai a ultuil er a blekerdelir a rechad el kiei er ngii. Aikal blai a diak el ruul el kmal tokubets a teletelel a lechub el betok a meringel chad el klalou a lechub el meringel a cheral a lechub el blirir a rengarbab a deruchellir el chad. A kmal ungil teletelel a ngiidil blai a sel desa siasing er a Kristo el ngara rechad el kiei er a chelsel. Sel kmal klou a ultutelel a chodechulir a rechad el tir a kiei er a chelsel, ng diak el tial omekedecheraol.
A blekerdelel a Kristo a mengai er a “cherengel a taem”1 lokiu a blakereng e melemolem el ngara rolel a telbiil. A blekerdelel a Kristo a mekreos er a chelsel a klengar er tirkel melasm el kiei ngara klungiaol. Te mekekii a blirir loba llomes er a ebangkelio, a lechutem a ulolel malechub eng sment. A dil kau el tang el kiei er a blim eng dirrek el sebechem loltirakl sel “mosiik aikal tekoi,”2 eng sebechel mo uchul chedaol besichel a blim.
Kid a oltirakl a tekingel a Rubak el mo “mesmechokl [er kid]; e kudmokl aikel bek el usbechall; a toketekii a blai” el mo sumechokl, kudmokl, e toketekii a chedaol klengar kid, ng diak el klokled. Sel klou a rengud e doltirakl er a rolel a Osobel er a telbiil, e a rekeblid a mo “blai er a klebkall, e chelderoder el blai, [me a dirrek el] blil a Dios.2
Ongerung, a rechad el kiei er a kot el ungil blai a ngarngii a temir el menguiu chedaol llechukl me a tekingir a rengar el profet er a bek el sils. A President Russell M. Nelson a mla siotai er kid el mo “mult” e “omekbeches” a rekeblid lokiu omesubel ebangkelio.3 A siotai er ngii a kmo a kot el ungil blai a uderuul, a meklou a belkul ulkeruled e melisiich aikel chelitechetud. Ouchel reng er a bek el sils a dongu el ngosukid el mukeroul el mo telkib el bekokuii, mui er a beltikereng, me a ungil klemedengei. A omesubel chedaol llechukl a ngoikid el mo kmeed er a Osobel, el chubechub me a krazia er ngii a ngosukid el mukeroul.
A Biblia, Babier er a Mormon, me a Pearl of Great Price a ouchais a cheldecheduch er a telungalek, meng diak el mechas a rengud er a ikal chedaol hong a lolngeseu el meleketek a kot el ungil blai. Ngellechukl er ngii a nglunguchir a rechedam me a rechedil, kengaol er a ongetikaik, me a klisichel a llemalt, me a ringel er a bosech me a klungiaol, me a kngtil a mekemad me a klungiolel a budech. Ng blelekl er a chelsel chedaol llechukl lochotii er kid el kmo ng mekera telungalek a lengoriakl sel kiei er a melemalt el klengar e kuk mekera lsiseb er a kerior sel bora ngodech el rael.
Ongedei, a kot el ungil blai oltirakl er a lecheklel a Rubak er a kot el ungil Blil, el templo. Okedecherul a templo omuchel er a ikel beot el teletelel—el metemotem a basio e oberk a chutem. Aikal uchelel a ureor el kudmeklii a chutem a sebeched lomekesiu el mora otirekled e ra beot el llach. A otirekled er a llach a ngii a dodai el deteketekii a klengar kid el mo oltirakl. A diak el mesim loltirakl a mekrolid el mo mesisiich, el dechor, e diak demesim, 4el ua deel el chelseklel a templo. A mesisiich el tekekled a uchul e a Rubak a mo odureklii Chedaol Reng er Ngii el mo mult a rengud.5 Sel desiseb er a mesisiich el ngeldechel a rengud eng uaia dolechel a klebokel besiich er a cheslel a templo.
Sel dolemolem el ngara klaumerang, e a Rubak a mekekokil melodech er kid. Kid a mo oba Osengel er a medad e mo omuchel loba beltikereng me a Klebekelel.6 Sel dorael mo uai Ngii, e kid omelchesiu el ngara Blil, e Ngii a mo omelchesiu el ngara blid.
Ng sebeched lomak a rekeblid el mora Blil sel denguu e deblechoel lousbech er a babier er a mora templo alsekum eng sebeched el mong er a ngidi el taem el sebeched. Sel doruul uaisei, e a chedolel a blil a Rubak a dirrek el mora rekeblid.
A klebokel el Salt Lake Temple a dechor er bitang. Te milkedecherur a ruchelel a ikelesia lolab a beot el klekedall, ikel mle sebechir el metik, e mle meringel lourreor, eng mlo sebechel a templo el mo dechor er sera 1853 el mo 1893. A kot el ungil teletael er a omekedecheraol, me a kldaiksang, me a besisiich er a chelsel lulusbech a ruchelel a Ikelesia a tilketekii a klebokel el blai el million el chad a chemat er ngii.
Ng kmeed el dart me a okedei el rak er a memong er a lemoterekokl tial templo. Di ua dilu Elder Gary E. Stevenson er a elii, a teletelel a omeruul blai el blel ousbech el omkedor a templo a mla mo diak el osbech e kuk okiu a beches el omeruul. Alsekum eng diak el mekedmokl aikel mla mo mechut el klekedelel tial templo e kid a tomelii sel klaumerang er a ruchelel, el tir a mle meringel loureor e milcherei a kedmeklel a templo el mora merael mei el telcheroll.
A Ikelesia a mla omuchel er a eua el rak lureor el mo omekbeches okedecherul a klisichel tia el templo.7 A dodai, ulolel, me a kbekbel a mo mesisiich. A kot el ungil klemedengei er a omekedecheraol el ngarngii er chelechal sils a mo rulii tial templo el mo beches. Ng diak el sebeched el mesa teletelel okedechrul tiang, eng di uriul e kid a mes el merang e meklou a belkul. Aikal rokui el urerel, e a besichel a chelsel tial klebokel templo a di doreked.
Ng kired loltirakl er a okesiu el beskid a omekbeches er a Salt Lake Temple e chemoit a temed el merritel a klengar kid er a chedaol teketekel a klengar kid meng di melemolem el beches. Sel deblechoel merritel er kid, el dirrek loker er a Rubak el kmo, “Ngera dirk kengesonges er ngak?”8a sebechel ngosukid el toketek a ungil rekeblid.
Ongeuang, a kot el ungil blai a olsechall el omrotel er kid er a ses el eolt er a klengar. A Rubak a mla yaksok el kmo tirkel oltirakl a llechul a Dios a “mo selbechakl er a beluu.”9 A rengelekel a Dios oba klisiich el mo omakes el bedul uchei el diak el iior er a mondai er a klengar.
Sera 2002 ak silubii a klou a belkul suobel kirel a mondai. Sera kngara Asunción, Paraguay, ak mlo kebetech ngak me a remerredel a stake er a beluu. Tiaikid el taem, e a Paraguay a mle chebuul er a udoud, e betok el chedal a Ikelesia a mlo chebuul a delengcheklir. Ng meketeketang el diak bora South America er a bok merek er a mission e dirkak a tal kbora Paraguay. Ng dirk sesei el sandei el kchedal a Area Presidency. Ak mle telkib el metitur ngii el tekoi lomekrael er tirkal merredel a stake, me a kuleker tir me louchais er ngak aikel di mle ungil besul tekoi er a stake er tir. A kot el merredel er a stake a uluchais er ngak aikel ungil besul tekoi. A ongerung a uluchais aikel ungil besul tekoi me a bebil er a mondai lechelbangel. Sera bochal temel ngkel ulebongel el merredel er a stake, eng di millekoi aikel suebek a rengud er ngii el mondai. Sera losaod ngkal merredel er a stake er a klungel tial mondai, eng kmal mlo subek a renguk, e bekikl, el uase a kmo dmu el mongerang.
“Elder Clayton, ulker tir tiakid el ker: ‘Remerredel, a rechedal a stake er kemiu el melecha mui el ongeltacher, me a uldars er a sengerenger, e meruul a ngerchelir er a Ikelesia, e merael loldingel e olisechakl a telungalek el sensei er a rekeblirir me a odingel10er a bek el buil, e ngara ongdibel er a telungalek, mesuub chedaol llechukl, e ngara nglunguuch el telungalek er a bek el sils, ng tela er tir a ngarngii a mondai er tir el diak el sebechir el di tir el sumechokl el diak lousbech a ngesou er a Ikelesia el mo olngeseu sumechokl a mondai er tir?’”
A kultirakl er tial uldasou el kngiluu, me a kuleker tirkal merredel a stake tial ker.
Te ulemes er ngak el mechas a rengrir e dula el kmo, “Pues, ninguno,” belkul a kmo, “Ng diak, a chad.” Te dilu er ngak el kmo ng diak a tal chedal a ikelesia el riruul aikal rokui el tekoi el mlarngii a mondai er ngii e dimlak el sebechir el sumecheklii. E le ngerang? Le tir el kiei a kot el ungil blai. A mesisiich el klengar tir a mesterir a klisiich, ungil ues, me a ngesou er a babeluades el tir ousbech lotekangel a mekngit el tekoi er a kerruul el meliuekl er tir.
Tia diak el belkul a kmo a remelemalt el chad a diak el bol secher, diak le bora ringel er a kerior, ringel er a siobai, a lechub e bol chelbangel a betok el olibesongel er a klengar. A klengar er a chutem a blechoel meskid a ringel, eng di cherengel a taem ak mla mesterir tirkel tir a melasm loltirakl a llach el mo ngeltengat e metik er a rolir el bedul a budech me a urungulir. Aikal klengeltengat a mora ngii dil chad er a ngii dil ker. 11
A David a millekoi, “Alskeum e ng diak el Rubak a mekedecherur a blai, eng diak ultutelel tirkel lomekedechor ngii.”12 Ngii dil ker el mkiei er ngii, me a ngii dl teletelel a blim, me a ngii dil teletelel a telungalek er kau, eng sebechem el toketekii a kot lungil blai el mora a telungalek er kau. A mla moluut el ebangkelio er a Jesus Kristo a meskid a moktek er tial blai. A Osobel a kot el meduch el meleketek, omekedechur, e omesiich er kid. A urerel a sel cherrungel me a diak a ulebengelel deureng el mo er kau. El oba ngesuel el okiu a beltik el reng, a rengum a sebechel mo uai sel soal e mo sel kot el ungil teletelem, kutmokl el kiei er a kot el ungil blai.
Ng dmeu a renguk louchais el kmo a Dios e Demad el rokui a ngar. A Ngelekel, el Rubak el Jesus Kristo, a Osobel e Olsobel er a rokui el chad. Te kmal betik a rengrir er kid. A Ikelesia er a Jesus Kristo er a Uriul-klebesei el Santo a rengedel a Rubak el ngara beluulechad. A rengar el profet me a reapostol omekrael er ngii er chelechal sils. A Babier er a Mormon a klemerang. A mla moluut el ebangkelio er a Jesus Aristo a cherrungel el chedechuul el kirel a okedecherul a kot el ungil el blai. El ngara a ngklel a Jesus Kristo, bo le uaisei.