Mei er a Kristo—e Mkiei el Uriul-klebesei el Santo
Ng sebeched el remuul a meringel el tekoi e ngosuterir a rebebil mo meruul osisiu, le kid el medengelii ngkel doumerang er ngii.
Ke kmal mesulang, e Elder Soares, er a mesisiich e ngarmedad el olchotel a klaumerang er kau er a Babier er a Mormon. Ng dirk tekoi, eng mlarngii a techellek lorkedii sel mle kot el llecheklel a Babier er a Mormon. Tial babier, el ketengel er chelechal taem, a ikakid el tekingel a Nephi a mle llechukl: “Ak mo meruul aikel tekoi el Rubak a mla meskemam, a llach el kirel, le kmedengei el kmo a Rubak a diak le besterir a rengelekel a chad a ngii di le llach, alsekum eng diak le kedmeklii a mo rolel eng mo sebechel mo motirakl a llechul.”1
Sera kureked er tial llel a babier, a kmal mlo mui er a omereng el saul el mo ra lluich me a edei a rekil el Joseph Smith, el ulidii a Babier er a Mormon lokiu a “sengk me a klisichel a Dios.”2 Ak dirrek el mle mereng a saul er a tekingel a ngeasek el Nephi, el miruul a meringel el tekoi sera bo lolai aikel sintsiu er a Laban.
A Nephi a mle medengei el uase a lolemolem osengel ngara Rubak, eng mo ungil lotireklii tial llach. A Nephi a mle melemolem lomes el bedul Osobel er a chelsel a klengar ngii luldimukl aikel taem el blara ringel er a ongetikaik, ringel er a bedengel, me a mekngit el blekerdelir a rebebil er a rechedal a telungalek er ngii.
A Nephi a mle medengei el uase ng techa sebechel loumerang er Ngii.3 Uriul e ng millekoi el uase “Ak meral mechitechut el chad! Oi, a renguk a ngara klengitelreng el tech a uchul,”4 ng millekoi a Nephi, “A Dios a mla sebecheklek; e mla omekrael er ngak er a ringel er a omerollam er a oreomel; e mla sobecheklak er a ki morael er a daob.”5
Kid el oltirakl er a Kristo, a diak demochib er a ringel me a kerior er a klengar kid. Kid a blechoel morimel el mo meruul a meringel el tekoi el omko ng di kid eng kmal mo oberaod e locha mo diak el sebeched. Sel doltirakl er a ongtil a Osobel el “mei e moltirakl er ngak,”6 Ngii a mo omeskid a ngesou, mengelim, ma budech el dousbech, di ua blel ruul el mora Nephi ma Joseph. Uldimukl aikel kmal meringel el kerior, eng sebeched el melchesuar a beltikereng er Ngii sel doumerang er Ngii e dekengei er a Soal. Ng sebeched el metik er a deureng er Ngii el medechel el kirir a roltirakl er Ngii, le “Kristo a deureng.”7
Sera 2014, er a kungerachel er a mision, e a telungalek er ngak a siliseb er a dimlak kimodengelii el teletael. Sera ki morael er a tkul a dellas, a kot el kekerei el ngelekam el sechal a rirebet el miltemall a bdelul e dimle merekong el secherel. A di lorael mo oberaod a secherel, e a retoktang a mocha orreched el mo omotk er ngii.
A telungalek er kemam a mlo dmak er a chelsel a delmerab er a osbitar, e uldersii a rengmam el mo er a Dios. Chelsel tiaikid el meringel e chetituokel taem, e ki mle mui er a beltikereng me a budech er a Chedam er a Babeluades.
Ng dimlak ki modengei el uase ngera mo duubech a lechub e ngika el ngelekam ng suobel ng diak. Aki di mle ungil medengei el uase a klengar ngii a ngara chimal a Dios, me sel diak a ulebengelel osengel er ngii, a mo klungiaol mei er kemam ruriul. Ngokiu a sengk er a chedaol reng, a ki mle kldmokl er a ngii di el ngerang el mo duubech.
Ng dimlak el beot! A telmelel a rirelii meng ngara osbitar el eru el buil e kemam a oungerachel er a lmuut er a eual dart el remisionari. Ngkal ngelekam a di ulebes a rokui el tekoi el ble lodengei. A ukeruul er ngii a mle kemangeet e meringel el ukeruul er a bedengel, omelekoi, me a exercise le ngarngii. Ng mle melemolem el meringel, eng di cherengel a taem aki miles ongasireng el duubech.
Kede medengei el kmo ng diak el bek el kerior el desiseb er ngii a mo ungil ruriul. Eng di, sel ki molemolem a uldesuam el ngara Kristo, e a ki mo melchesuar a budech e mes ongasireng er a Dios, er a ngii di el teletael, er sel Temel me a Teletelel.
Ngarngii a taem eng diak desa el kmo a teletael er chelechang a di mo ungil besul ruriul e sebeched el mo uaia, Nephi, el kmo, “A renguk oberaod el tech a uchul.”8 Ngarngii a taem e a di mo chimol tekoi el dobang a Jesus Kristo. Ng meral klengeltengat el doba tial urunguled me a klaumera er kid er Ngii. A Kristo a ngii a chimong el otirakl a Telbilel. A ulengull er Ngii a mo er tirkel mei er Ngii.9
A remengetekled a kmal sorir kid el rokui a bo dolchesuar a budech me a ongelaod el mei sel doumerang e dengai osenged el bedul a Osobel el Jesus Kristo.
A ngar el profet er kid, el President Russell M. Nelson, a mla mengedecheduch er a ues er a Rubak el mo er a beluulechad ma rechedal a Ikelesia er a Kristo: “A klemeched el mo er a beluulechad a beot e klemerang: aki siotai er a rokui el rengelekel a Dios er tial beluulechad ma beluulechad er a redeleb el mei er a Osobelir, e mnguu a klengeltengat er a chedaol templo, e obang a deureng, e sebechem el mo nguu a diak a ulebengelel klengar.”10
Tial siotai el “mei er a Kristo” a ngarngii a belkul el mora Uriul-klebesei el Santo.11 Kid el chedal a Ikelesia er a Osobel, a mla soiseb er a telbiil Lobengkel a mla mechell el chedaol sechal me a redil ngelekel.12 Kid a dirrek el mla nguu a techall el mo oureor lobengkel a Rubak el sioati er a rebebil el mei er Ngii.
Sel doureor lobengkel a Kristo, e sel kmal moktek er kid a kirel ngara rekeblid. Ngmorngii a taem e a chedal a telungalek malechub a kmeed el sechelid a mo chelbangel a ringel. A beluulechad, me a dirrek el rengrir, a locha rulterir el mo oumededenger er a klemerang. Ng kired el meruul aikel rokui el sebeched el ngosuterir el mo melchesaur a beltikereng er a Osobel me a kid. Ak lotkii a bades er a chedaol llechukl el ngii mla mo soad el chelitakl el “Bom Kaubeltikereng” el osischeklid el kmo, “Tiaikid e a rokui el chad a mo medengei el kmo kom chedak, alskeum e kom kaubeltikereng.”13
A beltikereng er kid el mo er tirkel losiik er a klemrang, e a cherarou er a rokui el deureng a mo melasm el meruul er kid el mo omdasu el uase kede mengeblad er tirkel betik er a rengud a lsekum e kida melsam loltirakl er a ebangkelio e olisechakl a klemerang el kirel.
A duch er kid el ngosuterir a rebebil el mei er a Kristo malechub e telmuut el mora Kristo a kmal klou el ultuil er a okesiu el deruul lokiu a blakereng er kid el melemolem el ngara rolel a telbiil.
Alsekum eng meral ngara rengud a mo osiik er tirkel betik er a rengud, e kid a kired el mesisiich el bereked er a Kristo e urrekodel er a Ikelesia er Ngii me a cherrengelel ebangkelio er Ngii.
Ka deluut lomes er sel cheldechedechal a Nephi, e kid a medengei el uase sel blakereng er a Nephi el mo ultuil er a Rubak a okiu osischeklir a rechad er a blil el tir a mle oumerang er a Rubak e mle okesiu loltirakl a telbiil. Tia mocholt er sel ues er a kerekar er a klengar. Uriul er a lenguu sel merekos e ungil redechel a kerrekar, e a Lehi a “ulemes [el] meliuekl, losiik el uase [ng] metik er a rechad [er a] telungalek er ngii.”14 Ng milsa Sariah, Sam, me a Nephi el dechor “el uaia lak lodengei el uase te mor ker.”15 A Lehi a millekoi el kmo, “A kulleker el mo er tir; e dirrek el dilu er tir el mle klou a ngerek el melekoi er tir me lemei er ngak, e lenguu tial rodech.”16 Molbedebek el kmo a Lehi a dimlak el bol cheroid er a kerrekar er a klengar. Ng millemolem el kmeed er a Rubak e siotai er a telungaleker ngii el mei er sel ngarngii e lenguu a rodech.
A cherarou a mo mengesuseu er a rebebil el mo cheroid er a ebangkelio el mengeroid osischeklel a Kristo er a Ikelesia er Ngii. Ng meruul er kid el mo omdasu el uase ng sebeched el melemolem el ngara rolel a telbiil el di kid, el di ultuil er a chedaol tekoi dolab, eng di kede cheroid er a Ikelesia er Ngii.
Chelechal uriul klebesei, e a Ikelesia er a Kristo a mloluut el mo ngosuterir tirkel ngara telbiil ngelekel a Kristo el mo melemolem el ngara rolel a telbiil.
Chelsel a Doctirne and Covenants e kede mengeuiu el uase, a Rubak a kmo tiakid a osischeklek el ngike el ouchel a rengul e mei er ngak, a ngii a chedal aikelesia er ngak.17
Ngokiu a Ikleesia er a Kristo el ngara beluulechad, e kid a mo mesisiich lokiu a cheldebechel er a Resanto. Kede rongesii a Ngerel lokiu a reprofet er Ngii, chad er a ues, me a ocholt. Sel kmal klou a belkul, a okiu a Ikelesia er Ngii e kid a ngmai a meklou a ultutelel klengeltengat er a Tngakireng er a Kristo el di sebeched el mo medengei sel doruul a chedaol ruoll.
A Ikelesia er a Jesus Kristo er a Uriul-klebesei el Santo a ngii a Ikelesia er a Kristo el ngara beluulechad, el mla moluut er chelechal uriul klebesei el mo klungiolir a rokui el ngelekel a Dios.
Ak sioning el kmo sel demei er a Kristo e dekiei el Uriul-klebesei el Santo, e kid a mo ngeltengat er a dmolech el beltikereng er Ngii, deureng er Ngii, me a budech er Ngii. Kid a mo uaia Nephi, el sebeched el remuul a meringel el tekoi e ngosuterir a rebebil mo meruul osisiu, le kid el medengelii ngkel doumerang er ngii.18 A kristo a llomes er kid, e klengar kid, e osobeled19 El ngara a ngklel a Jesus Kristo, amen.