![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fb2%2F4f%2Fb24f5c8f2ef96164e87ba0490b24fd639df452b5%2Fb24f5c8f2ef96164e87ba0490b24fd639df452b5.jpeg/full/!250,/0/default)
Metik er a Selbechakl er a Ses el Eolt er a Klengar
A Jesus Kristo me a Tngakireng er Ngii a selbechakl el kid a rokui a ousbech, el diak el iior er a ses el eolt el ngara chelsel a klengar er kid.
Sera mid-90s, el e ak ngara daingak, e mle oureor er sel Fourth Company er a Santiago Fire Department er a beluu er a Chile. Sera ak ngar sei, ak mle kiei er a obis er a rechad er a ngau el mengkar a leklebesei. Mocha ra ulebongel er tial rak, e tedilu er ngak el uase ng kirek loureor er a Beches el Rak le tiaikid el sils eng blechoel ngarngii a bkaischemrungel el duubech. Ng mlo mechas a renguk, e kmo, “Ng merang?”
Me a, ki kiei el mengiil ngak me tirkal kimdak loureor, e sel sueleb er a klebesei, e a fireworks a mocha mekekerekard er a chelsel a beluu er a Santiago. Aki mlo kaiuechull e oureng er a ungil beches el rak el mo er a tang me a tang. E di mle kiul mo melebusech a kambalang er tial obis er kemam, lolchotel a kmo ngarngii a bkaischemrungel. Aki ngilai a klekedellam e ngmasech er a mlai. Sera kimorael mong, me kimorael er a chelsel tial seked er a rechad el ngara deureng er a beches el rak, ak miltebengar el uase tirkal chad a kora diak louedikel el kaididerurt. Te kmal mle chelellakl e ungil a rengrir er tial klebesei. Ng di bita er tial seked, e a rechad el kimulereched el mo olngeseu er tir a mlara klou el kerior.
Tial teletael a ngilsukak el mo medengei uase a klengar kid a sebechel uaisei el di ungil a rokui el tekoi, eng di ngarngii a taem el kid a mo chelbangel a ses el eolt er a klengar lengelakl er sel klisiched lotekangel. Kerior er a tech, uldasu, telungalek, me a urered; kerior el duubech er a beluu; me a bebil er a tekoi er a klengar malchub a kodall a bebil er a ses el eolt er a klengar el bo dechebangel.
Sel dechelbangel a ses el eolt er a klengar, eng blechoel me mekngit a rengud malechub e kede medakt. A President Russell M. Nelson a mla melkoi el kmo, “A klaumerang a mtechir a dakt”—klaumerang er a Rubak el Jesus Kristo (“Let Your Faith Show,” Liahona, May 2014, 29). Ak mla mes a kerior el tomall a klengar er a rechad, me ak mla metik el uase ng diak el iior er a ngidil ngera el kerior el me subechii er kid—a lengarngii a nger el kirel malechub a lak a ulebengelel desang—ng di ngarngii a chimol mo sobecheklid, e tia osisiu el sebechekled er a rokui el kerior. Tial chimol tekoi el sobecheklid a blal beskid a Chedam er a Babeluades el Rubak el Jesus Kristo me a Tngkaireng er Ngii.
Ng diak a tara kid el mochib er a ses el eolt er a klengar. A Helaman, el profet er a Babier er a Mormon, a ulsisechakl el kmo: “Ng okiu a bedul a Osobel, el ngii a Jesus Kristo, el ngelekel a Dios, e ng uaisei el kirem el mekedecherur a dai er kau; me se el le mei a se el sesengel a eolt er a diabelong el ongiterbis er ngii, e lolsiu a cheltel el me er kau, e ng mo diak a klisichel er kau e mo diak a techellel el orretau el ruebet er riou er a diak a ulebengelel el ongarm me a ringel, le ng okiu a bad el kau a milkdecherur, el ngii a mesisiich a dai er ngii, el dai er ngii a lulekedechor er ngii a rechad e ng diak el sebechel el ruebet” (Helaman 5:12).
A Elder Robert D. Hales, el ngii a mla chobangel a betok el kerior er a klengar, a dilu el kmo: “A kerior a mo er a rokui el chad; eng di iior er a desrta el chad el kmo te mekerang. A ringel a sebechel lobekid er a erul teletael. Ng sebechel mo smisichid e mengikiid er kid a lobengkel a klaumerang, a lechub eng sebechel bai tomelii a klengar kid a lsekum eng diak a klaumera er kid er a tngakireng er a Rubak” (“Your Sorrow Shall Be Turned to Joy,” Ensign, Nov. 1983, 66).
Sel uchul e kid a mo ngara deureng er a Jesus Kristo me a Tngkaireng er Ngii, eng kirel ngarngii a klaumera er kid er Ngii—el ngii el klaumerang a ngoikid el ngoriakl er a ikel rokui el ringel el omko, ng di kid eng diak el sebeched. Ng mla yaksok el uase Ngii a mo kobekakl a chelngeled a lsekum e kede mo er Ngii er a ikel rokui el doruul.
“Mei er ngak,” Ngii a millekoi, “kemiu el chellungel a berraod, e bok beskemiu a ulengull.
“Mnguu a chelngelek, e mosuub er ngak; le ngak a medemdemk e ngariou a renguk: me ko mo metik a ulengull er a rengmiu.
“Le chelngelek a beot, me a ringel a kebekakl” (Mateus 11:28–30; dirrek el mesa Mosiah 24:14–15).
Te melekoi el kmo “ngkel ngarngii a klaumera er ngii, a diak el medakt a ngii di el ngerang. E ngkel diak a klaumerang er ngii, a diak bol ngai a nger.” (Tial tekoi a ledilii a Thomas Aquinas eng di dimlak el sal smisichii a belkul er a ikel tekoi el ngii a ulisechakl.) Eng di, kid a diak dodengei a tekoi el mo duubech er a beluulechad, e blechoel diak a nger kid el kirel a ker el kmo ngera uchul. Ngera uchul me tia duubech el kirek? Ngera uchul meng duubech el mei er ngak? Ngera kirek el subii? E sel lak dengai a nger, e aikel tekingel Osobel el mo er a Profet Joseph Smith er a lengara Liberty Jail a kmal mo klemrang:
A Dios a mle yaksok er ngii a el mo budech a rengul ea ringel ma ongarm el ngarngii a di mo telkib el taem.
Ng dilu er ngii el kmo a lsekum e ngotekangel aikal ringel ma ongarm, ea Dios a mo kobkellii er bab (Doctrine and Covenants 121:7–8).
Ng uaisei el betok el chad a oumerang er a Jesus Kristo, a klou el ker a kmo kid kede oumerang er Ngii e dirrek el oumerang aikel tekoi el Ngii olisechakl er kid e olengit e rkid el mo meruul. Ng sebechel a chad lomdasu el kmo, “Ngera medengei a Jesus Kristo el kirel a tekoi el duubech el mei er ngak? Ng mekera medengei aikel kusbech el mo ngara deureng?” E a mera er ngii, a ngkal Osobeled e Sebechekled a ngii a profet Isaiah a millekoi el kmo:
“Ngkaikid ng kel blo louketui er ngii a rechad; e mlara klengitelreng, e medengelii a ringel. …
“Ng meral ngii a mla otekau a kngtil a rengud, me a lengeled. …
“Eng di mlo er a ringel el kirel a kngtid, ng miltemall el kirel a kngtid: a budech el dobang e ngii a mileskid; me a chelebed el mlorngii a omekungil er kid” (Isaiah 53:3–5).
A Apostol Petrus a ulisechakl er kid el kirel Osobel, el kmo, “Ngii a chimong el ngilai a kngtid, me kid, el ngara kodall el klengit a uchul, a mo ngar: el ringel er ngii a kid a mo ungil” (1 Petrus 2:24).
Sel taem er a kodellel a Petrus a mle kmeed, ng di tekingel a diak el kirel rullid el mo medakt; ng bai, mle olisechakl er a Resanto el mo ngara “deureng,” er a chelsel aikel “meklou el ringel er a ongetikaik le blarngii.” A Petrus a millelach er kid el kmo “a ringel el bo [decharm] , … el kmal mesisiich,” a mo mekrolid el mo “chotengii e kobkelii a Jesus Kristo sel lemei” e mo “osebelel a [klengar] kid ruriul(1 Peter 1:6–7, 9).
A Petrus a millemolem el kmo:
“Betik er a renguk, lak bo louedikel a rengmiu er a kerior el me subechii er kemiu e momdasu el kmo kom delbeakel:
“Bom ngara deureng, lulsiseb er a tngakireng er a Kristo; me sel, mocholt a klebkellel, e kom kmal mo ngara klou el deureng” (1 Peter 4:12–13).
A President Russell M. Nelson a ulisechakl el kmo a “Resanto a sebechir el melemolem el ngara deureng er a chelsel a ngii di el ngerang. … Se el sekum e a moktek er a klengar er kid a ngara uldasu er a mo suobel … el Jesus Kristo me a ebangkelio er Ngii, e kid a sebeched el mo melechesuar a deureng el diak el diak el iior er a ike el ngii a mla duubech—me a lechub e ng diak el bol duubech—er a klengar er kid. A deureng e mengai er a dirrek e le Ngii a uchul. Ngii a uchul a rokui el deureng” (“Joy and Spiritual Survival,” Liahona, Nov. 2016, 82).
Ng uaisei, el beot a dosaod aika el tekoi sel lak dengara chelsel a ses el eolt e meringel a doltaut sel dengara chelsel a ringel. Ng di ngak el odam er kemiu, eng soak a molchesuar el uase ng kmal soak a bo modengelii a klou el ultutelel a bo modengei el kmo a Jesus Kristo me a Tngakireng er Ngii a sebechekled, el diak el iior er a kerior loldechelakl a klengar kid.
AK medengei el uase kid el rokui a ngelekel a Dios, e Ngii a betik a rengul er kid, e kid a diak decheloit. Ak siotai er kemiu el mei me mesang el kobekakl a chelngeliu e mo sebechekliu. Mei e bomolngeseu er a rebebil el metik er a selbechakl el tir osiik er ngii. Mei e bom teloi er kemam e bom selbechakl, lodngakl a ses el eolt er a klengar. Ng kmal diak a rraureng er a renguk el uase omko komei, e ko momedengei, e mo olngeseu, e kiei lobengkemam.
A profet Alma ouchais er tiakid el tekoi el mo er a ngelekel er a Helaman: “A kmal medengei el uase ngkel loumerang er Dios a mo mosebechakl er a kerior, ringel, me a olibesongel e mo suobel ruriul sils” (Alma 36:3).
A Osobel a Ngii a dilu el kmo:
“Bol chelellakl a rengmiu … ; le rokui el chad a blebelek; bom kellechakl e modengei el kmo ngak a Dios. …
A leuaisei, e lak mngara dakt el molmuut er a kodelliu; le chelechal mngara beluulechad eng diak mnguu a cherrengelel a deureng, eng omei er ngak e komonguu a mui el deureng (Doctrine and Covenants 101:16, 36).
Sel chelitakl el “Be Still, My Soul,” el kmal mla rutechii a renguk e ra chelsle a beotk el ngerang, a ngarngii a oba klumech el mei er kid. A tekoi er a chelsel a kmo:
Be still, my soul: The hour is hast’ning on
When we shall be forever with the Lord,
When disappointment, grief, and fear are gone,
Sorrow forgot, love’s purest joys restored.
Be still, my soul: When change and tears are past,
All safe and blessed we shall meet at last. Chelitakl, no. 124)
Sel bo dechebangel a ses el eolt er a klengar, ak medengei el uase a bo el blak a rengud el ultuil er a Jesus Kristo me a Tngakireng er Ngii el mo sebecheklid, e kede mo metik a ngesou, ongelaod, klisiich, duchelreng, me a budech el kid osiik, el medengei er a rengud el kmo sel ulebongel er a klengar kid er tial beluulechad, e kid a mo remenges a tekingel a Mastang el kmo: “Ngungiang, kau el mle blak a rengum el mesiungek: … be msiseb er a rengedel a rubak” (Mateus 25:21). Loba ngklel a Jesus Kristo, amen.