Sel Klisichel a Babier er a Mormon el Omult

Mla er a Elder Benjamin M. Z. Tai

Er a Chelchad er a Rokeuid

A Babier er a Mormon a meskid a chedaol el cheio, e ouchais a uldasu er a omeruul, e omak er kid er a Chedaol el Reng.

Uriul, er a kisa report er tial dirk mlo merek el osengelek, e ak mlo medengei el uase ng kirek el sumecheklii a klengar ngak. Ng olngeseu er ngak, e a toktang er ngak a mileskak a uldasu el kirel a cheio ma chundo, el ngii, a lsekum ak melilit el mo oltirakl, eng sebechel el rulak el mo mesisiich a bedengek.

A lsekum a derta er kid a mo er a chedaol el osongel, e ngera ke de mo subii el kired? Ngara mo omsodel sel ngedechel a chedaol osongel? Mo er kid el ngii sel kired el mo uai ngii, ng klou a ultutelel el kid a medengei el kmo ke de mekerang e meruul aikel dodengei.

A Jesus Kristo a Mastang el Toktang.¹ Ngokiu a Tkangireng er Ngii, e Ngii a omkar a telmeled, Ngii a ngmai a chelitechetud, e omekungil a chelemuul el rengud.² Ngokiu a krasia er Ngii, ea chelitechetud a sebechel mo klisiched.³ Ngii a olengit er kid el mo oltirakl er Ngii ⁴ lokiu a omesuub el Kirel, orrenges a Tekingel, e merael el ngara medemedek el reng er a Rengul.⁵ Ng mla yaksok el mo olngeseu er kid⁶ er tial kemangel el klengar er a omeruul er bult, el beltel a ngodechid e meskid a diak a ulebengelel el deureng.⁷

A Osobel a mla meskid a Babier er a Mormon el mesisiich el dongu el mo olngeseu aikal bult. A Babier er a Mormon a meskid a chedaol el cheio, e ouchais a uldasu er a omeruul, e omak er kid er a Chedaol el Reng. Ng llechukl el kired,⁸a tekingel a Dios a ngar er ngii ⁹el di bleketakel el ouchais er kid el kmo ke de techang, moktek, me a bekesel a chochid.¹⁰ Ngobengkel a Biblia, a Babier er a Mormon ouchais er a Jesus Kristo¹¹e olsisechakl el mo ke de mekerang e mo medengei a klemerang e mo uai Ngii.

A Brother Saw Polo a mle okeim me a eiai a rekil seral bo lodengelii a mla moluut el ebangkelio er Jesus Kristo. Sera bo kudengelii, ngii a mla mesiou el branch president el mlo melai a rak, eng di ak mlo medengei el kmo ng dirrekak a tal longuiu er a Babier er a Mormon leng dirrekak el bo er ngii el llechukl er a tekingel. Sera kuker er ngii el kmo ng mekerang e medengei el kmo a hong a klemerang a lsekum eng dirrekak el chiuii, ng dilung el kmo ng milsuub er a siasing er a cheldecheduch er a Babier er a Mormon er a bek el sils lokiu a ues er a llechukl, ousbech er a dictionary el oliuid aikel tekoi er a merikel, e meluches a ikel blal suub. Ng silodii el kmo, “Bek el taem el kusuub, ak meluluuch el kirel aikal blak suub, e ngak a mo melchesuar a budech me a deureng, ea uldesuek a mo bleketakel, e a renguk a mo medemedemek. A kulmelchesuar er a Chedaol Reng el louchais er ngak el kmo ng klemerang. Ak medengei el kmo a Babier er a Mormon a tekingel a Dios.”

Di ua Brother Saw Polo, e a derta er kid a sebechel el mesuub er a Babier er a Mormon el okiu a teletael el de ngara chelsel. Sel doureng el mo oumerang e melbedebek aikal osisechakl er a chelsel a rengud, ng sebeched el oker er a Dios el kmo aikal olisechakl ng klemerang.¹² A lsekum eng meral ngarngii er a rengud el mo medengei e ngarngii a rengud el mo meruul, Ngii a mo onger a ker el ngar er a rengud lokiu a Chedaol Reng. Nogkiu a klisichel a Chedaol Reng e kid a mo medengei a klemerang er a rokui el tekoi.¹³ Sel denguu a chedaol el sioning er a Babier er a Mormon, e ke de dirrek el mo medengei lokiu sel osisiu el klisiich el kmo a Jesus Kristo a Osobelel a beluulechad, e a Joseph Smith a profet er Ngii, e a Ikelesia er a Jesus Kirsto er a Uriul-klebesei el Santo a mla moluut el Ikelesia er Ngii.¹⁴

Se er ak ngeasek el lomuchel el mesiou el misionari, ak ngilasech er a skoki el milrael el mo er a Australia. Ak kmal mle sabisi, kersos, e diak a moktek eng di mla er ngii a renguk el mo mesiou, e ngak a kmal uluusbech er sel klou el reng el kmo a kumerang er ngii a klemerang. Ng mle blak a renguk el meluluuch e menguiu a chedaol llechukl, eng di sel rau el reng a mlo mesisiich e mlo mechitechut a bedengek. Uriul er ak bla er a ringel el mo melai a seisei el sikang, e a chad er a skokii a mirael e mle stob er a bita er a kingelek. Ng ngilu tial Babier er a Mormon el kulenguiu er ngii el mla er a chimak. Ngulmes er a ikrel e dulang, “Tiang a meral lungil hong!” me ng liluut el meskak tial hong e melemolem el merael. Ng dimlak kluut el mesang.

Me a ikal tekingel a dirk ngara oderngesek, e ak rirrengesi e mlo melchesuar er a renguk, “Ngak a ngar tiang, e Ngak a medengei el kmo ke ngar ker. Di bo er sel bkul rebab el sebechem, e ngak a mo kudmokl a ikel mo medechel.” Ngar sel skoki el ngar bebul a Taiheio, e ak ngiluu a sioning lokiu a omesubek er a Babier er a Mormon me a odbechel a Chedaol Reng el kmo a Osebelek a medengei el kmo ngak techang e a ebangkelio a klemerang.

A Elder David A. Bednar a ulsisechakl: “Sel klemedengei el kmo a ebangkelio a klemerang a tebedechel a klaumerang. Bek el klemerang el mo er a ebangkelio a dechelel a bult.”¹⁵ A bult a ousbech er kid el mo “ngar er a omerelel a tekoi, ng diak di dorrenges el merekong.”¹⁶ Sel omerelel a moktek er a Rubak el kired-osisechklel a Kristo- a ulsisechakl el kot el bleketakl el ngar er a chelsel a Babier er a Mormon.¹⁷ Nguldimukl er a:

Kot, mochotii a klaumerang er a Jesus Kristo se el moumerang er Ngii, moltirakl a Llechul, e bo modengei el kmo Ngii a mo ngosukid.¹⁸
Ongerung, bo douchel a rengud er a bek el sils el kirel a klechitechetud me bo dolchesuar a deureng me a budech sel Ngii a ousubes er kid.¹⁹ A ouchel reng a usbechall er kid el mo ousubes er a rebebil²⁰ e ngosukid el merael mo bedul ruchei. A Osobel a mle yaksok el mo ousubes er kid sel sekum ke de blechoel el ouchel a rengud.²¹
Ongedei, meruul e oltirakl a telbiil lobengkel a Dios lokiu a chedaol ruoll uaia techolbechelid. Tiang a mo rulid el nga er a rael er a telbiil el ngiii a omekrael er kid el mor Ngii.²²
Ongeuang, mo nguu a sengk er a Chedaol Reng. Tial sengk a meskid a techeled el blechoel el chelmengel ngkel ngii a melenget, mengelaod, e omekrael er kid.²³
Ongeim, outekangelel mo er a ulebongel el di merael mo ruchei el urrekodel a tekingel a Kristo er a bek el sils.²⁴ Sel donguiu er a Babier er a Mormon e le blak a rengud loltirakl osisechakl er a chelsel, eng sebeched ngoriakl er a ongetikaik e ngmai a ulekrael me a ucheliu er a chelsle a klengar kid.²⁵

Me sel dolemolem el meruul a osisecheklel a Kristo er a klengar kid, e kid a mo mesisiich er a diak el meruul el mo er a omengodech me a dakt el omeruul el mor ngii. Kid a mo nguu a sioning, e le Chedaol Reng a “mo ochotii a rokui el tekoi el kau a kirem el meruul,”²⁶ me a “tekingel a Kristo a mo ouchais er kau a rokui el tekoi el kirem el mo meruul.”²⁷

Mlo lluich el rak, el Brother Huang Juncong a mle chemau a ringel el kirel a rrom, dekool, me a bakutsi. Se er a bol londengelii a Jesus Kristo me a olutel a ebangkelio er Ngii, a Brother Huang a mlo soal el mo mengodech a teletelel el kirel a telungalek er ngii. Sel kot el ringel el blar ngii a omeloko. Ng mesisiich el meloko a dekool, me ng milasem el betok el taem el mo diak el lolokou engdi dimlak el sebechel. Ta er a klebesei, eng kmal mlo diak el sebechel obes aikel tekoi el mla er a Babier er a Mormon: “lobang a blak el reng, el ngarengii er a rengum.”²⁸ Lokiu a ikel metom el omeruul, eng mlo melechesuar el kmo ng sebechel mo mengodech el loba ngesuil a Chedam er a Babeluades me a Jesus Kristo.

A re cherrungel el misionari a mle omak a klaumerang er tir lobengkel e ulechotii a uldasu er tial omeruul, el uldimukl a betok el nglunguuch me a omesubel a tekingel a Dios. Lobang a blak el reng, el ngarengii er a rengum, a Brother Huang a milruul aikang lobengkel a klaumerang e miltik el kmo sel blak a rengul el omtab er a beches el blekeradel el ngii a soal mo meruul, el uaia omesubel a Babier er a Mormon, eng mo diak el sal omdasu el kirel aikel omeruul el ngii a soal mo diak loruul.

Sel bo el omdasu aikel omeruul el blar ngii er a teruich me a eim el rak er a mla memong, ng dilung, “Ng diak kudengei el kmo oingerang eng mlo diak kuloko a dekool, eng di sel blak a renguk el melasem el meruul a tekoi el ngii a kudengei el kmo mengemdaol er a Reng er a Rubak el mei er a klengar er ngak e melemolem el meruul er ngii, me ng mlo diak el soak a dekool el melmuut er a chelechang.” Ng okiu a omerelel a osisecheklel a Babier er a Mormon, ea klengar er a Brother Huang a mlo mengodech, e ngii a mlo ungil el buch me a chedam.

A President Russell M. Nelson a mle yaksok: “Sel moluluuch el mesuub er a Babier er a Mormon er a bek el sils, e kemiu a mo meruul a ungil a telbiil er a—bek el sils. Ak yaksok er kemiu el kmo sel momdasu el kirel a ikel mosuub, e a mado er a babeluades a mo obok, e kemiu a mo ngmai a nger er a kermiu me a omekrollel a klengar er kemiu. Ak yaksok el kmo sel blak a rengmiu el mesuub er a Babier er a Mormon er a bek el sils, eng sebechiu el mo selbechakl er a cheraro, dirrek el ues er a delngerengel me a bebil er a mekngit el blekeradel.”²⁹

Resechelik, a Babier er a Mormon a tekingel a Dios, e ngoikid el kmo kmeid er Ngii a lsekum e ke de mesuub er ngii.³⁰ Me sel doruul aikal tekoi, e kid a mo ngmai a sioning er a cherrungel el klemerang.³¹ Me sel dolemolem el kiei lokiu aikal olisechakl, eng mo diak el ngar ngii a rengud el mo meruul a mekngit.³² A rengud, osenged, me a meliuekl er kid a mo mengodech el mo uaia Osobel.³³ A kuuchais a sioning er ngak el kmo a Jesus a Kristo, e Osebeled, e Osobel, e Sechelid. El ngara a ngklel a Jesus Kristo, amen.