![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fda%2F2c%2Fda2c41ade8ece5e2ccfbf48ba522fdb7aa4b1227%2Fda2c41ade8ece5e2ccfbf48ba522fdb7aa4b1227.jpeg/full/!250,/0/default)
Ngii a Mo Oeak Medad
A Rubak a mengeteklel a Oltel a ebangkelio me a Ikelesia er Ngii. Ngii a mui lungil medengelii a ngara medad. Ngii a siotai er kau el mo er tial ureor.
Rodam me a rodos er a ngak, ng dmeu a renguk el be dekeldibel er tial klou el ongdibel er a Ikelesia er a Jesus Kristo er a Uriul-klebesei el Santo. Chelsel ongtil el bo dolbedebek er a teletael er a Olutel a Ikelesia er a Rubak er chelechal ulebongel el taem me a klengeltengat el bla dengai, e a President Russell M. Nelson a mla yaksok el kmo aika diak di bo dolbedebek el merekong ng dirrek el dimereko el diak dobes.
Ng diak a kubes a mla duubech el teletael, e oumera el kmo ngosisiu leko er kemiu. Ng di mo iior er a dersta er kid el rulii meng diak dobes er ngii. Tiak klou a belkul er ngak le uldesuek el kirel a kedmeklel tial ongdibel a kmal klou a bla lengedechii er ngak el diak el soak lobes er ngii. Msall ek sodii.
A kedmeklek a ngilikak elmo omes a rekord er a Oluut. Ng betok el taem el bla kchiuii, eng di ng oumesingd el team el klou a ultutelel tekoi el mei er ngak el dosaod el kirel a Joesph Smith, el ngii a profet er a Oluut. Eng di chelechal taem e ak milsa a teletael el Rubak omekrael er kid, a roltirakl er Ngii, me a Ikelesia er Ngii. Ak milsa sel klou el ultutelel a dulekrael er a Osobelel a beluulechad, el Ulemeob—el ngii a medengei a rokui el tekoi, er a chelii, chelechang, me a klukuk. Ngii olisechakl er kid er a dersta el dauch e omekrael er kid, ng diak lorrimel.
A miting el kusaod er ngii a mle klou a belkul telengtengil Oluut. Ng mle Chedaol sils er sera April 3, 1836, er a chelsel a Kirkland Templo er a Ohio, leuid el klebesei ruriul er a lemoterekokl. A Joseph Smith a smodii tial meang el taem er a reksi er a beluulechad er sel betengel. Klou er tial cheldecheduch a ngara chelsel a Doctrine and Covenants er a 110 el bliongel:
“Ng mle ieta sils, e a kullengeseu er a Remerredel el merous er a Belsilel a Rubak el mo er a rechedal a Ikelesia, el mlengai er a Reteruich me a terung, el tir a mle techellir loungerachel er tial chedaol sils. Uriul er a lemekedmokl el mo er a rodam er ngak, eak mlo dechor, e a kateng a mlengai, e ak mlo outubaruach ngak, me a Oliver Cowdery, e mla er a nglunguuch. Uriul er a ki bo merek el meluluuch, e tiakid el ues a mlocholt er medemam.”1
“A kateng a mlengai er a uldesuam, e a osengam el kirel a klemedengei a ulebok.
“Aki milsa Rubak el dechor er a bita er a chelsakl, er medemam; el dilechor er a ko er a kolt, el mengengungau a bedengel.
“A medal a mle kmard el uaia ngau; e a cheiul a becheleleu el di uaia snow; e a osengel a diliich el ua dichel a sils; e a oto er a ngerel a kmal di ua bekerurt el klou el ralm, el ngerel a Jehovah, el kmo:
“Ngak a kot e ulebongel; ngak a mle ngar, e ngak ngike el mlora kodall; ngak a sebechekliu el mo er a Chedam.
“Oi, a kngtmiu a bla kusubes; me kom klikiid er medak; a leuaisei, e bom ngara deureng.
“Bol kellechakl a rengmiu, me a rengrir a rokui el chedak bol ngara deureng, el tir, a ultuil er a duchelreng, e mla mekedecherur tial blai el ngara ngklek.
“Oi, ak mla kongei er tial blai, me a ngklek a morngii; e okiu a chubechub er ngak e ak mo duum er a rechedak el tir a mei soiseb er a chelsel tial blai.
“Oi, ak mo duum er a remesiungek, e mo mengedecheduch el mo er tir, e a lsekum a rechedak otirakl a llechuk, e diak el lotuu a mekngit er a chelsel tial blai.
“Oi a rengrir a retelael me a dersteruich el telael a mo ngara klou el deureng er a klengeltengat el mochubel kirir, me a klengeltengat el rechedak a mla ngmai er a chelsel tial blai.
“E a chisel tial blai a bo oberk el mo er a ikel cheroid el beluu; e tiaikid a uchelel a klengeltengat el mo mochubel el mo er a rechedak. Me boluaisei. Amen.
“Uriul er a lemechesimer tial ues, e a babeluades a ulebok er medemam; e a Moses a dilum er medemam, e miskemam a kiis er a omengideb er a Israel er a ikel eua el saus er a beluulechad, me a ikel teruich el blai el ngara diluches.
“Uriul e ritiang, e a Elias a dilum, e milskemam a cherrengelel a ebangkelio er a Abraham, e kmo ngokiu kemam me a rokui el ngelekam er a bek el telcheroll a mo mukngeltengat.
“Uriul er tial ues, e a lmuut el tara klou el ues a ulebok er medemam; e a Elijah el profet, el ngii a milngai el mo er a babeluades el dimlak bol chau a kodall, a dilchor medemam, e dilu el kmo:
“Oi, ng merema sel taem, el mildung er a ngerel a Malakai—louchais el kmo ngii el [Elijah] a mo modurokl, ruchei er sel klou e kdekudel sils er a Rubak—
“El mo mult a rengrir a rechedam el mo er a rengelekir, me a rengelekir el mo er a redemerir, le lak e tial beluulechad el rokir a mo medebeakl—
“A leuaisei, e a kiis er chelechal taem a ngara chimomiu; me bo modengei el kmo sel klou e kdekudel el sils er a Rubak a kmedang, el merema er bita er a chesmerel a rekeblimiu.”2
Chelecha, ak mla choiuii tial cheldecheduch el betok el taem. A Chedaol Reng a mla oterkeklii er ngak el kmo tial cheldecheduch a klemerang. Eng di sel kusuub e kululuuch el mengedmokl el kirel tial ongdibel, e ak mlo bleketakl el mesa klisichel a Rubak lomekrael er a Remesiungel er tial Urerel.
Euid el rak ruchei er a Moses a lenguu a kiis er a omengideb er a Israel el msa Joseph er a Kirkland Templo, “e a Joseph a mle medengei lokiu sel dai el ngara uchelel a Babier er a Mormon el kmo a moktek er ngii a mo ‘olecholt el mo er a rechad er a blai er a Israel … me bo lodengei a telbilel a Rubak, el kmo te diak bol riid el mo cherechar.’ Sera 1831, e a Rubak a dilu er a Joseph el kmo a omengideb er a Israel a mo omuchel er a Kirkland, ‘E ngarisei [Kirkland], e mo oberk el mo er a rokui el beluu … le Israel a mo suobel, e ngak a mo omekrael er tir.’”3
Ng uaisei el ureor er a misionari a mle usbechall er a omengidb er a Israel, eng di a Rubak a ulisechakl er a Reteruich me a Terung, el tir a mle bebil er a rekot el misionari,“Me bo lolbedebek el diak lorael mo e ra bebil er a beluu, el dimerekmo lengai a klengeltengat er tir er a templo.”4
Ng belkul a kmo tial Kirkland Templo a mle klou a ultutelel er a teletelel a moktek er a Rubak el erung a uchul: A kot, a Moses a mlengiil er a rekil a urerel a templo el kirel olutel a kiis er a omengideb er a Israel. E a ongerung, e a President Joseph Fielding Smith a ulisechakl el kmo a “Rubak a dilu er a Resanto el mo mekedecherur a templo [Kirkland Temple] el mo sebechel locholt a kisel a ngerachel el re apostol e sebechir el ngmai a klengeltengat e bol kldmokl el mo oureor er a beluulechad el mo meng ulebongel el taem.”5 Ng uaisei el klengeltengat er a templo el dodengei er chelechal sils a dimlak er a chelsel a Kirkland Temple, eng di a otireklel tial ulaoch a uchul, e a ikel uchelel chedaol ruoll a ulemuchel risei, luldimukl a betok el chedaol ocholt el mo dongu er tirkel mlokedong el mo er a mission lobengkel a yaksok er a “klisiich er a eanged”6 el mlo uchul a klou cheldellel a omesiou er a remisionari.
Uriul er a Joseph er a lengai a kiis er a omengideb er a Israel, e a Rubak a ulemekrael er a Profet el mo oltobed er a rechedal a Teruich me a terung el mo er a mision. Sel kusuub, eng kmal mo bleketakl el kmo a Rubak a milngedmokl er a rael el Teruich me a terung a mo er a mision er a cheroid el basio el rechad a mla mekedmokl el mo oumerang e olngesenges er tir. E a cherengel a taem, e a retelael chad, lokiu tir, a mo chedal a mla moluut el Ikelesia er a Rubak.
Ngultuil er a rekord el dolab, eng kmeed el euid el telael me a eim el dart el mo bedul eai el telael el chad a miltecholb er a chelsel aikel erul mision er a reteruich me a terung er a ikel Beluu er a British. Tia a mlo dodai er a ureor er a misionari er a Europe. Sera ulebongel er a 19th century, eng kmeed el oketiu el telael er tir a mla mei er a Beluu er a Merikel, el betok er tir a mla er a ikel Beluu er a British me a Scandinavia el mei.7 A Rubak a ulemekellomes er a Joseph me tirkel meduch a rengrir el misionari el mlo oureor er a omeridm, er sel team, el uaia ble el meringel lureor. Eng di a Rubak, lokiu a cherrungel losengel me a kedmeklel, a uchul eng mlo sebechel.
Ko medengelii sel bleketakl e beot e ko er a uaia lolachitnger el tekoi el ngara 110 el bliongel er a Doctrine and Covenants.
“Oi, le ng merema sel taem, el mildung er a ngerel a Malakai—louchais el kmo ngii el [Elijah] a mo modurokl, ruchei er sel klou e kdekudel sils er a Rubak—
“Elmo mult a rengrir a rechedam el mo er a rengalk, me a rengalk el mo er a redemerir, le lak e tial rokir el beluulechad mo medebeakl—
“A leuaisei, e a kiis er chelechal taem a ngara chimomiu; me bo modengei el kmo sel klou e kdekudel sils er a Rubak a kmedang, el merema er bita er a chesmeriu.”8
A kuuchais el kmo a Rubak a mle uchei el mesa ngar medad me a teletael el Ngii a mo omekrael er kid el Ngoseuir er a Urerel e kudmeklii a moktek er Ngii er a uriul klebesei.
Sera kusiou el ngara Presiding Bishopric er a betok el rak er a memong, eng mle ngerchelek lomes er a teletelel me a otutel sel chelechad el milngedmokl er tial domekedong er ngii el kmo FamilySearch. Meng sebechek el kmo ak mle kerekikl el “mes” a urerel e diak du el kmo a “kuluungerachel” er ngii. Betok el mellomes el chad a chiloit a urerir e mlei el meruul er sel soal a Rubak.
A First Presidency a kildmeklii a moktek el mengesadel a osisiu el mla meruul chedaol ruoll. Sel mle klou el rraureng a sel dimlak el sebeched el mo medengei el kmo a chedaol ruoll el kirel a chad ng mla mekedmokl ng diak. Betok el rak—a lechub eng di uldesuek el kmo mlo mela rak—el First Presidency di oker ngak el kmo, “Ngoingerang eng mo merek?”
Ngokiu a nglunguuch, blakerreng, me a klou el temir a rechad el kirel, e tial ureor a milkedmokl. Ng mlei el ngara blechebechel. A mle kot el ureor e rulii a FamilySearch el mo beot a dousbech er ngii el mo er tirkel diak el sal meduch er a rua computer. Betok el ngeldechel a mlo er ngii, e ngak a medengei el kmo ng melemolem e ngeldechel, le sel domakes el kudmkelii a tara tekoi, e kede mekengii a chesimer er a lmuut el bebil er a chedaol ocholt el kirel a kuk bebil er a meklou a belkul tekoi el dirkak deues. Ngosisiu er chelechal sils, el FamilySearch a ngii a lousbech er ngii a Rubak el tebedechel a Oluut er Ngii—meng diak di domelekl a mla mekedmokl el chedaol ruoll.
A Rubak a mechikid me kede meruul a beches el teletael el mo ngosuterir a rechad el mo medengei e betik a rengrir er a rebeldekir e mo kudmokl chedaol ruoll er a templo el kirir. Chelecha, e a Rubak a kmal mle ungil medengei a mo duubech, le a rengeasek a bai mla mo olisechakl er a rechad er a blirir me a rechedal a ward er tir el kirel a tekoi er a computer. Kede rokui el mla metik er a deureng er tial teletael er a omesiou.
A reng er a Elijah a omult a rengrir a rengeasek el mo er a remechuodel, rengalek el mo er a redemerir, me a remekekerei el mo er a remeklou. A templo a muut el mo oureor el merech a oiter er a techolbechelid me a bebil er a chedaol ruoll. Sel blakereng el mo mesiou er a rebeldeked e omak er a rechedam me a rechedil mo er a rengalek a di meleketek.
A Rubak a miles aika el merael mei. Ngii a ulemdasou er ngii, er a bek el teletelel, el uaia bek el teletael el Ngii a mla ngmodech er a chelsel a Ikelesia er Ngii. Ng mla olekiis e kudmekelterir a reblak a rengrir el chad el tir a melilt el mo meruul a meringel el tekoi. Ng meral mla oba kllouelreng e mechikid me kede mesuub a “derstelkib el suobel er a dersta el taem, loudersesei er ngii.”9 Ng mesisiich lurrekodel a temel me a blechebechel er aike Loruul, e uaisei e Ngii a melekoi el kmo a mo chuarm a blechoel meskid a klengeltengat el kid a diak deues er chelechang.
Ak mengesimer lochotii omereng el saul el mo er a Rubak—el Ngii a ulemekellomes er a President Nelson meng siotai er ngak el kirel tial klou el ongdibel. A bek el sikang me a bek el nglunguuch er a kedmeklek a uchul a klengeltengat.
Ak siotai er a rokui el rongesii tial klumech el mo menguiu aika el tekoi e bo moba klaumerang el kmo a Rubak a omekrael er a Olutel a ebangkelio er Ngii me a Ikelesia er Ngii. Ngii oeak kuchei er kid. Ngii a mui lungil medengelii a ngara medad. Ngii a siotai er kau el mo er tial ureor. E Ngii obengkem er a chelsel. Ngii a mla kudmeklii a basio el kirem er a omesiou. E sel bom charm, e ke mo melchesuar a deureng sel molngeseu er a rebebil el mo kldmokl el kirel a luut er Ngii.
Ak olecholt er a klaumerang er ngak el kmo a Chedam el Dios a ngar. A Jesus a Kristo. Tia Ikelesia er Ngii. Ngii a medengelkau e betik a rengul er kau. Ng omekrael er kau. Ng mla rullii a rael el kirem. El ngara chedaol ngklel a Jesus Kristo, amen.