Mei e bom Teloi
Kid a siotai er a rokui el ngelekel a Dios er a beluulechad el rokir el mo teloi e rkid e rtial klou el ureor.
Rodam me a rodos er ngak, me a rsechelik, bek el sandei a rechad er a Ikelesia er a Jesus Kristo er a Uriul-klebesei el Santo er a beluulechad el meliuekl a mengull er a Chedam er a Babeluades, el Dios e King er a beluulechad el rokir, me a Betik er a Rengul Ngelekel, ra Jesus Kristo. Kid a melbedebk er a klengar me a osischeklel a Jesus Kristo el chimol diak a kngtil chad el mle kiei, e klikiid el Ngelekel a Dios. Kede melasm el blechoel, melai er a sacrament el omeletked er a tngakireng er Ngii e ochotii el uase Ngii a moktek er a klengar kid.
Kede betik a rengud er Ngii e mengull er Ngii. Ngokiu a dmolech e diak a ulebengelel beltik el reng er Ngii a uchul, e a Jesus Kristo a mlora ringel e mlad el kirem e kirek. Ng milkengii a tengetengel a kodall, e choridii a merers lomii er a resechelei me a rekaubeltikereng,1 e mesterir a urungulir a roureng, omekungil er a rsmecher, e melubet er a rellechotel.2
Ngii a dodersii a rengud a rengud, klengar kid, me a omengull er kid er a bek el sils. Tiaikid a uchul, e “ke de mengedecheduch ra Kristo, e ngara deureng ra Kristo, [e] olisechakl el kirel a Kristo … me a rengeleked bo lodengei el kmo ng techang ngkel domes er ngii el kirel a ngbetel a kengtid.”3
Ngara Teletelel Oltirakl
Ngdi, kid loltirakl er a Jesus Kristo a lmuut el betok a kired el meruul el diak di dosaod e domerk el kirel a Kristo. A Osobel a Ngii a mle olutii a Ikelesia er Ngii el ngosukid er a rael el mo uai Ngii. A Ikelesia er a Jesus Kristo er a Uriul-klebesei el Santo a teleketek el meskid a techall el mora rolel a roltirakl. Ngokiu omerelled er a chelsel a Ikelesia, e kid a mtebengar a meruul loltirakl er a odbechel Chedaol Reng. Ng er mor ngii a kse er kid lolngeseu er a rebebil loba chubechub me a blekokeuii.
Tia blekeradel er a klengar kid el rokir, e kired el blechoel meruul er ngii.
A merael a chisir el chad er a klekool a chemoit a betok el temir lousekool. aikel klekool lengarngii. Nurs, networkers, nuclear engineers, me a dirrekl el ngak el kmal mengaidesachel el meruul a kall er a uum er Harriet a mla mo sebechel e meduch sel deblechoel el melasem a duch er kid.
Ngak el kabitei er a skoki, ak blechoel lolisechakl er a romekall a skoki lousbech—er a mesil uaia lemeral mesil er a skoki lomekall e rngii. A ua teletelel a mesil a diak di losichekelterir a romekall a skoki el sub a beot el teletelel a bekall; ng dirrek el mesterir a duch er a ikel mo duubech el tekoi el bol chelbangel sel bocha lomekall er a meral skoki.
Osisiu el tekoi el mo er a remeral loltirakl er a Jesus Kristo.
Sel blak a rengud loureor er a chelsel a Ikelesia er a Jesus Kristo me a betok el techall el ngar ngii a ngosukid el mo ungil kldmokl er ngodech el teletael er a klengar, ngii di el ngera el duubech. Kid el chedal a Ikelesia, a kired el modulb er a tekingel a Dios lokiu a reprofet, er a ngara mong el taem me a direk el chelechang. Okiu a blakereng el nglunguuch el mora Demad er a Babeluades, e kid a mo meduch lomtab er a ngerel Chedaol Reng. Kede kongei okedong el mo mesiou, olisechakl, melib, oldingel, e olngeseu. Aikal techall a ngosukid el mukeroul er a reng, uldasou, me a blekeradel.
Aikang a ngosukid el mo kldmokl el mo meruul e oltirakl chedaol telbiil el mo omekngeltengat er kid er chelechall klengar me sel merael mei el klengar.
Mei, bom Teloi er Kemam!
Kid a siotai er a rokui el ngelekel a Dios er a beluulechad el rokir el mo teloi e rkid e rtial klou el ureor. Mei e mesang! Nguldimukl er chelechal taem er a ringel er a COVID-19, e bo dekebetech lokiu a online. Bo mesterir a remisionari er kemam lokiu a online. Dil kau el mo metik el uase tial Ikelesia ngea ngara chelsel. Sel lengelakl tial meringel taem, e bo dekebetech er a rekeblimam me a ikel basio el kim ngara omengull er a chelsel.
Aki siotai er kemiu el mei e olngeseu! Mei e mosiou lobengkemam, loldingel er a rengelekel a Dios, loltirakl a blekeklel Osobel, e rullii tial beluulechad el mo ungil basio.
Mei e bo teloi! Komo melisiich er kemam. E kemiu a dirrek el mo kmal mo, bekokeuii, e ungil a rengmiu el dirrek. A klaumera er kemiu a mo dmolech e kemiu a mo mesisiich—e mo sebechiu lotekangel a ringel me a diak dolsingch longarm er a klengar.
Meng mekera domuchel? Ng betok a rolel.
Aki siotai er kemiu el mo menguiu er a Babier er a Mormon. A lak a babilengiu, eng sebechiu el menguiu er ngii er a ChurchofJesusChrist.org4 a lechub em download er ngii er a Book of Mormon app. A Babier er a Mormon a tara ouchais el kirel a Jesus Kristo e kldemel a Chuodel me a Beches el Renged. Ng somam aikal chedaol llechukl e mesuub el rokui.
Aki siotai er kemiu el morsel ComeuntoChrist.org bo modengei el uase a rechedal a Ikelesia ngera te olisechakl e ngera te oumerang.
Msiotai er a remisionari el mo oldingel er kau lokiu a online a lechub a rekeblimiu a lsebechel—tir oba klumech er a omekungil. Tirkal misionari a mekreos el ngelekam el sechal me a redil el mesiou er a kakerous el beluu er a beluulechad lolab a temir me a ududir.
Chelsel a Ikelesia er a Jesus Kristo, e ko metik a telungalk er a rechad el kuk diak el sal ngodech er kemiu. Ko metik er a rechad lousbech a ngesou er kemiu e sorir lolngeseu er kemiu sel molasm el kmal mo ungil el chad sel klechad—el Dios a ulemeob er kemiu el kirel.
A Chimal Osobel a Berrokel el mora Rokui el Chad
Komlocha omdasou el kmo, “Ak mla remuul a mekngit er a klengar ngak. A kumdasou eng diak el sebechek el mo chedal a Ikelesia er a Jesus Kristo. A Dios a locha diak el soal a chad el uaia ngak.”
A Jesus Kristo, ngokiue a Ngii a “King er a reking,”5el Mesaia, el Ngelekel a ngar el Dios6a kmal omekerreu er a dersta el ngelekel a Dios. Ngii omekerreu el diak el iior er a deruchellel a chad—diak el iior er a iltetel, diak el iior er a kengitl a chad. Sera Lengar beluulechad, e a Osobel a ulngeseu er a rokui: a remlara deureng me a rungil beserir, a retelemall me a remla remiid, me tirkel diak a urungulir. Blechoel, tirkal el Ngii a mle mesiou e oldingel er tir a dimlak el chetengakl, klebokel, a lechub el merau. Oumesingd, tirkel chad el Ngii a milsebechakl a dimlak a kmal ngerang lebsang ng di omereng el saul, ngariou el reng, me a klemeriar reng el mo oumerang.
Alsekum a Jesus a uldersii a klengar Ngii lolngeseu er “tirkal mle ngariou el chad,”7 e a omomdasou eng locha diak el betik a rengul er tire er chelechang? Ng locha diak el ngarngii a basio er a chelsel a Ikelesia er Ngii el mora rokui el ngelekel a Dios? Uldimukl er tirkel omelchesiu el diak el klikiid, mla mechoit, malechub eng di tir el tang?
Ng diak olakael er a klikiid el kirem lobang el mo sebechem el nguu a krazia er a Dios. A nglunguchem a diak el kirel kmal mo klou malechub el klebokel malechub e lungil tekoi el mo morenges er a babeluades.
A mera er ngii, a Dios a diak lochotii omengeleoch8—aikel tekoi el soal a beluulechad a diak a belkul er Ngii. Ngii a medengelii a chelsel a rengum, e Ngii a betik a rengul er kau el diak el iior er a deruchellem, ududem, a lechub rechad lobengkem er a Instagram.
Sel dodars a rengud el mora Demad er a Babeluades e dolkeed er kid er Ngii, e kid a melchesuar lolkeed er Ngii el mei er kid.9
Kid a a rokui el betik er a rengul ngelekel.
Uldimukl er tirkel louketui er Ngii.
Nguldimukl er tirkel, mekedidai a rengrir, diak lolngesenges, me a mo kesib a rengrir er a Dios me a Ikelesia er Ngii, e ngmai a kloklir, e tuobed er a chesimer el merael mocheroid e kmo te kmal diak el luut el mei.
A ngalek sel chiis er a blil, eng diak lotebengar a sebekereng er a chedam me a chedil lomes er tire r a mado. Te oba klengitelreng, e omes er a ngelekir sechal a lechub a redil merael—e oureng ma mekreos el ngelekir a subii a kmo ngerang er tial teletael e locha mesa klengar er a kuk beches el ues—e a uriul eng lemuut el me remei.
Ngosisiu el betik er a rengul Demad el ngara Babeluades. Ngii a mengiil er a luut er kid.
A Osobelem, oba lengelel a beltikereng me a chubechub er a Medal, e mengiil er a luut er kau. Uldimukl alsekum komelchesiu el cheroid er a Dios, e Ngii a di mesekau; e Ngii a mo oba chubechub el kirem e remurt el mo tikeuau.10
Mei e bom teloi.
A Dios a Mechikid me Kede Suub a Klubeled er a Cheleuid er Kid
Kid a beches el ngara omerael er a klengar er a beluulechad el ngara klou el skel a belkul a ngarbab el klemerang. Ng blechoel, kid a di mesang rael el ngarmedad—e diak el sebeched el mesa el uase ngoikid el morker. A betik er a rengud el Demad er a Babeluades a dirkak el beskid a rokui el nger. Ngii a mengerchir kid el di kid el mo mengedechuul a betok el tekoi el kired. Ngii a mengerchir kid el mo oumerang—luldimukl alsekum eng kora meringel.
Ngii a mengerchir kid el mo sumecheklid e bol telkib el sebeched el di kid—el sumechokl e—denguu a tlbakes el bedul uchei.
Tiaikid a rael e kid a mesuub e mukeroul.
Ng sebechem el uase ng kmal soam a rokui bol komakai a lecheklel? Ke mo bleketakl el soam a bek el nger er kau el mo nger? Bek el tab a mla meluches?
A kumerang el uase bebil er kid a mereched el mo mesaik er uai tial teletael er a babeluades. Kede suub a meklou a belkul suobel er a klengar. Okiu a klubeled er a mekngit el deruul. Okiu ouchel reng mesel bododengei el uase a “mekngit a diak el beskid a deureng.”11
A Jesus Kristo, el Ngelekel a Dios, a mlad me luchul a mekngit lomerelled lak bol temellid el terbengid er a omerolled. Ngokiu Ngii, eng sebeched el mo ouchel a rengud, e a mekngit el deruul a sebechel dauch el kirel a ngarbab el klebkall.
Ng diak di el kau el tang el ngara tial omerael. A Demad er a Babeluades a diak blal chitid medorael er a iilkolk.
Tiaikid a uchul, e sera spring er a 1820, e Ngii a dilum lobengkel a Ngelekel Sechal, er a Jesus Kristo, el mora ngeasek el chad, el Joseph Smith.
Momdasou er tial telkib el taem. A Dios er a beluulechad el rokir a dilum er a chad!
Tiang a mle kot er a ikel betok el odingel er a Joseph me a Dios me a bebil er a rechad er a babeluades. Betok er a tekoi ledilung tirkal chedaol chad el morngii a llechukl er a chedaol llechukl er a Ikelesia er a Jesus Kristo er a Uriul-klebesei el Santo. Ng beot a debetik. Ngii dil chad a sebechel menguiu e mesuub a klemechel a Dios el kired er chelechal sils.
Aki siotai er kemiu el mo mesuub.
A Joseph Smith a dirk mle ngeasek sera lengai aikal chedaol ocholt. Betok er tir a mlei ruchei er a bol okedei a rekil.12 Ng dimlak el meduch, e a bebil er a rechad a mle omdasou, el uase ng metitur e diak el sebechel profet er a Rubak.
Eng di a Rubak a di mle mekedongii—loltirakl er a teletael el debetik er ngii er a chelsel chedaol llechukl.
A Dios a dimlak longiil losiik er a klikiid el chad el mo olluut er a ebangkelio er Ngii.
Omko Ngii ng mle uaisei, e Ngii a dirk melemolem el mengii.
A Joseph a di mle uai kau me a ngak. Ng uaisei el Joseph a miruul a chelbirukl, eng di a Dios a ulusbech er ngii el kudmeklii a moktek er Ngii.
President Thomas S. Monson a mle blechoel omelekl er aikal tekoi: “Ngkel okedongii a Rubak, a Rubak a rulii el mo sebechel.”13
A Apostol Paulus a millekoi er a Resanto el mla er a Korint: “Momtab er a okedong er kemiu, rodam me a rodos: ng diak el betok er kemiu a mle mellomes er a klechad; ng diak el betok a mle mesisiich; e diak el betok a milchell er a chetengakl el blai.”14
A Dios ousbech er a ngariou a rengrir el mo kudmeklii a moktek er Ngii. A klemerang a dechor sioning el uase ngklisichel a Dios, ng diak el chad, a kudmeklii a Urerel er a beluulechad.15
Morrenges er Ngii, Moltirakl er Ngii
Me a Dios sera ldum er a Joseph Smith, e Ngii uluchais er a Ngelekel Sechal, el Jesus Kristo, e dilu e kmo, “Mrengesii.”16
A Joseph a uldersii a klngar ngii lorrenges er Ngii e oltirakl er Ngii.
Nguaia Joseph, el doltirakl omuchel lokiu a dolilt el mo rongesii e oltirakl er a Osobel el Jesus Kristo.
Alsekum eng somiu el moltirakl er Ngii, e msisichii a klaumera er kemiu e bo moltirakl er Ngii.
Komo metik el uase kemiu a ulsiseb er a Ikelesia er Ngii—el basio el rechad a mengemedaol er kemiu e sebechiu mo oltirakl e mo ngara deureng.
Ngurungulek, er chelechal erul dart el rekil a Kot el Ues, sel domtab e dosuub er a Olutel a Ikelesia er a Jesus Kristo, e kid momedengei l uase ng diak kuk de el reksi er a cheldecheduch el dilubech. Kau me a ngak a klou a ngercheled tial klou, e melemolem lureor.
Ngera, solae, ngerchelem me a ngerchelek?
Kemo mesuub el kirel a Jesus Kristo. Mesuub a Tekingel. Mo Rongesii e mocholtirakl er Ngii el momeses el kirel tial ureor. Ak siotai er kemiu el mei e teloi!
Ng diak a belkul msal mo klikiid. Ng kirel di ngar ngii a semeriar reng me a klaumerang er kau e mo kmeed er Ngii er a bek el sils.
A ngercheled a mo oubeltikereng e mesiou er a Dios e oubeltikereng e mesiou er a rengelekel a Dios.
A moruul uaisei, a Dios a omechull er kemiu er a beltikereng er Ngii, deureng, me a meral ulekrael er a klengar kemiu, ra chelsel aikal meringel taem, el mong.
Aika kuchais e meskemiu a klengeltengat el ngara mui lomereng el saul me a beltikereng el mora dersta er kemiu, el ngara chedaol ngklel a Osobeled, e Mastang er kid—el Jesus Kristo, amen.