![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fad%2F90%2Fad901cba59d3b327374d9d56d04d34cff1837ec8%2Fad901cba59d3b327374d9d56d04d34cff1837ec8.jpeg/full/!250,/0/default)
Momtab a Klungiolel me a Klisichel a Dios
Ak siotai er kemiu el mo melbedebek er a bek el sils er a klungiolel a Chedam er a Babeluades me a Jesus Kristo me a ikel Tir a mla remuul el kiriu.
Cherengel a taem, me a dirrek el chelsel a meringel el taem, a reprofet a mla mengelechel er kid el mo melatk a klisichel a Dios e omtab aikel Ngii a mla remuul el kired, telungalek er kid, me a rechad.1 A omesodel a debetik er a chedaol llechukl eng ding kmal bleketakl er a chelsel a Babier er a Mormon. A uchelel a smodii a tara moktek er a Babier er a Mormon el “mo olecholt er tirkel rasech er a blai er a Israel aikel meklou el tekoi el Rubak a mla remuul el mora ruchelir.”2 A ulebongel er a Babier er a Mormon e a Moroni a melekoi el kmo: “Ak dmu, er kemiu el kmo sel mngai aika el tekoi … e bo molbedebek e ra chubechub er a Rubak el kirir a rengelekel a chad … e mngai aika el tekoi e melbedebek er a chelsel a rengmiu.”3
Sel osisiu el ongit er a reprofet el mo melbedebek er a klungiolel a Dios a mengasireng.4 A Demad er a Babeluades a soal a bo dolbedebek er a Klungiolel me a klungiolel a Betik er a Rengul Ngelekel, el diak el bol Klungiolir ng bai omelatk er kid el kirel a chubechub er Tir el kired. Sel dolbedebek er a blekokeuii er Tir el kired, e a osenged me a klemedengei er kid a meleketek. A dolbedebek er a klechubechub er Tir, e kede lmuut el mo ngar er eou a rengud, blechoel el meluluuch, e mesisiich.
A mesisiich el teletael lobengkel a smecher el chad el kulemes er ngii a ochotii omereng el saul me a blekerurau me a chubechub el sebechel meltid. Sera 1987, ak mlo medengelii a Thomas Nielson, kmal chetengakl el chad lulusbech el mora botk er a hart. Ng mle 63 a rekil e mle kiei er a Logan, Utah, er a Beluu er a Merikel. Uriul er a bol merek el soldau er a Ongeru el Mekemad, eng mlo bechil a Donna Wilkes er a Logan Utah Temple. Ng kmal mlo mesisiich e meduch el chad er a sment. Aikel rak er ngii ruriul eng mle semeriar loureor lobengkel a kot el klou el ngelekel a ngelekel, er a Jonathan, sel lak a skuul. Tirkal terung a kmal mlo ta rengrir, e ungil a delongelir le Tom a mle betok a leues el teletelel er a Jonathan.
A Tom a mlo seselk a rengul mengiil er a mo donor er a hart er ngii. Ng dimlak el sal klou a rengul chad. Ng mle blechoel soal mereched el meruul aikel lomdasu el meruul lokiu a meringel el urerel me a blakereng er ngii. Tial secherel a hart er ngii, eng kora di merael mo mechitechut, e a Tom a mle blechoel loker ngak el uase ak mekera orchedii tial teletael. Ng mle oungelakl, el melekoi a betok el teletael el sebechek el remuul meng mo sebechel mereched el ngarngii a donor er a hart.
A tara klebesei, eng mlorngii a donor er a hart el mo ra Tom. A klungel me a teletelel a rasech a mle chatter, e ngkal donor a mle ngeasek el chad, el dirk 16 a rekil. Ngkal mle donor er a hart a Jonathan, el le betik er a rengul a Tom el ngelekel a ngelekel. Tiaikid el sils, e a Jonathan a kmal miltemall el mle aksident er a lomekall el subechii er a kzia.
Sera bo kuldingel er a Tom me a Donna er a osbitar, ete kmal mlara klengitelreng. Ng meringel domtab er a klengitelreng le blarngii, sel lodengei el kmo a Tom a mo suobel a le nguu a hart er a ngelekel a ngelekir. A kot, eng mle chetirir tial teletael el melai er a hart er a Jonathan el rechad er a blil a mlara klengitelreng, el ngelekir redil me a bechil. Eng di, a Tom me a Donna a mle medengei, el kmo a Jonathan a mla mo diak loureor a nor er a bdelul, e mlo medengei el kmo a nglunguchir el kirel a hart el mo er a Tom a dimlak luchul e a Jonathan a aksident. Ng diak, a hart er a Jonathan a mle sengk el mo omekngeltengat er a Tom er a taem lousbech er ngii. Te mlo mtebengar el uase a ungil tekoi a mei lokiu tial kerior me te kilengei el melemolem er a ukeruul.
A botk a di mlo ungil besul. Uriul, e a Tom a mlo ngodech el chad. Tia kmal silsichii a bedengel luldimukl er a omereng el saul. Ngouchais er ngak el uase ng bek el tutau lomdasu er a Jonathan, me a ngelekel redil me a bechil, er tial sengk el blal nguu, me a klengeltengat el tial sengk a mla msang. Ng uaisei el dirk omosiroi a teletelel el chad, eng di ak mlo metik el uase a Tom a mla mo medemdemk a rengul, e bekudasu, e bekokeuii el chad.
A Tom a kiliei el teruich me a edei el rak ruriul er a botk er a hart, el ngii a rak el mle sebechel diak lemolem. Ng melekoi el uase aikaikid el rak a milsa techall lolngeseu er a telungalek er ngii me a rebebil er a rechad lokiu a blekerurau me a beltikereng. Ng mle uchul a kerruul e ungil okesiu el mo er a rebetok el chad er a ungil blekeradel me a blakereng.
Kid a uaia Tom, el dersta er kid a mla ngmai a sengk el diak el sebeched el di kid el ngmai, ng sengk el mlara Chedam er a Babeluades me a Ngelekel Sechal, luldimukl a osebeled lokiu a tngakireng er a Jesus Kristo.5 Kid a mla nguu a klengar er tial beluulechad; e mo nguu a klengar er sel tara beluu ruriul, me a diak a ulebengelel klengar—alsekum e kid a melilt el kirel—ngii el rokui el sebeched el Chedam er a Babeluades me a Jesus Kristo a uchul.
Bek el taem el dousbech, ngmai a klungiaol kired, a lechub e kede melatk el kirel aika el sengk, eng kired el melatk er a omelenget, blekerurau, me a chubechub er tirkel milskid. A omengull er tirkel lodars el mei er kid a klou a ultutelel er a di mereng a saul. Sel dolbedebek aika el sengk er Tir eng kirel lomult er kid.
A ta er a kmal ungil okesiul a omult a Kekerei el Alma. El Alma a mle “melemolem el omtok er a Dios,”6 a anghel a dilum. El ua otto er a derumk,7 a anghel a milellach er a Alma ele ngulmetok er a Ikelesia “e merechorech a rengrir a rechad.8 A anghel a dochelir tia el olisechakl: Bong, e bo molbedebek a kelebsengir a redemmiu e molebedebek a meklou el tekoi el [Dios] a mla remuul el kirir.9 Chelsel a rokui el omengelechel, sei a kmal ngera a anghel a ulmeketakl er ngii.
Alma a ouchel e melebedebek. A uriul e ng uluuchais el kirel a osisecheklel a anghel el mo er a ngelekel el sechal er a Helaman. Alma a milellach, Ak mengelechel el kmo ke meruul aike el kirek el meruul, el melebedebek a kelebsengir a redemad; le tir a mla er a kelbus, e dimlak a mo melubet er tir e ng di mle ta el Dios er a Abraham, Isak, me a Jakob; e ngii a milubet er tir er a ringelir.10 A Alma a di mle beot el ouchais, Ngak a nguu a klaumerang er ngak el msang.11 Alma a mle medengei el kmo a omelebedebek el kirel a otebedir er a kelbus me a ngesou er a taem er a ringel me a ongarm er a rokui el tekoi, e kede mo medengelii a Dios me a meral el yaksok er Ngii.12
Bebil er kid a mla melechesuar a meklou el tekoi el ua Alma, e ng di a belted a sebechel el osisiu el klou el mengodech. A Osobel a mle yaksok er a irechar:
“Beches el reng a bok beskemiu, e loia er a chelsel a rengmiu: e ngak a mo otebedii er kemiu sel medecherecher el reng … , e meskemiu a reng er a tech.
“E mo meskemiu a reng er ngak. …
“… E ko mo chedak, e ngak a mo Dios er kemiu.”13
A mla mekiis er a kodall el Osobel a dilu er a re Nephites el uase ngera uchelel a bult. Ng dillii a klou a belkul tekoi er sel uldesuel a Chedam er a Babeluades el kmo:
“A Demak a uldureklak el mo mad er a kerus, luriul er a kodellek er a kerus, eng mo sebechir a rokui el chad el mei er ngak. …
“Tiaikid a uchul ak mla mokiis; e uaisei, e okiu a klisichel a Chedam eak ngoiteterir a rokuiel chad el mei er ngak.”14
Ke mekerang e mo kmeed er a Osobel? Ka molatk se er a Jesus Kristo a mle otireklii a soal a Chedam, a Klisichel er a kodall, e mlo otekau a kngtim me a chlitechetum, e Nguu a klisichel a Chedam el kirem, me sel ngarbab el osobelel el kirem.15 Aikang diak bla bol sebechel ngoikau el mo kmeed er Ngii? Aika a merngak. A Jesus Kristo a “dechor el berrokel a chimal, e oureng e semeriar lomekungil, ousubes, mengikiid, melisiich, mengikiid, e omiich er [kau].”16
Aika el tekoi a kirel meskid a beches el reng a oderchid el mo oltirakl er a Chedam er a Babeluades me a Jesus Kristo. Eng di a beches el reng a dirrek el “sebechel mo oumededenger, … e sebechel mo ikrii a Dios el [kid] a betik a rengud er ngii.”17 Sel sobecheklid er tial teletael, eng kired el melbedebek er a bek el sils aikel sengk el bla dengai me a klungiaol el beskid. A King Benjamin a milellach, “A kureng me molbedebek, e bo blechoel melatk, er a klungiolel a Dios … me a kllouelreng er ngii el kiriu.”18 A lsekum kede rullii, e kede mo ngmai a ungil klengeltengat er a babeluades.
Sel dolbedebek a klungiolel a Dios me a chubechub e ngosukid el mo ungil lorrenges a chedaol tekoi. Seikid, a rullid el mo mesisiich lobult el bedul chedaol tekoi e rullid el mo medengelii a klemerang er a rokui el tekoi lokiu a klisichel Chedaol Reng.19 Tia uldimukl a klaumerang er a klemrang er a Babier er a Mormon, ma klemedengei el kmo a Jesus a Kristo, a Osobel e Olsobel er kid, e kongei er a mla moluut el ebangkelio er Ngii er tial uriul klebesei.20
Sel dolbedebek er a klisichel a Chedam er a Babeluades me a Jesus Kristo me ikel Tir a mla remuul el kired, eng diak bol beot a rengud el kirir, el uaia Tom el dimlak el beot er a rengul kirel a hart er a Jonathan lengiluu. Ngara deureng me a omengull, e a Tom a dobedebekii er a bek el sils a kerior el dilubech el mlo uchul eng komengetii a klengar ngii. Mesel dodengei el kmo ng sebeched el mo suobel e kiei el mora ulebongel, eng kired el mo melbedebek el kmo a mo suobel el mora ulebongel a kired el meringel loureor kirel.21 Ng sebeched el mo ngara deureng sel bo dodengei el kmo a lak a Jesus Kristo e kede remiid leng di Ngii a uchul eng sebeched el nguu sel kot el ngarbab el sengk er a Chedam er a Babeluades.22 Ng klemerang, tiaikid el teletael a rullid el mo oba deureng er a yaksok er a “diak a ulebengelel klengar er tial beluulechad” e mo nguu a “diak a ulebengelel klengar … e mo suobel” er sel merael mei el klengar.23
Sel dolatk er a klungiolel a Chedam er a Babeluades me a Jesus Kristo, e a klaumera er kid er Tir a mo chachisois. A nglunguched a mengodech le kid el medengei el uase a Dios a Demad e kid a Rengelekel. Ng diak dosiik el mo melodech er a moktek er Ngii ng bai kirel a soad el mo chatter er a Soal me bo dengai a klengeltengat el Ngii a meskid, lultuil er a ongtid el kirel.24 Kede osiik el muut el mo medemdemk a rengud, muut el mo klikiid, muut el mo mesisiich, e lmuut el mo uaia Kristo.25 AIka el mengodech er kid a rullid el mo ngmai a lmuut el bebil er a klengletengat er a babeluades.
Sel dochotii el kmo a rokui el ungil tekoi a mei lokiu a Jesus Kristo, eng mo sebeched lochotii a klaumera er kid el mo er a rebebil er a rechad.26 Ng mo mesisiich a rengud sel bo dechelbangel a meringel el tekoi me a teletael.27 Kede mo mesisiich loltirakl a telbiil el bla deruul lobengkel a Osobel.28 Kede mo mui er a beltikereng er a Dios, e mo soad lolngeseu er a rengesool e diak dorritel er tir, e obeltikereng er a rengeleked e omekeroul er tir el ngara llemalt, e mo ouchel a rengud er a kngtid, e blechoel ngara deureng.29 Aikaikid a klebokel el redechel sel dolbedebek er a klungiolel me a chubechub er a Dios.
A Osobel a kuk mle omeklatk,“Ng diak a ngerang el relii a chad el ongesechii a rengul a Dios, malechub el bol kesib a rengul ra kmong techang, ng di tirkel diak loureng a sulel ra rokui el tekoi.”30 A kumdasu a Dios a diak bol kesib a rengul a dobes er Ngii. Ak bai, omdasu el kmo Ngii a kmal mo telord a rengul. Ngii a medengei el uase kid a cheroid er a techall el mo kmeed er Ngii lokiu omelbedebek el Kirel me a Klungiolel. Seikid e kid a Choridid er Ngii me a ikel tokubets el klengeltengat el Ngii a mla yaksok er kid.31
Ak siotai er kemiu el mo melbedebek er a bek el sils er a klungiolel a Chedam er a Babeluades me a Jesus Kristo me a ikel Tir a mla remuul el kiriru. A omeletkiu er a Klungiolir bol mesisiich lomak a rengmiu el mo er Tir.32 Molbedebek er a chubechub er Tir, e kemiu a mo ngeltengat er a chedaol tekoi e mo merael mo uaia Kristo. Ng di a dolbedebek er a chubechub er Ngii e ngosukid el “mo outekangel el mo er a ulebongel,” el di merekmo “bo er a babelaudes” e mo “kiei lobengkel a Dios er a diak a ulebengelel deureng.”33
A Demad er a Babeluades, a millekoi el kirel a Betik er a Rengul Ngelekel el kmo,“Mrengesii!”34 Sel moltirakl e morrenges a Tekingel, e molbedebek, e mngara deureng me a omengull, el kmo a Osobel a soal oluut aikel diak el sebechem loluut, Ngii a soal mo omekungil a telemall el kau a diak el sebechem el omekchubs, Ngii a soal mo sumechokl a mla metemall;35 e Ngii a sumechokl aikel cheleuid el tekoi el kirem;36e Ngii a soal sumechokl a telemall el reng.37
Sel kulbedebek a sengk er a Chedam er a Babeluades me a Jesus Kristo, e ak mla mo medengelii sel meral beltikereng er Tir me sel diak a smodii el chubechub er Tir el kriri a rokui el rengelekel a Chedam er a Babeluades.38 Tia el klemedengei a milngodech er a ngak, e dirrek el mo mengodech er a kau. El ngara a ngklel a Jesus Kristo, amen.