Ng mekera e a Priesthood a Omekngeltengat er a Rengeasek
Okiu a priesthood, e kid a sebeched el modars. A priesthood a meskid a llomes el mera beluulechad.
Ak dmeu a renguk el ngar tiang. Sera kot el bokudengei el kmo ak mo mengedecheduch er kemiu er chelechal sils, ak kmal mle semeriar e diosisiu el taem ng reou a renguk. Ak chiloit a klou el taem el omdasu a kmo ngera sebechek el mo ouchais, e a kuureng me a Chedaol Reng bo lemelemalt el mengedecheduch er kau el okiu a cheldechedechak.
Chelsel a Babier er a Mormon, a Lehi a ulemekngeltengat er a rengelekel sechal uchei er a lemad el ngii a ulngeseu er tir el mes a klisichir me a diak a ulebengelel el ultekllir. Ngak a kot el kekerei er a delongelir a reteai el ngalek, e tia el mlo merek el rak e ng ketengel di ngak a chimo el ngalek er a blai. Ng telkib el meringel er ngak sel diak a rebebil er ngak el kmeed me a lechub el ngar er ngii a sebechek el mengedecheduch er ngii. Ngar er ngii a klebesei el ngak a kmal mo sabisi. Ng mesaul a renguk er a delak me a demak, el tir a mla melasem el mo er a tkul er bab el sebechir el olengeseu er ngak. A ta er a olechotel a sera demak a di mle ngii el soal el omeksak a klengeltengat er a priesthood er a ongelaod er a chelsel a kmal meringel el team. Uriul er a omekngeltengat, a rokui el tekoi a dimlak dil mereched el mengodech, e ng di ng mlo sebechek el melechesuar a budech me a beltikelreng er a Demak er Babeluades me a dirrek el demak. Ak ngeltengat el ngar er ngii a klikiid el demak el ngii a sebechel el kudmokl a klengeltengat er a priesthood er a ngidi el team el ngak a ousbech e ngii a ngosukak el mes a klisichek me a diak a ulebengelel ultekllek, el di ua Lehi er se er a lomekngeltengat er a rengelekel.
Diak el ior er a tekoi el omchelbangel, kau a sebechem el blechoel el ngar er ngii a techellem el ngmai a klengeltengat er a priesthood. Okiu a rechedal a telungalek er kau, resechelim, ngara omesiou el odam, merredel er a priesthood, me a Chedam er a Babeluades el ngii a diak el metom er kau, ng sebechem el mo ngmai a klengeltengat er a priesthood. Elder Neil L. Andersen a melekoi: “A klengeltengat er a priesthood a diak a ulbengelel e muut el klou er ngike el ngii a mongit el mengedmokl er tia el sengk. … El kid a klikiid, a chedaol ruoll er a priesthood a smisichii a klengar er kid.”1
Lak momael er a rengum el olengit a klengeltengat se el kau a kmal ousbech a bebil er a omekrael. Ng chelsel aike el meringel el team el kid a kot el ousbech er a Chedaol Reng el mo olengeseu er kid. Ng diak a chad el cherrungel, e kid el rokui a mo chelbangel a ringel. Bebil er kid alta te chuarm er a sebekreng, meringel el berraod er a uldasu, tekoi el bol sau e meringel el mengoit, me a lechub e ng di omelechesiu el kmo ng ngesonges. A klengeltengat er a priesthood a sebechel el ngosukid el mo mesisiich er a ika el ongarm e mo nguu a budech e melemolem el omakes el bedul a ngar medad el taem. Ak oureng el kmo kede mo melasem el kiei el klikiid el mo ngmai aika el klengeltengat.
A ta er a rolel e a priesthood a omekngeltengat er kid a okiu a klengeltengat er a patriarch. Ak mla subii el mo chemau a klengeltengat er a patriarch se el kumelchesiu el mekngit a renguk me a lechub ak sabisi. A klengeltengat er ngak a ngosukak el mo mesa se el ultekelek me a keltukel el uldesuel a Dios el kirek. Ng meskak ongelaod e ngosukak el mesa ikrel a osengek er a beluulechad. Ng omeklatk er ngak er a sengk me a klengeltengat el ngak a mo ngmai a lsekum ak kiei el klikiid. Ng dirrek el ngosukak el mo melebedebek e mo melechesuar a budech el Dios a mo meskak a nger e mo mkais a chesimer el kirek er sel kltukl el team el ngak a kmal ousbech.
Klengeltengat er a patriarch a olengeseu el mengedmokl er kid el muut el mo kiei el obengkel a Demad er Babeluades. Ak medengei el kmo a klengeltengat er a patriarch a mlara Dios e sebechel ngosukid el mult a klitechetud el mo klisiched. Aika diak el tekingir a remengelil; aikal klengaltengat a ouchais er a kid aikel kired wl mo medengei. Ng di uaia Liahona el mora tang me a tang er kid. Sel denguu a Dios el mo ruchei e oba klaumerang er Ngii, Ngii a mo omekrael er kid er a chereomel el de ngar er ngii.
El di uaia Dios el ulemekngeltengat er a Joseph Smith el oba priesthood el mo uchul e a klengeltengat er a ebangkelio a sebechel moluut, e ng sebeched el mo ngmai aike el klengeltengat er a ebangkelio er a chelsel a klengar er kid el okiu a priesthood. Bek el sandei e kid a ngar er ngii a lemelted me a techelled el mo nguu a sakrament. Ng okiu tia el chedaol ruoll er a priesthood, e ng sebechel Chedaol Reng el blechoel el obengked, el ngii a sebechel el omekbeches e melikiid er kid. Alsekum kede melchesuar el kmo ng kired el mengoit a kmo ngerang er a chelsel a klengar er kid, bom mesa tara moumerang er ngii el merredel el ngii a sebechel ngosukau el mo er a melemalt er rael. A remerredel a sebechir el ngosukau el mo nguu a mui el klisichel a Tngakireng er a Jesus Kristo.
Doldanges er a priesthood, e ng sebeched el dirrek el ngmai a klengeltengat er a chedaol ruoll er a templo. Sera blo el sebechek el soiseb er a chelsel a templo, e ak rirelii er a renguk el mo nguu meng mo ruoll el kblechoel el mong. Se el kungoit a temek e melenget el mo kmeed er a Demak er Babeluades er a Chedaol el blil, e ak mla mukngeltengat el mo ngmai a ocholt me a ongelulau el ngii a mla ngosukak er a chelsel a klengar er ngak.
Okiu a priesthood, e kid a sebeched el modars. A priesthood a meskid a llomes el mera beluulechad. Elder Robert D. Hales a melekoi: “A lak a klisichel a priesthood, ‘a beluulechad el rokir a mo diak a ultutelel’ (see D&C 2:1–3). Ng mo diak a llomes, mo diak a oureng—di mo ilkolk.”2
A Dios a oieng er kid. Ngii a soal kid a deluut el mo er Ngii. Ngii a medengelkid. Ngii a medengelkemiu. Ngii a betik a rengul er kid. Ngii a blechoel el melebedebek e omekngeltengat er kid ngii mese el sekum kede melechesuar el kmo ng diak el melemalt er a rengud. Ngii a medengei el kmo ngera kede ousbech e oingerang e kede ousbech er ngii.
“Molengit, me bom ngai; mosiik, me bo betik; molengod, me lobok el kiriu:
“Le tirkel lolengit a mo ngmai; e tirkel losiik a mo metik; e ngike el melengod a mo obok el kirel” (Mateus 7:7–8).
Alsekum e kau a dirkak el bo er ngii a olechotel a klaumerang er kau er a priesthood, ak mengesuseu er kau el mo meluluuch e olengit el di kau el mo medengelii a klisichel e mo menguiu a Chedaol Lechukl el mo remenges a tekingel a Dios. Ak medengei el kmo a lsekum kede rullii er a rengud el mo melasem el mo melechesuar a klisichel a priesthood er a Dios er a chelsel a klengar er kid, e kede mo ngeltengat. Loba ngklel a Jesus Kristo, amen.