Kiei el Sioning er a Ngar el Kristo

Mla er a Bishop Gérald Caussé

Presiding Bishop

Ng mle meringel a sils sera spring er a 2017, e mle ngarngii sel temel a omsarech er a Paris France Templo ea ta el sechal a mlo er ngikal tour guide e kora mle diak sal ungil a osengel. Ng dilung el kmo ng kiei er a bita er a templo e kmal di mle bleketakl ouchais el kmo ngulemtok er tial okedecherul a templo. Nguluuchais el kmo a tara klebesei eng mla er a blil el ulmes el bedul rikl, e milsang a klou el torak el mengidel er tial bleob el chaus er a Jesus el mlar bab e mekokil el nguu loiang er a chetemel a templo. Ngikal sechal a uluuchais el kmo tiang el lilsang a ngildechii a rengul el kirel a Ikelesia. Ng mlo medengei el kmo kid a mesiungel a Jesus Kristo e ulengit a klausubes el kirel aikel mle mekngit el blekerdelel er a uchei.

siasing/Llecheklel

Bleob el chaus el mlo dechor er a Paris France Templo.

A bleob el chaus er a Kristus, el besichel a chetemel a Paris Templo me a bebil er a kloklel a Ikelesia, a ouchais er a beltkil a rengud el mo er a Osobel. Sel mle kot el bleob el chaus el mle meruul er a marble a mle urerel a kldachelbai el chad er a Danish el Bertel Thorvaldsen, el dilsechii er sera 1820—el osisiu el rak el mla er ngii a Kot el Ues. Tial bleob el chaus a ngarngii a klekakerous er ngii me a betok el teletelel a omeruul el klalou er sel taem, el ngii a olechotel a Kristo el mlo chuarm er a kerus. A urerel a Thorvaldsen a olechotel a ngar el Kristo, el mlo mesisiich er a kodall e, uldars a chimal, e ulengit er a rokui el mo er Ngii. Ng di ikel ultil a deel er a Chimal me a ochil me a telmall el ngara chebaod er Ngii a ouchais er sel klou el ringel el Ngii a ulutekangel er ngii el mo olsobel er a rokui el chad.

siasing/Llecheklel

Chimal a Osobel el chemolt er tial Kristus

Ng locha tara uchul e kid el rechedal a Iklesia er a Jesus Kristo er a Uriul-klebesei el Santo a betik a rengud er tial bleob el chaus ele kede lotkii sel cheldecheduch el ngara Babier er a Mormon el Osobel a mlo chemolt er a beluu el meliuekl er a Merikel.

siasing/Llecheklel

Jesus Kristo mlo oldingel aikel beluu er a Merikel

“E chelechang, e te milsang a Chad el metengelang er babeluades; el mle bleiull er a becheleleu e kekemangel bail; meng mlei el me dechor er a delongelir. …

“Meng mocha merk a chimal e dula el mo er a rechad, el kmo:

“Kamomes, Ngak a Jesus Kristo, …

“… Me ak mla melim er a kob er a mechuuached el Chedam a milskak, e mla msa klebkall a Chedam ra kngai el chemol a kengtil a beluulechad.”¹

Meng ulengit er a derta el sechal, redil, me a ngalek el mlong e lotuu a chimorir er a Chebaod er Ngii, e remutech a util a deel er a Chimal me a ochil, me bo el sioning el kmo Ngii ngkel Mesaia el blo el meketeket el mengiil er Ngii.²

Tia el ongasireng el ues a kot el ngarbab el telengtengil a Babier er a Mormon. Tia el “ungil chais” er a ebangkelio a chemolt er tial llecheklel a Osobel el Ngii a mekekokil odars a “chim er a klechubechub”³ e olengit er a derta el chad el mei er Ngii me bo el nguu a klengeltengat er a Tngakireng er Ngii.

A chedul a klemechel a Babier er a Mormon a mo olutii a klemerang el klemedengei el ngii a klou a ultutelel el ngerchelel a Jesus Kristo el mo olsobel e nguu a ngarbab el klengeltengat el mo er a rechad. Tiang el moktek a chemolt er sel omesodel a babier el mo lmuut er sel kmal ulebongel el bliongel. Ngokiu a dart el rak er a rebet me a chedaol el rau el reng, e sel dmolech el belkul omeruul el Kristo a rirelii er a Gethsemane me a Kolkata a ririid malechub eng mlo diak a belkul. Ngkol uangerang a diul a rengul a Joseph Smith, se ra loliuid er a 1 Nephi, el lesang tial mengasireng el yaksok: “Aikang el uriul el rekord [er a Babier er a Mormon] … a mo ochotii a klemerang er sel kot [el Biblia] … e mo ocholt a bleketakl e mekreos el tekoi el ngii a mlo dibus er a delongelir; e mo chemolt el mo er a rokui el klauchad, tekoi er a ngor, me a rechad, el kmo a Sib er a Dios a Ngelekel a Diak a Ulebengelel Chedam el Sechal, e Osobelel a beluulechad; ea rokui el chad a kirir el mei er ngii, e le lak eng diak el bo el suobel.”⁴

A bleketakl e mekreos el klemerang el kirel a Tngakireng er a Osobel a mekdekudem el medung er tia el Babier er a Mormon. Me sel kumasech a bebil er a ikal klemerang, e ak kulengit er kemiu me momtab el kmo ng milkerang e ngodechii malechub eng mekerang e sebechel ngodechii a klengar er kemiu.

A Tngakireng er a Jesus Kristo a sengk el modars el mo er a rokui el tir a mla kiei, tirekel dirk ke kiei, me a tirkel mo kiei er a beluulechad.⁵
Ng uldimukl er a berraod er a kengtid el doltekau, ea Kristo a ngilai a kengtil a rengud, klechitechetud, ringeled, sechered, me a rokui el ringel el ngii a mei er a rechad er tial klengar. Ng diak a sebekreng, ringel malechub eng klengit el reng el Ngii a dimlak el bo el chuarm er ngii el kired.⁶
A melngakireng er a Osobel a ngosukid el mo mesisiich er a chelitechetul a Rebetel a Adam, el uldimukl er a kodall er a tech. Eleng Kristo a uchul, ea rokui el rengelekel a Dios el milechell er tial beluulechad, el diak el ior a le blel mekedung, a mo chemau omeruul el delbengir me a bedengir a mo dmak el okiu a klisichel a Okiis er a Kodall⁷ e lmuut el mo er Ngii el “mo er a kerrekeriil … kirel a [omerellir].”⁸
E se el kuk klekakerous er tiang, e sel ngeiul a cherrungel el klengeltengat er a Tngakireng er a Osobel a mei eleng blakereng er kid ⁹ el kiei el oltirakl a “osisecheklel a Kristo.”¹⁰ Se el berusel, a Lehi a milsang a melemalt e chibutek el rael¹¹ el ulmekrael el mo er sel kerrekar er a klengar. A redechel a olechotel a beltkil a rengul a Dios el mlocholt el okiu a klengeltengat er a Tngakireng er a Kristo, el kot el mekreos el kloklel e mo nguibes er ngii … [e] ngii a kot el ngarbab er a ikel rokui el sengk er a Dios.¹² Sel uchul eng mo sebeched el nguu tia el rodech, eng kired el mo ousbech a klaumerang er kid er a Jesus Kristo, e ouchel, “e mo orrenges a tekingel a Dios,”¹³ e mo ngmai a meklou a ultutelel chedaol ruoll, e mo oltirakl a chedaol telbiil el mo lmuut er a ulebengelel a klengar er kid.¹⁴
Ng okiu a Tngakireng er Ngii, ea Jesus Kristo a diak el dil ngubet a kengtid, Ngii a dirrek el odersii a klisiichel mo er a remesiungel me “[bol becherei] a di klechad,”¹⁵e mekekokil “merael el mo ungil,”¹⁶ e mo mui er chedaol teletael¹⁷me a tara klebesei eng sebeched el mo mecherrungel el uaia Kristo,¹⁸ meng mo sebeched el lmuut el mo kiei el obengkel a Dios¹⁹e mo ngmai a rokui el klengeltengat er a rengedel a babeluades.²⁰

A dirrek el tara menglou a reng el klemerang el ngara Babier er a Mormon a uasei, meng locha mo er a rokui el chad, ea Tngakireng er a Rubak a sengk, el mo er ta el chad, el ungil el mo er a derta el chad.²¹ El di uai a Jesus el ulengit er a derta er tirkel remesiungel a Nephite el mo remutech a Telmellel, e Ngii a mlad el kirel a dersta er kid el rokui, el mo er a ta el chad, el uai a lsekum e kemiu me a ngak a dimle chimol chad el ngar tia el beluulechad. Ngii a odersii a ongtil el mera derta er kid el mei er Ngii e mo ngmai a meringelchad el klengeltengat er a Tngakireng er Ngii.²²

A teletelel a Tngakireng er a Kristo a meral mo merang sel domtab a okesiul a retokubets el ungil resechal me a redil el ngara chelsel a Babier er a Mormon. El uldimukl er tir a Enos, Alma, Zeezrom, King Lamoni, me a bechil, me a rechedal a King Benjamin. A cheldechederir er sera lobult me a mesisiich el klaumerang er tir a olechotel a kiei el sioning el kmo ng mekerang ea rengud a sebechel mo mengodech me a klengar er kid a mo mengodech lokiu a diak ulebengelel klungiaol me a klechubechub er a Rubak.²³

A profet Alma a uleker er a rechedal er tial klou a ultutelel el ker. Ng dilung, “A lsekum e komla mo melchesiu er a bult el reng, ko mla mo melchesiu er kemiu el somiu el mengitakl er a cheliteklel a beltik el reng er a Osobel, meng soak loker, komo melchesiu re ngii er chelechang?”²⁴ Tial ker a kmal klou a ultutelel er chelechang, ele sel demesiungel a Rubak, e sel Klisichel a mo obengked, e melisiich er kid, e mo mengodech er kid er a bek el sils.

A keril a Alma a sebechel mo ngodecheii el mo oker, ng oingerang e kemiu a kmal dirk ulmelchesuar er sel ungil teletelel a Tngakireng er a Osobel er a klengar er kemiu? Tiang a duubech sel molechesuar a “meringelchad me a ungil” deureng²⁵el mei er kemiu el mo ouchais a sioning er kemiu el kmo a kngtmiu a bla lousubes; malechub e a meringel el teletael el mchau a di mo kiul mo kebekakl; malechub a rengmiu a mo medemedemk e kemiu mo sebechemiu el lousubes er a chad el tilmelemiu. Malechub e ke mo omtab er a klisichiu el mo oubeltik el reng e olngeseu er a rebebil a merael el mo klou malechub ea omerelel a mo chedaol a rullemiu el mo ngodech el chad, el di uai a okesiul a Osobel.²⁶

Ak sioning el kmo a ikal rokui el teletael a merang e olechotel el kmo a klengar a sebechel mo mengodech el okiu a klaumerang er a Jesus Kristo me a Tngakireng er Ngii. A Babier er a Mormon a meketeklii e menglou a klemedengei er kid er tial kot el ngarbab el sengk. Mesel kemiu a mesuub er tial babier, e komo rongesii a ngerel a ngar el Kristo el olengit er kemiu me bo er Ngii. Ak yaksok er kemiu el kmo sel mkengei er tial ongit e mo sumecheklii a klengar kemiu el oltirakl a okesiul a Kristo, e sel omerellel a ngebetel a klengit er Ngii a mei er a chelsel a klengar er kemiu. Ngokiu a klisichel a Chedaol Reng, ea Osobel a mo omekngodech er kemiu er a bek el sils “el mo er sel cherrungel el sils”²⁷ sel kemiu a mo sebechemiu, el Ngii a dmung, “Mesang a medak me bomodengei el kmo Ngak ki Ngii.”²⁸ El ngara a ngklel a Jesus Kristo, bol uaisei.