![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F62%2F33%2F6233906a8aa70cc099f1dfe65b599879806ca81c%2F6233906a8aa70cc099f1dfe65b599879806ca81c.jpeg/full/!250,/0/default)
“Tial Blai Bo el Mekedechor el Ngara Ngklek”
(Doctrine and Covenants 124:40)
Kede bai omtab a telbiil el mengai me a chedaol ruoll el mekedmokl er a chelsel a templo a kmal meklou a ultutelel el mo mengikiid a rengud e mo olsobel er a rsechal me a redil ngelekel a Dios.
Chelsel sel Chedaol Oreomel er a erul dart el rak er a memong, e a ngeasek el Joseph Smith a milsa e milngedecheduch er a Dios, el Diak a Ulebengelel Chedam, me a Ngelekel, er a Jesus Kristo. Ngulkiu Tir, e a Joseph a mlo medengelii a meral teletelel a Kledios me a melemolem el chedaol ocholt lokiu tiaikid el ues er a uriul klebesei el ngii a “cherrengelel a rokui el tekoi er chelechal taem.”1
Kmeed el edei el rak ruriul, e a nger er a blakereng el nglunguuch er sel kesus er a September 21, 1823, el delmerab er a Joseph a mlo iimis el mellomes a chelsel el uaia “llomes er a sueleb a sils.”2 A chad a dilum er bita er a dukellel, e ulemekedong er a ngklel ngika el buik e dilu el kmo “ngoderuchel el mlodurokl er a rengedel a Dios … e a ngklel a mle Moroni.”3 Ng silbedii a Joseph el kirel a mochu er ngii el Babier er a Mormon.
E a Moroni a dilii sel tekoi el mla er a hong er a Malakai er a Chuodel el Renged, el di telkib el kekerei a ngedechel a er sel ngara a King James Version:
“Me chelechang, e ngak a mo ochotii a Priesthood el mo er kau, el okiu a chimal a profet el Elijah, er a uchei sel mei sel klou e kdekudell el sils er a Rubak. …
“E ngii a mo dolemii er a rengrir a rengalek sel telbiil milkedmokl el mo er a redemerir, me a rengrir a rengalek a mo obult el kirir a redemerir. E le lak, e tial beluulechad el rokir a mo nguemed er a luut er ngii.”4
Ng klou a belkul, le tekingel a Moroni el mo er a Joseph Smith el kirel a urerel a Elijah a mlo uchelel a ureor er a templo me a reksi er a telungalek er a urirul klebesei e kmal mle klou a ultutelel el kirel olutel a “rokui el tekoi, el Dios a mla dmung lokiu a rechedaol profet er ngii er a uchelel a beluulechad.”5
Me nglunguchek el kirel a ngelseuil Chedaol Reng er chelechal dedak e dosuub a telbiil, chedaol ruoll, me a klengeltengat el ngara chelsel a templo er a Ikelesia er a Jesus Kristo er a Uriul-klebesei el Santo.
Olutel a Elijah
Ak omuchel loker a klou a belkul ker: Ngera uchul me a olutel Elijah a mle klou a belkul?
“Ngokiu chedaol ocholt er chelechal uriul-klebesei e kede mo medengei el kmo a Elijah a uleba sel klisiich lomak er a Melchizedek Priesthood”6 e “mle ulebongel el profet loba ngii el priesthood ruchei er a lemei a Jesus Kristo.”7
A Profet Joseph Smith a silodii el kmo: “A reng, klisiich, me a okedongel a Elijah a kmo, ngar er ngii a klisichem el mo oba kisel a … cherrengelel a Melchizedek Priesthood … ; e mo … ngmai … a rokui el chedaol ruoll er a rengedel a Dios, el osisiu el mora beltel a rengrir a redemerir el mo er a rengelekir, me a rengrir a rengelekir el mo er a redemerir, osisiu el mo er tirkel ngara babeluades.”8
Tial chedaol klisiich lomak a deleuill a kmal klou a ultutelel le ikel “moak er a beluulechad a moak er a babeluades me a ikel mekedoked er a beluulechad a mekedoked er a babeluades.”9
A Joseph a millemolem el meketeklii el kmo: “Ng mekera Dios a bo lolsobel er tial telcheroll? Ngii a mo odureklii a profet Elijah. … A Elijah a ngii a mo odersii sel klisiich er a telbiil lomak a rengrir a rechedam el mo er a rengelekir, me a rengrir a rengelekir el mo er a redemerir.”10
A Elijah me a Moses a dilum er bebul a rois a ngiluu tiaikid el klisiich el msa Petrus, Jakobus, me a Johanes.11 Sera April 3, 1836, e ngii el Elijah me a Moses me a Elias a dilum er a chelsel a Templo er a Kirkland a ngiluu tiaikid losisiu el kiis er a priesthood el msa Joseph Smith me a Oliver Cowdery.12
A olutel tial klisiich lomak a deleuill lokiu a Elijah er sera 1836 a kmal mle klou a ultutelel el kirel a kedmeklel a beluulechad ruchei er a Ongeru Lemei Osobel e milchelii a klemeriar reng er a beluulechad el kirel a urerel a reksi er a telungalek.
Mengodech, Obult, me a Mengikiid el Reng
A tekoi el reng a engelakl er a tal telael a iidisel llechukl er a chelsel chedaol llechukl. Tial beot eng di klou a belkul tekoi a blechoel lochotii sel meral ngara rengul a chad. A rengud—el ngii a uldekial aikel desemeriar el tekoi, soad el meruul, moktek, urunguled, me a blekerdeled—a ochotii a teleteled e oterkeklid er sel ngii a de bo er ngii. E a kmal moktek er a urerel a Rubak a melodech, omult, e mengikiid a rengud lokiu a telbiil el ngara ebangkelio me a chedaol ruoll er a priesthood.
Kid a diak di domekedechor me a lechub e bo desiseb er a templo el kuk di mo milil malechub e kuk di dolai chised er a chelsel. Kede bai omtab, a telbiil el mengai me a chedaol ruoll el mekedmokl er a chelsel a templo a kmal meklou a ultutelel el mo mengikiid a rengud e mo olsobel er a rsechal me a redil ngelekel a Dios.
A beltel a rengrir a rengalek er sel telbiil el milkedmokl el mo er a redemerir—lulemuchel er a taem er a Abraham, Isaac, me a Jakob—el mo mult a rengrir a rengalek el mo er a redemerir, me a urerel a reksi er a telungalek, me a chedaol ruoll er a chelsel a templo a ureor el mo omekngeltengat er a dersta el chad er a ikal erul beluulechad. Me sel bol blak a rengud el kirel tial chedaol ureor, e kid otireklii sel llach er a mo oubeltikereng e mesiou er a Dios me a retonari er kid.13 E tiaikid el teletael er a omesiou a ngosukid el meral mo “Rongesii!”14 e merael bedul Osobel.15
Aikel kot el chedaol telbiil me a chedaol ruoll er a priesthood a di mekedmokl er a chelsel a templo el ngii a—Blil a Rubak. A rokui el tekoi el desuub me a rokui el mekedmokl er a chelsel a templo a di melutk el kirel a chedaol Jesus Kristo me a Urerel er a chelsel a uldesuel a Chedam er a Babeluades el kirel a deureng.
Ngara Chelsel mo er a Ikrel
A President Ezra Taft Benson a silodii a klou a belkul teletael el Osobel a meskid “el kirel a diak luut el kodall el kired me a diak a ulebengelel klengar el mo er a chad.”16 Ng dilu el kmo: “A Rubak oureor er a chelsel mo er a ikrel. E a beluulechad oureor er a ikrel el mo er a chelsel. A beluulechad oltobed er a rechad er a mekngit. Ea Kristo otebedii a mekngit er a chad, e tir a otebedeterir er a mekngit. A beluulechad a dosechii a chad el melodech er a lengarngii el basio. E a Kristo ngodechii chad el mo sebechel ngodechii a lengarngii el basio. A beluulechad a melasech er a blekerdelel a chad, eng di Kristo sebechel ngodechii a klechad er a chad.”17
A telbiil me a chedaol ruoll er a priesthood a kmal meklou a ultutelel el kirel osebelel a reng me a beltel a chad; e ikaikid a teletael el Rubak ousbech lomult er kid. A telbiil el desal mo ungil lotirakl, e deblechoel melbedebek, e llechukl “lokiu a Chedaol Reng er a ngar el Dios … er a chelsel a rengud”18 a meskid a moktek me a selbechakl el reng el kirel a klengeltengat er tial klengar me a diak a ulebengelel klengar. A chedaol ruoll el mengai lokiu a klikiid el klengar e deblechoel melbedebek a mo mekengii babeluades el klisichel a kledios a sebechel me soiseb er a klengar kid.
Kid a diak de bo er a templo el mo omart er kid malechub e dechiis ongetikaik er a beluulechad. Kede bai, mo er a templo el mo melisiich er kid er a ongetikaik er a beluulechad. Me sel desiotai el mei er a klengar kid a “klisichel a kledios”19 sel doruul chedaol ruoll er a priesthood e dengai e dotirakl a chedaol telbiil, e kede mo mukngeltengat lengelakl er a di klisiched20 el mo odngakl ongetikaik me a olibesongel er tial klengar e mo meruul a ungil.
A Chisel Tial Blai a mo Berrokel
A mle kot el templo er chelechal taem a mle dechor er a Kirkland, Ohio e mloterekokl er sera March 27, 1836.
Ngokiu chedaol ocholt el mlo er a Profet Joseph Smith er a tal sandei ruriul er a lemoterekokl tial templo, e a Rubak a millekoi el kmo:
“A rengrir a rokui el chedak bol ngara deureng, el tir a ulab, a rokui el klisichir, e mekedecherur el ngara ngklek. …
“A rengrir a rebetok er a telael el chad a mo ngara deureng er a klengeltengat el mo mechubel el kirir, me a klengeltengat el remesiungek a mla ngmai er tial blai.
“E a chisel tial blai bo loberk el mo er a kakerous el beluu; e tiaikid a uchelel a klengeltengat el ngii a mo mechubel er a bdelrir a rechedak.”21
A kulengit me momtab er sel tekoi el kmo a rengrir a rebetok er a telael chad a mo ngara klou el deurenge a chisel tial blai a mo obriid el mo er a kakerous el beluu. Aika mle meang el tekoi el mildung er sera April er a 1836, el Ikelesia a kmal di mle kesai a rechedal e di mle chimong a templo.
Chelechal sils er a rak er a 2020, e ngarngii a dart me a okolem me a kleai el templo. A okeua me a kltiu el templo a merael a ureor er ngii malechub eng mla muchais. Chelecha e a Blil a Rubak a mla mokedechor er a ikel “beluu el ngara iuns”22 me a beluu me a basio el betok el chad a ulemdasu el kmo ng diak el sebechel mo dechor a templo er ngii.
A teletael er a chelsel a templo er chelechang a mocholt er a okai me a eai el kakerous lomelekoi e lmuut el merael mo obdois er a kakerous lomelekoi sel lolemolem okedecherul a templo el mo omekngeltengat er a rengelekel a Dios. Chelsel aika el merael mei el teruich me a eim el rak, e a iidisel a kakerous lomelekoi el mo ngarngii er a chelsel a templo a mo chachisois.
Chelechal rak eng mo omuchel a urerel a tacher me a kleai el templo. A kuk domes er a bitang, eng mle dart me a okeim el rak lomekedechor a ikel mle kot el tacher me a kleai el templo, er sera uchelel a teketekel a Ikelesia er a 1830 el mo lmuut er a oterkeklel a Tokyo Japan Templo lokiu a President Spencer W. Kimball er sera 1980.
Ka momtab er a rechedel a urerel a templo er a di chelsel a klengar er a President Russell M. Nelson. Sera lemechell a President Nelson er a September 9, 1924, eng di mle kllolem a templo er a Ikelesia.
Sera lemoterekokl el Apostol er a April 7, 1984, e a okolem el rak ruriul, e a lluich me a kllolem el templo a mla momerek, ng mlo obdois er a lluich el templo er a di chelsel okolem el rak.
A President Nelson er a lemokedong el mo Merredel er a Ikelesia, eng mla er ngii a dart me a okeim me a kltiu el templo, ng mla mo obdois er a dart me a okedei me a kldei er a di chelsel a okedei me a eua el rak le chedal a Chelechad er a Teruich me a terung.
E sera bo Lorredel er a Ikelesia er a January 14, 2018, e a President Nelson a milchisii okedecherul a okedei me a kleim el beches el templo.
Oketiu me a elolem el basent er a templo er chelechal taem a bla loterekokl a President Nelson; el okai me a eua el basent er ngii a bla loterekokl er sera lekot el mo Apostol.
A Moktek er Kau bo el Blechoel ngara Ikel Meklou a Ultutelel Tekoi
Me kid el chedal a mla moluut el Ikelesia er a Rubak, eng mechas a rengud er a rretel a Urerel er chelechal uriul klebesei. E a lmuut el bebil er a templo a morngii.
A Brigham Young a ulemlaoch el kmo, “A rokir tial ureor eng kirel diak di lechimong a templo ng bai mo betok, el derstelael sechal me a redil a mo soiseb er a ikal templo e remuul a ureor el kirir tirkel mla kiei er a uchelel el mo er sel taem el Rubak a mochotii.”23
Kede medengei, el chisel okedecherul a beches el templo a uchul a klou el deureng e kired loureng a sulel a Rubak el kirel. Eng di, sel kmal moktek er kid a kirel lultuil er a telbiil me a chedaol ruoll el ngii a ngmodech a rengud e dolechii a blakereng er kid el bedul Osobel ng diak di dechat er a basio me a klebekelel tial blai.
Sel klou el ngerachel doba el rokui el chedal a mla moluut el Ikelesia er a Rubak a (Kot) e kede mo “Rongesii!”24 me a rengud bol mengodech lokiu a telbiil me a chedaol ruoll, e a (Ongerung) bo dengara klou el deureng er a ikel chedaol ngerachel el mo odars a klengeltengat er a templo el mo er a rokui el chad er a ikal erul beluu. Ngokiu a tekingel me a ngelseuil a Rubak, e kede meral kudmokl aika el chedaol ngerachel.
Teketekel a Zion
A Profet el Joseph Smith a dilu el kmo:
“A teketekel a Zion a ngii a moktek er a klemeriar reng er a rechedal a Dios er a bek taem; ngii a dodai el reprofet, prist, me a reking a mla kiei el ngara deureng el kirel; te kiliei lultuil er a deureng er sel sils er kid; e mla olsingch e ngara omengitakl e meluches e omlaoch er tiaikid el sils er kid; eng di te mla mo dibus e dimlak lesa tiaikid el sils er kid; … me chelecha eng ngercheled el mesang, e mo oureor loltaut er a klebkellel tia Uriul-klebesei.”25
“El Priesthood er a babeluades a mo ngara beluulechad, el mo kudmokl aikel meklou a belkul moktek; … el ngii a ureor el Dios me a reanghel a di mla olsingch e melbedebek el kirel el meketeketa el taem; e mle urungulir a re patriarch me a reprofet er a irechar; el ngii el ureor a moktek er ngii a mo choridii a klisichel a iilkolk, e kudmeklii a beluulechad, me a klebkellel a Dios, me a osebelel a telungalek er a chad.”26
A kuuchais el kmo a Chedam me a Ngalek a dilum er a Joseph Smith, me a Elijah a mla olutii a klisiich lomak. A chedaol telbiil me a ruoll a sebechel smisiich e kmikiid a rengud sel “Derengesii!”27 e denguu a klisichel a kledios loia er a rengud. E ngak a sioning el kmo tial ureor er chelechal uriul-klebesei a mo choridii a iilkolk e mesterir a telungalek er a chad a diak a ulebengelel klengar. A ikal klemerang a dmeu a renguk el ouchais loba chedaol ngklel a Rubak el Jesus Kristo, amen.