Sel Ngarbab el Moktek
Kid el medengelii a uldesuel a Chedam e ngara telbiil el mo meruul a ngar er ngii a bleketakl el ngercheled el mo olisechakl aika el klemerang.
A dengara chelsel ongarm me a ringel, eng di kid a kmal ngeltengat! Tial klou longdibel a mla mekekid er a dmolech el beltikereng er a Olutel ebangkelio er a Jesus Kristo. Kede ngara deureng er a dmiel a Chedam me a Ngelekel el milchelii Oluut. Kede mla muklatk er a mengasireng el urerel a Babier er a Mormon, el kmal moktek er ngii a ouchais el kirel a Jesus Kristo me a Osischeklel. Kid a mla mukbeches el ngara deureng er a klemerang el kirel chedaol locholt—el mo er a reprofet me a dersta er kid. Kede mla remenges a mekreos el chisel a klaumerang er a cherrungel el Tngakireng er a Jesus Kristo me a meral Okisel er a Kodall. Me kede mla mosisechakl a bebil er a klemerang er a cherrengelel ebangkelio er Ngii el mlocholt el mo er a Joseph Smith ruriul er a Dios el Chedam ledu er ngika el beches el mla mokedong el profet el kmo: “Ngika Betik er a Renguk el Ngelekek. Mrengesii!” (Joseph Smith—History 1:17).
Ng mla lmuut el mo mesisiich a klemedengei er kid er a olutel a priesthood me a kiis er ngii. Kede mla lmuut el mo mesisiich er a blakereng er kid el mo omekedong er mla moluut el Ikelesia er a Rubak er sel meral ngklel, el Ikelesia er a Jesus Kristo er a Uriul-klebesei el Santo. E dirrek el mla mongit el mo dmak e ngara sengerenger me a nglunguuch el melasm el mengkekerei a telmellel tial meringel secher el mla mekelkelii a beluulechad. Chelechal tutau e kede mlosisechakl er a ngar el profet er a Rubak el milskid a meang el reksi er a Oluut. Aki oisisii chisel el kmo tirkel “mo ngara nglunguuch e mesuub er a klemechel Oluut e ultuil er a klaumerang a mo ngeltengat el mo nguu a sioning er tir el kirel a chedaol moktek er ngii el kirel a kedmeklel a beluulechad er sel telib Longeru Lemei a Rubak e Osobeled, el Jesus Kristo.”1
Uldasu
Aika el rokui a telengtengil a chedaol uldasu el moktek er ngii a mo rulterir a rengelekel a Dios el mo suobel e mo uai Ngii. A chedaol llechukl a melekoi el kirel kmo “ngarbab luldasu er a deureng,” “uldasu er a mo suobel,” me a “uldasu er a kiei el mo cherechar” (Alma 42:8, 11, 5e tial uldasu—el mla mocholt lokiu Oluut—a ulemuchel er sel klou longdibel er a babeluades. Kid el mle reng, a mle semeriar el mo nguu a diak a ulebengelel klengar loeak a roungalek er kid er a babeluades. Seikid el taem e kid a mla omakes el mo er ngii el dimlak a bedenged er a tech me a chiuis. Sel mo meskid a techall, e a Dios el Chedam a kildmeklii a beluulechad. Chelsel tial uldasu er a klengar er a beluulechad, e kid a mo mechesechusem er a klengit sel bo dechebangel a ultok el klou a belkul kirel a chedaol ulekeruled. Kede dirrek el mo chelbangel er a kodall er a tech. Sel mo sobecheklid er a kodall me a klengit, e a Demad er a Babeluades a meskid Osobel. A Okiis er a Kodellel a sobecheklid el rokui er a kodall, e a tngakireng er Ngii a kokad a belsed me kede rokui el mo klikiid er a klengit loltirakl aikel mildung el kirel me bol sebeched el mukeroul. A Tngakireng er a Jesus Kristo a kmal moktek er a uldesuel a Chedam.
Sel longdibel el mla er a Babeluades, e a rokui el ngelekel a Dios er a reng a mlo medengelii tial uldesuel a Chedam, luldimukl a mo teletael er a beluulechad me a ongarm, me a ngesou er a babeluades, me a klebokel lulebengelel ruriul. Ng di mle uchelel e kede mesa ulebengelel. A rokui el chad el mla mechell er tial beluulechad a ngileltii a uldesuel a Chedam e milsebechakl er ngii er sel mondai dilubech er a babeluades ruriul. Betok er kid a dirrek el milruul aikal telbiil lobengkel a Demad el kirel aikel bo loruul er a klengar er a beluulechad. Ngokiu a teletael el dirkak el mocholt, ng di a blekerdeled er sel belurir a redeleb a ngarngii a relii er a teletael dengarngii er a beluulechad.
Klengar er a beluulechad me a Belurir a Rdeleb
Chelcha kmo telkib el smaod a meklou a belkul tekoi er a chelsel sel uldesuel a Chedam el ngii a ngar ngii a relii er a klengar kid er a beluulechad me a sel belurir a redeleb ruriul.
A moktek er a klengar er a beluulechad me a ulekeruled ruriul er a kodall a mesterir a rengelekel a Dios a techall el mo uai Ngii. Tiaikid a kmal urungulel a Chedam er a Babeluades el kirir a rokui el Ngelekel. A rolel e kede mo nguu tiaikid el klengar, e a diak a ulebengelel llach a kmo ng kired el mo klikiid lokiu a Tngakireng er a Jesus Kristo me bol sebeched el kiei er a rengedel a Chedam me a Ngelekel e bo dengara deureng el mo suobel. El ua osisechakl el ngara Babier er a Mormon, Ngii a siotai “er a rokui el mer ngii e bol nguu sel lungil er Ngii; e ngii a diak lekotouar er tirkel mer ngii, mechedelekelk me a becheleleu, rekelbus ma mimokl, resechal me a redil; e ngii a melakt er tirkel diak el kristiano; ea rokui a di osisiu el mo er a Dios” (2 Nephi 26:33; dirrek el mesa Alma 5:49).
A chedaol uldasu el kirel sel ngii a kired el mo er ngii a ultuil er kid el mo melilt lodngeklii a mekngit el mengetikaik er kid el mo omtok a llechul a Dios me a Uldesuel. Ng dirrek el kired el mo obangel a ultok er tial klengar er a beluulechad, a le kngterir a rebebil a lechub eng kuk di chelitechut er a cheroll. A bebil er a taem e a ulekeruled a ultuil er a ongarm me a kerior e bai diak lultuil er a ungil klengar me a budech el denga rngii. E diak a tara ikal ultok er a klengar er a chutem el sebechel mo nguu sel diak a ulebengelel moktek er ngii omko kmo ngera el chedaol a mei el tongetengid er a ikal ongarm er a klechad.
Tial uldasu ochotii a klengar kid er a ulebongel, me a moktek me a teletelel tial lomerael er a klengar er a chutem, me a ngesou er a babeluades el bo dengai. A llechul a Dios a mekletkid el kirel a mengeroid er kid er a kengaol el teletael. A osischeklir a remerredel a mekrolid er a rael e meskid a selbechakl reng el melisiich er kid er a omerolled el mo er a ulebongel.
A uldesuel a Dios a meskid a eua el tekoi el mo ngosukid er tial lomerael er a klengar er a chutem. Ngii el rokui a mei lokiu a Tngakireng er a Jesus Kristo, el kmal moktek er tial luldasu. A kot a mekletkid el kmo ngokiu a tngakireng er Ngii el kirel a klengit el douchel a rengud el kirel, eng sebeched el mo klikiid er a ikaikid el klengit. Seikid e a chubechub e uriul merritel “a mo diak luut el dobedebek” (Doctrine and Covenants 58:42).
Ongerung, e a tebedechel a Tngakireng er a Osobel, e Ngii a Ngilai a rokui el ringel er a klechad. Tia rulii meng sebeched el ngmai a chedaol ngesou me a klisiich el mo otekau a berraod er a klechad, er kid me a rechad, el uaia rua mekemad me a secher. A Babier er a Mormon a meskid a bleketakl lomesodel er a chedaol llechukl tial klou el klisichel a Tngakireng. A Osobel a ngilai a “ringel me a secherir [me a chelitecheterir] a rechedal. … Ngii a mo chemol a rokui el chelitecheterir, me rengul bol mui er a chubechub, lokiu a tech, be bo lodengei el kmo ng mekera lolngeseu er a rechedal loltirakl aikel chelitecheterir” (Alma 7:11–12).
Ongedei, a Osobel, lokiu a cherrungel el Tngakireng er Ngii, a kodekedii a rengedel a kodall e meskid a deureng el kirel a kmo kid el rokui a mo mekiis er a kodall. A Babier er a Mormon olisechakl el kmo, “Tial oluut a mei er a rokui, a remeklou me a rengeasek, a remimokl me a rekelebus, rsechal me a redil, a remekngit me a remelemalt; luldimukl a chui er a bdelud meng diak bol riid; le rokui el tekoi a moluut el mo er sel cherrungel el teletelel” (Alma 11:44).
Kede oudkeu er a klemerang el kirel Okiis er a kodall me a Pasqua. Tia meskid a uldasu me a klisiich el mo otekau a ringel er a klechad el dersta er kid a mo obangel me tirkel betik er a rengud, el uaia rua secherel a bedenged, uldesued, a lechub a chelitechetul a rengud el mlengai er a cheroll a lechub eng mei er tial klengar kid er a beluulechad. Okiis er a kodall a uchul, e kede medengei el kmo aika el chelitechut er a klechad a di kedeb el taem.
A mlamoluut el ebangkelio a subedid el kmo a Okiis er a kodall a uldimukl er ngii a techall el mo obengterir a rechedal a telungalek er kid—bechid, rengeleked, me a redemad me a redelad. Tia kmal smisichid el mo kudmokl a ngercheled er a telungalek er kid er a chelechal taem. Ngosukid el dmak el kiei el ngara beltikereng er tial klengar e olsingch el bodedak el ngara deureng ruriul.
Ongeuang e ulebongel, a chedaol ocholt er chelechal taem osischeklid el kmo a omerolled a diak el medebes er a kodall. Ng kekerei a mla mocholt el kirel tial klou a ultutelel tekoi. Kede medengei el kmo tial klengar a taem el dongedmokl er kid el mo omes er a Dios e diak dongeteket er a ouchel reng er kid (mesa Alma 34:32–33). E dirrek, el mla mosisechakl el kmo sel belurir a redeleb a merael a urerel osischeklel ebangkelio el mo er “tirkel mekngit me a re dimlak loltirakl a llach e uleketui er a klemerang” (Doctrine and Covenants 138:29) me tirkel mosisechakl risei a ngarngii a techellir el mo ouchel a rengrir e ngosechekl el mo er a Ulebongel el Kerkeriil (mesa bades 31–34, 57–59).
Aikakid a bebil er a meral tekoi er a uldesuel a Demad er a Babeluades:
A mla moluut el ebangkelio er a Jesus Kristo a meskid a tokubets luldesued el kirel a tekoi er a deleboes, chebechiil, me a omechell er a rengalek. Ngolisechakl el kmo a chebechiil el ultuil er a uldesuel a Dios a klou a ultutelel el mo kudmeklii a moktek er a uldesuel a Dios, luchul a chedaol basio el kirel a cheroll er a beluulechad, e kudmekelterir a rechedal a telungalek el kirel a diak a ulebengelel klengar. “A chebechiil a mechedaol er a Dios el mora tang,” ng millekoi a Rubak, “… beluulechad bol sebechel rekir a ulebengelel a blebelel” (Doctrine and Covenants 49:15–16). Ng uaisei, el chelsel tiang, el Uldesuel, a mo omtok a mesisiich el llach me a siukang er a beluulechad.
A klisiich lomeob a klengar a kot el ngarbab el klisiich el Dios a mla mesterir a Rengelekel. A usbechellel a tilobed er sel kot el llach el mo er a Adam me a Eva, eng di a tara klou a belkul llach a mlei lolkebai er a mekngit el usbechellel. A lemekedmokl er a ikrel a chebechiil, e tirkel rokui lousbech er tial klisiich a ngara chelsel a klou el klengit e melemall er sel kot el chedaol blebelel a sechal me a redil. Sel kmal luchul e a mla moluut el ebangkelio olisechakl el kirel tial llach er a deleboes a ultuil er a moktek er sel klisiich el dobang lomeob er a rengalek el mo kudmeklii a uldesuel a Dios.
Me kede Mekerang?
Chelechal eru el dart el rekil a Kot el Ues, lulemuchel er a urerel Oluut, e kede medengelii a uldesuel a Rubak e mla mo mesisiich er a chelsel erul dart el rak ra klengeltengat lokiu a mla moluut el Ikelesia er Ngii. Chelechal rak ra 2020, e kede oba sel omekedong er ngii el kmo 20/20 losenged er a teletael dilubech er a ngaramong.
Eng di, sel domes el bedul a ngarmedad, e a osenged a dirk cheroid. Kede medengei el kmo eru el dart el rak ruriul er a Okiis er a kodall, e a belurir a redeleb er chelechang a ngarngii a rebetok el meduch loureor el mengedmokl er a osisechakl el ngarngii risei. Kede dirrek el medengei el kmo chelecha eng mla mo betok a templo el meruul chedaol ruoll e ra diak a ulebengelel el mo er tirkel louchel a rengrir e mo urrekodel er a ebangkelio er a Rubak er a ika leru el beluu. Aika el rokui a lomelemii a uldesuel a Chedam er a Babeluades. A beltikereng er a Dios a kmal klou, eng di diak luldimukl er tirkel kesai el mlo oltirakl er a diablong, Ngii a mla kudmeklii a teletael er a klebkall el mora rokui el Ngelekel (mesa Doctrine and Covenants 76:43).
Kede medengei el kmo a Osobel a lmuut el mei e morngii a tal telael rak ra budech el mo rokir a uldesuel a Dios. Kede dirrek el medengei el uase ng mo er ngii a kakerous lokiis er a kodall, er a remelemalt me a rediak, lobengkel a ulebongel el kerkeriil er a dersta el chad lokiuellel okisel er a kodall.
Kede mo mukerrekeriil lultuil er a omerelled, soal a rengud, me sel ngii a mla mo teleteled el chad. Tial kerkeriil a mo rulterir a rokui el ngelekel a Dios el ngosechekl el mo er a rengedel a klebkall lultuil er a blekongesenges er tir me sel bo lulserechakl er ngii. Ng kel mo oukerkeriil aika el rokui a Osobeled, el Jesus Kristo (mesa Johanes 5:22; 2 Nephi 9:41). A Llemesel a Msa cherrungel klemedengei el kirel a rokui lomerelled me a soal a rengud, tirkel dimlak louchel a rengrir a lechub eng dimlak el mengodech me a tirkel mle ouchel a rengrir e mlengodech. A leuaisei, e a uriul er a kerkeriil er Ngii e kid el rokui a mo kombesar el “kmo a kerkeriil er ngii a melemalt” (Mosiah 16:1).
A ulebongel, e a kuchais er a klemerang el mla mei er ngak lokiu a betok el babier er a tengami me a dirrek sel kumes a betok longit er a rechad el sorir lemuut el mei er a Ikelesia ruriul er a lemengubet a ngklir a lechub eng rebet a uchul. Betok el chedal a ikelesia a diak lodengelii tial luldasu er a mo suobel, el ngii a nger er a betok el ker el kirel osisechakl me a llach er a mla moluut el Ikelesia. Kid el medengelii a uldesuel a Dios e mla soiseb er a telbiil el mo meruul e oba bleketakl el ngerachel el mo olisechakl aika el klemerang e meruul aikel rokui el sebeched el ngmai el mo er a rebebil me a teletael dengar chelsel er tial beluulechad. A kuuchais el kirel a Jesus Kristo, el Osobel e Olsobel er kid, el ngii a uchul a rokui el tekoi a mo sebechel mekedmokl, el ngara ngklel a Jesus Kristo, amen.