![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fa1%2F63%2Fa163e63090bf5688af658836854efcbd92b8ddc3%2Fa163e63090bf5688af658836854efcbd92b8ddc3.jpeg/full/!250,/0/default)
Mengesimer a Cheldecheduch
A dersta el klikiid a ousbech a cherungel el obult er a uldasou me reng el mo uaia Rubak.
Betik er a renguk el rodam me a rodos, me sel de bora ulebengelel tial reksi el ongdibel, e kede oureng a sulel a Rubak el kirel a ungil cheldecheduch me a chelitakl el merkid. Kede de meral mla oldeu a rengud er tial chedaol blengur.
Kid a medengei el kmo a olutel a ebangkelio er a Jesus Kristo a meskid a runguled me a deureng el mo er a rechad el mo orrenges e oltirakl a Osisecheklel. Kede dirrek el medengei el kmo a bek el obliil a sebechel mo blil a klaumerang, el budech, beltik el reng, me a Chedaol Reng er a Rubak a sebechel kiei er ngii.
Ng uaisei, sel mekreos kloklel a Oltel a chedaol templo. A chedaol ruoll me a telbiil a meklou a ututelel el mengetmokl er a rechad el mla meketmokl el mo mengemedaol er a Osobel er sel Longerung el Lomrolel. Chelecha el taem eng ngarngii a 166 el templo, ea lemuut el betok a dirke mei.
A odngelel a blai[open house] a ngarngii er a uchei er a lemechedaol aikel beches me a mla omekbeches el templo. Ng betok el resechelid el diak lengara klechelid er kid a mo mesarech aikal templo e mo smuub a bebil kirel a klengetengat er a templo. Ea rebebil er tirkal rechad a mo sorir lemuut el mo medengei el kirel. A rebebil a mo ngarngii a rengrir loker el mekerang eng sebecherir el mo ngmai a klengetengat er a templo.
Me sel de rechad er a Ikelesia, ng kired el mo keltmokl el mo onger a kerir. Ng sebeched smodii el kmo a klengetengat er a templo a sebechel mo er a ngidil chad el tir a mo kudmekelterir. Engdi a uchei er a le soisb er a cheledaol el templo, eng kirir el mla moterekokl el sebecherir. A Rubak a soal a rokui el Rengelekel el mo melai a diak ulebengelel klengeltengat el ngara chelsel a templo er Ngii. Ngii a mla mengedereder el kmo a dersta el chad ngerang kirel rulii meng mo sebechel soisb er a chedaol el Blil.
A ungil basio el domuchel er ngii er tial techall er a olisechakl a mo ocholt aikel tekoi el blotk el llechukl er a ikrel a templo: “Chedaol el mo er a Rubak: ng Blil a Rubak.” Sel cheldechedechal a President Henry B. Eyring me a rebetok rebebil a ulmekllomes er kid el lemuut el mo chedaol. A bek el templo a chedaol basio; e tirkel chad el mo er a templo a melasm el lemuut el mo chedaol.
Aikel reuoll el mo soisb er a templo a telengtengil a chad el mo chedaol. Mesel domes a ketmeklel, ea dersta el chad el soal el mo oldeu a rengul er a klengeltengat er a templo a mo er a teblong el berrotel el cheldecheduch[interview]: kot a obengkel a bisop, bisopric counselor, malechub eng merreder er a branch; ongerung a obengkel a merreder er a stake malechub eng mission malechub eng chimo er a re counselor. Chelsel tial berrotel el cheldecheduch[interview], eng ngarngii a bebil er a ker el bo loker.
A bebil er a ikal ker a dirk mlo mukngodech me bol bleketakl. Ng soak el mo melekoi el mo er kau er a chelechang:
-
Ngar er ngii a klaumerang er kau er a Dios, el Diak a Ulebengelel Chedam; Ngelekel, el Jesus Kristo; me a Chedaol Reng?
-
Ngar er ngii a klaumerang er kau er a Tngakireng er a Kristo me a Urerel el Osobelem e Olsobel?
-
Ngar er ngii a klaumerang er kau er a Olutel ebangkelio er a Jesus Kristo?
-
Ke oldubech er a Merredel er a Ikelesia er a Jesus Kristo er a Uriul-klebesei el Santo el profet, chad er a ues, me a ocholt e di chimo el chad el nga er a beluulechad el loba ngerachel el kirel a ike el rokui el kiis er a priesthood?
Ke oldubech er a rechedal a First Presidency me a Chelechad er a Teruich me a terung el Apostol el profet, rechad er a ues, me a ocholt?
Ke oldubech er a rebebil el General Authorities me a roungerachel er a Ikelesia er a basio el mngar ngii?
-
A Rubak a dilung el kmo a rokui el tekoi a mo keldmokl e beches er a uchei er Ngii (mesa Doctrine and Covenants 42:41).
Ke melasm el mo klikiid a uldesuem me a omrelem?
Ke oltirakl er a llach el kirel a klikiid er a tekoi er a deleboes?
-
Ke oltirakl a osisecheklel a Ikelesia er a Jesus Kristo sel dil kau me a teletelem er a bouai lobengterir a telungalek er kau me a rebebil?
-
Kau ke oldubech malechub ke ouchais a ngidil osisechakl, omeruul, malechub eng tekoi el ngii a ngodech er a ikel ngara Ikelesia er a Jesus Kristo er a Uriul-klebesei el Santo?
-
Kau ke melasm el mengull er a Chedaol sils, sel om ngara blim me a Ikelesia; e mora rokui el miting; keldmokl el mo melai er a sakrament; e mesmechokl er a klengar kau el oltirakl a llechul ebangkelio?
-
Kau ke melasm el meruul a klemerang er ikel rokui el omoruul?
-
Kau ke mui el harau ongeltacher?
-
Kau ke medengelii e oltriakl er a Llach er a Ulekerreuil a Bedenged?
-
Ngar er ngii a udoud el molechang malechub e ng bebil er a ngerchelem el mo er a di mla bechim malechub a rengelekem?
Alsekum e ng choi, e ke oltirakl aika el ngerchelem er chelechal taem?
-
Kau ke oltirakl a telbiil el omriruul er a chelsel a templo, luldimukl a oubail a garment er a templo el selaod er sel omelisiich[endowment]?
-
Ngarngii a meklou el klengit el ngara klengar er kau el ngii a kirel mo mesmechokl lobengkel a priesthood authorities el telengtengil a ouchel reng el kirem?
-
Omomdasou e ke klikiid el mo soiseb er a blil a Rubak e meruul a ikel chedaol ruoll er a chelsel a templo?
A klukuk, e aikal mlo omekngodech el ker er a babier er a templo a mo merous el mo er a remerreder er a Ikelesia meliuekl er a beluulechad.
Uldimukl er sel mo onger aikel ker el melekoi a klemerang, eng klemedengei el kmo a dersta meklou el chad el mo er a templo a mo oubail a chedaol garment er a priesthood le ngara eungel a bilir loubail. Tiang a olechotel a ikel dechal a rengud el mo melasm er a bek el sils el mo uai a Rubak. Ng dirrek el omklatk er kid el mo blechoel oltirakl a telbiil el meruul er a bek el sils e mo merael er sel rael er a telbiil er a bek el sils er a ngarbab e chedaol omeruul.
Chelechang, telkib el taem, ng soak el mengedecheduch el mo er a rengeasek. Aki outkeu er kau mebo le sebechem el nguu sel kedeb-usbechellel babier er a templo. Te di mo oker er kau a ker el ngii a kirel a omengetmeklem el mo meruul a chedaol ruoll er a omtechei techolbechelid me a omengedaol. Aki dmeu a rengmam el kau a klikiid e semeriar el mo meruul aikel chedaol ureor er a templo. Aki mereng a sulem!
Sel kuk di omerelel a tal chad el klikiid el mo soisb er a blil a Rubak a kirel ngar ngii sel omengetmeklel a chedaol teletael el mo er ngii. Engdi sel mobang a ngesuil a Rubak, eng sebechel a rokui el tekoi el meruul. Ng uai a mla medung, ng beot a ulekedecherur a templo ra bai ulekedecherur a rechad el keldmokl el mo er a templo. Klikiid er a tal chad a kirel mobult a uldesuel me a rengul el mo uai a Rubak, el mo klemerang el chad er a bouai, e mo ungil olechotel, e mo chedaol el chad.
A kuuchais el kmo omengetmeklel a ureor a odars a betok el klengeltengat er a chelsel tial klengar me a betok el klengeltengat er sel klengar el merael mei, el uldimukl el mengeluolu er a telungalek er kau el mo cherechar el ngara “diak-a ulebengelel deuelreng.”1
Chelchang soak el mo mesaod er a tara tekoi: moktek er tial meral mei el rak. Sel temel a spring er a rak ra 2020, eng meral merot el erul dart[200] el rak sera Joseph Smith blo lechau a ues el mlara Dios el kid a medengelii el Kot el Ues. Dios el Chedam, me a Betik er a Rengul Ngelekel Sechal, el Jesus Kristo, a mlo chemolt el mo er a Joseph sera le teruich me eua[14] rekil el ngeasek. Tial teletael a omtutk er sel Oltel a ebangkelio er a Jesus Kristo el cherrungel, e mellemalt el mildung er a chelsel a Biblia.2
Ma le uasiei eng mlo er ngii a blechobech el odingel el mla er a rechad er a klumech er a babeluades, el uldimukl er a Moroni, Johanes el chad er a Techolb, me a ruliakuchei el re Apostol el Petrus, James, me a Johanes. Ea okiuelir a rebebil, el uldimukl er a Moses, Elias, me a Elijah. A dersta er oba chedaol klisiich el mo lemuut el omekngeltengat er a rengelekel a Dios el ngara beluulechad.
Ng ongasireng, e kid a mla nguu a Babier er a Mormon: Tiang a Dirrek el Ouchais el Kirel a Jesus Kristo, el keldemel a chedaol llechukl el mo er a Biblia. A ikel ocholt el llechukl er a Doctrine and Covenants me a Pearl of Great Price a dirrek el mla mo ungil omdois a klemedengei er kid el kirel a llechul a Dios me a diak a ulebengelel klemerang.
A ikel kiis me a obis er a priesthood a mla moluut, el uldimukl er a obis er a Apostol, Rokeuid, patriarch, high priest, elder, bisop, priest, teacher, me a deacon. Me a redil el betik a rengrir er a Rubak el blak a rengrir mesiou er a Relief Society, Primary, Young Women, Sunday School, me a bebil er a okedong er a Ikelesia—el ngii rokui a kmal meklou a ututelel tebechedel a Oltel a ebangkelio er a Jesus Kristo el cherrungel.
Meng, sel rak er a 2020 a mla moterekokl el rak er a bicentennial. A klou el ongdibel er a mermang el Ongeua el buil a mo ngodech er ikal mla mlo merek el ongdibel. A ikal mei el elolem el buil[six months], eak oureng el kmo a rebek el chedal a Ikelesia me a bek el telungalek a mo mengetmokl el kirel tial di tal ngodech el ongdibel el mo oldars sel uchetemel a oltel a ebangkelio.
Nglocha soam el mo omuchel el mengetmokl er kau me bo monguiu er sel cheldechedechal a Joseph Smith el kirel a Kot el Ues el llechukl er a chelsel a Pearl of Great Price. Me sel omesubed er tial mei el rak er a Mei, Moltirakl er Ngak a mo Babier er a Mormon. Ke dirrek el mo oureng er sel klou a ututelel ker el uaia, “Ng mekerang a klengar ngak a mo ngodech alsekum a klaumedengei er ngak er a Babier er Babier a di kiul mengai?” me a lechub “Ng mekerang aikal omeruul el ngii a oliterakl er sel Kot el Ues a rirelii a klakekerou el mei er ngak me a rebetik er renguk?” Ng dirrek, ikel video er a Babier er a Mormon a mla mo er ngii, meng locha soam el mo odak er sel omesubem me a omsubel a telungalek er kau.
Molilt a kerim. Mrelii a llecheklel a moktek er kau. Motungau er a chelsel tial klebokel el llomes er a Oltel. Me sel moruul, e sel klou el ongdibel er tial merael mei el Ongeua el buil a diak di bo lungil omelatk, ng mo diak mobes er ngii.
Chelecha mo mengesimer, eng soak el meskau a beltkil a renguk me a klengeltengat el kmo a dersta er kemiu bo el ungil a rengmiu e chedaol er a bek el sils. Ma le uaisei, bo le klou a rengum el kmo a ocholt a dirk melemolem er a chelsel a Ikelesia e di melemolem el ngara chederdelel a Rubak el mo lemuut “er sel moktek er a Dios a meruul, ea Ungil Jehovah a mo kmul uasei a ureor a mla mo merek.”3
A kumekngeltengat er kau, e lemuut louchais a beltkil a renguk el mo er kau, el loba klaumerang er ngak el kmo a Dios a kiei! A Jesus a Kristo! Tiang a Ikelesia er Ngii e kid a Chedal. El ngara chedaol ngklel a Jesus Kristo, amen.