Miltik lokiu a Klisichel a Babier er a Mormon
A rokui el chad a kirir el mo medengelii a metik er a klisichel a klemerang el ngara chelsel a Babier er a Mormon.
Me sel kuldingel a blirir tirkel mla obul, ea chimol ker el ak blechoel loker er ngii el mo tirkel mla obult a kmo te milkerang me a telungalek er tir e milsuub el kirel a Ikelesia e miklerang e te mlo metecholb. Ng diak el iior er a kmo a chad ng mesisiich lomais el ngara ikelesia a lechub eng dirkak el ngara ikelesia el betok el rak. A nger a blechoel diosisiu: te klikmechur e ungil osengir, e omuchel louchais el kirel a teletael el mlo uchul e te luuetang el mei. Ng klemerang, ea cheldechedechal a obult a blechoel el cheldecheduch el kirel a kmo ng miklerang e te metik er kid.
A Jesus Kristo a Ngii a Rubak er a mla remiid el klalou. Ng omekereu aikel mla remiid el klalou. Sei a uchul e Ngii a ulisechakl aikel edei el cheldecheduch el debetik er a chelsel sel Ongeteruich me a ongeim el bliongel er a Lukas: sel cheldechedechal a ririid el sib, ririid el udoud, me a, tokubets, ngkel ririid el ngalek. Aikal rokui el cheldecheduch a ngarngii a losisiu er ngii: ng diak el iior er a kmo te milkera e remiid. Ng diak el iior er a kmo te mle medengei el kmo te mla remiid. Ngarngii sel dmolech el deureng er a rengir el kmo, “Bo ngara deureng lobengkek; le ak mla mei [ngak] el ririid.” E sel ulebongel, ng diak a meral ririid el mo er Ngii.
Ng soak louchais er kemiu er sel kot el mekreos el klalou el merngak—sel cheldechedak el kmo ak milkerang e liluut el mei.
A uchei er a bol teruich me a eim a rekik, ea okdemelek er a Manuel Bustos a mle siotai er ngak el mo obengkel ngii me a telungalek er a ngii el ngara beluu er a Merikel. Tiang a mle ungil techall el merngak el mo mesuub a tekoi er a Merikel. A okdemelek a mla obult el mo chad er a Ikelesia er a betok er rak ruchei, e mla er ngii a ungil cheltel a reng er a misionari el lobang. Tiang locha sei a uchul ea delak, el dimlak kudengelii el kirel, a milngedecheduch er a okdemelek e dilu el uasei ngkongei er a siotai engdi ngar ngii a chimol omeruul el kengei er ngii: ngii a diak el bo lolasm el lomult er ngak el mo chad er a Ikelesia er ngii. Kemam a mle Katolik, el mla mo melai a telcheroll, meng dimlak a ungil uchul e ki bo mengodech. A okdemelek a mle mui el kongei e ultirakl a tekingel meng dimlak el soal onger a beot el ker el kirel a Ikelesia.
Ng uaisei, a okdemelek me a bechil, el Marjorie, a diak el sebechir el olechib el kmo tir te ngerang.
Ak miltutk el mo er a delmerab el ngar ngii a betok el hong er a chelsel. Ak milsang el kmo chelsel tial delmerab eng ngar ngii a bekord el erul dart el llecheklel a Babier er a Mormon el llechukl er a kakerous el tekoi, ea lluich a tekoi er a Sebangiol.
A tara klebesei, mle melemlim a renguk, mak ngilu a Babier er a Mormon el tekoi er a Sebangiol.
Ng mle tara ikel medemedemk e mellemau a bedengel sel ikrel, el ngar ngii a llechklel a anghel Moroni el ngara medal. Me se er a kbekengii, e sel kot el llel a mle llechukl tial yaksok: “Me sei el bomngai a ikang el tekoi, e bo kungemedaol er kau me bo moker er a Dios, el Diak a Ulebengelel Edam, lobang ngklel Kristo, aslekum a ikang el tekoi a diak le klemerang; ea lsekum e kau a mo oker lobang a blak el reng, el ngarengii er a rengum, lobang a klaumerang er a Kristo, e ngii a mochotii el klemerang leko er kau loeak a klisiichel Chedaol Reng.”
E lemuut el uase: “Le ngoeak a klisiichel Chedaol Reng e kau a mo medengelii a klemerang er a rokui el tekoi.”
Ng meringel a omsodel sel rirelii a ikal chedaol llechukl el mera uldesuek me a renguk. Ak kuuchais a klemerang, Ngak a dimlak kusiik el kirel “a klemerang.” Ngak a dirk mle ngeasek, el ungil a renguk er a klengar er ngak, e oldeu er tial beches el siukang.
Ma le uaisei, me tial yaksok el ngara uldesuek, e ak mocha omerebart er ngak e menguiu er tial hong. Sera kulemolem el menguiu, e ak mlo medengei el kmo alsekum eng soak el mo medengei a ngera el kirel, eng kirek lomuchel el meluluuch. E kede rokui el medengei el k mo ngera duubech sel mtibir el diak do monguiu el merekong ke direk el meluluuch el kirel a Babier er a Mormon. Ma le uaisei, e tiang a dilubech el merngak. Ng kmal mle tokubets e ngodech el omeruul—choi, ngdi osisiu ma ikel dilubech el mo er a retelael el chad meliuekl er a beluulechad. Ak mlo medengei lokiu a klisichel a Chedaol Reng el kmo a Babier er a Momon a mle klemerang.
Me ak mlo er a okdemelek e smodii el mo er ngii kirel ikal mla dubech e dirrek el kmo ngak a mla mo keldmokl el mo metecholb. A okdemelek a meral mlo mechas a rengul. Ngilasech er mlil, e omekall el mo er a skozio, e meremang lobang a ticket er ngak el suebek el mo remei, el mla er ngii a babier el llechuk el mo er a delak el kmo, “Ngak a dimlak chelsechusem er tiang!”
Ngii a kora mle merang el kirel tiang. Ngak miltik lokiu a klisichel a Babier er a Mormon.
Ngarngii a locha betok el mla obult lokiu a remisionari er a beluulechad, er a cheslel a betok el ongasireng el teletael. A lechub e te locha lebult lokiu a resechelirir el Dios a mla mekrolterir el mo er tir. Ng locha dirrek el te miltik lokiu a chad el kiei er a chelechal taem malechub eng ngokiu a uchelir. Ngidil ngeral omeruul, e sel uchul a omerael bedul a klemerang beltel a chad, el di mereched malechub eng uriul, e tir rokiu a kirir mo chemau a teletael e mo metik lokiu a klisichel a kelmerang el ngara chelsel a Babier er a Mormon. Ngosisiu el taem, eng kirir el tibir el meral ngar ngii a rengrir loltirakl er a Dios el kmo te mo melasm el oltirakl a Llechul.
Sera kluut el mo r a Buenos Aires, ea delak a mlo omtab el kmo ng kmal mle soak el mo metecholb. Ng dirk kora mlarngii sel telkib el mekngit el blekeradel e rngak, eng dimlak lomtok er ngak, ng bai mlo oba uldesuek. E dimlak lodengei el uase, ng mle mengedecheduch er ngak el kirel a techolbechelid. Ng uaisei, e ak kumerang el kmo sel cheldecheduch er ngii a bai mle bleketakl e dmolech ra bai kel cheldecheduch er a remisionari. Ng dilu er ngak, “Alsekum eng soam el mo metecholb, eak mo ngosukau. Engdi a kot e ngak a mo oker a bebil er a ker, e soak kau a mo ungil meringel lomdasou e mo onger loba klemerang. Ke mla rulii a rengum el mo er a ikelesia er a bek el Sandei?
Ak dilu er ngii, “Choi, adang ak mo meruul er ngii.”
Kau ke medengei el kmo ua ngera a klemengetel a ikelesia?
“Choi, ak medengei,” Ak dilung.
Ngii ulenger, “Mada, alsekum sel ometecholb, e ngak a mo uchul kau a mo er a ikelesia.” Meng oker ngak alsekum meral ngar ngii a renguk el diak bo kulim a rom malechub ak meloku.
Ak ulenger er ngii, “Choi, adang ak dirrek el mo oltirakl er tilechang.”
Meng lemuut el melekoi, “Alsekum ke mo metecholb, e ngak a mo uchul eng mo uaisei.” Meng mocha meruul er tiang el lolab a bek el llach.
A okdemelek a ulmekedong er a delak e dilu er ngii melak el bo lebekikl, e ngak a mo obes er tiang. Uriur er a eua el rak, e ak ngiluu a okedongel a misionari el mo mesiou er a Uruguay Montevideo Mission, me a delak a ulmekedong er a okdemelek e uleker er ngii el kmo oingerang e ngak a mo obes er tiang. A klemerang a uasei sel taem el ngak a miltecholb, ea delak a kmal mlo ungil a rengul.
Ak mlo medengei el kmo a Babier er a Mormon a mle klou a ututelel er a rolel obult lokiu sel okesiu er a yaksok el kmo a chad a mo kmeed el mo er a Dios sel loltirakl a osisechakl.”
A Nephi a silodii sel klou a ututelel moktek er a Babier a Mormon el uasei:
Mekid a blak a rengud el meluches, el mo mengesuseu er a rengeleked, ma dirrek el rodam er kid, el mo oumerang er a Kristo, e mo ungil a deluill el mo er a Dios. …
“E [sola] kede mengedecheduch ra Kristo, ngara deureng ra Kristo, olisechakl el kirel a Kristo, [e] omlaoch el kirel a Kirsto, … me a rengeleked bo lodengei el kmo ng techang ngkel domes er ngii el kirel a ngbetel a kengtid.”
A rokir el Babier er a Mormon a ngarngii a osisiu el chedaol moktek.
Tiaikid a uchul, e a ngii di el chad el mo menguiu er ngii, loba reng er a nglunguuch, a diak di longuiu el kirel a Kristo, ng dirrek el mesuub er a Kristo—oumesingd sel tibir el “mo melasm er a tekoi” e diak el kotouar ngii el blulak el tekoi a uchul er tirkel diak loumerang me a ikel lolekoi a rebebil el tir a dirkak lechuiu.
A President Russell M. Nelson a ulemtab: “Sel kumdasou el kirel a Babier er a Mormon, e ak medesuii a tekoi el klisiich. Aikel klemerang er a Babier er a Mormon a ngarngii a klisichel el mo omekungil, olluut, mengelaod, moluut, olngeseu, melisiich, e oldeu a rengud.”
A siotai er ngak er tial ieta sils el mo er a dersta er kemiu, a diak el ior a klemengetel om blam chad er a Ikelesia, e mo mecherei sel klisichel a klemerang er a Babier Mormon mebol betik er kid el luut el lorekedid el bek el sils sel blak a rengud losiik a ocholt. Ng mo meruul er ngii alsekum me kede mecherei.
Ak ulterekokl louchais el kmo a Babier er a Mormon a oba mui el ebangkelio er a Jesus Kristo ea Chedaol Reng a mo ouchais a klemerang el kirel er a bek el taem el mo er a ngidil chad el ngii, a meral ngarngii a rengul, losiik a klemedengei el kirel a mo olsobel er tir. El loba ngklel a Jesus Kristo, amen.