2010–2019
Mei, Moltirakl er Ngak—sel Kot el Ungil e Bedochel el Uldesuel a Rubak
October 2019 el klou el ongdibel
2:3

Mei, Moltirakl er Ngak—sel Kot el Ungil e Bedochel el Uldesuel a Rubak

Mla er a Mark L. Pace

Merredel er a Cherrengelel a Sandei Skuul

A Rubak a mengedmokl e ra rechedal kirel odecheleklel a cherarou. Mei, Moltirakl er Ngak a kot el ungil e bedochel uldesuel a Rubak.

Kede ngara deureng el dmak er tial klou longdibel er a Ikelesia er a Jesus Kristo er a Uriul-klebesei el Santo. Ng klengeltengat el dengai a uldesuel me a soal a Rubak lokiu osischeklir a reprofet me a reapostol er Ngii. A President Russell M. Nelson a ngii a ngar el profet er a Rubak. Doureng a saul er a ulekrael klemechel el bla dengai er chelechal sils.

Ak dochelii a sioning er ngak er a ikel mal medung el tekoi. A kuchais er a klaumera er ngak el kirel a Dios, el Diak a Ulebengelel Chedam. Ngii a ngar e betik a rengul er kid e omes er kid. A uldesuel er a deureng a meskid a klengeltengat er tial klengar chelechang me a urirul el deluut el mora Rengedel.

Ak dirrek el sioning er a Jesus Kristo. Ngii a Di Chimong el Ngelekel a Dios. Ngii a mla osebelid er a kodall, e Ngii olsobel er kid er a kelngit sel dultuil er a klaumerang er Ngii e douche a rengud. Sel cherrungel el tngakireng er Ngii el kired a meskid a klengeltengat er chelechal klengar me a diak a ulebengelel klengar. Ng klemerang, “Bol modanges a Dios el kirel a diak a mekesiur el sengk er a chedaol ngelekel Sechal” (“The Living Christ: The Testimony of the Apostles,” Liahona, May 2017, sel uchelel).

A Ruriul-klebesei el Santo er a beluulechad el rokir a ngeltengat el mengull era Jesus Kristo er a chelsel a templo er Ngii. A tara ikal templo a merael a ureor ngii er chelechang el ngara Winnipeg, Canada. A bechik, er a Anne Marie, me a ngak a mlarngii a techellam el mo oldingel er tial basio er a omekedecheraol er sera Ongeai el buil er chelechal rak. Ng kmal klebokel a lecheklel tial templo e meral mo klebokel a bol merek a urerel. Eng di, ngdiak el sebechel morngii a klebokel el templo er a Winnipeg, malechub a ngii dil ker, a lak a mesisiich el dodai er ngii.

Sel dekdekims e meteu el chetemel a Winnipeg a rirelii a urerel me a kedmkelel tial dodai er a templo el mle meringel. A leuaisei, eng mlo moterekokl el dodai er tial templo a morngii a okeuid el deel el baeb el selement. Aikal baeb a okolem el feet a klemengetel (18 m) e 12 el mo er a 20 (30 el mo 50 cm) a tengel. Ngmongelt el mo riou er a chutem el dimerekmo lsebechii er a bad, el kmeed el 50 feet (15 m) ea cheungel a chutem. Tiaikid, ea ikal okeuid el baeb, a rullii el mo mesisiich a dodai er tial klebokel el templo er a Winnipeg.

Kid a Ruriul-klebesei el Santo, a osiik er a osisiu el mesisiich el dodai er a klengar kid el chedaol dodai dousbech erngii er tial klengar er a beluulechad e lemuut elmo remei er a blid er a babeluades. A dodai a morngii lultuil er a belted el mora Rubak el Jesus Kristo.

Kede lmatk a tekingel a Helaman er a chelsel a Babier er a Mormon: “Chelechang, e rungalk, molatk, e molatk, el kmo ng okiu a bedul a Osobel, el ngii a Kristo, el ngelekel a Dios, a kirem el mekedecherur a dodai er kau; me se el le mei a sesengel a eolt er a diabelong el ongiterbis er ngii, e lolsiu a cheltel el me er kau, e ng mo diak a klisichel er kau e mo ediak a techelel el orretau el ruebet er riou er a diak a ulebengelel el ongarm me a ringel, le ng okiu a bad el kau a milkdecherur, el ngii a mesisiich a dai er ngii, el dai er ngii a lulekedechor er ngii a rechad e ng diak el sebechel el ruebet”(Helaman 5:12).

Doureng a saul, el kid a kiei er a taem el reprofet me a reapostol olisechakl er kid el kirel Osobel el Jesus Kristo. A doltirakl a tekingir e ngosukid el kudmeklii a mesisiich el dodai er a Kristo.

Tal rak ra memong, er sel uchelel a tekingel er a October 2018 el klou el ongdibel, e a President Russell M. Nelson a millekoi er tiakid el uleklatk: “Sel meketeketang el moktek ra Ikelesia a mo olngeseu ra rokui el chedal el mo melisiich a klaumerang er tir ra Rubak er kid el Jesus Kristo ma Tngakireng er Ngii, e mo olngeseu er tir el meruul e oltirakl a telbiil lobengkel a Dios, e mo melisiich e merenged ra telungalek er tir. Tial cheliseksikd el beluulechad er chelechang, eng diak el beot. A cherarou a mesisiich loldechelakl er a klaumerang me kid me a telungalek er kid el kmal mesisiich. A mo sobecheklid, eng kired ungil moktek me a teleta” (“Opening Remarks,” Liahona, Nov. 2018, 7; smisichii a belkul).

Okiuellel a klemechel a President Nelson, e a Elder Quentin L. Cook er a Chelechad er a Teruich me a terung el Apostol a ulechotii sel Come, Follow Me el ngesou el mora dersta el chad me a telungalek. A tekingel a mle uldimukl aikakid el tekoi:

  • “Sel beches el mo omesuub-er a blai el Come, Follow Me … a mla mekedmokl el mo ngosuterir a rechedal a ikelesia el mesuub er a ebangkelio er a rekeblirir.”

  • “Tial ngesou a mora bek el chedal me a telungalek er a Ikelesia” [Come, Follow Me—For Individuals and Families (2019), vi].”

  • “A moktek er kid a mo tabesul a teletael er a Ikelesia me a blai el mo smisichii a chedaol tekoi e dochelii a bult el mo er a Chedam er a Babeluades me a Rubak el Jesus Kristo. (“Tmolech e Kemanget el Cheldecheduch el mo er a Demad el ngara Babeluades ma Rubak el Jesus Kristo,” Liahona, Nov. 2018, 9–10.)

Ngulmuchel er a Kot el buil er chelechal rak, e a Ruriul-klebesei el Santo er a beluulechad el rokir a mesuub er a Beches el Renged lobengkel sel Come, Follow Me el ngesou lomekrael er kid. Ngokiu a iioter e ra bek el sandei, e sel Come, Follow Me a ngosukid el mesuub chedaol llechukl, me a osisechakl e ra ebangkelio, me a osischeklir a reprofet me a reaspostol. Ng mal ungil ngesou el mei e rkid el rokiu.

Uriul er a etui el buil el dengara tiaikid el omesubel chedaol llechukl, e ngera kede mesang? Kede mesterir a Ruriul-klebesei el Santo er a ngii dil ker el mla mukeorul a klaumerang me a blakereng er tir el mora Rubak el Jesus Kristo. Kede mesterir a dersta el chad me a telungalek el imakl a taem er a bek el sandei el mesuub a tekingel Osobel. Kede mesang a ungil osisechakl er a Sande isle dosuub a chedaol llechukl er a blai e douchais a uldesued sel kuk de bora ikelesia. Kede mesang a klou el deureng er a telungalek el ta rengrir er chelechal mla mo diak di donguiu chedaol llechukl e bai mla mo mesuub a chedaol llechukl er a ngodech el teletael.

Ng techellek el mla mo oldingel er a Ruriul-klebesei el Santo e remenges aikel mla duubech el mo er tir sel losuub er tial Come, Follow Me. Tial olchotel a klaumerang a mekekii a renguk er a deureng. Aikakid a bebil er a tekoi el blak renges e ra kakerous el chedal a Ikelesia er a kakerous el basio er a beluulechad.

  • A tal chedam uluchais el kmo: “Ak semeriar er a Come, Follow Me, leng meskak a techall louchais er a klaumera er ngak el kirel Osobel el mora rengelekek.”

  • Chelsel a tara obliil, e a ngalek a millekoi el kmo: “Tia techall el kurrenges er a rechad er a blik louchais er a klaumera er tir.”

  • A chedil uluchais el kmo: “Aki mla mukrael el uase ng mekera ki mnguu a Dios el mo kot. Aki mle [omdasou] el uase ‘ng diak a temam eng di aki mla mo [mui] a urungulam, deureng, budech, me a klungiaol er a teletael el dimlak kimodengei el uase ng sebechel.

  • A obekel a dilu el kmo: “Ngodech a omesubam e ra chedaol llechukl el diak el uaia ngara mong. Ng kmal muut el betok a ki bla msuub el dimlak ki msuub er a ngaramong. A Rubak a soal kemam a kimomes a tekoi er a kuk ngodech el teletael. A Rubak a mengedmokl er kid.”

  • A tara chedil a millekoi: “Ng soak le ki dmak el mesuub osisiu el tekoi. Uchei, aki di mle menguiu er ngii. Elechang, aki mesuub er ngii.

  • A kuk tara odos a uluchais er tiakid el tekoi: “A uchei, e koba suobel e a chedaol llechukl a olngeseu er ngii. E chelechang, e kolab a chedaol llechukl e a suobel a olngeseu er ngii.”

  • A tara odos a millekoi: “Ak mesa klekakerous sel kuruul er ngii [me sel] lak kuruul er ngii. Ak metik el uase ng beot sel kusaod er a Jesus Kristo me a klaumera er kid el mora rebebil er a rechad.”

  • A mechas a millekoi: “A kumekedong er a rengelekek me a rengelekir a rengelekek sel Sandei, e ki dmak el mesuub er a Come, Follow Me el rokui.”

  • A tara odos a millekoi: A “Come, Follow Me a uaia Osobel a ngii olisechakl er ngak. Ng mlukerael er a babeluades.”

  • A kuk chedam a millekoi: “Sel dousbech er a Come, Follow Me, eng uaia dengalek er a Israel, el melcha olangch er a tkul a chesmered, lomecheliu a telungalek er kid er a cheraoru el merael melemall.”

Rodam me a rodos, ng deureng el kuldingel er kemiu e remenges el kirel a blakereng er kemiu el mesuub er a Come, Follow Me el klengeltengat elmora klengar kemiu. Ko mesulang er a blak el reng e rkemiu.

A dosuub chedaol llechukl lobengkel a Come, Follow Me lomekrael er kid smisichii a belted el mora Jesus Kristo me a ebangkelio er Ngii. Kid a diak dongesadel er a tal sikang el dengara ikelesia sel Sandei el mo dochelii a tal sikang er a omesubed er a chedaol llechukl er a blai. Omesubel ebangkelio a blechebech el teletael er a bek el sandei. Uaia tal odos el mle ouchais er ngak, “A moktek a diak el relii a ikelesia el kedeb a temel ra tal sikang; ng rulii a ikelesia el mo elolem el klebesei a klsel!”

Chelecha, e molatk el kirel a uleklatk er a profet, er a President Nelson, el dilii er sera October 2018 el klou el ongdibel.

“A cherarou a di merael mo mesisiich loldechelakl er a klaumera er kid me a telungalek e rkid el kmal mesisiich a rretel. Sel mo uchul e kid a mo selbechakl, eng kired lousbech er a ungil e bedochel el moktek” (Opening Remarks,” 7).

Ng (kmeed el lluich me a etui el sikang ruriu) el mle iieta sils er a Sandei, eng mlo chosmerii ongdibel el dilii tiaikid el yaksok: “Sel moureor el blak a rengmiu el mesemechokl a rekeblimiu el mo basio er a omesubel ebangkelio, … e a teletelel a cherarou er a klengar kemiu me a rekeblimiu a mo kekerei” (“Becoming Exemplary Latter-day Saints,” Liahona, Nov. 2018, 113).

Ng mekera odelcheklel a cherarou e di merael mo klou e a osisiu el taem e a blekerdelel a cherarou a merael mo kekerei? Ng sebechel duubech, e mla duubech er a chelsel a Ikelesia el rokir, le Rubak a mengedmokl er a Rechedal el kirel odelcheklel a cherarou.. A CCome, Follow Me a kot el ungil e bedochel el moktek er a Rubak. El uaia osischeklel a President Nelson, “Tial beches el omesuub-er a blai, lobengkel a ngesou er a Ikelesia a ngarngii a techellel mesterir a klisiich a telungalek.” Eng di, tiang a kirel lultuil er a blakelreng er kid; eng kired “[loltirakl] el kmal mo ungil medengelii e kerekikl el remuul a [rekeblid] el mo basio er a klaumerang” (“Becoming Exemplary Latter-day Saints,” 113).

Sel ngaruchei, ng dirrek el millekoi a President Nelson, “A dersta er kid a ngerchelel a chedaol ulkerulel” (“Opening Remarks,” 8).

Tial ngesou er a Come, Follow Me e a, Rubak a mengedmokl er kid “el kriel a meringel el taem el dengarngii er chelechang” (Quentin L. Cook, “Deep and Lasting Conversion,” 10). Ngii olngeseu er kid el kudmeklii a “meisiich el dodai el sekum a chad a dechor ngii eng diak el mukel” (Helaman 5:12)—el dodai er a klaumerang el mesisiich el delalm er a belted el mora Rubak el Jesus Kristo.

A blakereng e rkid er a bek el sils el mesuub a chedaol llechukl bol sisichid e lochotid el klikiid elmo ngmai ikal klengeltengat. Aika nglunguchek el ngara ngklel a Jesus Kristo, amen.