Mo Soiseb er a Iabed me a Dichel a sils, Rubak, Bom Kiei Lobengkek!

Mla er a Reyna I. Aburto

Ongerung el Counselor er a Relief Society General Presidency

A kuchais el uase “ngokiu a ringel me a klungiaol” e a Rubak obengked, me a “ringel el dengarngii a [sebechel] mo deureng er a Kristo.”

Ta er a soad el chelitakl er a ikelesia ouchais er a tial ongit “Mo soiseb er a iabed me a dichel a sils, Rubak, bom kiei lobengkek!” Mle tara taem e ak mla er a skoki el kmedang er a klou el sesel eolt. Ak mla er a mado e omes, e milesang a okrokl el iabed el ngariou er kemam. A dichel a sils a mlo subechii a ikal iabed, meng rirelii a dichel el kmal mlo medidiich. Di mle kiul a, skoki a mlo reiou el soiseb er tial okrokl el iabed, me a okrokl el ilkokl a di mle mereched el liueklemam meng mlo diak el sebechemam el mesang sel llomes el ki milsang er a uchei.

Dichel a ngeltel a sils

milekokl el iabed

Aikal iabed a sebechel soiseb er a klengar kid, el tongetengid er a llomes er a Dios e dirrek el rullid el mo oker alsekum tial llomes a dirk ngar ngii el merkid. A bebil er a ikal iabed a ringel el reng, sebekreng, me a bebil a bek bedengel a secher er a btelud me a reng. Ng sebechel tomellii osenged er kid, rebebil, ma Dios el dirrek. Tia ngar ngii a relii el mo er a redil me a resechal kakerous a rekrir el meliuekl er a beluulechad.

Ngosisiu ngarngii a ltemelii a omerritel malechub eng rau el reng el sebechel ngar ngii a relii el mo er tirkel dirrekak el siseb er a ringel. Ng di ua ngidil tebedechel a bedenged, a btelud a sebechel mo chemau a secher, klou el telemall, me a chemical imbalances. A uldesued sel sekum e ngara ringel, e ngungil a dosiik a ngesou er a Dios, me tirkel ngara bita er kid, me a ukeruul me a resemmong lomkar a uldasu.

“A rokui el chad—el sechal me a redil—a ulebeob el di uaia teletelel a Dios. A dersta er tir a mekreos el ngalek er a reng el sechal me a redil el ngelekel a chedam me a chedil er a babeluades, me a … leuaisei, e a dersta er tir a sebecherir el mo ng mai a chedaol teletelir.” Di uai a Chedam me a chedil er a Babeluades me a Osobeled, eng ngar ngii a bedenged er a tech e mo chemau a tekoi er a reng.

Betik er a rengud el rodos, ng kmal di ungil sel molechesuar el mekngit a rengum malechub e ke bekikl a lebebil er a taem. Klengit el reng, sebekreng, ngasechereng a di omerelel a chad. Engdi, alsekum e kede di blechoel mekngit a rengud me a ringeled a kmal klou meng tomer sel klisiich el mo omelchesiiu er a beltkil a rengul a Chedam er a Babeluades me a Ngelekel Sechal me a Chedaol Reng, e kid a bai locha chemau a klengit el reng, sebekreng, malechub e ng bebil ra secherel a reng.

A ngelekek el redil a mle tal loluches el kmo: “Ng mla er ngii a taem … [el] Ngak a kmal di mle blechoel mekngit a renguk. Ak ulmedasu el kmo sel mekngit a rengud a teletael el demerur el kirel, e ngii olechotel a klechitechut. Meng di mle ngak a medengelii. … A kumelchesiu el meral dimlak a belkuk.”

A sechelik a silodii el uai tiang: “Serak dirk kekerei el ngalek, eak mle blechoel lomelchesuar el diak a rungulek, ngara ilekolk, sabisi, e medakt e omelchesiu el kmo ngak a chelmuul malechub eak telmall. Ak mle ungil omart a ringelek e dimlak bok cholt el kmo ngak a chemau a ngerang e bai di olecholt el kmo ak mesisiich.”

Resechelik, tiang a sebechel ducheb el mera dersta er kid—tokubets el sel, moumerang er a moktek er a deureng, e kede bai ngmai a diak a belkul berraod el merkid ele kede omdasu el kmo kid a kired el mo cherrungel. Aikal uldasu a sebechel kmal mo oberaod. A ngeiul a cherrungel a teletael el ngii a doruul er tial klengar er a tech me a ikrel—el kmal di okiu sel krasia er a Jesus Kristo.

Sel klekakerous, a bai sel mouchais el kirel a omelasm er a reng, e mkengei el kmo ngdiak kom cherrungel, e kede bai mesterir a kengei a rebebil el mo ouchais aikel ringel el lechau. Me kede mo dmak e mo medengei el kmo ngar ngii a ngesou e kid a diak el kired el ngara ringel el di kid el tang.

Oureng el kirel a Ongeru Lemei

Sel de mesiungel a Jesus Kristo, e kede mla rulii a telbiil lobengkel a Dios el kmo kede “mo ngosuir a tang me a tang er a chelngelel me bol kebekakl” e “mo lmangel lobengterir a re ngara klengit el reng.” Tia uldimukl sel klemedengei el kirel a secher er a reng, e osiik a donguu el sebechel el smaud aikal ringel, e ngoikid me a rebebil el mo er a Kristo, el ngii a Mastang er a Omekungil. Malta eng diak desal lungil medengei el kmo a rebebil te ngera te chemau, eng di sel dodengei el kmo a ringelir a merang a sebechel el klou a ututelel el kot el bakes el losiik a klemedengei me a omekungil.

A bebil er a teletael, ea uchul a klengit el reng me a sebekreng a sebechel mocholt, engdi a lebebil er a taem eng meringel a debetik. A btelud a mo meringel eleng berraod er a uldasu a uchul malechub eng kmal mesaul, el ngii a sebechel sel bebil er a taem el mo ungil lokiu a telkelel a blengur, cheliuaiu, me a ouedikel. Bebil er a taem, ea therapy malechub omelim el kar el ngara chederdelel a semong el toktang a dirrek el ulsbechall.

A diak el mukar el secher er a btelud me a reng a sebechel kmal mo chetituokl, meng kedi cheroid er a rokui, diak a sumechokl el klemedengei, telemall el deluill, di kau el tomelau, malechub engdi kau el nguu a klengar er kau. Ngak a kot el medengelii tiang, le demak a di mle ngii el nguu a klengar er ngii er a betok el rak er a mla memong. A kodellel a kmal mle chilas a rengmam e chilam a rengam el telungalek me a ngak. Ng mla mo melai a betok el rak el kureor el mesemechokl er a kngtil a renguk, engdi ak dirk silubii el kmo a ungil teletelel a bai kired el mesaod el kirel a dertel a klengar lokiu a ungil cheldecheduch meng bai mo sebechel lolngeseu el terbengel tial omeruul e diak loldubech er ngii. Chelechang eng sebechek el mesaod er a kodellel a demak el mo er a rengelekek e sioing er a omekungil el Osobel a odersii el mo er a bita me a bita er a kateng[veil].

Ng mekngit a rengud, ele betok el chad el chemau a meringel el klengit el reng a mo cheroid er a rebebil er a re Santo ele te omdasu el kmo ng diak el sebechir lobengterir. Ng sebeched el ngosuterir el mo medengei el kmo tir a kirir lobengked. Ng klou a belkul bo dodengei el kmo a klengit el reng a diak el klechitechut, me a diak el klengit. Ng “oureor er a berotel e mo kekerei a klemedengei.” A bo dedak, eng sebeched el kaingeseu el choroid a teletael el mo diak omeliakl mesel beredel a rur a mo kebekakl ea ongasireng lomekungil a mo er ngii.

Sel temel a Osisechklel er tial beluulechad, ea Jesus Kristo a ulmekungil er a resmerch me a retelemall, engdi a ta el chad a kirel mo ngar ngii a klaumerang er ngii el mo er a Kristo mebol sebechel mo nguu a omekungil er Ngii. A rebebil a milrael er a kemanget el omerael, a rebebil a uldars a chimorir el mo rutechii a Bilel, ea rebebil a lulengider er tir el mo er Ngii mebo lungil. Mesel kirel a omekungil, eng diak el kid el rokui a kmal lousbech er Ngii? “Kid ng diak de rokui el di mechebuul?”

Bo doltirakl er a rolel a Osobel e bol klou a beltkil a rengud, e lak doukerekeriil, e de stob el kensa a chedaol teletelir a rebebil. Sel dorrenges loba beltikereng a tara kot el klou el sengk el dodersii, e sebeched el mo ngosuterir a rebebil er a berraod lechellungel tirkel betik er a rengud me a rsechelid me luchul, lokiu a beltkil a rengud, eng sebechir lmuut el mo melchesuar Chedaol Reng e nguu sel llomes el ngara Jesus Kristo.

Alsekum me kau a blechoel liuekl er a “cheltel a ilkolk,” e mobult el mo er a Chedam er a Babeluades. Ngdiak a ngidil ngerang el bla bom chau el sebechel ngodechii sel diak a ulebengelel klemerang el kmo kau a Ngelekel e Ngii a betik a rengul er kau. Molatk el kmo a Kristo a Osobelem, ea Dios a Demam. Tir a medengei. Momes er Tir el kmeed er kau, e orrenges e oldars a ngeseu. “[Tir] a mo mengelim er kau er a ringel el om ngarngii.” Moruul a rokui el ngii a sebechem, e moumerang er a melngakireng el krasia er a Rubak.

A ringelem a diak el olengchelem, engdi bai sebechel mo melisiich er kau. Eleng uchul a“bedengek el teluol toched,” kau a ngar ngii a klisichem el mo omelchesuar a klou el beltik el reng elmo bedul a rebebil. Mesel Chedaol Reng a mengetikaik, e mouchais er a cheldechedecham mel “ngesuii a klechitechut, msisiich a ikel mesulal chim, ma bkul a uach el omritel.”

Mo er tirkel ngara ringel er a chelechal taem malechub e te olngeseu tirkel ngara ringel, bol ngar ngii a rengud el loltirakl a llechul a Dios me a Chedaol Reng er Ngii bol blechoel lobengked. Bo doruul a mekekerei e beot el lomeruul ” me bol beskid a chedaol klisiich. A President Russell M. Nelson a dilung: “Ngdiak a ngodech el mekengii a babeluades el uai a klikiid, keldung, blak el reng er a siik, mesuub a tekingel a Kristo el ngara chelsel a Babier er a Mormon, e blak a rengud el mora templo e merul a urerel a reksi er a telungalek.”

A Osobel a Omekungil

Bo dolatk el kmo a Osobeled, el Jesus Kristo, [a mla ngmai] el mo er ngii [a] kengtid, me a chelsel bol mui er a klechubechub, el okiu er a tech, meng mo medengei … el kmo mekerang e mo olngeseu er [kid] er a kengtid.” Ngii a mlei el “mo omkar a chelmuurreng, … mo mengelaod er a rokui el mengiung; … mesterir a deurreng ma blekebek el mad, ng cheltiakl er odanges el diak le klengiterreng, e mo omekerreu er tir.”

Ongerung el Lemei

A kuuchais er kau el kmo a “soiseb er a iabed me a dichel a sils” a Rubak a mo kiei lobengked, ma “ringeled [a sebechel] mo dibus eleng deureng er a Kristo,” meng uaisei eng “okiu a krasia e kid a mo suobel, er a uriul aikel kid a sebeched el meruul.” A kuuchais el kmo a Jesus Kristo a lemuut el mei er a beluulechad “el omekungil el ua dichel a sils.” Ma le uaisei, Ngii a “a mo smuld a rokui el chiuosech er a [medad]; ng dikea lluut el mor ngii … a ringel.” E le tirkel rokui el “mei er a Kristo, me bo mecherrungel er ngii,” a “sils a mo diak el ngelt; … ea Rubak a mo [llemesed] el diak a ulebengelel, ea ikel sils er [kid] ra chelbuul a mo diak.” El ngara a ngklel a Jesus Kristo, bol uaisei.

Uleklatk

1. “Bom Kiei Lobengkek!” Chelitakl, no. 166.

2. Sera kim ngara bebul a iabed, eng diak el sebechemam el mesang a ikolk el ngariou er kema, sera kim ngara chelsel tial ilkolk, eng mle meringel el desang a dichel a sils el ngii dirk milidiich sera kim telkib el ngarbab.

3. “Telungalek: Chais el mo er a Beluulechad,” Liahona, May 2017, 145.

4. “A reng me a bedengel a tech a delbengel a chad” Mesa (Doctrine and Covenants 88:15). “A bedengem, a templo er a delbengem. A usbechellem er a bedengem a ngarngii a letemelii er a reng er kau” (Russell M. Nelson, “Decisions for Eternity,” Liahona, Nov. 2013, 107).

5. Mesa, okesiu, Isaia 65:19; Lukas 7:13; 3 Nephi 17:6–7; Moses 7:28. Sel dosuub el mo medengei olangch me a reng a sebechel ngosukid el mo uai a Osobeled, el Jesus Kristo.

6. Mesa “Sadness and Depression,” kidshealth.org/en/kids/depression.html.

7. Hermana Elena Aburto blog, hermanaelenaaburto.blogspot.com/2015/08. Ng dirrek el milluches:

   “Tial olasm a milskak a techall el mo ousbech er a klaumerang er ngak el kirel a moktek er a mo suobel. Elek mle medengei el kmo a Demak er a Babeluades a betik a rengul er ngak, e Ngii a ngar ngi a moktek el kmal di merngak, ea Kristo a kmal ungil medengei aikel ngak a chemau.”

   “A Dios a diak lolenguul er kau alsekum eng diak a duch er kau. Ngii a ungil a rengul ngusukau el mo ungil e mo er a ouchel el reng. Ngii a diak longerchiil er kau el mo remuul a rokui el tekoi er a chelsel a ta el taem. Ng diak el kirem el di kau el tang el meruul er ngii” (iwillhealthee.blogspot.com/2018/09).

8. Di cheldecheduch er a delongelir. Ng dirrek el milluches: “Sel omekungil Tngakireng er a Osobel a kmal uchul a budech e ngosukak er tial omerael. Sera di lengak el tang el ngara ringel, eak mlo metebengii el kmo Ngii a mla mo chemau aikal ngak a mla mo chemau. … Ng kmal ngarngii a urungulek el kmo ak mo cherrungel er a ngarmedad el taem, e sel okiis er a kodall el bedengek a mo diak el cheuarm er tial secher er a klechad [ringel].”

9. Mesa Russell M. Nelson, “Perfection Pending,” Ensign, Nov. 1995, 86–88; Jeffrey R. Holland, “Be Ye Therefore Perfect—Eventually,” Liahona, Nov. 2017, 40–42; J. Devn Cornish, “Am I Good Enough? Ng locha sebechek?” Liahona, Nov. 2016, 32–34; Cecil O. Samuelson, “What Does It Mean to Be Perfect?” New Era, Jan. 2006, 10–13.

10. Ng klou a ututelel el bo dosaod aikal omeruul el mo er a rengeleked, retelungalek, ma resechelid el ngara rekeblid, ikelesia, me a bouai.

11. Mosiah 18:8–9.

12. Mesa Russell M. Nelson, “Jesus Christ—the Master Healer,” Liahona, Nov. 2005, 85–88; Carole M. Stephens, “The Master Healer,” Liahona, Nov. 2016, 9–12.

13. Sel bo dodengei aikel olangech me a teletelel el ngar kid me a rebebil a kmal ngar ngii a ngesukii. Ng dirrek el sebeched el mesuub el mo dmangech aikel diak el melemalt malechub eng diak el ungil uldasu e bai mo omtechei loba ungil.

14. Klengit el reng a sebechel dubech eleng uchul a ungil mengodech er a klengar—el uaia cherellel a ngalek malechub eng beches el ureor—e sebechel dubech altang a klengar er kau a ungil.

15. Mesa “Understanding Stress,” Adjusting to Missionary Life (2013), 5–10.

16. Mesa Jeffrey R. Holland, “Like a Broken Vessel,” Liahona, Nov. 2013, 40.

17. Mesa Dale G. Renlund, “Understanding Suicide” (video), ChurchofJesusChrist.org; “Talking about Suicide” (video), ChurchofJesusChrist.org; Kenishi Shimokawa, “Understanding Suicide: Warning Signs and Prevention,” Liahona, Oct. 2016, 35–39.

18. “A uchelel a omekungil a ousbech a klaumerang el uai a klaumerang er a ngalek el kirel merang el tekoi el kmo Chedam er a Babeluades a betik a rengul er kau e mla ochotii a rael el mo omekungil. A Betik er a Rengul Ngelekel Sechal, el Jesus Kristo, a mlad mel bo er ngii a omekungil. Engdi diak a olai el teletael, ng diak a beot el cheluch el mo omekungil, malechub eng beot el rael el kmal mo ungil lomkar. A kar a ultuil er a dmolech el klaumerang er a Jesus Kristo me sel Klisichel el mo omekungil” (Richard G. Scott, “To Heal the Shattering Consequences of Abuse,” Liahona, May 2008, 42). Sel ngar ngii a telemall, eng blekerdeled el mo rulii el mo ungil. Engdi, ngdiak el kired el kmal di kid el mo kudmeklid malechub e te rebebil. Ngdiak el kired el remuul a rokui el tekoi el di kid. Ngar ngii a taem er a klengar er ngak, eak mlo omes er a therapist el mo ngosukak el kirel kmal mle meringel taem el blek chau er ngii.

19. Mesa Johanes 9:1–7.

20. Jane Clayson Johnson, Silent Souls Weeping (2018), 197.

21. Mesa Mateus 9:2–7, 20–22; 14:35–36; Markus 1:40–42; 2:3–5; 3 Nephi 17:6–7.

22. Mosiah 4:19; dirrek el mesa Jeffrey R. Holland, “Are We Not All Beggars?” Liahona, Nov. 2014, 40–42.

23. Mesa Rom 2:19; 13:12; dirrek el mesa Jeffrey R. Holland, “Come unto Me” (Brigham Young University devotional, Mar. 2, 1997), speeches.byu.edu.

24. 1 Nephi 8:23; dirrek el mesa 1 Nephi 12:4, 17; 3 Nephi 8:22.

25. Mesa Psalm 82:6; Rom 8:16–18; Doctrine and Covenants 24:1; 76:24; Moses 1:1–39.

26. Mesa Adjusting to Missionary Life, 20; see also Mika 7:8; Mateus 4:16; Lukas 1:78–79; Johanes 8:12.

27. Jacob 3:1; dirrek mesa Efesus 5:8; Kolose 1:10–14; Mosiah 24:13–14; Alma 38:5. Mchiuii a patriarchal blessing er kau malechub molengit el mo nguu a klengeltengat er a priesthood me bol sebechem el remenges e momtab el kmo kmal ua ngera beltkil a rengul a Chedam er a Babeluades el mo er kau e soal mo omekngeltengat er kau.

28. Mesa 2 Korinth 4:16–18; Doctrine and Covenants 121:7–8, 33; 122:5–9.

29. 2 Korinth 12:7.

30. Mesa Doctrine and Covenants 81:5; dirrek mesa Isaia 35:3.

31. Mesa Moroni 4:3; Doctrine and Covenants 20:77.

32. Mesa Alma 37:6.

33. Russell M. Nelson, “Revelation for the Church, Revelation for Our Lives,” Liahona, May 2018, 95.

34. Mesa Alma 7:12; dirrek mesa Isaia 53:4; 2 Nephi 9:21; Mosiah 14:4.

35. Isaia 61:1–3; dirrek mesa Lukas 4:18.

36. Alma 31:38; dirrek mesa Alma 32:43; 33:23.

37. 2 Nephi 25:23.

38. Malakai 4:2; 3 Nephi 25:2.

39. Ocholt 21:4.

40. Moroni 10:32.

41. Isaia 60:20.