![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fd7%2Fb4%2Fd7b4e85b02541a3831b9219368e54b1c0075e722%2Fd7b4e85b02541a3831b9219368e54b1c0075e722.jpeg/full/!250,/0/default)
Erung el Ngarbab el Llach
Ng kired el melasm loltirakl aika el eru el ngarbab el llach. A leuaisei, e kede teleuadel er a delongelel a llach me a beltikereng.
Rodos er ngak er a chelsel ebangkelio er a Jesus Kristo, ak mengemedaol er kemiu el uaia om chedaol mengkerengel a diak a ulebengelel telungalek. A President Russell M. Nelson a mla olisechakl er kid el kmo, “A Ikelesia a mloluut me luchul e a telungalek bol mokdubech, el moak, el sobel el mo er a ulebongel.”1 Tial osisechakl a klou a ultutelel a suobel er a chelsel el mo er a rechad el tir a redil me a redil dmak, sechal me a sechal, sechal lobengkel a redil e obengkel a sechal, malechub a remodil me a resausechal, lokedongall el kmo LGBT.2 A President Nelson a dirrek el mla omeklatk er kid el k mo ng diak a “belkul [deblechoel] kongei er a uldesuel a tang el uaia lolchotel a beltikereng er a deleuill er kid.”3 Aikal ulaoch el osisechakl a meklou a ultutelel er a chelsel a cheldecheduch er a telungalk el nger er a kerrir a rengalk me a rengeasek. Ak mla ngara nglunguuch losiik a ulekrael el kirel a tekingek el mo er tial seked le kemiu a dirrek el chelbangel aikel ker, el ngii a ngarngii a letemelii er a chelsel a bek el telungalek er a Ikelesia.
I.
A kumuchel er a ikel lerung el ngarbab el llach el Jesus a ulisechakl.
“Ng kirel betik a rengum er a Rubak el Dios er kau loba rengum el rokir, me a rokir el klengar kau, me a uldesuem el rokir.
“Tiaikid a kot el ngarbab el llach e kot el klou a belkul.
“E a ongerung el klou a belkul a di uai ngii, Bo el betik a rengum er a ngar bita er kau el ua le betik a rengum er kau”4
Ng belkul a kmo kid a mla modurch el mo oubeltikereng el mo er a rokui el chad, le sel olachitnger er a Jesus el kirel a ungil chad er a Samaria olisechakl el kmo a rokui el chad a tonari er kid.5 Eng di a blakereng er kid el mo oltirakl er tial ongeru el llach a diak el rellid lobes er sel kot, el ngii a mo betik a rengud er a Dios loba rokir rengud, bedenged, me a uldesued. Kede ochotii tial beltikereng sel “doltirakl a [Llechul].”6 A Dios a mengerchir kid el mo oltirakl a Llechul le ngultuil er tiaikid el blekognesenges, luldimukl er a ouchel reng, eng sebeched el lemuut el mo kiei er a Rengedel emo cherrungel el uai Ngii.
Chelsel sel dirk mlo merek el cheldechedechal er a BYU, e a President Russell M. Nelson a millekoi er sel ngii omekedong er ngii el kmo “mesisiich el deleuill er a delongelel a beltkil a rengul a Dios me a Llechul.”7 Sel kot el klou a ultutelel llach el ngii a melutk el kirel aikaikid el domekedong el kmo ng LGBT a llechul a Dios el kirel a chebechiil me a obengkel llach er a tekoi er a deleboes. Aika el eru llach a meklou a ultutelel er a chelsel a uldesuel a Chedam er a Babeluades el kirir a Rengelekel. El uaia ikel osischeklel a President Nelson el kmo, “A llechul a Dios a mesisiich lurrekodel er sel cherrungel el bletikereng er Ngii el kired me a blakereng er Ngii el kired el mo er sel ngii a kired el morngii.”8
A President Nelson a ulisechakl el kmo: “Betok el beluu … a mla kongei er a chebechiil er a rosisiu el chad. Me kid el chedal a Ikelesia, a mengull a llechul a beluu … , luldimukl a chebechiil lokiu a siukang. Eng di, a klemerang a kmo, sera uchelel … e a chebechiil a mle mechedaol lokiu Dios! El me lmuut er chelechal sils eng dirk keluadel er Ngii el mekedmokl er a delongelel a sechal me a redil. A Dios a dirkak el ngedechii a Uldesuel kirel a chebechiil.”
A President Nelson a millemolem el melkoi el k mo: “A Dios a dirkak el ngedechii a Llechul el kirel a deleboes. Aikel kired el meruul el mo sosieb er a templo meng dirkak el mengodech.”9
A President Nelson a mla omeklatk er kemam el rokui el kmo, “a ngercheled kid el Apostol a di olisechakl a klemrang e merekong. Tial ngerachel a diak el besterir a [Reapostol] a kengei el mo melodech a chedaol llach.”10 A leuaisei, e rodos er ngak, e a remengeteklel a Ikelesia a kirir el blechoel lolisechakl a meklou a belkul tekoi el kirel a chebechiil er a delongelel a sechal me a redil me a llach er a tekoi er a deleboes.
II.
A klou el urerel a Ikelesia er a Jesus Kristo er a Uriul-klebesei el Santo a mengedmokl er a rengelekl a Dios el mo nguu a rengedel a celestial, tokuni sel kot el ngarbab el klebkall, el mo suobel e nguu a diak a ulebengelel klengar. Tiaikid el ngarbab el renged a di sebechel mengai lokiu a diak a ulebengelel chebechiil.11 A diak a ulebengelel klengar a uldimukl er ngii sel klisiich lomeob el ngara sechal me a redil12—el ngii a ocholt er chelechal taem a smodii el kmo “ng melemolem lomekdubech a tane el mo er a ulebongel.”13
Chelsel a cheldechedechal le mo er a rengeasek, e a President Nelson a ulisechakl el kmo, “A moltirakl a llechul a Dios e ko mo selbechakl er a omerolliu el bedul a diak a ulebengelel klengar”14— el kemiu, a mo uaia Dios, el mo obang a diak a ulebengelel klengar me a chedaol ultekelliu el Chedam me a Chedil er a Babeluades. Tiaikid a klengar el soad a le bo er a rokui el betik er a rengud. A beltikereng er kid, a diak el kired el nguu el mo ngaruchei er a llach me a moktek er a Dios, el ngii a dodengei el kmo ng mo uchul a deureng el mo er tirkel betik a rengud er tir.
Eng di te betok a betik a rengud er tir, luldimukl er tirkel loba mla moluut el ebangkelio, eng di diak loumerang malechub e te kuk melilt el diak loltirakl a llechul a Dios el kirel a chebechiil me a llach er a deleboes. Te kuk mekerang?
A osischeklel a Dios ochotii el kmo kid a rokui el Ngelekel e Ngii a ulemeob er kid el mo ngara deureng.15 A ocholt er chelechal taem olisechakl el kmo a Dios a mla kudmeklii a moktek el kirel a klengar tial beluulechad el rokui el chad a sebechir el melilt el mo oltirakl e osiik aikel kot el ngarbab el klengeltengat er Ngii a lechub ete melilt aikel kuk ngoiteterir el mo er a ta er a ikel ngariou el renged.16 Ngultuil er a dmolech el beltikereng er a Dios el mo er a rokui el Ngelekel, e a ikel ngariou el renged a dirrek el kmal klebokel el diak a chad el sebechel smodii.17 A Tngakireng er a Jesus Kristo a uchul e a ikal rokui a sebechel mekedmokl, le Ngii a “kobkellii a Chedam, e osobel a rokui el blebelel a chimal.”18
III.
Ak mla mengedecheduch el kirel sel kot el ngarbab el llach, e mekera sel ongerung? Mekera doltirakl er a llach el mo betik a rengud er a odam er kid? Aki mengelechel er a rechedal a ikelesia el kmo tirkel kuk kongei osischakl me a blekeradel er a deleuill er a redil me a redil, sechal me a sechal, sechal sebechel lobengkel a sechal me a redil, malechub a remodil me a resausechal a kired el mo ngara beltikereng el mo er tir el Osobel a melekoi el kmo tir odam er kid. A leuaisei, e sera lemoterokl a kengei el kirel a chebechiil er a rosisiu el chad er a Beluu er a Merikel, e a First Presidency me a Chelechad er a Teruich me a terung el Apostol a ultebedii a tekoi el kmo: “A ebangkelio er a Jesus Kristo olisechakl er kid el mo oubeltikereng e omekerreu er a rokui el chad loba blekokeuii me a ungil klechad er a beluu—luldimukl a lak dekengei a loruul tekoi Aki meketeklii el kmo tirkel tir a kongei a llach malechub eng kengei er a kort el kirel a chebechiil er a rosisiu el chad a diak el kired el mo ouketui er tir.”19
Osisiu, ng diak el kired el mo oldechelakl er tirkel kuk ngodech a klaumerang me a loruul el tekoi er kid.20 Ng mekngit el dolekoi, eng di a rebebil er a rechad el chelbangel aikaikid el tekoi a melemolem el uaia lengara kemikl er a rebebil er a rechedal me a remengeteklel a telungalek, ward, me a stake. Ng kired el rokui el melasm el muut el mo bekokeuii e ungil chad er a beluu.
IV.
Aikel ngii a uchel eng diak dodengei, e kid a kakerous a teletael el dechelbangel er tial klengar. Eng di kede medengei el kmo a Dios a mo ngosukid er a ikal mondai alsekum eng meral ngarngii er a rengud osiik er Ngii. Uriul er a bo decharm e douchel a rengud er a llach el bla detemall el kid a mla mosisechakl el kirel, e kede melemolem el sebeched el mo er a tara rengedel a klebkall. Sel mo ulebongel el kerkeriil a mo ultuil er a Rubak, el di ngii el tang a medengei, e olab a llomes, me a krasia el mo oukerkeriil er a dersta er kid.
Osisiu el taem, eng kired el melasm loltirkal aika el eru el ngarbab el llach. A leuaisei, e kid a telaod er a delongelel a llach me a beltikereng—loltirakl a llach a merael er a rolel a telbiil, e a osisiu el taem e kede oubeltikereng el mo er a odam er kid. Tial teletael a mo kired lultuil er a chedaol ulekrael el kmo ngera doldubech me a ngera domtok e mekera bo doubeltikereng e dungil lorrenges e dirrek lolisechakl. Ng diak el kired el ngmai a llach locheuekl eng di ng kired lochotii a mui el klemedengei me a beltikereng. A omeroled a kired el mo omdasu er tirkel ngalek el kuk diak el sal medengei el kmo te bliongel el sechal te redil, e bai olekebai sel mekekerei e doucais el kmo tengerang, chelsir a rebetok el ngalek, e tial diak lodengelterir a merael mo diak ra omerolel a taem.21 Kede omtok a omengesuseu er a rechad el mo cheroid er a rolel a telbiil,e tiang a torbengii sel omesiou el mo er a ngi dil chad el ngii a omekrael el rechad el mo cheroid er a Rubak. Me a chelsel aika el rokui e lak dobes el kmo a Dios a mla tibir a deureng me a klengeltengat el mo er tirkel rokui loltirakl a Llechul.
V.
A rechedil me a rchedam me a kid el rokui a ngercheled lolisechakl aika el eru el ngarbab el llach. Mo er kemiu a redil er a Ikelesia, e a President Spencer W. Kimball a silodii sel ngii a ngercheliu lokiu tiakid el ngarbab lulaoch: “A klou el iildois er a ulekerulel a Ikelesia er a uriul klebesei a mei lokiu kemiu a rebetok el ungil redil er a beluulechad … el kmal mo obdois a iidisir el me soiseb er a Ikelesia. Tia mo uaisei le a redil er a chelsel a Ikelesia a ochotii a llemalt me a ungil lomeruul er a klengar tir e dirrek el redil er a chelsel a Iekelsia a moues el tokubets el ngodech … er a rebek el redil er a beluulechad. … Me a okesiu er a redil er a chelsel a Ikelesia a kmal mo bleketakl el mesisiich luchul a iildois er a rechad me a chedaol ulekerulel a Ikelesia er a uriul klebesei.”22
Ng melekoi el kirel tial ulaoch, e a President Russell M. Nelson a dilu el kmo “sel sils el President Kimball a ulemlaoch el kirel a chelechal sils. Kemiu a redil el ngii a ulemlaoch el kiriru!”23 Ng dimlak ki motebengar kemam el rirngesii tial ulaoch er a okeua el rak er a memong el kmo a rebebil er a redil er tial Ikelesia a mo olsobel er a resechelirir me a telungalek el tir a mla mechetakl er a tekingel a beluulechad me a chelbeldil a diablong. A nglunguchek a kmo bo molisechakl e mngara omeruul me bol mutaut tial ulaoch, el ngara ngklel a Jesus Kristo, amen.