Redil er a Telbiil el Obengkel a Dios
Sel desiseb er a telbiil e bo dekeldemel a Dios a ngii olchotir a remesisiich e ungil ngalek el redil el ngelekel a Dios el tir a chedil, e omekrael, e olngeseu.
Ng kmal mereng a renguk er a klengeltengat el ngak a mengedecheduch er kemiu, a redil rengelekel a Dios er a telbiil. Chelecha el kebesengei, e a moktek er ngak a mo omekduch a rengmiu el kirel a klou el omesiou el kemiu a mla mokedong el kirel. Choi, rokui el redil ngelekel a Dios el orrenges er ngak a mla mokedong er a Rubak el Jesus Kristo.
A okedongem a ulemuchel er se er a bem siseb er tia el klechad, er a chelsel a basio me a taem el telutk el kirem el mla er a Dios el ngii a kmal ungil medengelkau e betik a rengul er kau el Ngelekel. Chelsel a beluu er a redeleb, Ngii a mildengelekau e ulisechakl er kau e otungau er a basio el kau a ngar er ngii a techellem, di mekesai el taem er a reksi er a beluulechad, el mo siotai el mo er a techolb el ralm. Ngar er isei, e ke mo remenges aika el tekoi el medung el okiu a mla mokedong el mesiungel a Jesus Kristo: “Ak mla modurch ra Jesus Kristo, el mo tochelbau el ngara ngklel a Chedam, me a Ngalek, me aChedaol Reng. Amen.”1
Se el bem duum er a ralm, e ke mla kongei er a ta er a okedong el mo mesiou. El beches el ngelekel a Dios er a telbiil, e ke rirellii a yaksok e ngiluu a ngerachel er a Ikelesia er a Jesus Kristo er a Uriul-klebesei el Santo, el kau a mlo mungakl el chedal. Ke mla tibir el obengkel a Dios el mo nguu a ngklel a Jesus Kristo, e mo oltirakl a Llechul, e mo mesiou er Ngii.
Mo er a derta el tir a remuul aika el telbiil, a omesiou el Rubak a omekedong er ngii el mo rullii a kmal ungil chatter er ngika el chad. A sechal me a redil ngelekel a Dios er a telbiil, a uaisei, el rokui a obang a chimo e kmal klou a belkul e deuil a reng el okedong. Ng mesiou er a rebebil el Kirel.
Milngedecheduch er a rodos, President Russell M. Nelson a uluuchais er a kmal ungil kedeb el omesodel a okedongel a Rubak el mo er kau el mo obengkel er a Urerel. A President Nelson a mla smodii okedongiu er tiakid el teletael: A urerek me a klebkellek [a] mo melai el mei a diak a el mad e diak a ulebengelel el klengar er a chad.’ (Moses 1:39.) Me ngii el blak a rengul ngelekel-loltirakl er Ngii a mo mera el melekoi, ‘A urerek me a klebkellek a mo olengeseu er tirke el betik a renguk er tir el mo nguu se el moktek er a babeluades.’
“Olengeseu er a ta er a chad el mo nguu se el ultekellel er a celestial el ngii a tebechedel a chedaol el ngerchelel a redil. Ngii el chedil, sensei, me a lechub e ng omekeroul el Santo, e ngii a omeob er a ngar el klei el mo er a teletelel a loureng el tekoi. El obengkel a Dios, e se el chedaol el ngerchelel a mo olengeseu er a redeleb el kiei me a reng el mo uldars. Tia e a klungel a blebelel. Ng chetengakl, omekllomes, e olsobel.”2
Ng diak el sebechem el medengei el kmo ng oingerang, me a lechub e ng ngera klemengetel a taem, e se el ngerchelem a mo uldalem el kirel a omesiou er a okedong el chedil, merredelel, me a lechub e ng olisechakl el odos. A Rubak, el oba beltikelreng, a diak el beskid se el omelilt el taem, klemengetel, me a lechub e ng blechebechel a ureled. E ng di ke medengei er a chedaol llechukl me a ngar el profet el kmo aika el ngerachel a dirke mei, el locha ngar er tia el klengar me a lechub e se el merael mei, el mora derta el ngelekel a Dios. E ngii el rokiu a mengedmokl el kirel a diak a ulebengelel klengar er a oubeltikelreng el telungalek—el ngii a kot el ngar er bab er a rokui el sengk er a Dios.3
Kau a mo mellomes e mo oltoech a rokui el omelasm el mo mengedmokl er kau er chelechang el oba ulebongel el ngara uldesuem. Tia el ngerachel a di beot e le derta er aika el ngerachel a ousbech er a osisiu el omengedmokl.
Me medomuchel er a ngerachel el mo mesiou el odos. El di ua moba ngerchelel a 10 a rekil el ngalek er a telungalek el chedam a mla mo smecher, me a lechub e ng merredel er a Cheldebechel er a Rolngeseu el basio el kiei er ngii a miltemall er a seseb, me a lechub se el om ngara osbitar el omekungil er a botk—e kau a ngar er ngii a techellem el mo kudmeklii a okedong el mlara Rubak el mo mesiou el Ngelekel.
Aike locha chemolt el kmal kakerous el ngerachel er a omesiou. E ng di ngii el rokui a ultuil er a ongedmeklel a mesisiich, e oubeltik el reng, me a diak a dektel el klaumerang el kmo a Rubak a diak el olekoi di merekmo se el lekedmeklii a rael, me a se el soal a reng el mong e meruul el Kirel.4
E le ngii a kldmokl, a 10 a rekil ngalek a mai chimal mechulii a mla melakl el delal e meluluuch el kmo ng mekera e olengeseu er a telungalek er ngii. E ngii a di melemolem er ngii.
A merredel er a Cheldebechel er a Rolngeseu a mla kudmeklii el mo mesiou el uchei er a dimlak lodengelii el seseb er tia el basio el lengar ngii. Ngii a mla mo medengelteterir e oubeltik el reng er tirka el chad. A klaumerang er ngii er a Jesus Kristo a mla mukeroul er a chelsel a rak el ngii a mla munger a nglunguchel el mo er a Rubak el mo olengeseu er ngii er a mekekerei el omesiou el mo er Ngii. Uchul a meketeket el omengedmeklel, e ngii a mle kldmokl e semeriar el mo omii er a rodos er ngii el mo olisechakl er a rechad me a telungalek el tir el ngara ringel.
A odos el ngii a omekchubs er a osbitar er a blotk a mle kldmokl el mo mesiou er a reledak el smecher. Ngii a mla chemoit a betok el taem er a klengar er ngii el mesiou er a Rubak el mo er a rokui el diak lodengelteterir el chad el di uai me a le tonari me a lechub e ng sechelil. Se el bo lolechesuar er a rengul er a okedong el mo olisechakl er a osbitar, ngii a mle milsiou er a rebebil el diak a dektel e oba a kmal beltik el reng el uchul e tirka el bebil er a resmecher a uluureng me ng diak dil mereched el mo ungil.
Ngara osisiu el blekeradel el kau a mengedmokl el mo mesiou, e ng sebechem e kirem el mengedmokl el kirel a okedongem el mo mengetikaik el kirel a Rubak se el lemei. Ngii a mo ousbech er a klaumerang er a Jesus Kristo, e uldalem er a dmolech el beltik el reng er kau el kirel a chedaol llechukl, el mo mengedereder er a rechad e mo olsisechakl er a Tekingel el diak a dektem. Sei e kau a mo kldmokl el oba Chedaol Reng el blechoel el chelmengem. Ke mo ousemeriar el melekoi el kmo,“Ak sebechek,” se el sekum e a counselor er a merreder er a Rengeasek el Redil a melekoi, el oba cheuateter el oto, “A Sister Alvarez a smecher er chelechang. Ng techa mo olsisechakl er a klas er ngii?”
Ng ultuil er a osisiu el omengedmokl el kirel a klebokel el sils el Rubak a omekedong er kau el mo meruul er a ngerchelel a chedil. E ng di ng dirrek el kmal ultuil er a muut el klou el oubeltik el reng el ble mousbech er ngii er a uchelel. Ng mo ultuil er a klaumerang er a Jesus Kristo el mo chengelakl er a mla meues er a chelsel a rengum. E dirrek el mo ultuil er se el klungel a nglunguuch el kirel a mo melodech, ulekrael, me a ongelaod er a Chedaol Reng el mo chengelakl er a se el momelechesiu er ngii el kmo ng sebechel.
Ke locha ulterkokl el oker el kmo mekera er a rechad er a diak el belkul a rekrir a medengei el kmo ngera se el kmal lousbech er ngii a chedil. Ng kmal ungil ker. A rechad a diak el sebechir el medengei a rokui el tekoi, e ng di ng sebeched el smuub a bebil er a suobel el okiu a ocholt er a Dios. Ng dirrek el sebeched el mesuub el okiu a tekoi el domtab, se el denguu a techall el mo osiik er a Chedaol Reng el mo olengeseu er kid el mo medengei a domtab.
Ak mla omtab er a Kathleen Johnson Eyring er a ika el mla mo merek el okeim me a euid el rak el kim bechiil. Ng chedil er a reteua el sechal me a reteru el redil. Me lmuut er chelecha el taem, e ngii a mla kongei er a okedong el mo chedil el omtebechel er a muut el betok er a dart el telungalek me a rebebil el ngii a mla rodelterir el mera rengul el chedil.
Ko medengelii se el omesodel a President Nelson el kirel a chedaol el ngerchelel a redil—uldimukl er ngii a ngerchelel el chedil: “El chedil, sensei, e omekeroul el Santo, el oldak er a ngar el klei el omeob a loureng el tekoi. El obengkel a Dios, e se el chedaol el ngerchelel a mo olengeseu er a redeleb el kiei me a reng el mo uldars. Tia e a klungel a blebelel.”5
Me lmuut er chelecha sel bo kumtab, e a bechik, er a Kathleen, a mla oltirakl er sel ultaut, el mora redil rengelekel a Demad. A kisel a denguu el me er ngak aike el tekoi el kmo “ngii a omeob er a ngar el klei el mo er a teletelel a loureng el tekoi … el dmak el obengkel a Dios.” Ng dimlak el orrimel. Ng ulmekedasech. E ngii a ngar er ngii se el kata el kirel aike el tekoi el loureng, el ngii a melasem el omekedasech er tirke el tir a loubeltik el reng e oungalek er tir. Se el kata a mle ebangkelio er a Jesus Kristo—el sebechel lomes er ngii el okiu a nglunguuch el ultebengar er a ika el mla memong el rak.
Se el bom redil er a telbiil el obengkel a Dios a ua kmal ungil e ultebechel el rengelekel a Dios a mla blechoel el ouchedil, omekrael, olisechakl, mesiou er a ngidi el teletael me a basio el Ngii a mla kudmeklii el kirir. Ak yaksok er kau el kmo ke mo metik er a deureng er tia el omerolem el mo er a blim er a babeluades el obengkel el ngalek el redil el loltirakl a telbilel el ngelekel a Dios.
A kuchais el kmo a Dios el Chedam a ngar e Ngii a betik a rengul er kau. Ngii a mo onger a nglunguchiu. A Betik er a Rengul Ngelekel a omekrael, er a rokui el komakai, el Ikelesia er a Jesus Kristo er a Uriul-klebesei el Santo. President Russell M. Nelson a ngar el profet. E a Joseph Smith a milsa e milngedecheduch er a Chedam el Dios me a Jesus Kristo er a chelsel a oreomel er a Palmyra, New York. Ak medengei el kmo ng klemerang. Ak dirrek louchais el kmo a Jesus Krsito a Osobeliu; Ngii a betik a rengul er kemiu. E okiu a Tngakireng er Ngii, eng sebechiu el mo klikiid e mo selbechakl e ngoriakl el mo er a ngarbab e chedaol okedong el mei er kemiu. Ak olecholt er a klaumerang er ngak loba ngklel a Jesus Kristo, amen.