![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F2d%2Fe3%2F2de36a486b6479d1941ea2eccf92eb51d1fd3ad7%2F2de36a486b6479d1941ea2eccf92eb51d1fd3ad7.jpeg/full/!250,/0/default)
Chedaol Ultekelled
Sel blak a rengum el mesiungel a Jesus Kristo, eng sebechem el ngmai chedaol ulekrael me a ocholt lultuil er a Llechul el molab.
Sera bok merek er a Young Women camp er chelechal summer, ea klebokel ngeasek el dil a mle meskak a tetat el babier. Ng milluches, loker el kmo, “Ak mekerang e mo medengei el uase a Dios ouchais er ngak ngerang?” Ng kmal soak a keril. A rengud oureng el mo kmeed er a blid er a babeluades. Ng soad lomelchesiu el usbechall e ngarngii a derelii. Ng di bebil er a taem eng meringel er kid el medengelii a di uldesued me a odbechel Chedaol Reng. A reprofet, er a recheuodel me a chelechang, a mla olisechakl el kmo “alsekum a kmong ngerang a rullau el mo meruul a ungil, eng mlara Kristo.”1
A President Russell M. Nelson a mla melekoi er a beot, e mesisiich el ongit: “Betik er a renguk el rodam me a rodos, a kulengit er kemiu elmo melisiich er a chedaol ultekelliu el mo ngmai chedaol ocholt. … Molilt el mo meruul chedaol ureor elmo nguu a deureng er a sengk er a Chedaol Reng e mrengesii a ngerel a Reng el blechoel e bleketakl.”2
A soak er chelechal tutau a mo mengedecheduch er kemiu el ngara renguk el kirel a kleua el rael mo smisichii a chedaol ultekelliu el mo ngmai chedaol ocholt.
1. Bol blak a rengmiu Loterkeklii a Taem me a Basio el mo rongesii a Ngerel a Dios
Mesel molilt el mo meruul e modars a temem er a bek el sils el mo kmeed er a ngerel a Dios, oumesingd a Babier er a Mormon, cherengel a taem ea Ngerel a mo bleketakl e kau a mo ungil medengelii.
A kuk bitang, e a olibesongel me a cherrodech el mui er a beluulechad me a rekeblid me a klengar kid a sebechel uchul eng meringel a derengesii a Ngerel. Aikal ongesang a sebechel sokedii a uldusued me a rengud e diak el becherei a basio el mo er a medemedemk e mengelulau er a Chedaol el Reng.
A Profet Joseph Smith a ulisechakl el kmo a Dios a blechoel lolecholt er Ngii el mora “rechad lokiu a berrotel el teletael, er a ikel le ngar ngii; a le ngara chereomel a lechub a ked, el blechoel diak a cherrodech me a nglemuu er ngii.”3
A Diabelong a soal el meleakl er kid er a choto er a ngeral a Dios el mengeroid er kid er a ikal diak a cherrodech er ngii el basio. Alsekum a Dios a mengedecheduch loba, chelellakl, e kekerei el ngor, e kau me ngak a kired lolekeed el mo er Ngii. Momtab el uase ngera mo duubech omko kid a mo blak a rengud lomak el mora babeluades el uaisel domak el mora Wi-Fi! Mngiltii a taem me a basio, e morrenges er a ngerel a Dios ra bek el sils. E moltirakl er tiaikid el blam tetkii el taem, leng betok el tekoi a ultuil er ngii!
2. Moruul e Lak Mongiil
Sel mnguu odubech e moltirakl loba blakereng, e a Rubak a sebechel ousbech e rkau. Sel oblechoel meruul, e kemo blechoel mtebengar a ngerel Chedaol Reng se lemei. Ke mo ungil medengelii a ulekrael er a Dios e Ngii a “soal … lolecholt er a uldesuel me a soal er kau.”4 A omeoud, eng sebechem lobes malechub eke metom er a techall elmo ngoseuir a tara chad el kirel a Dios.
3. Mngai a Urerem er a Rubak
A nglunguuch el Chedam er a Babeluades a semeriar longer aikel ongtid el mukrael el mo er a kmong techang lousbech a ngesou. A President Henry B. Eyring a mla olisechakl er kid el mo osiik chedaol ocholt loker er a Dios er a chad el sebeched el ngoseuir el Kirel. “Omko koker a ker el uaisei, e a Chedaol Reng a mei e kau a mo omelchesiu aikel tekoi el sebechem el remuul el mora rebebil er a rechad. Sel bong e moruul aikal tekoi, e kau a meruul a urerel a Rubak, e sel moruul a urerel a Rubak, e kemo nguu a sengk er a Chedaol Reng.”5
Ng sebechem el meluluuch lolengit er a Dios er a urerel. Sel bom uaisei, e Ngii a sebechel ousbech aikel duch er kau el mo kudmokl a meklou el Urerel.
A demak el rubak, el Fritz Hjalmar Lundgren, a tilobed er a beluu er a Sweden er a le teruich me a etiu a rekil. Ng kilerd er a beluu er a Merikel, el di ngii el tang, loba blil a bilel me a di elolem el rak el skulel. Ng dimlak lodengei a tekoi er a Merikel, eng mlora Oregon e ulureor er a seidai, lobengkel a delak el mechas me a delak, e mlo chedal a Ikelesia. Ng dimlak bo loungerachel er a ward, eng di blak el reng er ngii loldingel e olisechakl, e ngilteterir a betok er a okeim el telungalek el mei er a Ikelesia. Ng milkerang e mo uaisei?
Uriul er a lemad a demak el rubak, a kulemes er a chelsel a baks er a ikal babilengel e milsa babier el lilchesii a chad el liluut el mei er a ikelesia leng beltikereng er a demak el rubak a uchul. Tial babier a dilu el kmo, “A bertelel a Brother Fritz, a kumerang, el uase ng blechoel meruul a urerel a Chedam er a Babeluades.”
Tial babier a mlara Brother Wayne Simonis. A demak el rubak a uleldingel er ngii e mlo medengelterir a dersta el chedal a telungalek. Cherengel a taem, e a demak el rubak a dilu er tir el uase ng ousbech er tir, meng mle oleker er tir el mo er a ikelesia. Eng di tiaikid el Sandei, e a Brother Simonis a milkiis el erul tekoi a mlara uldesuel—ng dimlak bol merek el mengadou ra blil e mle kirel mo chull er tiaikid el taem. Ng mle omdasou el uase ngmora ikelesia, edi aksiub er a chimal a demal rubak, e sola merael mo remei e rokir a chedeuel a blil. A telungalek er ngii a sebechel di tir el ngara miting er a sacrament.
Ng kmal mle ungil tial moktek er ngii el mo lmuut ra, le ngara bebul a chadou, eng rirngesii a chad el melemiakl er a changaridang. Ng melekoi el kmo: “Ak chilisengekl … e a Brother Fritz a dechor er a changaridang. Ng mle klikmechur el bedul ngak. A kot, ak mlo merur e ulmelchesiu el uaia kekerei el ngalek el mla chemiis er a skuul. E kuk mocha … omelchesiu el kesib a renguk. [Ng di a Brother Fritz] a ngilbetii a bilel e turcheklii er a changaridang. Sera loluill a chimal a becheleleu el bilel, e ngulbult lomes er ngak e dilu el kmo, “Brother Simonis, ngarngii a tara martilengem? Tial ureor a locha kmal klou a belkul le alsekum eng diak eng diak mchititerir a telungalek er kau, le alsekum eng kmal klou a belkul, e ak ngosukau.’ Sera kumes er ngii, akmilsa blekokeuii me a beltikereng er a Kristo. Ngmlo diak el kesib a renguk. … Ak di mlo mechei a dongu er ngak er tiaikid el Sandei e okiuellel ngkal ungil sechelik el metengel er a changaridang el merael bedul a ikelesia.”
A demak el rubak a mla nguu a oderchelel a Rubak, e mle medengei el uase ngkirel mosiik a mla remiid el sib. Ng di uai tirkel teuang el chad el kilderii a sechelirir el mle smecher longesechii er a chadou e sola oltengel er ngii me lomekungil er ngii a Jesus Kristo,6 meng diuaia demak el rubak el urerel a mlora bebul a chadou. A Rubak odars ocholt el mor tirkel losiik el mo olngeseu er a rebebil.
4. Moumerang
Dirke cheliseb, ak dirk milenguiu er a chedaol llechukl el kirel a tara ungil misionari el ngii a ngiluu a ngerachel el mla er a Rubak. A Aaron a mle olisechakl er a king er a Lamanites, el mle mechas a rengul el uase ngera uchul me a odam er a Aaron er a Ammon a dimlak lobengkel mei e lolisechakl er ngii. “Me a Aaron a dilu er a king: Momes, a Chedaol Reng er a Rubak a mla mekodongii el kuk mo er a tara ureor.”7
A Reng a milngedecheduch er a renguk: derta er kid a ngodech a teleteled a doureor, e a bebil er a taem e a Reng a omekedong er kid el mo era “tara rael.” Ng betok a rael el doleketek er a rengedel a Dios kid loltirakl a telbiil el chad, el oltirakl er a Jesus Kristo. Sel moltirakl er Ngii el blak a rengum, a sebechem el ngmai chedaol ulekrael me a ocholt el di kirem, lultuil er a Llechul el molab. Ngarngii a tokubets el ureriu me a ngercheliu er a klengar e mo ngmai a tokubets el ulekrael el mo kudmokl.
A Nephi, me a odam er a Jared, me a Moses a mlo iimuul er a meklou el daob— el dimle kakerous a teletael lulusbech. A Nephi a uluureor er a “ngodech el bedengel a usbechellel a kerrekar.”8 A obekul a Jared a dilasech a bilas “el diak a chemersel el diua belatong.”9 E a Moses “a milrael er a berrebirt el chutem er a belngel a daob.”10
A redersta er tir a ngilai chedaol ulekrael, el kuk mle blingelir, e a dersta er tir a ulumerang e miruul. A Rubak a kerekikl er tirkel lolngesenges, el uaia tekingel a Nephi el kmo, “ng mo kudmeklii a rael el [kired] me ke de mo kudmokl aikel tekoi ledu er kid.”11 Ka momtab er a Nephi el melekoi el kmo, “a rael”—ng diak el “sel rael.”
Kid kede olechib malechub e kede mengeroid a urerel a Rubak le Ngii el mla kudmeklii a “rael” el kuk ngodech er sel domdasou er ngii?
A demak el rubak a mlukrael el mora ngodech el basio—loubail a ungil bail, e ngara bebul a chadou, er a Sandei el sils. Moumerang er a Dios lomekrael er kau, luldimukl a le kora ngodech er sel kau omdasou er ngii a lechub e ngodech er a rebebil.
A re Uriul-klebesei el Santo a kakerous a teletelir, eng di “tir el rokui a diosisiu er medal a Dios”—“a mechedelekelk me a becheleleu, ngara ringel me a remimokl, sechal me a redil,” remesobil me a rbechiil, rungil beserir me a remechebuul, ngeasek me a recheuodel, meketeketa el chedal a ikelesia me a dirk ulebult.12 Ng diak el iior er a uase kengerang a lechub a teletael el kau a ngara chelsel, a Rubak a siotai er kau el me obengkel.13
Sel mosiik e moruul a soal a Chedam el mo tebechedel a klengar kau, e kau, a mo, mukrael elmo mengodech e mo ouchel a rengum.
A beches el prokuram er a Ikelesia el mora rengalek me a rengeasek a dechor er a dodai er a omesuub losiik chedaol ocholt, osiik aikel soal a Rubak a doruul, e mo oltirakl. A dersta er kid, el diak el iior er a rekid me a teletael el dengara chelse, a melsam el mo osiik, ngmai, e meruul. Sel moltirakl er tial diak a ulebengelel teletael er chelechal taem, e ko mo kmeed er a Jesus Kristo— me a beltikereng er Ngii, llomes er Ngii, ulekrael er Ngii, budech er Ngii, me a klisichel el Omekungil. E mo chachisois a chedaol ultekelliu el mo dongu er a Chimal er a bek el sils elmo mengedmokl a Urerel. Lobang a ngklel a Jesus Kristo, amen.