Klumech, me a Belkul, me a Seked
Ngokiu a diak el ngemed el nglemuu me a cherrodech er chelechal taem, e bo dolasm el lomes ra Kristo er a chelsel a klengar kid, kalumera er kid, me a omesiunged.
Rodam me a rodos, ngka Sammy Ho Ching, leuid el buil ngalek, e ngara blil lomes er a klou el ongdibel er tial mlo merek Longeua el buil.
Sera bocha el taem el doldars a chimad el mo er bab loldubech er a President Russell M. Nelson me a rebebil er a General Authorities, e a Sammy mle mechesa chimal lorreked er a tul. Meng rirelii sel kuk tara kmal ungil tekoi.
A Sammy ochotii el mer kid a beches el teletael er a kengei lolab ochid.
Ak mengemedaol er kemiu el mei er tial eru er a tal rak el klou el ongdibel er a Ikelesia er a Jesus Kristo er a Uriul-klebesei el Santo. Ak di mo dmedesii a dai er a bo kusaod er ngii el kirel a belkul tial eru-ra-tal-rak longdibel, el mo omuchel er tiakid el cheldecheduch el mengai er a Lukas er a Beches el Renged:
“Meng dilubech, e a [Jesus] er a lemerema er a beluu er a Jericho, e a tal mikou el chad a dilengchokl er a tkul a rael lolengit:
“… Me ngulerrenges [er a] rechad el melngelakl, me nguleker el kmo ngera belkul.
“… Me te ulechais er ngii, a Jesus er a Nazareth a mle chengelakl.
“Meng longela, e kmo, Jesus, kau el Ngelekel a David, bom chebkak.”
Kilbetiekl er a teletelel, tial seked a milasem el meruul er ngii meng mo lmuk, eng di “ng mengai el longelang.” A ulochotel a tial omerolel, ng milengai el mo er a Jesus, el rirengesii a mesisiich el klaumera er ngii loelngit me bol sebechel lolutii osengel e olemekungil er ngii.
Ng kmal ngildechii a renguk er tial kedeb el cheldecheduch sel tal kunguiu er ngii. Ng sebeched el melchesuar a chelbulel ngika el chad. Ng telkib el sebeched el rongesii el loldiu el lolechau er a Osobel. Kede klikmechur er tial teletelel chetil a longellakl er ngii—eng di, ng mle blak a rengul kilungii a ngerel e r a taem el rebek el chad a millekoi er ngii el mo mengkekerei er a ngerel. Ng meral, klebokel, el cheldecheduch el kirel a blakereng el klaumerang. Eng di ng uaia bek el cheldecheduch er a chedaol llechukl, el sel deblechoel mengui er ngii, e kede metik er a belkul.
A tara uldasou el mechas a renguk er ngii a sel klungiaol el mla er ngika el chad el mle iliuekl er a rechad luleba chedaol chubechub el kirel. A klou el suobel el mengai er a tial cheldecheduch a ultuil er a rebetok el diak dodengelterir el redil me a re sechal, el ngika el chad er a loker tir el kmo, “Tial cherrodech ng ngera belkul?” obang a ues, a lsebechem, el mo dongchii a Kirsto el rau el reng a uchul; Ngii a mle “belkul a teletelel.” Ngarngii a suobel el mei er kid el rokui er a chelsel tiang. Sel dosaod el kirel a klaumerang me a bult, eng klou a ultutelel doker er tirkel tir a dirrek el ngarngii a klaumera er tir! “A mikou ng sebechel lomekrael er a mikou?” A Jesus a mle tal loker. “[A blo uaisei,] eng diak di diul ruebet er a iekolek?”
Tiaikid el dosiik er ngii el tekoi el kirel a klaumerang me a bult a moktek er a ikal ongdibel, e chelechall sils el dekldibel e ko mo metik el kmo tial skel a klaumerang a di ngara kid el rokui. Momes el meliuekl er kau. Chelsel tial basio e ko mesterir a kakerous el telungalek el mla er a kakerous el basio el mei. A remeketektang el sechelei a kaunged e lekaseues, e a rechad er a chelitakl a merech er tir, ea rekuk omtok a ngara ikel le ngarngii e kesaod. A remeketeketa er a bol merek el misionari a osiik er tirkel mle kldemir, e a re dirk mlo merek el misionari a kuk blak a rengrir losiik er a beches el kldemir (alsekum e ko medengelii a kulekoi er ngii!). Me a siasing? Rubak mngesukemam! Me a dengua el di lebeldoel a rebek el chad, e kede mla obult el mo dikea “doruul a urerel a klemisionari” e “mla mo rechad er a omelai el siasing.” Me a chelsel aikaikid el rokui el teletael el ngarngii, e a chad a sebechel loker el kmo, “Aika ngera belkul?”
Meng di uai sel cheldecheduch er a Beches el Renged, el tirkel ngeltengat a mo mtebengar el kmo, a rokui el tekoi el mekedmokl er a chelsel tial ongdibel, a diak a kmal ultutelel alsekum a Osobel a diak el ngii a moktek er a rokui. Sel mo uchul e kede nguu a ues el dosiik er ngii, me sel omekungil el Ngii a yaksok el kirel, me sel klou el ultutelel, eng kired el oibekii tial klou el nglemuu—el ngara deureng—e ngmai osenged el bedul Ngii. A nglunguchir a rebek el mengedecheduch, a urungulir a rokui el mengitakl, me a omengull er a rebek el chad—a rokui el siotai er a Reng er Ngii el Ikelesia er ngii—el ngar el Kristo, el Ngelekel a Dios, el Prince er a Budech.
Eng di ng diak el belkul a kmo ng kmal kired el ngara conference center e kid a metik er Ngii. A ngalek sel ketengel menguiu er a Babier er a Mormon el sal mechas a rengul er a blakereng er a Abinadi malechub e tirkel erul telael el soldau, eng sebeched el dochelii el kmo a Jesus a ngii a uchul tial meang el cheldecheduch, el ngara chelsel a bek el llel tial babier lomak er tirkel bebil er a mesisiich a klauemra er tir el chad el ngara chelsel.
Osisiu, a sechelid sel sekum eng mesuub el kirel a klechelid er kid, eng sebechel mo mechas a rengul er a bebil er a diak lodengei el tekoi el kid ousbech er a klechelid er kid el uaia—tekoi el kirel omengeled, siungel a klechad, rolir a rucheled, me a ngara mesil el blechebechel a telungalek, me a diak el uai iidisel a cheldellel a ikelesia el bebil er tir a locha mo mechas a rengrir lulemdasou el kmo, ng ko er a di beot el tekoi a doruul. A leuaisei, e a rebeches el sechelid sel le ues a betok el beches el ues me a teletael, eng diak desal mesaod a komakai e bai kired el meketakl a belkul aikel meklou a ultutelel el mo er tir, lultuil er sel kmal ngii a techel ebangkelio—el beltkereng er a Demad me a Delad er a Babeluades, sengk er a tngakireng er a chedaol Ngalek, me a ongelaod lulekrael er a Chedaol Reng, oluut er chelechal uriul-klebesei er a ikal rokui el klemerang me a lmuut el bebil.
A chad sel leketengel mo er a chedaol el templo, eng locha sebechel mo mechas a rengul er a teletael er a chelsel. A ngercheled el mo medengei el kmo a chedaol olangch me a ulecholt lomeruul, me a bail dousbech me a osengel a huirum, a diak el choudur a uldesued ng bai ngoikid el bedul Osobel, el ngii a uchul e kede ngara omengull. A templo a Blil, e Ngii a kirel kot el ngaruchei el ngara uldesued me a rengud—el meang el osischeklel a Kristo a mekekii a klechad er kid el di uaia teletelel chedaol ruoll er a templo—lomuchel er sel taem el dechiuii a tekoi llechukl er a tuangel el mo er sel ulebongel el temed er a chelsel. E sel kot el ngaruchei er a ikal rokui el meang el teletael, eng kired, er a chelsel a rokui el tekoi, el mesa sel moktek er a Jesus er a chelsel a templo.
Ka momtab aikel betok el mla duubech e mekedmokl el tekoi me a beches el chais er a chelsel a Ikelesia er a ikal mereko el tela el buil. Me sel doldingel er a ta me a tang, a lechub e deluut el melisiich a tekoi el doruul er a Chedaol sils, a lechub e dousbech a beches el prokuram el mo er a rengalek me a rengeasek, eng sebechel mochib osenged er sel meral belkul aika el ulaoch alsekum e kede omes el kmo ng kuk ngodech, el diak losisiu el teletael e a lechub aikang a kabekbuk el tekoi lombil a ngesou el ngosukid el toketekii a Dodai er a Osebeled. A mera er ngii, tiaikid sel kmal ngara moktek er a President Russell M. Nelson el kid a mo ousbech er a mla mocholt el ngklel a Ikelesia. Alsekum a Jesus—a Ngklel, Osischeklel, Okesiul, me a chedaol klengar Ngii—a mo moktek er a omengull er kid, e kede mo melisiich er sel klemerang losischeklel a Alma el kmo: “Ng betok el tekoi a morngii; [eng di] kmal, di chimol tekoi a kot el klou a ultutelel er ngii el rokui— … el ngii a Osobel el [ngii] a ngar e lmuut el mei ra delongelir a rechedal.”
A teletael er a beluu er a taem er a Joseph Smith er sera 19th-century a mle klou a nglemuu el leues a re Kristiano. E a chelsel tiaikid el nglemuu el tir a milchelii, e tirkaikid el mle mesisiich el kautok el chad, a milngeuid er a Osobel el ngii a ngeasek el Joseph a kmal lulsiik er ngii. Oumekemad a lomekedong el “iilkolk me a rraureng,” eng merola el mo er a chereomel e milsa e rirngesii a meang el sioning er sel moktek er a Osobel er a chelsel ebangkelio el muut el ngaruchei er a ngii di el ngera el mla medung er tiang er chelechal tutau. Me ngokiu tiaikid el mengasireng el beches el ues, e a Joseph a milsa Demal er a Babeluades, el ngii a ngarbab el Dios er a beluulechad, me a Jesus Kristo, el Di Chimol Cherrungel el Ngelekel Sechal. E a Chedam a ulechotii okesiu losisiu ngii me sel bla dosaod er ngii er chelechal tutau: Ng tiletkii a Jesus, e kmo, “Ngkakid a Betik er a Renguk el Ngeelekek. Mrengesii!” Ng diak a ngii di el tekoi el smodii a chedaol deruchellel a Jesus, me a ngarbab el Ngerchelel er a chelsel a uldasou er a mo suobel, me a deruchellel er medal a Dios er a ikaikid el kleuid- el tekoi el mla medung.
Cherrodech me a rraureng? Seked me a klautok? Aika betok er a beluad. E kelemrang, a re diak loumerang me a roumerang el dirrek a dirk omtok er tial ues me a ikel rokui el bla kusaod er chelechal sils. Me alsekum e ke melasm el mo beiusech osengem e metik er kau el ngara chelsel a betok el kakerous el uldasou, e a kutucheklau el bedul ngike el sosisu el Jesus e sioning el apostol el kirel sel teletael el dilubech el mora Joseph Smith, losisiu me sel dilubech er a tal telael me a eai el dart el rak er a memong el mo er ngike el mikou el sechelid el liluut el nguu osengel er a lengara Rael er a Jericho. A kuchais aika el eru el teletael me a lmuut el betok el kmo sel kot el mengasireng el ues me a cherrodech er a klengar a kmo a Jesus a diak di be lengelakl el merekong Ngii a me teloi er kid, e mo dechor bita er kid, e Ngii a mo kiei lobengked.
Rodos me a rodam, ngokiu a diak el ngemed el nglemuu me a cherrodech er chelechal taem, e bo dolasm lomes er a Kristo er a chelsel a klengar kid, kalumera er kid, me a omesiunged. Sei kid sel klemerang a ngar ngii. E a lskeum a kuk bebil er a sils eng kedeb osenged me a rengud a kekeringang ma lechub a klaumera er kid a ngara skeng me a omengikiid—e kmal mo uaisei—e bo le klou a ngered el lemangel, “Jesus, kau el ngelekel a David, bom chebkak.” Ak yaksok loba ngerel a apostol mea mesisiich el ulaoch el kmo ngii a rongesau er chelelchang malechub a uriul el kmo, “Bo momes: a klaumera er kau a mla osebelau.” Mengemedaol er kau el mera klou el ongdibel. Loba ngklel a Jesus Kristo, amen.