Diak el Mesmesim el Blakereng el mora Jesus Kristo
A Dios a siotai er kid el mo chemoit a mechut el blekerdeled e mo omuchel er a beches el klengar el ngara Kirsto.
Tial mlo merek el Ongeua el buil, eng mlarngii a techellek el mo oterkeklii a Templo er a Kinshasa Democratic Republic er a Congo. Ng diak a tekoi el smodii a deureng er a remesisiich a klaumerang er tir el chad er a Congo me a ngak a mlo melechesuar er aki mesa oterkeklel a templo er a belurir.
Tirkel mo soiseb er a Kinshasa Temple a mesa sunga llechukl el kmo Congo Falls. Tia omeklatk er tirke el mora-templo er a diak el mesim el blakereng er tir lultuil er a Jesus Kristo e olitrakl er a rolel a telbiil el ngara moktek er a Chedam er a Babeluades. A omeuachel el ngar er tial sunga a omeklatk er a mle teletael er a ngara mong er tirkel uchelel a Klekristiano er a Congo.
Uchei er a lobult, e te milngull a ko er a bleob el klalou, loumerang el kmo aikal klalou a ngarngii a klisichel. Uriul er a lobult, ete betok a milrael el mora ikel diak el mochur lomeuachel er a Congo, el uaia rua Nzongo Falls. Tirka el ulebult a chiloit aika el ble longull el klalou er tia el omeuachel el olecholt el mo er a Dios me a rebebil el kmo te mla chemoit aike el mle mechut el omerollir e mo kongei el nguu a Jesus Kristo. Tirka dimlak dil choit aikal bleob el klalou el mora chellelakl,e meched el ralm; te chiloit er a dmolech e meringel a berius er ngii lomeuachel, ma ikal klalou a diak el sebeched lemuut el metik. Aikal teletael a olengchelel a uchelel a diak el mesim el blakereng el mora Jesus Kristo.
A rechad er a bebil er a basio a dirrek lochotii a blakereng er tir el mora Jesus Kristo er a osisiu el teletael. A rechad er a chelsel a Babier er a Mormon lokedongall el Anti-Nephi-Lehies a “mlomechei a klekedellir er a mekemad,” el dilakl er a “chelsel a chutem” lolchotel “a klaumerang el mora Dios … el kmo [tir] a diak luut el mo ousbech aikal klekedall.” Tia olchotel a uase, tir a yaksok el mo oltirakl osischeklel a Dios e diak letemelii tial blakereng er tir. Tial blakereng a mle uchelel a “beltir el mora Rubak” el diak luut el mocheroid er ngii.
A “bult el mora Rubak” a belkul a kmo kede mengodech a omerelled, el mo cheroid er a mechut el teletael er a klaumerang, e obult el mora beches lultuil er a klaumerang er a moktek er a Chedam er a Babeluades me a Jesus Kristo me a Tngakireng er Ngii. Tia el omelodech a muut el klou er a llomeserreng el kongei er a osisecheklel a ebangkelio. Ng sumecheklii a olechoted, e ngodechii a belkul a klengar er kid, e rullid el mo mui lultuil er a Dios. Aikel soal a rengud el ngii omtok aikel tekoi el ngoikid el mora Osobel e oltirakl er a rael er a telbiil a mo mechoit e mutechei lokiu a blakereng el kongei er sel soal a Chedam er a Babeluades.
A obult el mora Rubak omuchel lokiu a diak el mesim el blakereng el mora Dios, e lobengkel a omerullel tial blakereng meng mo tebechedel a klengar kid. Tiang el blakereng a melemolem el teletael er a klengar e kirel mo klou a rengud e melemolem el ngara ouchel reng. E uaisei, e tia el telbiil a mo tebedeched, e uldalem er a chelsel a rengud, e blechoel el ngara chelsel a klengar er kid. Ng uai kid el diak dobes a ngkled el diak el iior ra ikel domdasou, eng diak dobes er a blakereng el medechel er a rengud.
A Dios a siotai er kid el mo chemoit a mechut el blekerdeled e mo omuchel er a beches el klengar el ngara Kirsto. Tia a morngii alsekum e kede mekdebechii a klaumerang er a Osobel, el ngii a mo omuchel el orrenges a klaumerang er a rebebil el oumerang. A uriul er sei, e a klaumerang a mo dmolech se el doruul a teletael el ngii a ngoikid el muut el mo mesisiich el mo er Ngii.
Chelechang, ng locha di ungil sel omenglou a klaumerang a blo el bekuiuiuul el ua secher er a tereter. E seikid e a mekekerei el “sngos” a sebechel el mekdubech a klaumerang er a rebebil. Eng di tiang a diak loureor el uaisei. A tal rolel e a klaumerang a mukeroul a sel sekum a chad a mo ngara olchotel a klaumerang. Aika el omeruul a blechoel el modubech el okiu a ongit el ngii a modars er a rebebil, e ng di ng diak el sebeched el “omekeroul” er a klaumerang er a tang me a lechub e kede di ultuil er a rebebil el kired. El mo uchul a ulekerulel a klaumera er kid, eng kired el melilt omeruul el ngii omekeroul er a klaumera er kid, el uaia nglunguuch, omesubel chedaol llechukl, melai er a sakrament, e mesiou er a rebebil.
Sel mukeroul a klaumerang er a Jesus Kristo, e a Dios a siotai er kid el mo yaksok er Ngii lokiu a telbiil. Aika el chedaol telbiil, el uaia yaksok a dodengei, el mucholt el okiu a belted. Chedaol telbiil a dirrek el rullii a mesisiich el dodai el mo uchul a chedaol el bekesed. Mese el dolilt el mo metecholb, e kede omuchel el nguu a ngklel a Jesus Kristo e mo melilt el mo melangch er kid el Obengkel. Kede tibir el mo uai Ngii e mo meruul aike el Blekerdelel.
Chedaol telbiil a omak er kid el mo er a Osobel e oldubech er kid er se el rael el ngii a mekrolid el mo er a blid er babeluades. A klisichel a chedaol telbiil a ngosukid el mo blechoel el obang sel bekeu el bult er a reng, e mekdolech a belted el mora Rubak, e mo nguu se el siasing er a Kristo el muut el mo cherrungel er a blekerdeled. Eng di a telaod el reng el kengei er a telbiil a diak el bol beskid a ngidil ngerang. Kede locha mo melasem el omart a meral teleteled, e chemoit a mechut el blekerdeled er a kellechakl el ralm, me a lechub e kede dmakl a dongu er kid er a ultok el dirk ultom a ordemelel. E ng di a ouralmesils el kengei el kirel a chedaol telbiil a diak el bol bkais a chesimer el mora chedaol klisichel a Chedam er Babeluades me a Jesus Kristo.
A blakereng er kid loltirakl a telbiled a diak el kirel mengodech lultuil er a ngeldechel a teletael er a klengar kid. A ultiled er a Dios a kirel mo uai sel Congo River el kmeed er a Kinshasa Temple. Tia el omouachel, diak el ua bek el omouachel er a beluulechad, a omaoch el ta el rak omaoch a bekord el 11 miliol el karong (41.5 million L) el ralm er a chelsel a tal second el mo er a debel a Atlantic.
A Osobel a mle siotai er a Roltirakl er Ngii el mo kausisbech e mesisiich. Ngii a dilung, “Uaisei, bol delalm er a chelsel a rengmiu, el mo meruul aikel tekoi el kulisechakl er kemiu, e mla dmu er kemiu.” A “delalm” el blakereng loltirakl a telbiled a rullid el mo mui el medengelii a yaksok er a Dios meng sebeched el mo nguu a diak a ulebengelel deureng.
Betok el blak a rengrir el Uriul-klebesei el Santo a mla ochotii el kmo te “delalm” loltirakl a telbilir lobengkel a Dios e meral di mereko el mla mengodech. Msall e kuuchais er kemiu el kirir a retedei el chad—Brother Banza Mucioko, Sister Banza Régine, me a Brother Mbuyi Nkitabungi.
Sera 1977 e a re Banza a kiliei er a Kinshasa el beluu er a Zaire, el ngii chelechal taem eng Democratic Republic er a Congo. A rechad a mle chemat er tir er a klechelid er tir el Brodestant. El uchul a duch er tir, a ikelesia er tir a milngedmokl er a kekerei el telungalek er tir el mora Switzerland el mo mesuub e milsterir a kosukai er a Daingak.
Sera lengara Geneva, e lengara bas el mora skuul, e a Brother Banza a mle blechoel mesa kekerei el ikelesia el llechukl a ngakl el kmo “Ikelesia er a Jesus Kristo er a Uriul-klebesei el Santo.” Ng mlo melbedebek, “A Jesus Kristo ngarngii a Resanto er ngii er chelechang, er tial uriul klebesei?” Ngii a tilbir er a rengul e mlong e omes.
A Brother me a Sister Banza a kmal lulmengemedaol er tir a rechad er a branch. Te ulker a bebil er a kmal ungil ker el kirel a teletelel a Dios, el uaia, “Alsekum a Dios a di reng, el uaia eolt, e kede mekerang e obeob el uai Ngii? Ng mekerang e Ngii a kiei er a kingall?” Te dirkak a ta mel nguu a kmal mesubed er a rengrir el nger el merekmo a remisionari a uluuchais er tir el kirel a mla moluut el osisechakl er a kedeb el osisechakl. Sera lorael a remisionari, e tirkal Banza mlo kaseues e kmo, “Tiang diak el klemerang el bla derengesii?” Te millemolem lomais el me er a ikelesia e mesuub lobengterir a remisionari. Te mle medengei el kmo a techolbechelid e ra mla moluut el Ikelesia er a Jesus Kristo a morngii a le temellii. Ng mo mengai aike el kosukai er tir, visa er tir a mo mengubet, e tir me a tirke el terung el mekerei el ngelekir a mo kirir el muut el mora Switzerland. Te kilengei el mo metecholb e moterekokl er sera October 1979.
Erul sandei ruriul er a techolbechelid, e a Brother me a Sister Banza a liluut el mora Kinshasa el kot me a ongerung el chedal a Ikelesia er a chelsel a belurir. A rechedal a branch er a Geneva a millemolem el mengedecheduch er tir e ngilsuterir el mo medengelterir a remengeteklel a Ikelesia. A re Banzas a ngilai olisiich el mo melemolem el blak a rengrir e mengiil er a yaksok er a Dios el mo kudmeklii a Ikelesia er a Zaire.
E uaisei, a ta er a ngalek er a skuul er a Zaire, Brother Mbuyi, a milsuub er a Belgium. Ng mlo nguu a techolbechelid er a 1980 er a Ward er a Brussels. Uriul er tiaikid el taem, eng mlora mision er a England. Ea Dios a riruul ongasireng el Teletelel. A Brother Mbuyi a liluut el mora Zaire el uaia bo longedei el chedal a Ikelesia er a belual. Ngokiu a kengei er a rechad er a blil, e a miting er a Ikelesia a mlar ngii er a blil. Chelsel a Ongeru el Buil er a 1986 e a babier el melai a kengei el mo er a klou el amt el mo medengelii a Ikelesia. A saing er a tedei el chad er a beluu er a Zaire a mle kirel ngeiuul. Tirkal tedei el chad el mle ngeiuul a saing er tir a Brother Banza, Sister Banza, me a Brother Mbuyi.
Tirkal mesisiich a rengrir el chedal a ikelesia a mle medengelii a klemerang er a rengesii; te siliseb er a telbiil er a lenguu a techolbechelid el mlo omak er tir el mora Osobel. Eng di tirkang a mla chemoit aikel mechut el blekeradel er a dmolech lomeuachel el diak er a rengrir a lmuut el mo melai. Tia el rael er a telbiil a dimlak a ta mel beot. A uldikel er a beluu, me a diak el blechoel kaseues lobengterir a remengeteklel a Ikelesia, me a meringel lomengederoder er a Resanto a mle sebechel mengitechut a rengrir tirkal diak el meral ngar er ngii er a rengrir el chad. Eng di a Brother me a Sister Banza me a Brother Mbuyi a millemolem el ngara klaumerang. Te mlo mokedong er a otekeklel a Templo er a Kinshasa, Okedei me a ede el rak el uriul er a saing er a babier el ngii a mlo uchul a olengchelel a Ikelesia er a Zaire.
A re Banza a ngar er tia el Conference Center er chelecha el sils. Te dmak el obengterir a reteru el ngelekir el sechal, Junior me a Phil, me a buch el sechelingir, Annie me a Youyou. Chelsel a 1986, e a Junior me a Phil a mle kot el terung el chad el mo metecholb er a Ikelesia er a Zaire. Brother Mbuyi a omes aika el osongel er a Kinshasa el obengkel a bechil, er a Maguy, me a reteim el ngelekir.
Tirkal uchelel a mle medengelii a belkul a telbiil el tir a riruul “el kirel a klemedengei er tir er a Rubak el Dios er tir, e mo ngara deureng er a Jesus Kristo el Osobelir.”
Kede mekerang e omak er kid el mora Osobel e melemolem el oba klaumerang el uai tirkang me a rebetok el teruich el telael el Santo er a Congo el tir a ultirakl er tir me a lmuut el miliol el bebil el iliuekl er a beluulechad. A Osobel a ulsisechakl er kid. Bek el sandei e kede nguu a sakrament e remuul a telbiled el obengkel a Chedam er a Babeluades. Kede yaksok el mo omak er a olengcheled el obengkel a Osobel el okiu a kengei el mo nguu a Ngklel, e mo blechoel el melatk er Ngii, e mo oltirakl a Llechul. Ngar er ngii er a rengud e mengedmokl el kirel e klikiid el mo meruul aika el telbiil er a bek el sandei a omak er kid el mora Osobel, e ngosukid el dualem a telbilel a rengud, e mo mesisiich el ulekrael er a rael er a telbiil.
Ak siotai er kemiu el mo meruul aika el klemengetel a klengar el omerollel a chad el oltirakl. Moruul e moltirakl a telbiil. Mchoit a mechut el blekerdeliu er a dmolech, klou el omaoch el omouachel. Bom ungil dmakl a dongu er kemiu er a ultok el diak a ordemelel el chemolt. Ngokiu a Tngakireng er a Jesus Kristo, e sel doruul a telbiil loba blakereng el meral ngara omengull el kirel eng mo omekngeltengat a klengar er kemiu el mora ulebongel. Komo uaia Osobel sel blechoel melbedebk er Ngii, oltirakl er Ngii, e oulbetikereng el mo er Ngii. Ak olecholt a klaumerang er ngak el kmo Ngii a diak el mesmesim el dodai. Ng sebeched el ultuil er Ngii, e a yaksok er Ngii a bleketakl. Lobang ngklel a Jesus Kristo, bol uaisei.