Rokɔ Kan
Ewuradze n’edwuma rokɔ kan ara yie.
Mo nuanom na me nkyerɛbaa adɔfo, ɔyɛ me enyigye dodow dɛ mekã hom ho ber a yɛrehyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ne Afrehyia-Mprɛnu Wiadze Mfɛndzanan Ehyiadzi a otsĩa 190 no ase no. Modɔ dɛ meba hom efiefi anaa bea biara a hom wɔ no, ama yɛabɔ mu etsie nsɛm a nkɔnhyɛfo, adzehufo, na nyikyerɛfo na Asɔr baanodzifo nkaa no bɛkã no.
Ɔyɛ hɛn enyisɔ dɛ yɛwɔ abaefo mfir a ɔma hɛn kwan ma yehyia dɛ wiadze nyina mu Jesus Christ esũafo. Nyimpa dodow a wɔhwɛɛ ndaansa Ebɔbira wiadze mfɛndzanan ehyiadzi no kyɛn mpɛn biara dze, na yɛwɔ enyidado dɛ dɛm bɛba bio.
Abosoom kakra ara mu no, wiadze nyina mu nsan yarba, gya hyehyew, na ɔdomankoma ɔsɛɛ ama hɛn wiadze ebutuw. Menye hom mu kor biara a dɛm ber yi mu no ɔayew no dɔfo no dzi ne yaw. Na mobɔ mpaa ma hɔn a sesei woruhu amandze no.
Naaso, Ewuradze n’edwuma rokɔ kan ara yie. Yɛwɔ nyimpa ntamu ntsetsee, akataenyim, na Zoom nhyiamu horow ber mu no, yesũa dɛ yɛsesã mbrɛ yesi yɛ adze na binom wɔ ndamyɛ mpo mu. Mber mu a ndzɛmba asesã botum dze akatua a enyi nnda aba.
Hɛn asɛmpasomafo na asɛmpakã baanodzifo edzi dwuma ara yie, woegyina pintsinn, na wɔayɛ nwanwa ampaara. Nna ɔwɔ dɛ asɛmpasomafo hwehwɛ akwan fofor, na akwan pa a wɔdze yɛ hɔn edwuma mpo no, asɛmpakã dwuma horow dze amandzɛɛ aba dɛ wɔrekyerɛkyerɛ adze kyɛn ber biara mu.
Nna ɔwɔ dɛ yɛtow temple mu mber kakra, nye adansi dwuma no wɔgoow no adze kakra, mbom sesei ne nyina rokɔ kan. Afe 2020 mu no, nkyɛ yebotutu famu ahyɛ temple afofor 20 ase!
Ebusua abakɔsɛm edwuma akɔ sor sor. Wɔakyekyer ward nye stake piinara. Na ɔyɛ hɛn enyisɔ dɛ yɛbɔ amandzɛɛ dɛ Asɔr no ama wiadze mu nsan yarba ne nyimpa ho mboa ndzɛmba ama edwumadze ahorow 895 wɔ aman 150 mu.
Asɛmpa adzesũa a etu mpon wɔ efiefi pii mu renya dasegye a ɔyɛ dzen nye ebusua nkitahodzi pa nsunsuando. Enã kor kyerɛwee dɛ: “Afei a yɛboa ano wɔ Zoom do Kwesida biara no, yɛtse nkã dɛ yɛatwe abɛn hɛn mba na mba nananom no ara yie. Kor biara fa kwan kyerɛ n’adwendwen wɔ Come, Follow Me ho. Mpaabɔ a yɛbɔ ma hɛn ebusua mu mba no asesã osiandɛ yenya hɔn ehiadze ho ntseasee yie.”
Mobɔ mpaa dɛ, hɛn yɛyɛ nyimpadɔm yi, yɛdze mber soronko yi dze benyin wɔ sunsum mu. Yɛbaa asaase yi do dɛ wɔrobɔsɔ hɛn ahwɛ sɛ yɛbɛsan mu eyi dɛ yebedzi Jesus Christ ekyir, yɛataa enu hɛnho, yeesũa adze, na yeetu mpon. Hɛn esunsum pɛ dɛ wotu mpon. Na yetsim yie wɔ anamɔn kwan no do a, na mpontu no ba.
Ne nyina mu no, hɛn Ɔsor Egya na Ne Ba Jesus Christ, dɔ hɛn! Wɔdwen hɛnho! Hɔn nye Hɔn sor abɔfo roweɔn hɛn.1 Minyim dɛ ɔyɛ nokwar.
Ber a yɛaboa ano rebetsie nsɛm a Ewuradze ekenyan N’asomfo dɛ wɔmfa mma no, moto nsa frɛ hom dɛ hom ndwendwen anohoba bi a Ewuradze abɔ. Ɔpaa mu kãa dɛ “obiara a ɔpɛ na obosuo Nyankopɔn n’asɛm a ɔyɛ ndam na tum wɔ mu, dza obotum etwitwa abɔnsam ne ndabraba nye ne mfir a oesua, … na ɔafa [osũanyi] a ɔwɔ Christ no edua kwan heaheaba na nkekãnkekã no mu.”2
Mobɔ mpaa dɛ ho bɛsan mu esuo Nyame n’asɛm mu dɛ ma wɔpaa mu akã wɔ wiadze mfɛndzanan ehyiadzi yi mu no. Na mobɔ mpaa dɛ hom bɛtse Ewuradze no dɔ a odzi mu a ɔwɔ ma hom no,3 wɔ Jesus Christ ne dzin krɔnkrɔn no mu, amen.