Akyɛdze Kɛse a Ɔyɛ Ba no

Elder Matthew S. Holland ne Kasaa

Ɔkã Eduosuon no ho

Ɔnam Jesus Christ mu no, yebotum eguan efi hɛn honandua mu nkõgu a yɛfata, na abrabɔ mu esian a ɔnnsɛ hɛn no yeedzi do konyim.

Ber a merekenkan Mormon Nwoma no ayɛ Come, Follow Me adzesuadze ndaansa ɔhew ber yi mu no, dza Alma bɔɔ ho amandzɛɛ ber ohun no bɔn no, yɛɛ me ahobow, nna “biribiara nnyi hɔ a ɔbɛyɛ yaw a ne kɛse tse dɛ [ne] yaw no.”¹ Mekã dɛ, kasa a ɔfa yaw kɛse no, ɔkyee m’adwen, ne fã bi osian ɔkõ a dɛm dapɛn no mu no menye kidney boba ketseketse bi dzii. Nyimpa kor biara nnyaa “ndzɛmba akɛse” ho sũahu dabiarada ber a adze “ketseketse” a “ɔtse dɛm … dua[a] ba[e].”²

Alma ne kasaa no so daa edzi maa me osiandɛ kasafua kɛse wɔtaa dze kyerɛ ndzɛmba ahorow a ɔyɛ fɛw dodow anaa ne sasõ nnyi. Mfatoho, Joseph Smith kyerɛɛw dɛ bɔfo Moroni hyɛɛ bataker “fufuufuw,” a no fufuw “ɔkyɛn adze … biara” a [oe]hu no “wɔ asaase yi do pɛn.”³ Naaso kɛse botum akyerɛ adze dzendzen bi sɛ adze bɔn mpo a. Dɛm ntsi, Alma na nkasafua nkyerɛasee dze yaw kɛse fam “hun ahoguan” “moho hyehyee me,” “haaw me,” na “dzii atseetsee kɛsenara” ho.⁴

Mfonyin a Alma twa no kyerɛ nokwar a ɔsɛ ndwenho yie dɛ dabi yɛbɛtse hɛn bɔn biara a yɛayɛ ho afɔdzi ne yaayaw no emudzi mu. Pɛrpɛrdzi hwehwɛ dɛm na Nyankopɔn Nankasa nnkotum asesã.⁵ Ber a Alma kaa no bɔn “nyina” no—nkankara ma wɔasɛɛ binom hɔn gyedzi no— nna ne yaw ayɛ kɛse ara ma onntum nsoa, na Nyankopɔn n’enyim nkɔree ho adwendwen “sunsuaan [no] pasapasa,” na ɔhwehwɛɛ dɛ “nkyɛ [ɔ]ayew koraa [ne] kra nye [ne] nyimpadua.”⁶

Mbom, Alma kãa dɛ biribiara hyɛɛ ase dɛ ɔresesã aber no mu ara a “[n]’adwen twee” nkɔnhyɛ a ɔfa “obi a wɔfrɛ no Jesus Christ … ɔreba abɔbɔ werdam dze etua wiadze bɔn no,” na “[o]sũi wɔ [n]’akoma mu dɛ: O Jesus, ɔwo a eyɛ Nyankopɔn ne Ba, hu me mbɔbɔr.” Ɔdze adwen kor na ntotɔserɛ kor no, dɛw “mbordo a ɔtse dɛ [ne] yaw” no hyɛɛ no mã.⁷

Onnyi dɛ hɛn werɛ fir dɛ nnuho no botae nye ebɛfa awerɛhowdze bi na asesã no ma ɔayɛ dɛwdzi kɛse. Ndaase nkã Ne “papayɛ a … ɔnnkyɛr,”⁸ ber no ara mu a yɛba Christ hɔ—yɛkyerɛ gyedzi na akoma a ɔasesã nokwar mu—hɛn bɔn no mu dur a, ɔhom hɛn do no hyɛ ase fi hɛn ekyir kɔ Ne dze do. Iyi tum ba mu osiandɛ Ɔno a Onnyi bɔn hun amandze “a onnyiewiei na onnyi kãbea”⁹ wɔ bɔn biara a ɔwɔ no wiadze a Ɔabɔ nyina, ma N’abɔdze nyina—amandzehu a ɔyɛ yaw ara ma bɔgya fii no honandua enyi nyina kyĩi. Fi Nankasa no sũahu mu no Agyenkwa no bɔ hɛn kɔkɔ, wɔ ndɛ kyerɛwsɛm mu dɛ, yennyim mbrɛ hɛn “amandzehu” ne “dzen” bɛyɛ sɛ yennu hɛn ho a. Mbom nkyii, Ɔdze ehumbɔbɔr a onnyi kabea no, Ɔkyerɛ mu so dɛ, “Hwɛ emi Nyankopɔn, meehu amandze yinom dze ama obiara, ama sɛ wonu hɔn ho a, woennhu amandze.”¹⁰—nnuho a ɔbɛma hɛn kwan ma “yɛasɔ” “dɛw mbordo” no a Alma sɔɔe hwɛe no.¹¹ Nkyerɛkyerɛ yi nko ho, “Migyina nwanwa mu.”¹² Naaso, ahowbow mu no, Christ ma bi mpo kã ho.

Ɔtɔfabi a yaw kɛse ba a ommfi bɔn mbom ofi mfomdo a yɛayɛ, binom hɔn ndzeyɛɛ, anaa tum a ɔbor hɛn do. Mber yinom mu no, bia a ibɛtsẽa mu esũ dɛ Ndwomtofo nokwafo no:

“M’akoma ridzi yaw wɔ mo mu: na owu ho hu atɔ mo do.

“… Na ahodwuruw akata mo do.

“… Ao, sɛ mowɔ ebubur atsaban ɛ! nkyɛ mubotu makɔ beebi, na maakɔhom.”¹³

Eduryɛ ho abɔdze-nyansapɛ, hɔn a wɔawea hɔn afotu anaa asɛndzii mu ndzinoa botum abrɛ hɛn amandzehu no adze. Mbom hom nhyɛ no nsew, akyɛdze apapa nyina—fi Agyenkwa no hɔ.¹⁴ Hɛn haw na tsirpaa kɛse koraa mbrɛ ne farbaa tse biara no, bea a mboa mapã befi no yɛ kor: Jesus Christ. Ɔno nko na Okita ayarsã edur no tum mapã no a Ɔdze siesie mfomdo biara, ayɛ bɔn biara yie, asakyer esintɔ biara, esiesie pirakur biara, na Ɔdze nhyira biara akã ekyir no aba. Tse dɛ tsetse adasefo no, megye dase dɛ “na yennyi sɔfopanyin a hɛn mbrɛwyɛ nntum nntsɛ no”¹⁵ na mbom Pomfo dɔfo a Osianee fii N’ahengua do wɔ sor na ofiir edzi “[ɔ]bɛtse yaw na oehu amandze na obenya nsɔhwɛ biara bi … , ama … [o]eehu mbrɛ obesi aboa no nkorɔfo.”¹⁶

Obiara a ndɛ ɔwɔ yaw dzendzen anaa soronko bi a inya atsenkã dɛ obiara nntse mma hɔn yie no, hom wɔ bi kã. Bia na ebusuanyi, nyɛnko, anaa asɔfodzi banodzifo biara nnyi a—mbrɛ hɔn sunsum mu atsenkã na akoma pa bɛtse no—a onyim wo atsenkã pɛpɛɛpɛr anaa ɔwɔ nsɛm noara pɛr a ɔdze bɔboa w’ayarsã. Mbom hu iyi: Obi wɔ hɔ a ɔtse dza irudua mu no ase pɛpɛɛpɛr, a “ɔbɔ adze nyina do”¹⁷ na “otum dɛ ɔyɛ ma ɔtra mbordo kyɛn adze nyina a ebisa anaa [e]dwen.”¹⁸ No kwan do na obobue na wɔ Ne mber nhyehyɛɛ do, mbom Jesus ayɛ krado daa dɛ Ɔbɛsã wo yarba na w’amandzehu mbrɛ ɔtse biara no.

Ber a ema No kwan ma Ɔyɛ dɛm no ibohu dɛ w’amandzehu no annyɛ kwa. Ɔrekasa fa Bible mu ekunyin etsitsir no na hɔn awerɛhowdzi ho no, Ɔsomafo Paul kãa dɛ “Nyankopɔn … edua hɔn amandzehu mu wɔama hɔn ndzɛmba papa binom, osiandɛ sɛ woennhu amandze a nkyɛ wonnkotum ama woedzi mu.”¹⁹ Hom nhu dɛ, Nyankopɔn no su ankasa na hɛn asaase yi do asetsena no botae nye enyigye,²⁰ naaso yennkotum abɛyɛ abɔdze a wodzi mu a wɔwɔ ɔsor enyigye a yennyi sũahu horow a ɔsɔ hɛn hwɛ, ɔtɔfabi ma ɔkã hɛn ara yie. Paul kã mpo dɛ, Agyenkwa Nankasa “nam amandzehu mu dzii mu” daapem.²¹ Ntsi bɔ woho ban wɔ abɔnsan no nwasaa ho dɛ sɛ eyɛ nyimpa papa a, nkyɛ ibokwetsir nsɔhwɛ a ɔtse dɛm no.

Otwar dɛ itsia atorsɛm no a ɔfam ho dɛ w’amandzehu horow no kyerɛ biribi dɛ nnkã hɔn a Nyankopɔn asan mu eyi hɔn no ho, hɔn a ɔyɛ dɛ wofi enyimnyam tsebew kor mu kɔ kor so a wɔnnhaw. Mbom hu woho dɛ mbrɛ John Yikyerɛfo hun wo ampara wɔ ne nyikyerɛ nwanwa a ɔfa nda a odzi ekyir yi ho no. Na John hun “nyimpadodow kɛse a obi nntum nnkan hɔn a wofii aman, nye mbusuakuw, nye nkorɔfo, nye kasa nyina, [wo]gyinagyina ahengua no nye Eguambaa no enyim, hyehyɛ ntar fitaa, … [wɔ]dze ndze kɛse tsẽa mu dɛ, Nkwagye nkã hɛn Nyankopɔn.”²²

Ber a wobisaa dɛ: “Woananom nye hɔn a wɔhyehyɛ ntar fitaa yi? na wofi hen?” John nyaa nyiano no: “Woyi nye hɔn a wofi ahohia kɛse no mu no, na wɔahor hɔn ntar wɔ Eguambaa no bɔgyaa mu.”²³

Enuanom na nkyerɛbaa, amandzehu wɔ tsenenee mu no boa wo ma efata hɔn a Nyankopɔn asan mu eyi, kyɛn dɛ ɔda wo edzi fi hɔn ho. Na ɔma hɔn anohoba yɛ w’anohoba. Dɛ ma John paa mu kã no “ɔkɔm renndze [hom] bio, na eso nsukɔm renndze [hom] bio; na eso ewia anaa ɔhyew biara rennkã [hom]. Na Eguambaa no a ɔwɔ ahengua no finimfin no bɛyɛ [hom] guanhwɛfo, na ɔdze [hom] akɔ nkwa nsubura ho: na Nyankopɔn bɛpepa nyinsuwa nyina efi [hom] enyiwa mu.’’²⁴

“Na owu nnyi hɔ bio, na awerɛhow, nye sũ, nye yaw bi nnyi hɔ bio.”²⁵

Megye dase kyerɛ hom dɛ ɔnam Jesus Christ Ne papayɛ a ɔbor ntseasee na No Werdambɔ a onnyiewiei no do no, yebotum eguan efi hɛn honandua mu nkõgu a yɛfata, na abrabɔ mu esian a ɔnnsɛ hɛn no yeedzi do konyim. No kwankyerɛ ase no, wo krɔnkrɔn nkrabea no bɛyɛ kɛse na dɛwdzi nwanwa no, ne nsaso nnyi—dɛwdzi dɛɛdɛw na ɔyɛ soronko ma wo a, wo “nso” bɛyɛ abɔtsir a ɔkyɛn “biribiara a ɔwɔ wiadze.”²⁶ Ama aasɔ enyigye yi sesei ahwɛ na wɔaahyɛ mã afebɔɔ no, moto nsa frɛ wo ma ayɛ dza Alma yɛe no: ma w’adwen ntwe ngyina akyɛdze kɛse a ɔyɛ Nyankopɔn ne Ba dɛ mbrɛ woeyi akyerɛ wɔ N’asɛmpa mu wɔ iyi, No nokwar nye Asɔr tseasefo. Jesus Christ ne dzin mu, amen.