Sie Nsesa no
Ɔnam Jesus Christ do, wɔma hɛn ahoɔdzen ma yɛyɛ nsesã a ɔka kyɛr. Ber a ahobrɛadze mu ara yɛkɔ No hɔ no, Ɔbɛma hɛn ahom enyin dze asesa.
Nkyerɛbaa, ɔyɛ enyigye dɛ menye hom wɔ ha.
Susu obi a ɔrokɔ gua mu akɔtɔ adze bi ho. Sɛ otua kaw ma ɔbor adze no bo do a, sikagyenyi no bɛma no nsesã
Ɔhen Benjamin kyekyerɛɛ no nkorɔfo a wɔwɔ tsetse America wɔ nhyira horow akɛse akɛse a yenya fi hɛn Agyenkwa, Jesus Christ hɔ ho asɛm. Ɔbɔɔ sor, asaase no, nye afɛɛfɛw dze nyina a yɛdze gye hɛn enyi no.1 Ɔnam No dɔ Werdambɔ do no, Ɔma hɛn kwan ma wɔpon hɛn fi bɔn na owu mu.2 Ber a yɛkyerɛ hɛn ndaase ma No na enyiberdo ara yɛdze Ne mbrasɛm bɔ bra no, ntsɛmara ohyira hɛn, a ogya hɛn ma yɛdze Ne kaw daapem.
Ɔma hɛn ma dza no bo a ɔsom no ɔbor do koraa kyɛn dza yebotum dze ahyɛ No ananmu ara da. Ntsi no, ebɛnadze na yebotum dze ama Ɔno a, otua kaw a wonntum nntwa ho bo maa hɛn bɔn? Yebotum asesã hɛn suban dze ama No. Yebotum dze hɛn nsesã ama No. Obotum ayɛ adwen sesã, nsesã wɔ suban mu, anaa nsesã wɔ kwan a yɛrotɔ kɔ no do. Dza hɛn mu kor biara dze bɛhyɛ N’akatua a wonntwa ho bo ananmu ma hɛn bɔn no, Ewuradze serɛ hɛn akoma nsesã. Nsesã a Obisa no fi hɛn hɔ no nnyɛ Ɔnoara ne mfaso, na mbom hɛn dze a. Ntsi no, ɔnntse dɛ adzetɔnyi no a ɔbɛgye nsesã a yɛdze ma no, hɛn Agyenkwa yamuyiefo totɔserɛ hɛn dɛ yɛmma nsesã no nka.
Wotsiei nsɛm a Ɔhen Benjamin kãe no ekyir no, no nkorɔfo tsẽaa mu, paa mu kãa dɛ hɔn akoma asesã dze see dɛ, “Osian Ewuradze Tumfo no Sunsum no a ɔama nsakyer kɛse aba hɛn mu, … no ntsi yennyi pɛ biara bio dɛ yɛbɛyɛ bɔn, na mbom dɛ yɛbɛyɛ papa aber nyina.’’3 Kyerɛwsɛm no nnkã dɛ wobedzii mu amonmu ara, mbom, hɔn pɛ dɛ wɔbɛsesã no ogyaa hɔn ndzeyɛɛ. Hɔn akoma nsesã no kyerɛɛ dɛ wɔbɔpɔr honammunyi no efi hɔ na wɔdze hɔnho ama Sunsum no ber a wɔreper abɛyɛ tse dɛ Jesus Christ ara yie no.
President B. Eyring kyerɛkyerɛ dɛ: “Nokwar nsakyeree gyina erohwehwɛ kwa wɔ gyedzi mu, a mbɔdzembɔ kɛse na yaw bi kã ho. Nkyii ɔyɛ Ewuradze na obotum dze ama … ahotsew na nsesã ho anwanwadze.’’4 Yɛdze hɛn mbɔdzembɔ rekã Agyenkwa no tum a ɔdze bɛsesã hɛn ho no, yɛba bɛyɛ abɔdze fofor.
Mber a nna mo suar no, muhun moho dɛ menam anamɔn kwan bi a ɔkɔ sor, anamɔn kwan tsentsendo kɔ me onnyiewiei abrabɔ botae no. Ber biara a meyɛe anaa mekã biribi bɔn no, nna metse nkã dɛ meretserew esian anamɔn kwan no, a mehyɛ m’akwantu nyina ase bio. Nna ɔtse dɛ mirisi skwɛ do wɔ mbofra hɔn agordzi Mbowatsena na Ntwerba a ɔma etserew fi sor wɔ bɔɔd no do dze wo kɔ agordzi n’ahyɛse no! Nna ɔyɛ abagura! Naaso ber a mehyɛɛ ase dɛ meretse dza Nephi frɛɛ no Christ ne nkyerɛkyerɛ ase no5 na mbrɛ mebesi dze edzi dwuma daa daa wɔ m’abrabɔ mu no, menyaa enyidado.
Jesus Christ ama hɛn daa daa nsesã ho nhwɛdo. Ɔto nsa frɛ hɛn dɛ yɛmfa gyedzi wɔ No mu ndzi dwuma, a okenyan hɛn ma yenu hɛnho—“gyedzi na nnuhu a ɔdze akoma sesã ba.’’6 Ber a yɛsesã na yenu hɛnho na yɛdan hɛn akoma ma No no, yenya pɛ ara yie dze dzi ahyɛmu krɔnkrɔn horow no do na yɛdze bɔ bra. Yɛsɔw dze kodu ewiei ber a yɛkɔ do dze fapem horow yinom bɔ bra wɔ hɛn abrabɔ nyina mu na yɛto nsa frɛ Ewuradze dɛ ɔnsesã hɛn. Erosɔw dze ekodu ewiei n’asekyerɛ nye dɛ eresesã dze ekodu ewiei. Afei na matse ase dɛ merennhyɛ ase bio ɔnam nkõgu biara a midzi, mbom mbɔdzen kor biara a mobɔ no, nna morokɔ do wɔ me nsesã kwan no do.
Nkenyan asɛnsin bi wɔ Young Women ngyina do no mu a ɔkã no pi dɛ, “nnuhu akyɛdze no som me bo na mohwehwɛ dɛ mubotu mpon dabiara.’’7 Mobɔ mpaa dɛ akyɛdze fɛɛfɛw yi bɔsom hɛn bo na dɛ yɛgye hɛn enyim hwehwɛ nsesã. Ɔtɔfabi a nsesã a yehia dɛ yɛyɛ no bata bɔn a ɔyɛ dzen papaapa ho. Mbom ɔtaa dɛ, yɛper dze siesie hɛn suban ma yɛdze hɛnho abata Jesus Christ no su horow no ho. Ebia hɛn daa daa nsanmuyi horow no bɔboa anaa obesiw hɛn kankɔ. Ketseaba, na mbom ɔkɔ do, ngye enyim nsesã bɔboa hɛn ma yeetu mpon. Ma nnya abagura. Nsesã yɛ nkwa nda nyina mu kwan. Meda ase dɛ wɔ hɛn aperdzi dɛ yɛbɛsesã mu no, Ewuradze wɔ hɛn ho abotar.
Ɔnam Jesus Christ do, wɔma hɛn ahoɔdzen ma yɛyɛ nsesã a ɔka kyɛr. Ber a ahobrɛadze mu ara yɛkɔ No hɔ no, Ɔbɛma hɛn ahom enyin dze asesã.
Dza ɔkã hɛn Agyenkwa no Werdambɔ ho nsakyer tum ho no, Sunsum Krɔnkrɔn no bɛgye hɛn abamba na ɔakyerɛ hɛn kwan ber a yɛdze hɛn mbɔdzembɔ hyɛ mu. Obotum mpo aboa hɛn ma yeehu nsesã a yehia dɛ yɛyɛ. Yebotum so edua asɔfodzi nhyira horow, mpaabɔ, akɔnkye, na yɛrokɔ temple do enya mboa na nkuranhyɛ.
Dɛmara so, ebusuafo, baanodzifo, na anyɛnkofo nokwafo botum ayɛ aboafo wɔ hɛn mbɔdzembɔ mu dɛ yɛbɛsesã. Mber a midzii mfe awɔtwe no, nna emi na mo nuabanyin panyin, Lee nye hɛn anyɛnkofo dzi mber dzi agor wɔ fipamfo dua bi no nkorbata mu. Nna hɛn enyi gye bɔmu wɔ hɛn anyɛnkofo kuw no mu wɔ dua no nwin ase. Da kor bi, Lee fi dua no do bɔɔ famu na obuu ne nsamu. Ne nsamu a obui no yɛɛ dzen maa no dɛ ɔnoara bɔfow dua no. Mbom nna onnyi hɔ so a ɔmma dua do agor no annyɛ dɛw. Ntsi no, hɛn mu binom wowɔw no fi ekyir ber a binom so twee ne nsa a oye no, na ɔnnyɛ dzin mma no kɛse biara mma no no, Lee sanee fow dua no. Nna ne nsamu da ho ebu, naaso nna ɔasan abakã hɛn kuw no ho enyigye mu ber a nsa no resã no.
Maadwen mo sũahu a nna midzi agor wɔ dua do no ho mpɛn pii dɛ hɛn dwumadzi wɔ Jesus Christ n’asɛmpa mu no ne saso. Asɛmpa nkorbata no nwin ase no, yenya nhyira horow a ɔbata hɛn ahyɛmudzi horow ho. Ebia binom bɔhwe ase efi hɔn ahyɛmudzi horow ahotɔ ho na wobehia hɛn mboa a hɔnara wɔdze bɛsan afow asɛmpa nkorbata no aba. Obotum ayɛ dzen ama hɔn dɛ hɔnara wɔbɛsan aba. Ana yebotum esuo ha kakra na yɛatwe no sor kakra dze aboa hɔn ma woenya ayarsã ber a hɔn enyi gye hɛn fekuw no?
Sɛ eruhu asehwe bi ho epirekur ho amandzehu a, meserɛ ma binom kwan ma wɔmboa wo ma sankɔ w’ahyɛmudzi na nhyira horow a wɔdze ma no ho. Agyenkwa no botum aboa wo ma aatse apɔw na asesã, ber a hɔn a wɔdɔ wo no etwa woho ehyia.
Ɔto mber bi a mihyia anyɛnkofo a muhun hɔn akyɛr mfe pii mu. Ɔtɔfabi a wɔkã dɛ, “Nnsesã koraa!’’ Mber biara a metse dɛm no, moho mmbaa me, osiandɛ mowɔ enyidado dɛ mber resen no masesã. Mowɔ enyidado dɛ masesã fitsi ndeda. Mowɔ enyidado dɛ maayɛ ayamuyie kakra, mummbuaa atsɛn, na mowɔ ayamuhyehye mbordo. Mowɔ enyidado dɛ megye binom hɔn ehiadze do ntsɛmntsɛm, na mowɔ enyidado dɛ meenya abotar kakra.
M’enyi gye ho dɛ mutu mpasar wɔ mbepɔw a ɔbɛn me fie no mu. Ɔtaa dɛ boba ketseketse bi kɛhyɛ m’asopaatsee no mu ber a merenantsew no. Ewiei no, migyina na mopopo boba no fi m’asopaatse no mu. Mbom ɔyɛ me ahobow wɔ mber tsentsen a mema moho kwan dze pasar wɔ yaw mu ansaana megyina na meyi gyegyefo no efi hɔ.
Ber a yɛnam ahyɛmudzi anamɔn kwan do no, ɔtɔfabi a yɛtase mboba wɔ hɛn asopaatse mu tse dɛ su bɔn, bɔn horow, anaa suban bɔn horow. Ntsɛmara a yɛporow hɔn fi hɛn abrabɔ mu no, mbrɛ hɛn honandua akwantu besi ayɛ dɛwdzi a.
Yɛrema nsesã aka gye mbɔdzembɔ. Munnkotum esusu dɛ merigyina wɔ kwan no do ara na medze boba a ɔyɛ ebufuw na ɔyɛ yaw a miyii no bɛsan ahyɛ m’asopaatse no mu bio. Memmpɛ dɛ mebɛsan ayɛ bio akyɛn dɛ fafranta fɛɛfɛw bi a ɔsan mu yi dɛ ɔbɛsan akɔ n’abon mu.
Megye dase dɛ osian Jesus Christ ntsi, yebotum asesã. Yebotum asesã hɛn su, yɛadan hɛn adwendwen, na yɛatsew hɛn suban ho ma yɛabɛyɛ tse dɛ Ɔno. Yɛdze No mboa no, yebotum ama nsesã no aka. Jesus Christ ne dzin mu, amen.