Wɔasɔ Ahwɛ, Wɔahwehwɛ Mu, na Wɔapɔw Ho
Nhyira kɛsenara koraa a ɔbɛba ber a yɛkyerɛ wɔ hɛn nsɔhwɛ horow ber mu dɛ yeedzi nokwar wɔ hɛn ahyɛmu mu no bɛyɛ hɛn awosu a ɔbɛsesã.
Mo nuanom na nkyerɛbaa, ɔyɛ me enyigye dɛ menye hom kasa ndɛ. Mowɔ enyidado dɛ mebɛma hom nkuranhyɛ ber a ɔyɛ dɛ ma abrabɔ ayɛ dzen na yennyim dza ɔreba no. Hom mu binom, sesei nye dɛm mber no. Sɛ ɔnntse dɛm a, mber a ɔtse dɛm bɛba.
Dɛm no nnyɛ mbususɛm. Ɔbɛba ampara—naaso enyidado wɔ mu—osian Nyankopɔn no botae a Ɔdze Bɔɔ wiadze yi ntsi. Dɛm botae no nye Ɔbɛma Ne mba kwan ma wɔasɔ hɔn ahwɛ na woenya pɛ dɛ wɔbɛsan mu eyi dza oye ber a ɔyɛ dzen no. Wɔreyɛ dɛm no, hɔn su bɛsesã na wobotum abɛyɛ tse dɛ Ɔno ara yie. Nna Onyim dɛ obehia gyedzi a onnhihim wɔ No mu.
Dza minyim no dodowara fi m’ebusua mu. Ber a nna medzi bɛyɛ mfe awɔtwe no, me maame onyansafo no kãa kyerɛ emi na mo nua dɛ yɛnye no ntutu efuw wɔ hen ebusua ture a ɔwɔ mfikyir no mu. Afei, dɛm no bɛyɛ dɛ edwuma a ɔnnyɛ dzen, naaso nna yɛtse New Jersey. Nsu taa tɔ. Clay dɔɔ sõ wɔ dɛtse no mu. Efuw no fifir ntsɛntsɛm kyɛn nduadzewa no.
Mekaa me haw ber a efuw no do tsew wɔ me nsamu a no ndwow no etsim dɛtse no mu dzendzendzen no. Me maame na mo nuabanyin no nna woedzi me kan koraa wɔ hɔn afã noho. Mbɔdzen biara mobɔe no, mekaa ekyir koraa.
“Iyi yɛ dzen dodow!” Musũi tsẽaa mu.
Nkyɛ obohu me mbɔbɔr no, me maame yerɛww n’ano na ɔkãa dɛ, “Oh, Hal, nokwar ɔyɛ dzen. Dɛm na ɔsɛ dɛ ɔyɛ. Abrabɔ yɛ nsɔhwɛ.”
Dɛm ber no mu no, muhun dɛ ne nsɛm no yɛ nokwar na ɔbɔkɔ do ayɛ nokwar wɔ me daakye ber mu.
Siantsir a Maame yɛrɛww n’ano ɔdɔ mu ara no bɛdaa edzi pefee ekyir no a mekenkaan Ɔsor Egya na No Dɔ Ba rekasa fa Hɔn botae a Wɔdze bɔɔ wiadze yi na Wɔmaa sunsum mu mba ɔnnkyebo abrabɔ yi ho kwan no ho asɛm no.
“Na yɛbɔsɔ hɔn ahwɛ, sɛ wɔbɛyɛ ndzɛmba nyinara a Ewuradze hɔn Nyankopɔn bɛhyɛ hɔn ho mbra no;
Na hɔn a wosie hɔn asetsena a odzi kan no wɔdze enyimnyam bi bɛkã hɔn ho, na hɔn a wonnsie hɔn asetsena a odzi kan no nnkenya enyimnyam wɔ dɛm ahenman kor noara mu dɛ hɔn a wosie hɔn asetsena a odzi kan no; na hɔn a wosie hɔn asetsena a otsĩa ebien no wɔdze enyimnyam bogu hɔn etsir do afebɔɔ kesi afebɔɔ.”1
Emi na ɔwo yɛgyee nsato no too mu dɛ wɔbɔsɔ hɛn ahwɛ na yɛakyerɛ dɛ yɛasan mu eyi dɛ yebesie Nyankopɔn ne mbrasɛm ber a yennyi hɛn Ɔsor Egya ne nkyɛn no.
Nsato ɔdɔ mu ara ofii hɛn Ɔsor Egya hɔ mpo no, Lucifer tuu sunsum mu mba no ne nkyɛmu ebiasa mu kor hɔn aso ma wodzii n’ekyir na wɔpoow Egya ne nhyehyɛɛ ma hɛn mpontu na onnyiewiei enyigye. Ɔnam Satan n’etuatsew ntsi, wɔpaam ɔno nye n’edziekyirfo. Sesei ɔbɔ mbɔdzen dɛ, ɔdodow ara a obotum no, ɔma wɔdan fi Nyankopɔn hɔ wɔ ɔnnkyebo abrabɔ yi mu.
Hɛn a yɛgyee nhyehyɛɛ no too mu no yɛɛ dɛm osian hɛn gyedzi wɔ Jesus Christ a Ɔdze Noho bɔɔ afɔr dɛ Ɔbɛyɛ hɛn Agyenkwa na Pomfo ntsi. Otwar dɛ yɛgye dzi dɛ honandua mu mbrɛwyɛ horow biara a yebenya no na ɔbɔnfo no tum biara a obetsia hɛn no, papa no tum no bɔbɔr do korakoraa.
Ɔsor Egya na Jesus Christ nyim wo na Wɔdɔ wo. Wɔpɛ dɛ isan kɔ Hɔn nkyɛn na ibɛyɛ tse dɛ Hɔn. Wo konyimdzi yɛ Hɔn konyimdzi. Atse dɛ Sunsum Krɔnkrɔn no si dɛm dɔ no pi ber a ikenkanee anaa itsee nsɛmfua yinom: “Na hwɛ, iyi nye m’edwuma na m’enyimnyam—dɛ medze nyimpa ne bɛkyebo na onnyiewiei nkwa bɔbɔ adze.”2
Nyankopɔn wɔ tum dɛ Ɔma hɛn kwan mu yɛ mberɛw. Ɔdze manna yɛɛn Israelmba ber a worikyinkyin kɔ anohoba asaase no. Ewuradze No somdwuma wɔ honandua mu no Ɔsãa yarba, nyaan ewufo, na Ɔdwedwee po. No Wusoɛr ekyir no, Obue “hɔn a wɔakyekyer hɔn egu efiadze no hɔn mbobow no.”3
Naaso Nkɔnhyɛnyi Joseph Smith, No nkɔnhyɛfo ekunyin mu baako no, hun amandze wɔ efiadze na wɔkyerɛɛ no adzesuadze a hɛn nyina nya mu mfaso na yehia wɔ hɛn gyedzi no nsɔhwɛ ho a ɔkɔ do ba no mu: “Na sɛ wɔtow wo kyen mona mu, anaa wɔdze wo hyɛ ewudzifo nsa, na wobu wo okumfɔ; sɛ wɔtow wo kyen po bun mu; sɛ po asorɛkye nye wo dzi aper; sɛ ehum dzendzen bɛyɛ wo tamfo; sɛ sor yɛ kebii, na abɔdze-dze nyina bɔ mu siw wo kwan, na iyinom nyina ekyir no, sɛ hɛl ankasa bue n’anomu wɔ wo do a, me babanyin, hu dɛ dɛm ndzɛmba yinom nyina bɛma wo ntɔhunii, na ɔbɛyɛ wo mfaso.”4
Obotum ayɛ wo nwanwa ampaara dɛ Nyame tumfo dɔfo ma kwan ma hɛn honandua mu nsɔhwɛ yɛ dzen dɛm yi. Osiandɛ Onyim dɛ otwar dɛ yenyin wɔ sunsum mu ahotsew na saso a yebotum atsena Ne nkyɛn wɔ ebusua ebusua afebɔɔ mu. Ama dɛm etum aba mu no, Ɔsor Egya maa hɛn Agyenkwa no tum no a yɛdze gyedzi bɛsan mu eyi ama hɛnho dɛ yebesie Ne mbrasɛm no na yenu hɛnho na dɛm ntsi yɛaba No hɔ.
Egya n’enyigye ho nhyehyɛɛ no no botantsim nye dɛ yɛbɛyɛ tse dɛ No Dɔba, Jesus Christ ara yie. Ndzɛmba nyina mu no, Agyenkwa no ne fasusu nye hɛn kwankyerɛ mapã no. Woennyi No emmfi mu dɛ wɔnnkɔsɔ No ahwɛ. Ɔsɔwee maa Ɔsor Egya ne mba nyina, Otuaa hɛn nyina hɛn bɔn ho kaw. Ɔtsee hɔn a wɔaba honanadua mu nye hɔn a wɔbɛba nyina hɔn amandzehu.
Sɛ isusu yaw a ibotum asɔw no yie a, kaa No. Dza inya ho amandze no Ohun ho amandze a Oehu mbrɛ Obesi bepegya wo. Bia orinnyi adzesoa no, mbom Ɔbɛma wo ahoɔdzen, awerɛkyekye, na enyidado. Onyim kwan no. Ɔnoom kuraba wenwen no. Ɔsɔɔw obiara n’amandzehu.
Agyenkwa dɔfo a Onyim mbrɛ Obesi aboa wo wɔ nsɔhwɛ biara a ihyia mu no na Ɔrenyɛn wo na Ɔrekyekye wo werɛ no. Alma kyerɛkyerɛɛ dɛ:
“Na obefir edzi, ɔatse yaw na oehu amandze na obenya nsɔhwɛ ahorow biara bi; na iyi bɛma asɛm no aahyɛ mã, dza ɔkã dɛ, na ɔbɛfa no nkorɔfo hɔn yaw nye yarba ato noho do”
“Nna ɔbɛfa owu ato no do, ama oesiansian owu mpokyerɛ a ɔkyekyer no nkorɔfo no, na ɔbɛfa hɔn mberɛwyɛ ato no do, ama ehumbɔbɔr aahyɛ n’abadaa mã dɛ mbrɛ ɔtse wɔ honam mu, ama ɔnam honam mu eehu mbrɛ obesi aboa no nkorɔfo dɛ mbrɛ hɔn mberɛwyɛ tse no.”5
Kwan kor a Ɔdze bɔboa wo nye Ɔbɔto nsa afrɛ wo ma akaa No aber nyina na aba Ne nkyɛn. Ɔahyɛ hɛn nkuran dɛ:
“Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye.
“Hom mfa mo kɔndua no nto hom do, na hom nsũa me; osiandɛ modwe na mebrɛ moho adze wɔ akoma mu: na hom benya ahomgye ama hom akra.”6
Kwan a yɛfa do dze ba Ne nkyɛn nye yɛmee wɔ Ne nsɛm mu, yɛkyerɛ gyedzi dze kɔ nnuhu mu, yɛsan mu yi dɛ wobonuma hɛn na No somfo a wɔama no tumdzi no si hɛn pi, na nkyii yesie ahyɛmudzi a yɛnye Nyankopɔn ayɛ no. Ɔsoma Sunsum Krɔnkrɔn no ma ɔyɛ wo damfo, ɔma awerɛkyekyer, na kwankyerɛ.
Ber a ibɔ bra a ɔfata Sunsum Krɔnkrɔn akyɛdze no, Ewuradze bekyerɛ kwan dwudwoodwo ber mpo a nnhu kwan mu no. Emi no, Ɔataa akyerɛ me anamɔn a odzi do anaa ebien a muntu. Ɔnntɔ kã dɛ Ɔbɛma mehu ndaamba ekyirekyir, naaso kakra ara muhu no ma me kwankyerɛ wɔ dza mesan mu yi wɔ daa daa abrabɔ mu.
Ewuradze kyerɛkyerɛɛ mu dɛ:
“Aber yi mu hom nnkotum dze hom honam enyiwa ehu ɔfa dɛm ndzɛmba soronko a ɔbɛba ekyir a hom Nyankopɔn ahyehyɛ, nye enyimnyam a odzi abɛbrɛsɛ kɛse ekyir.
“Osiandɛ abɛbrɛsɛ kɛse ekyir na nhyira ba.”7
Nhyira kɛsenara koraa a ɔbɛba ber a yɛkyerɛ wɔ hɛn nsɔhwɛ horow ber mu dɛ yeedzi nokwar wɔ hɛn ahyɛmu mu no bɛyɛ hɛn awosu a ɔbɛsesã. Yɛsan mu yi dɛ yebesie hɛn ahyɛmudzi no, Jesus Christ no tum na No Werdambɔ mu nhyira horow no botum ayɛ edwuma wɔ hɛn mu. Hɛn akoma botum agow ma yɛadɔ, dze bɔn akyɛ, na yɛato nsa afrɛ binom ma wɔaba Agyenkwa ne nkyɛn. Hɛn awerɛhyɛmu wɔ Ewuradze mu no nyin. Hɛn suro brɛ adze.
Afei, dɛm nhyira horow mpo a wɔabɔ ho anohoba a ofi abɛbrɛsɛ mu ba no, yɛnnhwehwɛ abɛbrɛsɛ. Ɔnnkyebo asetsena yi mu no, yebenya akwan horow a wɔdze bɔsɔ hɛn ahwɛ, dze edzi nsɔhwɛ dzendzen birara do konyim a ɔbɛma yɛayɛ dɛ Agyenkwa no na hɛn Ɔsor Egya ara yie.
Dza ɔkã ho no, otwar dɛ yehu binom a wɔwɔ ahokyer mu na yɛbɔ mbɔdzen dɛ yɛbɔboa. Dɛm no bɛyɛ dzen ara yie ber a hɛnankasa yegyina hɛn nsɔhwɛ dzendzenndzen mu. Naaso yebohu dɛ ber a yɛma kor n’adzesoadze do no, kakra ara mpo a, hɛn ekyir nya ahoɔdzen na yenya kan bi wɔ sum mu.
Iyi mu no, Ewuradze nye hɛn Fasusu. Ɔsɛɛn mbeamudua do wɔ Golgotha no, Oedzi kan atse yaw kɛse a nkyɛ Ɔnnyɛ Nyankopɔn Ne Ba a Ɔwoo no Kortonoo no a nkyɛ Owui no, Ɔhwɛɛ N’ekumfo no na Ɔsee N’Egya dɛ, “Fa kyɛ hɔn, na wonnyim dza wɔreyɛ.”8 Ber a Oruhu amandze ama hɔn nyina a wɔbɛtsena nkwa mu no, Ɔhwɛɛ, John fi mbeamudua no do na Nankasa ne nã a oridzi awerɛhow na Ɔsoom no wɔ no nsɔhwɛ ber mu:
“Na Jesus hun ne nã nye osuanyi a ɔdɔ no no dɛ ogyina hɔ no, ɔsee ne nã dɛ, Ɔbaa, hwɛ wo ba nye yi!
“Na ɔsee osuanyi no dɛ, Hwɛ, wo nã nye yi! Na ofitsi dɔn no ara mu na osuanyi no faa no kɔr nankasa ne fie.”9
Ne ndzeyɛɛ wɔ dɛm da krɔnkrɔn no mu no, Nankasa gyaa No nkwa mu kwa ma hɛn mu kor biara, a Ɔrema mboa, nnyɛ wɔ abrabɔ yi nko mu, mbom onnyiewiei nkwa wɔ mber a ɔreba no mu.
Mehu nkorɔfo a woegyina ayɛ ndzɛmba nwanwa ber a woridzi nokwar wɔ nsɔhwɛ yaayaw mu. Mfatoho pii wɔ Asɔr ne nyina mu ndɛ. Abɛbrɛsɛ gya nkorɔfo ma wɔkɔ hɔn nkotodwe enyim. Ɔnam hɔn nokwardzi a wɔdze tsim kodu ewiei na hɔn mbɔdzembɔ do, wɔbɛyɛ tse dɛ Agyenkwa no na hɛn Ɔsor Egya ara yie.
Musũaa adzesuadze kor so fii me nã hɔ. Ɔyɛ basiaba kakraba no onyaa kɔmɛr mu yarba bɔn ma ɔka kakra ma oewu. Ekyir no onyaa ntsin na adwen mu yarba. N’egya wui wɔ ne mberantsɛber mu, ntsi me maame na no nuanom mbanyin no boaa hɔn maame.
N’abrabɔ nyina mu no, ɔtsee yarba no nsɔhwɛ ho nsunsuando. Mfe 10 a odzi n’abrabɔ ewiei no, wɔyɛɛ no ɔperhian pii. Naaso ne nyina mu no, ɔkãa mpa mu mpo no, ɔkyerɛɛ no nokwardzi ma Ewuradze. Mekaa dɛ nna mfonyin kor pɛr a ɔbɔ ne pia mu afasu no ho nye Agyenkwa dze no. N’asɛm a odzi ekyir a ɔkãa kyerɛ me wɔ no wu mpa do nye “Hal wo ndze yɛ dɛ ma awɔw reyɛ adze wo. Ɔwɔ dɛ ehwɛ woho do yie.”
No funsie som no Elder Spencer W. Kimball na odzii ekyir kasae. Ɔkãa biribi kakra faa no nsɔhwɛ na no nokwardzi ho no, ɔkãa iyi tsitsir ara: “Ɔbɛyɛ hom mu binom nwanwa saintsir a Mildred wɔdɛ ohu amandze kɛse na mber tsentsen dɛm. Mebɛkã hom siantsir no. Nna osiandɛ Ewuradze pɛ dɛ Ɔpɔw noho krakra kã ho.”
Mekyerɛ m’enyisɔ ma Jesus Christ N’Asɔrmba anokwafo pii a wɔdze gyedzi a onnhihim soa hɔn adzesoa nye hɔn a wɔboa binom ma wɔsoa hɔn dze ber a Ewuradze hwehwɛ Apɔw hɔnho kakra akã ho no. Mekyerɛ modɔ na enyigye ma hɔn a wɔhwɛ binom na baanodzifo a wɔwɔ wiadze nyina mu a wɔsom binom ber a hɔn nye hɔn ebusua ebusua sɔw mpɔwho a ɔtse dɛm.
Megye dase dɛ yɛyɛ Ɔsor Egya a Ɔdɔ hɛn no ne mba, Metse President Russell M. Nelson no dɔ a ɔwɔ ma hɛn nyina no. Ɔno nye Ewuradze no nkɔnhyɛnyi wɔ wiadze no mu ndɛ. Megye ho dase wɔ Ewuradze Jesus Christ ne dzin krɔnkrɔn no mu, amen.